Lako Yani

25 E qai kaya vei Mosese o Jiova: 2 “Tukuna vei ira na lewe i Isireli mera kauta mai e dua na cau ena vukuqu, moni kauta mai na noqu cau+ vua na tamata yadua e uqeti na lomana. 3 Qo na cau moni taura vei ira: na koula,+ na siliva,+ na kopa,+ 4 na waniculacula karakarawa, na ­vutinisipi lokaloka,* na isulu kulakula, na lineni matailalai, na vutinime, 5 na kuli ni tamanisipi boro damudamu, na kulinisili, na kau na akasia,+ 6 na waiwai ni cina,+ na isaluaki ni waiwai ni veilumuti+ kei na ka boivinaka e dau vakamai,+ 7 na vatu onikisa kei na vatu tale eso me biu vata ena efoti*+ kei na taga ni lomasere.+ 8 Mera cakava e dua na tikina tabu ena vukuqu, au na qai vakaitikotiko* ena kedra maliwa.+ 9 Moni cakava qori, na valeniveitavaki kei na kena iyaya kece, ni muri sara vakavinaka na kena icakacaka au vakaraitaka vei iko.+

10 “Mera cakava e dua na kato mai na kau na akasia, me rua veimama na kiupiti* na kena balavu, dua veimama na kiupiti na kena raba, dua veimama na kiupiti na kena cere.+ 11 Mo qai ubia ena koula dina.+ Mo ubia na lomana kei na dagona, mo qai cakava tale ga me koula wavoki na batibatina.+ 12 Mo qai cakava e va na kena rigi koula, mo vakabira ena dela ni yavana vava, me rua na rigi ena dua na yasana, rua na rigi ena dua tale na yasana. 13 Mo cakava na ivua mai na kau na akasia, mo qai ubia ena koula.+ 14 Mo qai daramaka na ivua ena rigi eratou tu ena baba ni Kato me colati kina na Kato. 15 Me biu tu ga na ivua ena rigi ni Kato, me kua ni ucu laivi.+ 16 Mo biuta e loma ni Kato na iVakadinadina* au na solia vei iko.+

17 “Mo na cakava e dua na isogo mai na koula dina, me rua veimama na kiupiti na kena balavu, dua veimama na kiupiti na kena raba.+ 18 Mo cakava mai na koula e tukilaki e rua na jerupi ena mua ruarua ni isogo.+ 19 Cakava na jerupi qai biuta ena muana ruarua, me yadua na jerupi ena mua ni isogo ruarua. 20 Me rau tevuka cake tu na jerupi na tabadrau ruarua, me vakaruruga na isogo na tabadrau,+ me rau veiqaravi tu. Na matadrau na jerupi me qara ina isogo. 21 Mo vakataqara na isogo+ ena dela ni Kato, qai biuta i loma ni Kato na iVakadinadina au na solia vei iko. 22 Au na rairai vei iko e kea, qai vosa vei iko mai na dela ni isogo.+ Ena kedrau maliwa na jerupi erau toka ena dela ni kato ni iVakadinadina, au na vakatakila vei iko na ka kece au na vakaroti iko kina ena vukudra na Isireli.

23 “Mo cakava tale ga e dua na teveli+ mai na kau na akasia, me rua na kiupiti na kena balavu, dua na kiupiti na kena raba, qai dua veimama na kiupiti na kena cere.+ 24 Mo ubia ena koula dina, qai cakava na iukuuku koula me wavokita na batibatina. 25 Mo cakava wavoki na tutuna me tautauvata kei na rabaniliga,* qai wavokita na tutuna na iukuuku koula. 26 Mo cakava e va na kena rigi koula, biuta na rigi ena tutuna vava e sema kina na yavana vava. 27 Me volekata ga na tutuna na rigi me icurucuru ni ivua ena kau kina na teveli. 28 Mo cakava mai na kau na akasia na kena ivua qai ubia ena koula, me qai kau kina na teveli.

29 “Mo cakava tale ga na kena disi, kena bilo, kei na kena itakitaki, kei na boulu mera dau livia kina na isoro livi. Mo cakava mai na koula dina.+ 30 Mo qai biuta na madrai dauraici ena teveli, me tu ga e mataqu e veigauna.+

31 “Mo cakava mai na koula dina e dua na itutu ni cina.+ Me tukilaki me caka kina na itutu ni cina. Na kena idabedabe, na tolona, na tabana, na kena bilo, kena iukuuku mokimokiti, kei na sena me dua ga na tikina.+ 32 Ena basoga mai na yasa ni itutu ni cina e ono na tabana, e tolu na tabana ena dua na yasana, qai tolu na tabana ena yasana adua. 33 Ena tiko ena dua na iwasewase ni tabana e tolu na bilo e buli vaka na se ni amodi, qai biu veitaravi kina na iukuuku mokimokiti kei na sena, kei na tolu na bilo e buli vaka na se ni amodi ena iwasewase ni tabana adua, qai biu veitaravi kina na iukuuku mokimokiti kei na sena. Ena basoga va qori mai na tolo ni itutu ni cina na ono na tabana. 34 Ena tiko ena tolo ni itutu ni cina e va na bilo e buli vaka na se ni amodi, qai biu veitaravi kina na iukuuku mokimokiti kei na sena. 35 Ena tiko e dua na iukuuku mokimokiti ena ruku ni imatai ni rua na tabana e basoga mai na tolona, qai dua tale na iukuuku mokimokiti ena ruku ni rua na tabana e tarava, kei na dua na iukuuku mokimokiti ena ruku ni rua na tabana e tarava ena ono na tabana e basoga mai na tolona. 36 Me dua ga na tikinikoula dina sa tukilaki+ na iukuuku mokimokiti, na tabadra, kei na itutu ni cina taucoko. 37 O na cakava e vitu na kena cina, ni waqa na cina ena vakararamataka na yasana e liu.+ 38 Me koula dina na iqamu ni vauvau ni cina kei na itawatawa ni bukawaqa.+ 39 Na ka qori kei na kena iyaya kece me caka ena dua na taledi* koula dina. 40 Mo cakava sara ga ena kedra icakacaka a vakaraitaki vei iko ena ulunivanua.+