iMatai ni Tui

16 E tukuna o Jiova vei Jeu+ na luvei Ananai+ na itotogi ena tau vei Pasa, e kaya: 2 “Au a kauti iko cake mai na kuvuniqele meu lesi iko mo liutaki ira na noqu tamata na Isireli,+ ia o muria tiko ga na ivalavala i Jerepoami, o qai vakavuna mera valavala ca na noqu tamata na Isireli nira vakacudrui au ena nodra ivalavala ca.+ 3 Au na taviraki Pasa laivi kei na nona vuvale, au na cakava na nona vuvale me vaka na vuvale i Jerepoami+ na luvei Nipati. 4 O koya e nei Pasa e mate ena koro ena kani koya na koli, kei na nona e mate e veikau ena kani koya na manumanuvuka ni lomalagi.”

5 Na vo ni itukutuku me baleti Pasa, na ka e cakava kei na nona kaukaua, e volai ena ivola ni itukutuku ni nodra gauna na tui Isireli? 6 Sa qai davo vata kei ira na tukana o Pasa, e bulu ga e Tirisa,+ e tui sara o Ela na luvena tagane me sosomitaki koya. 7 E vosa tale o Jiova vei Jeu na parofita na luvei Ananai me baleti Pasa kei na nona vuvale ena ka ca kece e cakava ena mata i Jiova, ni vakacudrui koya ena ka e cakava e ligana me vaka na vuvale i Jerepoami, ni mokuti koya* tale ga.+

8 Ena ika26 ni yabaki i Tui Esa e Juta, e tui Isireli mai Tirisa o Ela na luvei Pasa me rua na yabaki. 9 E bukiveretaki koya na nona dauveiqaravi o Simirai, e lewa e veimama na nona qiqinivalu ena gauna e tiko kina mai Tirisa ni gunu tiko qai mateni ena vale i Erisa, o koya e lewa na nona vuvale mai Tirisa. 10 E lako yani o Simirai, e mokuti koya+ me vakamatea ena ika27 ni yabaki i Tui Esa e Juta, e tui sara me sosomitaki koya. 11 Ena gauna ga e tui kina, ni dabe ga ena nona idabedabe vakatui, e mokuti ira sara na vuvale kece i Pasa. E sega ni vakavoca vua e dua na tagane,* o ira na wekana* se o ira na nona itokani. 12 E mani vakawabokotaka o Simirai na vuvale taucoko i Pasa, me vaka na vosa i Jiova e vosataki Pasa kina e gusu i Jeu na parofita.+ 13 Ena vuku ni ivalavala ca kece erau cakava o Pasa kei na luvena o Ela, kei na valavala ca erau vakavuna mera vakayacora na Isireli nira vakacudrui Jiova na Kalou ni Isireli ena nodra matakau tawayaga.+ 14 Na vo ni itukutuku me baleti Ela, na ka kece e cakava, e volai ena ivola ni itukutuku ni nodra gauna na tui Isireli?

15 Ena ika27 ni yabaki i Tui Esa e Juta, e tui e Tirisa o Simirai me vitu na siga, nira keba tiko na sotia mera valuti Kipiconi+ ena nodra vanua na kai Filisitia. 16 Sa dede toka ra qai rogoca na sotia era keba tiko ni tukuni: “Sa bukivere o Simirai, sa mokuta tale ga na tui.” Era mani buli Omirai+ na iliuliu ni mataivalu ena siga oya o ira kece na Isireli ena keba me nodra tui na Isireli. 17 Sa qai biuti Kipiconi o Omirai kei ira kece na Isireli era tiko vata kei koya mera lako cake mera viribaiti Tirisa. 18 Ni raica ga o Simirai ni sa vakavuai na koro, e lako sara ina valececere vakabai ena nona vale na tui qai vakama na vale ni a tiko e loma, mani mate.+ 19 Ena vuku ni nona ivalavala ca e vakayacora ni caka ca ena mata i Jiova, ni muria na ivalavala i Jerepoami kei na ivalavala ca e vakavuna mera valavala ca kina na Isireli.+ 20 Na vo ni itukutuku me baleti Simirai kei na nona bukivere, e volai ena ivola ni itukutuku ni nodra gauna na tui Isireli?

21 Qori na gauna era waserua kina na Isireli. E dua na iwase era muri Tipini na luvena tagane o Kinaci, era vinakata mera buli koya me tui, e dua tale na iwase era muri Omirai. 22 Ia o ira na muri Omirai era vakamalumalumutaki ira na muri Tipini na luvei Kinaci. Sa qai mate o Tipini, e tui sara o Omirai.

23 Ena ika31 ni yabaki i Tui Esa e Juta, sa qai tui Isireli o Omirai, e veiliutaki me 12 na yabaki. E veiliutaki e Tirisa me ono na yabaki. 24 E volia vei Semeri na ulunivanua o Samaria ena rua na taledi* na siliva, e tara sara na koro ena ulunivanua. E vakayacana na koro e tara me o Samaria,*+ e vakayacana vei Semeri na itaukei* ni ulunivanua. 25 E cakava tiko ga o Omirai na ka ca ena mata i Jiova, e ca sara vei ira kece na liu vua.+ 26 E muria na ivalavala kece i Jerepoami na luvei Nipati kei na ivalavala ca e vakavuna mera valavala ca kina na Isireli nira vakacudrui Jiova na Kalou ni Isireli ena nodra matakau tawayaga.+ 27 Na vo ni itukutuku me baleti Omirai, na ka e cakava kei na nona kaukaua, e volai ena ivola ni itukutuku ni nodra gauna na tui Isireli? 28 Sa qai davo vata kei ira na tukana o Omirai, e bulu ga e Samaria, e tui sara o Eapi+ na luvena tagane me sosomitaki koya.

29 E tui Isireli o Eapi na luvei Omirai ena ika38 ni yabaki i Tui Esa e Juta, e veiliutaki tiko ga o Eapi na luvei Omirai e Isireli mai Samaria+ me 22 na yabaki. 30 E ca sara ena mata i Jiova o Eapi na luvei Omirai vei ira kece na liu vua.+ 31 E vaka me sega ni dua tu na ka vua na nona muria na ivalavala ca i Jerepoami+ na luvei Nipati, e vakawatitaki Jesepeli+ tale ga na luvena yalewa o Ecipeali na tui Saitoni,+ qai qaravi Peali+ me tekicuva vua. 32 E vakaduria tale ga e dua na icabocabonisoro vei Peali+ ena vale* i Peali e tara e Samaria. 33 E cakava tale ga o Eapi na duru ni sokalou.*+ E levu na ka e cakava o Eapi me vakacudrui Jiova kina na Kalou ni Isireli ni vakatauvatani kei ira kece na tui Isireli era liu vua.

34 Ena nona gauna, e tarai Jeriko tale o Aieli na kai Peceli. Ni vakadavora na kena yavu e mate o Epairami na nona ulumatua, ni cobara na kena katuba e mate na nona itini o Sikupi me vaka na vosa i Jiova e cavuta o Josua na luvei Nuni.+