iMatai ni Samuela

20 E dro mai Naioci e Rama o Tevita. Ia e lako vei Jonacani, e kaya: “Na cava au cakava?+ Na cava na noqu cala, na cala cava au cakava vei tamamu me via vakamatei au kina?” 2 E kaya sara vua o Jonacani: “Ena sega sara ni yaco qori!+ O na sega ni mate. Raica! Ena sega ni cakava o tamaqu e dua na ka levu se lailai me qai sega ni tukuna vei au. Na cava me vunia kina vei au o tamaqu na ka qo? Ena sega ni yaco qo.” 3 Ia e bubului tale o Tevita, e kaya: “E kila vinaka tiko o tamamu niu vakadonui e matamu,+ ena kaya, ‘Me kua ni kila qo o Jonacani de dua ena rarawa kina.’ Ia me vaka ni bula dina tiko o Jiova, ni o se bula tale tiko ga, sa vo ga e dua na ikalawa meu mate!”+

4 E qai kaya vei Tevita o Jonacani: “Na ka ga o tukuna au na cakava vei iko.” 5 E kaya vei Jonacani o Tevita: “Nimataka na vula vou,+ e dodonu sara ga meu dabe meu kana vata kei na tui. Ia mo tukuna mada meu lako, au na vuni ena lomanivanua me yacova na yakavi ena ikatolu ni siga. 6 Ke bau tarogi au o tamamu, mo tukuna: ‘E cikevi au o Tevita meu vakadonuya me lako vakatotolo i Peceliema+ na nona koro, me tomani ira na nona lewe ni vuvale ena cabori ni isoro e cabo e veiyabaki.’+ 7 Ke kaya va qo: ‘Sa vinaka!’ e kena ibalebale ni sa kalougata na nomu dauveiqaravi. Ia ke cudru, o na kila ni via vakayacora vei au na ka ca. 8 Mo vakaraitaka vua na nomu dauveiqaravi ni dei nomu lomani koya,+ ni o vakavuna mo veiyalayalati kei na nomu dauveiqaravi ena mata i Jiova.+ Ia keu cala,+ mo vakamatei au ga. Na cava mo kauti au kina vei tamamu?”

9 E kaya sara o Jonacani: “Au na sega sara ni tukuna qori me baleti iko! Keu kila ni saga tiko o tamaqu me vakayacora na ka ca vei iko, au na vunitaka vei iko?”+ 10 E qai kaya vei Jonacani o Tevita: “O cei ena tukuna vei au ni vosa vakacudrucudru vei iko o tamamu?” 11 E tukuna vei Tevita o Jonacani: “Lako mai me daru lako ina lomanivanua.” Erau mani lako ina lomanivanua. 12 E qai kaya vei Tevita o Jonacani: “Me noqu ivakadinadina o Jiova na Kalou ni Isireli niu na tarogi tamaqu ena gauna vata qo nimataka, se na ikatolu ni siga. Ke yalovinaka vei Tevita, au na talatala yani me tukuni vei iko. 13 Ia ke via vakayacora vei iko o tamaqu na ka ca, me vakayacora mada ga qori o Jiova vei Jonacani me kuria tale ga, keu sega ni vakatakila vei iko mo lako ena vakacegu. Me tokoni iko+ mada ga o Jiova me vaka ga na nona tokoni tamaqu.+ 14 Vakacava, o na vakaraitaka vei au na dei ni loloma i Jiova niu se bula tiko kei na gauna au mate+ kina? 15 Me kua ni mudu na nomu lomani ira na lewe ni noqu vuvale,+ ni vakawabokotaka o Jiova na meca kece i Tevita ena dela i vuravura.” 16 E qai veiyalayalati o Jonacani kei na vuvale i Tevita, e kaya, “Ena vinakata qori o Jiova, ena tarogi ira na meca i Tevita.” 17 E kaya o Jonacani vei Tevita me bubuluitaka tale ni lomani koya, ni lomani Tevita me vaka ga na nona lomani koya.+

18 E qai kaya vua o Jonacani: “Nimataka na vula vou,+ o na tarogi ni lala tiko na nomu idabedabe. 19 O na tarogi dina ena ikatolu ni siga, mo lako sara ena vanua o vuni tiko kina ena siga yani e liu,* mo mai tiko volekata na vatu qo. 20 Au na vanataka yani e tolu na gasau ena dua na yasana, me vaka ga niu via vana e dua na ka. 21 Niu tala yani e dua na dauveiqaravi, au na kaya, ‘Lai qara mai na gasau.’ Keu tukuna vua na dauveiqaravi, ‘Raica! E toka na gasau ena yasamu qo, kauta mai,’ mo qai lesu mai, me vaka ni bula dina tiko o Jiova, kena ibalebale qo ni o sa kalougata, ena sega na ka ca. 22 Ia keu kaya va qo vua na gonetagane, ‘Raica! E siviti iko na gasau,’ mo lako ni talai iko yani o Jiova. 23 Na vosa ni yalayala daru veivosakitaka,+ o iko kei au, me lewai kedaru kina o Jiova me tawamudu.”+

24 E qai vuni toka o Tevita ena lomanivanua. Ni sa vula vou, e lai dabe na tui ena nona idabedabe me kana.+ 25 E dabe tiko na tui ena nona idabedabe volekata na lalaga. E qaravi koya toka o Jonacani, e dabe o Apineri+ e yasai Saula, ia e lala toka na idabedabe nei Tevita. 26 E sega ni tukuna o Saula e dua na ka ena siga oya, e kaya lo ga: ‘Rairai yaco e dua na ka e sega ni savasava+ kina o koya. Io, e sega sara ga ni savasava o koya.’ 27 Ena siga tarava ni oti na vula vou, na ikarua ni siga, e lala tiko ga na idabedabe nei Tevita. E kaya sara o Saula vei Jonacani na luvena: “Na cava e sega ni lako mai kina na luvei Jese+ me mai kana enanoa se nikua?” 28 E kaya vei Saula o Jonacani: “E cikevi au o Tevita meu vakadonuya me gole i Peceliema.+ 29 E kaya, ‘Yalovinaka mo tukuna meu lako, ni na vakacaboisoro na neitou vuvale ena koro, e kacivi au sara ga na tuakaqu. Keu vakadonui gona e matamu, mo biuti au mada meu lako lo yani meu raici ratou na tuakaqu.’ Oya na vuna e sega ni lako mai kina o koya ena teveli ni tui.” 30 E qai katakatataki Jonacani o Saula, e kaya vua: “O iko na luve ni yalewa talaidredre, o nanuma niu sega ni kila ni o digia mo tokona na luvei Jese, mo madua kina, me madua tale ga kina o tinamu?* 31 Na gauna kece e bula tiko kina e vuravura na luvei Jese, o na sega ni vakataudeitaki o iko kei na nomu veiliutaki.+ Mo tala e dua me lai kauti koya mai vei au, ni dodonu me mate.”*+

32 Ia e kaya o Jonacani vei Saula na tamana: “Na cava me vakamatei kina o koya?+ Na cava e cakava?” 33 E qai cokataka o Saula na nona moto me cokai koya,+ e kila o Jonacani ni nakita o tamana me vakamatei Tevita.+ 34 E tucake sara mai na teveli o Jonacani ena levu ni cudru, e sega ni kana ena ikarua ni siga ni oti na vula vou ni rarawataka na ka e baleti Tevita+ qai vakamaduataki koya o tamana.

35 Ena mataka e lako sara o Jonacani ina lomanivanua me rau sota kei Tevita, e tomani koya e dua na dauveiqaravi gone.+ 36 E kaya vua na nona dauveiqaravi: “Yalovinaka, cici mo lai qara mai na gasau au vanataka.” E cici yani na dauveiqaravi qai vanataka o Jonacani na gasau me siviti koya. 37 Ni yaco yani na dauveiqaravi ena vanua e tau kina na gasau e vanataka o Jonacani, e kacivaka yani o Jonacani vua na dauveiqaravi: “Vakaevei, e siviti iko na gasau?” 38 E kacivaka yani o Jonacani vua na dauveiqaravi: “Kusa! Lako vakatotolo! Kua ni vakaberabera!” E tomika sara na gasau na dauveiqaravi i Jonacani qai lesu vua na nona turaga. 39 E sega ni kila e dua na ka na dauveiqaravi, o Jonacani ga kei Tevita erau kila na kena ibalebale. 40 Oti oya, e solia o Jonacani na nona iyaragi vua na nona dauveiqaravi qai kaya vua: “Lako, kauta qo ina koro.”

41 Ni biubiu na dauveiqaravi, e duri sara o Tevita mai na vanua volekata na ceva. E tekicuva ina qele qai cuva vakatolu, rau veireguci, rau qai veitagicaki, ia e tagi vakalevu o Tevita. 42 E kaya vei Tevita o Jonacani: “Mo lako ena vakacegu, ni daru sa veiyalayalati+ oti ena yaca i Jiova, daru kaya, ‘Me lewai kedaru mada ga o Jiova kei ira na nomu kawa kei na noqu kawa me tawamudu.’”+

E cavutu sara o Tevita me lako yani, e lesu o Jonacani ina koro.