Nodra Cakacaka na Yapositolo

20 Ni oti na maue, e kacivi ira na tisaipeli o Paula me vakayaloqaqataki ira, me vakamoce tale ga vei ira. Oti sa qai gole i Masitonia. 2 Ni oti nona lakova na yasayasa qori kei na nona vakayaloqaqataki ira na tisaipeli ena yasayasa kece ya, e yaco sara yani i Kirisi. 3 E vula tolu e kea. Ni siqema nira via nakicataki koya na Jiu+ ni vakarau soko tiko i Siria, e veisau na lomana me muri lesu i Masitonia. 4 Eratou tomani koya o Sopatero na luvei Piresi mai Peria, o Arisitako+ kei Sekudu mai Cesalonaika, o Keio mai Tapi, o Timoci,+ kei rau o Tikiko+ kei Tirofimo+ mai na yasana o Esia. 5 Eratou liu na ilala qo me ratou lai waraki keirau mai Tiroa. 6 Ia ni sa oti na siga ni Madrai* Sega ni Vakaleveni+ keirau sa qai biuti Filipai me keirau soko i Tiroa, oti e lima na siga keirau sa qai yaco yani. Keirau tiko e kea me vitu na siga.

7 Ena imatai ni siga ni macawa ni keimami soqoni vata me keimami kana, e qai vunau vei ira o Paula ni sa na biubiu ena siga tarava. E balavu nona vosa vei ira ni yacova sara na lomalomanibogi. 8 E vica toka na cina ena rumu ni vale e cake keimami soqoni tiko kina. 9 E dabe volekata tiko na katubaleka e dua na cauravou na yacana o Utiko ena gauna e vunau voli kina o Paula. E lutu sara na nona moce mani lutu mai na ikatolu ni tabavale, nira lai keveti koya sa mate tu. 10 E lako sobu ina tabavale e ra o Paula, e davoci koya, mokota,+ qai kaya: “Ni kua ni maue, sa bula tale o koya.”+ 11 E cabe tale o Paula ina tabavale e cake, e tikitikica na madrai qai kana. Era veivosaki tale tiko me yacova na kida ni mataka, oti sa qai biubiu. 12 Era mani kauta lesu na cauravou ni sa bula, qai sega ni tukuni rawa nodra lomavakacegu.

13 Keitou mani liu i waqa keitou soko sara i Aso. E vinakata o Paula me keitou na lai vakavodoki koya e kea ni a via taubale ga. 14 Ni yaco yani i Aso o Paula keitou vakavodoki koya, keitou soko sara i Mitilini. 15 Keitou biubiu mai kea ena siga tarava keitou yaco sara yani ena tai adua i Kio. Ena siga adua keitou kele vakalekaleka e Samo, qai yaco yani i Milito ni oti e dua na siga. 16 E vinakata o Paula me soko siviti Efeso+ me kua kina ni dede ena yasana o Esia, ni vakatotolo tiko i Jerusalemi+ me rawa ni donuya na siga ni Soqo ni Penitiko.

17 Ia mai Milito e talatala i Efeso mera lako mai na qase ni ivavakoso. 18 Nira yaco yani vua, e qai kaya vei ira: “Oni kila vinaka na imatai ni siga au butuka kina na yasana o Esia, au a tiko ga vei kemuni ena gauna kece qori,+ 19 au qarava na Turaga ena yalomalumalumu+ salavata kei na wainimata, kei na veika rarawa au sotava nira nakicataki au na Jiu. 20 Au sega ni vunia vei kemuni e dua na ka ena yaga vei kemuni, se meu sega ni vakavulici kemuni e matanalevu+ kei na cakacaka vakavunau e veivale.+ 21 Au a vunautaka sara vakavinaka vei ira na Jiu kei ira na kai Kirisi ni dodonu mera veivutuni+ vua na Kalou, mera vakabauta tale ga na noda Turaga o Jisu.+ 22 Raica! au sa lako tiko qo i Jerusalemi ena veidusimaki ni yalo tabu, au sega ni kila na ka ena yacovi au mai kea, 23 ia ena veikoro, e dau tukuna vei au na yalo tabu ni sa waraki au tu na valeniveivesu kei na veivakararawataki.+ 24 E sega ni dua na ka vei au na noqu bula, e bibi ga meu vakaotia na noqu itavi+ kei na cakacaka vakaitalatala e lesi au kina na Turaga o Jisu, oya meu vunautaka vakavinaka sara na itukutuku vinaka ni loloma soli wale ni Kalou.

25 “Ia qo au kila ni oni na sega ni raici au tale o kemuni kece au vunautaka vei kemuni na Matanitu. 26 Au kacivi kemuni kina nikua ni o kemuni ga oni na vakadinadinataka niu sa galala mai na nodra dra na tamata kece ga,+ 27 niu a tukuna kece vei kemuni na ivakaro ni Kalou, e sega ni dua na ka au vunia.+ 28 Ni qarauni kemuni+ kei na qelenisipi e lesi kemuni kina na yalo tabu moni kena ovasia,+ ni karona na ivavakoso ni Kalou+ e volia sara ga ena dra i Luvena.+ 29 Au kila niu sa na lako era na curu mai ena kemuni maliwa eso na olifa dau veivakasaurarataki+ era na sega ni lomana na qelenisipi. 30 Eso sara mada ga vei kemuni era na vakatanitaka na ivakavuvuli dina mera vakacalai ira kina na tisaipeli mera muri ira.+

31 “O koya gona moni yadra tiko, moni nanuma vinaka ni tolu na yabaki,+ na siga kei na bogi, au sega ni cegu na vakasalataki kemuni yadua, lakovata kei na wainimata. 32 Ia qo au sa tataunaki kemuni vua na Kalou, kei na loloma soli wale e cavuti ena nona vosa, nona vosa qo ena vakayaloqaqataki kemuni qai solia vei kemuni na nomuni ivotavota ena kedra maliwa na yalosavasava.+ 33 Au sega ni kocova na nona siliva se nona koula se nona isulu e dua.+ 34 Oni kila vinaka ni liga qo au vakarautaka kina na ka meu bula kina+ kei ira na tiko vata kei au. 35 Au sa vakaraitaka vei kemuni ena ka kece ga ni dodonu moni cakacaka vakaukaua+ moni vukei ira kina na malumalumu, moni nanuma tale ga na vosa ni Turaga o Jisu ni a kaya sara ga: ‘E marau vakalevu o koya e solia na ka,+ vakalailai o koya e taura na ka.’”

36 Ni tukuna oti na veika qo, e tekiduru vata kei ira kece qai masu. 37 Era veitagicaki kece, era mokoti Paula* ra qai reguci koya. 38 E mositi ira vakalevu na vosa i Paula ni kaya nira na sega ni raici koya tale.+ Era mani lai talaci koya i waqa.