Jeremaia

29 Qo na lewe ni ivola e vakauta o Jeremaia na parofita mai Jerusalemi vei ira na vo ni qase era kau vakavesu, o ira na bete, o ira na parofita, kei ira kece na tamata e kauta vakavesu o Nepukanesa mai Jerusalemi i Papiloni, 2 ni sa biubiu oti mai Jerusalemi o Tui Jekonaia,+ o tinana,*+ o ira na vakailesilesi lelevu, o ira na turaga ni Juta kei Jerusalemi, o ira na matai, kei ira na matai ni kaukamea.*+ 3 E vakauta o koya na ivola ena liga i Elasa na luvei Safani+ kei Kimaraia na luvei Ilikaia, e talai rau o Tui Setekaia+ e Juta i Papiloni vei Tui Nepukanesa e Papiloni. E kaya:

4 “Qo na ka e kaya o Jiova ni lewe vuqa* na Kalou ni Isireli, vei ira kece na kau vakavesu, o ira au lewa mera kau vakavesu mai Jerusalemi i Papiloni, 5 ‘Moni tara vale moni tawana. Moni teitei moni kania na vuana. 6 Moni vakawati me so na luvemuni tagane kei na luvemuni yalewa, moni kauta mai eso na watidra na luvemuni tagane, moni soli ira na luvemuni yalewa mera vakawati me so tale ga na luvedra tagane kei na luvedra yalewa. Moni lewe levu e kea, moni kua ni lewe lailai. 7 Moni saga me tikovakacegu na koro au lewa moni kau vakavesu kina, moni masulaka vei Jiova, ni tikovakacegu na koro oni na tikovakacegu tale ga.+ 8 Ni qo na ka e kaya o Jiova ni lewe vuqa, na Kalou ni Isireli: “Mera kua ni lawakitaki kemuni na nomuni parofita kei ira na nomuni daurairai era tiko ena kemuni maliwa,+ moni kua ni rogoca na tadra era tadrataka. 9 Ni ‘lasu na ka era parofisaitaka tiko vei kemuni ena yacaqu. Au sega ni talai ira yani,’+ e kaya o Jiova.”’”

10 “Qo na ka e kaya o Jiova, ‘Ni cava na 70 na yabaki e Papiloni, au na golevi kemuni,+ au na vakayacora vinaka na noqu vosa ni iyalayala meu vakalesui kemuni mai ena vanua qo.’+

11 “‘Niu kila vinaka na ka au nanuma tiko me baleti kemuni,’ e kaya o Jiova, ‘na nanuma moni tikovakacegu moni kua ni rarawa,+ meu solia vei kemuni na inuinui kei na ka moni namaka ena gauna se bera mai.+ 12 Oni na tagici au, oni na lako mai moni masuti au, au na rogoci kemuni.’+

13 “‘Oni na qarai au oni na kunei au,+ oni na qarai au ena lomamuni taucoko.+ 14 Au na vakadonuya moni kunei au,’+ e kaya o Jiova. ‘Au na kumuni ira na nomu era vesu, au na kumuni kemuni tale ga mai na veimatanitu kece kei na veivanua kece au vakatalai kemuni kina,’+ e kaya o Jiova. ‘Au na vakalesui kemuni ina vanua au lewa moni vesu kina.’+

15 “Ia oni kaya, ‘E vakatubura vei keimami o Jiova eso na parofita mai Papiloni.’

16 “Ni qo na ka e kaya o Jiova vua na tui e dabe tiko ena idabedabe vakaturaga i Tevita+ kei ira kece na tamata era tiko ena koro qo, o ira na tacimuni era sega ni kau vakavesu vata kei kemuni, 17 ‘Qo na ka e kaya o Jiova ni lewe vuqa: “Au sa tala vei ira na iseleiwau, na dausiga, kei na matedewa,+ au na cakava mera vaka na lolo luca* e sega ni laukana rawa, ni sa rui ca.”’+

18 “‘Au na cicimuri ira ena iseleiwau,+ ena dausiga, kei na matedewa, au na soli ira mera domobulataka na veimatanitu kece e vuravura,+ mera cudruvi, mera kidroataki, mera kaluvi,+ mera vosavakacacataki tale ga ena veimatanitu kece au vakatalai ira kina,+ 19 nira sega ni muria na noqu vosa au tukuna vei ira niu talai ira yani na noqu dauveiqaravi na parofita’ e kaya o Jiova, ‘au talai ira wasoma.’*+

“‘Ia oni sega ni rogoca,’+ e kaya o Jiova.

20 “Ia moni rogoca na vosa i Jiova o kemuni kece na kau vakavesu, au vakatalai kemuni mai Jerusalemi i Papiloni. 21 Qo na ka e kaya o Jiova ni lewe vuqa, na Kalou ni Isireli me baleti Eapi na luvei Kolaia kei Setekaia na luvei Mesea erau parofisaitaka tiko vei kemuni na ka lasu ena yacaqu,+ ‘Au na soli rau e liga i Tui Nepukanesa* e Papiloni, ena vakamatei rau o koya e matamuni. 22 Na ka e yacovi rau era dau cavuta o ira kece na kau vakavesu mai Juta era tiko e Papiloni me iru: “Me cakava mada ga vei iko o Jiova na ka vata ga e yacovi Setekaia kei Eapi, e tavuni rau o tui Papiloni ena bukawaqa!” 23 ni vakamadua na nodrau ivalavala e Isireli,+ erau veibutakoci kei na watidra na wekadrau, erau tukuna tale ga na ka lasu ena yacaqu niu sega ni vakaroti rau kina.+

“‘“O yau ga au kila, au vakadinadinataka,”+ e kaya o Jiova.’”

24 “O na tukuna vei Semaia+ mai Nilamai, 25 ‘Qo na ka e kaya o Jiova ni lewe vuqa, na Kalou ni Isireli: “Ni o vakauta mai eso na ivola ena yacamu vei ira kece na lewenivanua era tiko e Jerusalemi, vei Sefanaia+ na luvei Mesea na bete, kei ira kece na bete, o kaya, 26 ‘E lesi iko o Jiova mo bete mo sosomitaki Jioiata na bete, mo iliuliu ena vale i Jiova mo lewa na lialia e viavia parofita, mo vesuka ena ivesu kau kei na kaukamea ni domo,+ 27 ia na cava o sega ni vosataki Jeremaia kina na turaga ni Anacoci+ e viavia parofita tiko vei kemuni?+ 28 Ni talatala mada ga yani vei keimami i Papiloni, e kaya: “Ena dede sara! Moni tara vale moni tawana. Moni teitei moni kania na vuana,—”’”’”+

29 Ni wilika o Sefanaia+ na bete na ivola qo ni vakarorogo tiko o Jeremaia na parofita, 30 e vosa vei Jeremaia o Jiova, e kaya: 31 “Mo talatala vei ira kece na kau vakavesu, mo kaya, ‘Qo na ka e kaya o Jiova me baleti Semaia mai Nilamai: “Ni parofisai vei kemuni o Semaia niu sega ni talai koya yani qai uqeti kemuni moni nuitaka na ka lasu,+ 32 qo gona na ka e kaya o Jiova, ‘Au na totogitaki Semaia mai Nilamai kei na nona kawa. Ena sega ni dua na nona kawa me bula vei ira na tamata qo, ena sega ni raica na ka vinaka au na vakayacora vei ira na noqu tamata,’ e kaya o Jiova, ‘ni uqeta na talaidredre vei Jiova.’”’”