Dauveilewai

13 Era caka ca tale na Isireli ena mata i Jiova,+ e mani soli ira o Jiova e ligadra na kai Filisitia+ me 40 na yabaki.

2 Ia e dua na turaga ni Sora+ ena vuvale i Tani+ na yacana o Manoa.+ E yava na watina, e sega na luvena.+ 3 E qai rairai vua na yalewa na agilosi i Jiova, e kaya vua: “Raica, o yava o sega ni vakaluveni. Ia o na kunekune mo vakasucuma e dua na gonetagane.+ 4 Mo qarauna mo kua ni gunu waini se alakaolo cava ga,+ mo kua tale ga ni kania na ka e sega ni savasava.+ 5 Raica! O na kunekune mo vakasucuma e dua na gonetagane, me kua ni tasi na uluna,+ ni na Nasaraiti ni Kalou na gone qori ena gauna e sucu kina,* ena liutaka na nodra vakabulai na Isireli mai na ligadra na kai Filisitia.”+

6 E lako sara na yalewa me tukuna vei watina: “E lako mai vei au e dua na tamata ni Kalou dina, e vaka na agilosi ni Kalou dina na kena irairai, e vakatubuqoroqoro sara ga. Au sega ga ni taroga vua se lako mai vei, e sega ni tukuna vei au na yacana.+ 7 Ia e kaya vei au o koya, ‘Raica! O na kunekune mo vakasucuma e dua na gonetagane. Mo kua ni gunu waini se dua na ka e veivakamatenitaki, mo kua tale ga ni kania na ka e sega ni savasava, ni na Nasaraiti ni Kalou na gone qori ena gauna e sucu kina me yacova na siga e mate kina.’”

8 E vakamasuti Jiova o Manoa e kaya: “Ni yalovinaka Jiova. Au kerea me lako tale mai vei keirau na tamata ni Kalou dina oni tala mai me vakasalataki keirau ena ka me keirau vakayacora vua na gone ena sucu.” 9 E mani rogoci Manoa na Kalou dina, e lesu vua na yalewa na agilosi ni Kalou dina ena gauna e tiko kina e tuba, ia e sega ni tiko o Manoa na watina. 10 E cici vakatotolo na yalewa me tukuna vei watina: “Raica! E rairai vei au na turaga a lako mai ena siga oya.”+

11 E tucake sara o Manoa me tomani watina. E lako vua na turaga qori, e kaya vua: “O kemuni ga oni a vosa vua na watiqu?” E kaya o koya: “O yau ga.” 12 E qai kaya o Manoa: “Me yaco mada ga na ka oni tukuna. Ena vakacava mada na bula ni gone qo, na cava ena cakava?”+ 13 E kaya sara vei Manoa na agilosi i Jiova: “Me qarauna na watimu na ka kece au tukuna vua.+ 14 Me kua sara ga ni kania e dua na ka e caka ena vuanivaini, me kua ni gunu waini se alakaolo cava ga,+ me kua tale ga ni kania na ka e sega ni savasava.+ Me muria na ka kece au vakaroti koya kina.”

15 E kaya o Manoa vua na agilosi i Jiova: “Yalovinaka, moni tiko mada me keirau vakarautaka vei kemuni+ e dua na luvenime.” 16 Ia e kaya vei Manoa na agilosi i Jiova: “Keu tiko, au na sega ni kania na kemu kakana, ia ke o via cabora e dua na isoro kama vei Jiova, mo cabora ga.” E sega ni kila tiko o Manoa ni oya na agilosi i Jiova. 17 E mani kaya o Manoa vua na agilosi i Jiova: “O cei na yacamuni,+ me keirau na vakalagilagi kemuni ni yaco dina na nomuni vosa?” 18 Ia e kaya vua na agilosi i Jiova: “Na cava o taroga kina na yacaqu, ni yaca qoroi?”

19 E kauta sara o Manoa na luvenime kei na isoro kakana me cabora vei Jiova ena delanivatu. E qai vakayacora o koya e dua na ka vakatubuqoroqoro ni rau rai tu o Manoa kei na watina. 20 Ni lako cake i lomalagi na yameyame mai na icabocabonisoro, e lako cake sara i macawa na agilosi ena yameyame ni icabocabonisoro ni rau rai tu o Manoa kei na watina. Sega ni bera ni rau davo vakatoboicu ina qele. 21 E sega tale ni rairai na agilosi i Jiova vei Manoa kei na watina. E qai kila o Manoa ni oya na agilosi i Jiova.+ 22 E kaya sara vei watina o Manoa: “Daru na mate sara ga ni daru raica na Kalou.”+ 23 Ia e kaya vua o watina: “Ke via vakamatei kedaru o Jiova ena sega ni vakadonuya na isoro kama+ kei na isoro kakana mai ligadaru, ena sega ni vakaraitaka vei kedaru na ka kece qo, ena sega tale ga ni tukuna vei kedaru na ka qo.”

24 Oti e vakasucuma na yalewa e dua na gonetagane, e vakayacani koya me o Samisoni,+ ni tubu tiko na gone e vakalougatataki koya tiko ga o Jiova. 25 E qai sobuti koya+ na yalo i Jiova e Menetani+ ena kedrau maliwa o Sora kei Esitaoli.+