iKarua ni iVola Vei Ira mai Korinica

8 Raveitacini, keitou vinakata moni kila na loloma soli wale ni Kalou ina ivavakoso era tu e Masitonia.+ 2 Nira vakatovolei vakaca ena ka rarawa era sotava, era marau vakalevu ra qai dravudravua, ia e vuabale na nodra lomasavu. 3 Au rawa ni vakadeitaka vei kemuni ni ka era cakava e sa levu sara ga+ ni vakatauvatani kei na ka era rawata.+ 4 Era vakamasuti keitou tiko ga mera bau vakaitavi ena soli ka ni veivuke, ena nodra vukei na yalosavasava.+ 5 Keitou a sega ni namaka na levu ni ka era cakava, taumada ena nodra soli ira vua na Turaga, era soli ira tale ga vei keitou me salavata kei na loma ni Kalou. 6 Keitou mani uqeti Taito+ me vakacavara sara na kumuni ni nomuni iloloma me vaka ni a tekivuna vei kemuni. 7 Ia ni levu vei kemuni na ka kece, na vakabauta, na vosa, na kila, na gumatua, kei na neitou loloma vei kemuni, moni vakaitavi tale ga vakalevu ena soli iloloma qo.+

8 E sega ni ivakaro qo, ia au vosa tiko ena vuku ni nodra gumatua eso, me vakatovolei tale ga kina na dina ni nomuni loloma. 9 Oni kila vinaka na loloma soli wale ni noda Turaga o Jisu Karisito, e vutuniyau ia e qai dravudravua ena vukumuni,+ moni vutuniyau kina ena nona dravudravua.

10 Au via vakaraitaka kina na noqu nanuma:+ Qo ena yaga vei kemuni, ni dua na yabaki sa oti oni a sega ni tekivuna wale ga, oni taleitaka sara ga moni cakava. 11 Ia qo, ni vakaotia sara na ka oni sa tekivuna. Me vaka ni a gu na yalomuni moni cakava, ni vakaotia tale ga me salavata kei na ka e tu vei kemuni. 12 E ciqomi vakalevu ga na ka e soli ena yalo e vinakata. E namaki vua e dua me solia ga na ka e tu vua,+ e sega ni namaki me solia na ka e sega vua. 13 E sega ni kena ibalebale ya me mamada vei ira eso qai tarabi vei kemuni, 14 me tautauvata ga, na ka e levu vei kemuni ena gauna qo, ni solia vei ira e lailai vei ira na ka, ia na ka e levu vei ira mera solia vei kemuni me vakalevutaka na ka e lailai vei kemuni, me tautauvata kina. 15 Me vaka e volai: “O koya e levu vua na ka me kua ni sivia tale na ka e tu vua, o koya e lailai vua na ka, me kua ni lailai sara na ka e tu vua.”+

16 Me vakavinavinakataki na Kalou ni uqeta na loma i Taito+ me kauaitaki kemuni vakalevu me vaka ga na neitou kauaitaki kemuni, 17 ni muria o koya na veivakauqeti, ia na nona veikauaitaki e lako tiko yani vei kemuni ena nona sasaga sara ga. 18 Ia keitou tala yani me tomani koya na tacida e dau vakacaucautaki vakalevu ena ivavakoso kece ena vunautaki ni itukutuku vinaka. 19 Sega ni o koya ga ya, e lesi koya tale ga na ivavakoso me veitomani ena ilakolako ni kau iloloma qo me lai votai, me vakacaucautaki kina na Turaga, me ivakadinadina tale ga ni neitou dau tu vakarau me keitou veivuke. 20 O koya gona, keitou sega ni vinakata me dua e beitaki keitou ena ka e vauca na iloloma levu keitou na lai vota.+ 21 Keitou ‘qarauna me keitou dina ena mata i Jiova* ena ka kece, ena matadra tale ga na tamata.’+

22 Kena ikuri, keitou talai rau yani kei na tacida keitou sa vakadinadinataka ni dau gugumatua, sa qai gumatua ga ni dau nuitaki kemuni vakalevu. 23 Ia ke dua e qaqai Taito, e noqu itokani o koya, keirau cakacaka vata tale ga ena nomuni qaravi, ke dua e qaqai rau na veitacini, o rau qo erau yapositolo ni ivavakoso, erau dau vakalagilagi Karisito. 24 O koya gona, ni vakaraitaka vei ratou na nomuni loloma dina+ kei na ka keitou dau sakitaki kemuni kina, mera raica na ivavakoso kece.