Lako Yani

40 E qai tukuna vei Mosese o Jiova: 2 “Ena imatai ni siga ni imatai ni vula, mo vakaduria na valeniveitavaki, na valelaca ni veitavaki.+ 3 Biuta kina na kato ni iVakadinadina+ qai latia na Kato ena ilatilati.+ 4 Mo kauta mai loma na teveli+ qai tuvana na kena iyaya e delana, kauta tale ga mai na itutu ni cina+ qai waqara na kena cina.+ 5 Mo qai biuta na icabocabo koula ni ka boivinaka+ e dau vakamai me veidonui kei na kato ni iVakadinadina, qai biuta na ilati* me icurucuru ni valeniveitavaki.+

6 “Mo biuta na icabocabo ni isoro kama+ ena mata ni icurucuru ni valeniveitavaki, na valelaca ni veitavaki, 7 qai biuta na beseni ena kedrau tadrua na valelaca ni veitavaki kei na icabocabonisoro, qai tawana kina na wai.+ 8 Mo qai cakava wavoki na kena rara,+ biuta cake tale ga na ilati*+ me matamata ni rara. 9 Oti mo taura na waiwai ni veilumuti,+ qai lumuta kina na valeniveitavaki kei na ka kece e tu e loma,+ qai vakatabuya vata na kena iyaya kece, me rawa ni ka savasava. 10 Mo lumuta na icabocabo ni isoro kama kei na kena iyaya kece, qai vakatabuya na icabocabonisoro, me rawa ni icabocabonisoro savasava sara.+ 11 Lumuta tale ga na beseni kei na kena itutu, qai vakatabuya.

12 “Mo kauti Eroni voleka mai kei ratou na luvena tagane ena icurucuru ni valelaca ni veitavaki, qai vui ratou ena wai.+ 13 Mo vakaisulutaki Eroni ena isulu tabu,+ lumuti koya,+ qai vakatabui koya, ena qai veiqaravi vakabete vei au. 14 Oti oya, kauti ratou voleka mai na luvena tagane, qai vakaisulutaki ratou ena isulu balavu.+ 15 Mo lumuti ratou me vaka ga nomu lumuti tamadratou,+ me rawa ni ratou veiqaravi vakabete vei au, ia na nodratou lumuti ena itavi vakabete me dei tiko ga vei ratou ena nodratou itabatamata kece.”+

16 E cakava o Mosese na ka kece e vakaroti koya kina o Jiova.+ E cakava sara ga na ka e tukuni vua.

17 E vakaduri na valeniveitavaki ena imatai ni siga ni imatai ni vula, ena ikarua ni yabaki.+ 18 Ni vakaduria o Mosese na valeniveitavaki, e biuta e ra na veleti e sivi vakalomana,+ e vakaduria na feremi,+ e curumaka na kena kau balavu,+ qai vakaduria na kena duru. 19 E tevuka o koya na valelaca+ ena dela ni valeniveitavaki, qai biuta na iubi ni valelaca e delana,+ me vaka ga e vakaroti Mosese kina o Jiova.

20 Oti oya e taura na iVakadinadina+ qai biuta e loma ni Kato,+ qai curumaka na ivua+ ena Kato, e biuta tale ga na isogo+ e dela ni Kato.+ 21 E kauta sara na Kato ina valeniveitavaki qai biuta na ilatilati+ ni ilati me latia na kato ni iVakadinadina,+ me vaka ga e vakaroti Mosese kina o Jiova.

22 Oti e biuta e loma ni valelaca ni veitavaki na teveli,+ ena taudaku ni ilatilati, ena yasa ni valeniveitavaki ina vualiku, 23 qai tuvana vakaiyatu o koya e delana na madrai+ ena mata i Jiova, me vaka ga e vakaroti Mosese kina o Jiova.

24 E biuta ina valelaca ni veitavaki na itutu ni cina+ me rau veidonui kei na teveli, ena yasa ni valeniveitavaki ina ceva. 25 E waqara na cina o koya+ ena mata i Jiova, me vaka ga e vakaroti Mosese kina o Jiova.

26 E biuta tarava na icabocabo koula+ ena valelaca ni veitavaki ena mata ni ilatilati, 27 me vakama kina na ka boivinaka+ me kubou,+ me vaka ga e vakaroti Mosese kina o Jiova.

28 Oti, sa qai biuta ena kena vanua na ilati*+ ni icurucuru ni valeniveitavaki.

29 E biuta na icabocabo ni isoro kama+ ena icurucuru ni valeniveitavaki, na valelaca ni veitavaki, me cabora kina na isoro kama+ kei na isoro kakana, me vaka ga e vakaroti Mosese kina o Jiova.

30 Oti e biuta na beseni ena tadrua ni valelaca ni veitavaki kei na icabocabonisoro, qai tawana kina na wai ni sasavui.+ 31 Eratou dau savata kina na ligadratou kei na yavadratou o Mosese, o Eroni, kei ratou na luvena tagane. 32 Na gauna ga eratou dau curu kina ina valelaca ni veitavaki se ni ratou torova na icabocabonisoro, eratou na sasavui,+ me vaka ga e vakaroti Mosese kina o Jiova.

33 Oti sa qai vakaduria na rara+ me wavokita na valeniveitavaki kei na icabocabonisoro, e biuta cake tale ga na ilati* ni icurucuru ni rara.+

Sa qai vakacavara na cakacaka o Mosese. 34 Sa qai tekivu solega na valelaca ni veitavaki na o, qai vakasinaita na valeniveitavaki na lagilagi i Jiova.+ 35 E sega ni curu rawa ina valelaca ni veitavaki o Mosese, ni sa tu ga e delana na o, qai vakasinaita na valeniveitavaki na lagilagi i Jiova.+

36 Ni tubu cake ga na o mai na valeniveitavaki, era dau tokitaka na nodra keba na Isireli ena iwasewase kece ni nodra ilakolako.+ 37 Ia ke sega ni tubu cake na o, era na sega ni tokitaka na nodra keba me yacova na siga sa tubu cake kina.+ 38 Ni dau tu na o nei Jiova ena dela ni valeniveitavaki ena siga, qai tu ga e delana na bukawaqa ena bogi, era dau raica qori na Isireli taucoko ena nodra ilakolako kece.+