iMatai ni iVola Vei Ira mai Korinia

11 Moni vakatotomuri au, me vaka ga na noqu vakatotomuri Karisito.+

2 Au vakacaucautaki kemuni ni oni dau nanumi au ena ka kece ga, oni qai dei ena ivakavuvuli kece au a vakadewataka vei kemuni. 3 Ia au vinakata moni kila ni ulu ni tagane yadua o Karisito,+ e ulu ni yalewa na tagane,+ e ulu i Karisito na Kalou.+ 4 Na tagane yadua e masu se parofisai qai ubia na uluna, e sega ni doka na uluna, 5 ia na yalewa yadua e masu se parofisai+ qai sega ni ubia na uluna e sega ni doka na uluna, e tautauvata sara ga kei na yalewa e tasivori. 6 Ke sega ni ubi koya na yalewa, me koti vakalekaleka, ia ke ka vakamadua vua me koti vakalekaleka se tasivori, me ubi koya.

7 E sega ni dodonu me ubia na uluna na tagane, ni iyaloyalo ni Kalou o koya,+ e nona iukuuku tale ga, ia na yalewa e iukuuku i tagane. 8 Ni o tagane e sega ni buli mai na yalewa, o yalewa ga e buli mai na tagane,+ 9 kena ikuri, e sega ni buli na tagane ena vuku i yalewa, o yalewa ga e buli ena vuku i tagane.+ 10 Oya na vuna me tiko kina e ulu i yalewa na ivakatakilakila ni nona vakamalumalumutaki koya ena vukudra na agilosi.+

11 O koya gona, vei ira na tisaipeli ni Turaga, ena sega ni bula na yalewa ke sega na tagane, ena sega tale ga ni bula na tagane ke sega na yalewa. 12 A buli o yalewa mai na tagane,+ e basika tale ga na tagane mai na yalewa, ia na ka kece e bulia na Kalou.+ 13 Ni lewa mada mai: Vakacava e dodonu vua na yalewa me masu vua na Kalou qai sega ni ubia na uluna? 14 Vakacava, e kena ivakarau vei kemuni me maduataka na tagane ni balavu na drauniuluna? 15 Ia ke balavu na drauniulu i yalewa, e kena iukuuku ga, se vaevei? Ni sega ni soli vua na iubi ni ulu, na drauniuluna ga. 16 Ia ke dua e via veiletitaka me muria eso tale na ivakarau, e sega ni tiko e dua tale na ivakarau, e sega tale mada ga ena ivavakoso ni Kalou.

17 Ena noqu ivakasala qo, au sega ni vakacaucautaki kemuni, baleta ni dodonu me yaga na nomuni soqoni vata, ia sa mai vakavu leqa tale. 18 Kena imatai, au rogoca ni oni mai soqoni ena ivavakoso, oni sa duiyaloyalo tiko, au via vakabauta toka na ka au rogoca qori. 19 E macala kina vei au ni sa vakavuna qo moni dui toto* kina,+ ia ena qai laurai ga mai o ira e vakadonuya na Kalou.

20 Ni oni mai soqoni vata ena dua na vanua, sa sega ni yaga na nomuni kania na iVakayakavi ni Turaga.+ 21 Ena gauna me vakayacori kina na kana, oni dui kania rawa e liu na kemuni ivakayakavi, eso gona era viakana, eso tale era mateni. 22 Sa sega na nomuni vale moni kana mai kina, moni gunu mai kina? Se oni beca na ivavakoso ni Kalou, oni qai via vakamaduataki ira na ligalala? Na cava meu kaya vei kemuni? Meu vakacaucautaki kemuni? Au sega sara ga ni vakacaucautaki kemuni ena ka qo.

23 Ni vakadewataka vei au na Turaga na ka au vakaraitaka tale ga vei kemuni, oya ni bogi+ me soli yani kina na Turaga o Jisu, a taura mada e dua na madrai, 24 oti e vakavinavinakataka, e tikica, qai kaya: “Qo e vakaibalebaletaka na yagoqu+ e soli ena vukumudou. Dou cakava tiko ga qo mo dou vakananumi au kina.”+ 25 E cakava tale ga qo ena bilo,+ ni ratou sa vakayagataka oti na ivakayakavi, e qai kaya: “Na bilo qo e vakaibalebaletaka na veiyalayalati vou+ e vakadeitaki ena noqu dra.+ Dou cakava tiko ga qo ena gauna kece dou gunu kina, mo dou vakananumi au kina.”+ 26 Ena gauna kece oni kania kina na madrai qo, oni gunuva na bilo qo, oni sa vakatakila tiko kina na mate ni Turaga me yacova nona lako mai.

27 O koya gona, o koya yadua e kania na madrai se gunuva na bilo ni Turaga ena veibeci sa cala ena ka e baleta na yago kei na dra ni Turaga. 28 Me dikevi koya mada e liu+ e dua ni bera ni kania na madrai se gunuva na bilo. 29 Ni o koya e kana qai gunu, ena lewai ena nona kana kei na nona gunu ke sega ni kila na ibalebale ni yago. 30 Oya na vuna era malumalumu ra qai tauvimate kina e levu vei kemuni, e levu era sa mate*+ sara. 31 Ia ke da dikevi keda vinaka, eda na sega ni lewai. 32 Ena gauna eda lewai kina, e vakadodonutaki keda o Jiova*+ meda kua ni totogitaki vata kina kei vuravura.+ 33 O koya gona, kemuni na taciqu, ni oni soqoni vata mai moni vakayagataka na ivakayakavi qo, ni veiwaraki. 34 Ke dua e viakana, me kana ga mai nona vale, moni kua kina ni lewai ena nomuni soqoni vata.+ Na vo ni ka me caka au na qai lai vakadodonutaka niu yaco yani.