Vunau ni Soro

17 E kaya tale vei Mosese o Jiova: 2 “Vosa vei Eroni, o iratou na luvena tagane, kei ira kece na Isireli, qai kaya vei ira, ‘Qo na ka e vakarota o Jiova:

3 “‘“Ke dua na tagane ena vale i Isireli e vakamatea na bulumakau tagane se luvenisipi tagane, se me ena loma ni keba, se vakamatea ena taudaku ni keba, 4 me kua ni kauta mai ena icurucuru ni valelaca ni veitavaki me cabora me isoro vei Jiova ena mata ni valeniveitavaki nei Jiova, ena beitaki na tagane oya ni vakadavedra. Sa vakadavedra o koya, me qai muduki laivi* na tagane oya mai na kedra maliwa na kainona. 5 Qo mera kauta mai kina na Isireli na isoro era dau cabora ena lomanivanua vei Jiova, ena icurucuru ni valelaca ni veitavaki vua na bete. Mera cabora qo me isoro ni veiyaloni vei Jiova.+ 6 Ena qai kureitaka na bete na dra ena icabocabonisoro i Jiova, ena icurucuru ni valelaca ni veitavaki, me cakava tale ga me kubou na uro, me talei* vei Jiova na kena iboi.+ 7 Mera kua ni vakacaboisoro tale vei ira na timoni*+ era vaka na ibulibuli ni me, era saqamua+ vata tiko. Qo na lawa tudei vei kemuni ena nomuni itabatamata kece.”’

8 “Mo kaya vei ira, ‘O koya ga na tagane mai na vale i Isireli, se na vulagi e tiko ena kemuni maliwa e cabora na isoro kama se dua na isoro 9 qai sega ni kauta ina icurucuru ni valelaca ni veitavaki me cabora vei Jiova, me muduki laivi* vei ira na kainona.+

10 “‘Ke dua na tagane mai na vale i Isireli se dua na vulagi e tiko ena kemuni maliwa e kania na dra cava ga,+ ena duatani sara ga na mataqu vei koya e kania na dra, au na muduki koya laivi* vei ira na kainona. 11 Ni tiko ena dra na bula+ ni dua na kabula, au sa solia sara ga vei kemuni ina icabocabonisoro+ moni veisorovaki kina ena vuku ni nomuni bula, ni dra qo e caka kina na veisorovaki+ ena vuku ni bula e tiko kina. 12 Qori na vuna au tukuna kina vei ira na Isireli: “Me kua ni dua vei kemuni me kania na dra, me kua tale ga ni kania na dra+ e dua na vulagi e tiko ena kemuni maliwa.”+

13 “‘Ke lai vakasasa e dua na Isireli se dua na vulagi e tiko ena kemuni maliwa, qai toboka e dua na manumanu kila se manumanuvuka e rawa ni laukana, me vakadrodroya laivi na kena dra+ qai buluta ena qele. 14 Ni tiko ena dra na bula ni veimataqali kabula kece ga. Au mani kaya vei ira na Isireli: “Moni kua ni kania na dra ni kabula kece, ni tiko ena dra na bula ni veimataqali kabula kece ga. Ena muduki laivi* o koya e kania.”+ 15 Ke dua, se mani itaukei se dua e tiko vulagi e kania na lewe ni manumanu sa mate rawa tu se basuraka na manumanu kila,+ me qai savata na nona isulu, sili ena wai, ena dukadukali tiko me yacova na yakavi,+ oti ena qai savasava. 16 Ia ke sega ni savata qori qai sega ni vakasilimi koya,* ena saumitaro o koya ena nona cala.’”+