Vakatakila e Vola o Joni

16 Au qai rogoca e dua na domolevu mai na tikina tabu+ sara ni kaya vei ratou na vitu na agilosi: “Dou lako, dou sova i vuravura na vitu na boulu ni cudru ni Kalou.”+

2 E lako sara na kena imatai qai sova na nona boulu i vuravura.+ E tauvi ira na tamata na vidikoso rerevaki,+ o ira e tiko vei ira na ivakatakilakila ni manumanu kila+ ra qai qarava tiko na kena ivakatakarakara.+

3 E sova tale ga na kena ikarua na nona boulu i wasawasa.+ E vuki sara na wasawasa me vaka na dra+ ni tamata mate, era mate kina na kabula kece, io na ka era tu e wasawasa.+

4 E sova na kena ikatolu na nona boulu ina veiuciwai kei na ivurevure ni wai.+ Era qai vuki me dra.+ 5 Au rogoca sara ni kaya na agilosi e lewa na wai: “Kemuni na Kalou oni bula tiko, oni a bula e liu,+ oni yalodina,+ oni yalododonu ni oni lewa na ka kece qo,+ 6 nira vakadavea na nodra dra na yalosavasava kei na nodra dra na parofita,+ oni qai solia vei ira na dra mera gunuva.+ Sa rauti ira vinaka.”+ 7 Au rogoca ni kaya na icabocabonisoro: “Io, Jiova* na Kalou, na Kalou Kaukaua Duadua,+ e dina qai dodonu na nomuni lewa.”+

8 E sova na kena ikava na nona boulu ina matanisiga,+ e soli ina matanisiga na lewa me vakamai ira na tamata ena bukawaqa. 9 Era kama na tamata ena katakata levu, ra qai vosabeca na yaca ni Kalou, o koya e lewa na ka rarawa kece qo, ia era sega ni veivutuni mera vakalagilagi koya.

10 E sova na kena ikalima na nona boulu ina idabedabe vakaturaga ni manumanu kila. E butobuto na nona matanitu,+ ra qai katia na yamedra ena levu ni nodra rarawa, 11 era vosabeca na Kalou ni lomalagi ena nodra rarawa kei na nodra vidikoso, ia era sega ni veivutunitaka na ka era cakava.

12 E sova na kena ikaono na nona boulu ina uciwai levu na Uferetisi,+ e maca vakadua na kena wai,+ me vakarautaki kina na nodra sala na tui+ mai na icabecabe ni siga.*

13 Au qai raica e tolu na vosa dukadukali* eratou vaka na irairai ni boto ni ratou lako mai na gusu ni gata levu,+ mai na gusu ni manumanu kila, kei na gusu ni parofita lasu. 14 Eratou vosa uqeti dina ni timoni ratou qai cakamana,+ eratou lako yani vei ira na tui kei vuravura, me ratou vakasoqoni ira ina ivalu+ ni siga levu ni Kalou Kaukaua Duadua.+

15 “Raica! Au na lako yani me vaka na daubutako.+ E marau o koya e yadra tiko,+ e dara tiko na nona isulu e sau, de lako luvawale voli ra qai raica na tamata na nona vakamaduataki.”+

16 Eratou qai vakasoqoni ira ina vanua e vakatokai ena vosa vakaIperiu o Amaketoni.*+

17 E sova na kena ikavitu na nona boulu ina cagi. E qai rogo mai ena rumu tabu+ sara ena idabedabe vakaturaga e dua na domolevu e kaya: “E sa oti!” 18 E veitibiyaki na liva, e rogo mai eso na domo, e vavadugudugu na kurukuru, e yaco e dua na uneune vakaitamera e sega ni bau vakilai me tekivu mai na gauna e tawani vuravura kina na tamata,+ e uneune kaukaua dina! 19 E kavida tolu na koro levu oya,+ era bale tale ga na koro ni veimatanitu, e qai nanumi Papiloni na Ka Levu+ na Kalou, me solia vua na bilo ni waini ni nona cudru waqawaqa.+ 20 Era dui dro na veiyanuyanu, era yali na veiulunivanua.+ 21 Era lulutu mai lomalagi na ucaqereqere rerevaki e dua na taledi* na kedra bibi, e lutuki ira na tamata,+ era qai vosabeca na Kalou ena vuku ni ucaqereqere,+ ni vakacaca sara ga vakalevu.