iMatai ni Veigauna
22 E kaya sara o Tevita: “Qo na vale i Jiova na Kalou dina, qo tale ga na icabocabo ni isoro kama nei Isireli.”+
2 E qai vakarota o Tevita mera soqoni vata na vulagi+ era tiko ena nodra vanua na Isireli, e lesi ira mera dautavatu, mera taya na vatu mera bulia, me tara kina na vale ni Kalou dina.+ 3 E vakarautaka tale ga o Tevita e levu sara na kaukamea me ivako ni katuba ni matamata kei na iqamu, e levu sara na kopa e sega ni vakarautaki rawa na kena bi,+ 4 e sega tale ga ni wili rawa na levu ni kau sitari,+ nira kauta yani vakalevu na kau sitari vei Tevita o ira na kai Saitoni+ kei na kai Taia.+ 5 E kaya o Tevita: “Se gone o Solomoni na luvequ, e lailai na ka e kila,*+ ia na vale e tara me nei Jiova me duatani duadua na kena totoka,+ me kilai ena vanua kece+ na kena irogorogo kei na kena totoka.+ Au na vakarautaka vua.” E mani vakarautaka vakalevu o Tevita na kena iyaya ni bera ni mate.
6 E kacivi Solomoni sara na luvena qai vakaroti koya me tara na vale i Jiova na Kalou ni Isireli. 7 E tukuna o Tevita vei Solomoni na luvena: “E gagadre ni lomaqu meu tara e dua na vale ena yaca i Jiova na noqu Kalou.+ 8 Ia e vosa vei au o Jiova, e kaya, ‘O vakadavea vakalevu na dra, o vala tale ga ena ivalu lelevu. O na sega ni tara na vale ena yacaqu+ ni o vakadavea vakalevu na dra ina qele e mataqu. 9 Raica! Ena dua na luvemu tagane+ ena bula vakacegu o koya, au na vakacegui koya mai vei ira kece na kena meca era wavokiti koya,+ ena yacana o Solomoni,*+ au na solia vei ira na Isireli na sautu kei na vakacegu ena nona gauna.+ 10 Ena tara o koya na vale ena yacaqu.+ Ena luvequ o koya, au na tamana.+ Au na vakataudeitaka na idabedabe vakaturaga ni nona veiliutaki vakatui e Isireli me tawamudu.’+
11 “Ia qo luvequ, me tokoni iko mada ga o Jiova, mo rawata na ka o saga, mo tara na vale i Jiova na nomu Kalou me vaka e tukuna o koya me baleti iko.+ 12 Me solia ga vei iko o Jiova na vuku kei na yalomatua+ ni solia vei iko na lewa e Isireli, mo muria tiko ga kina na lawa i Jiova na nomu Kalou.+ 13 O na qai rawata na ka o saga ke o muria vinaka na ivakaro+ kei na lewa e vakaroti Mosese kina o Jiova me solia vei ira na Isireli.+ Mo yaloqaqa, mo kaukaua. Mo kua ni rere se domobula.+ 14 Au saga ena noqu igu meu vakarautaka ina vale i Jiova e 100,000 na taledi* koula kei na 1,000,000 na taledi siliva, e levu sara na kopa kei na kaukamea+ e sega ni kilai na kena bibi, au vakarautaka tale ga na kau kei na vatu,+ ia o na kuria qori. 15 E levu na nomu tamata cakacaka, o ira na dautavatu, o ira na matai ni vatu+ kei na kau, kei ira kece na kenadau+ ena cakacaka kece. 16 E sega ni wili rawa na koula, na siliva, na kopa, kei na kaukamea.+ Mo tucake mo tekivuna na cakacaka, me tokoni iko mada ga o Jiova.”+
17 E qai vakaroti ira kece na turaga ni Isireli o Tevita mera vukei Solomoni na luvena: 18 “E sega ni tokoni kemuni o Jiova na nomuni Kalou, e sega ni vakacegui kemuni ena veiyasana kece? Ni soli ira na lewenivanua e ligaqu, sa vakamalumalumutaki na vanua ena mata i Jiova kei na matadra na nona tamata. 19 Ia qo moni nakita e lomamuni taucoko kei na nomuni vinaka* taucoko moni vaqarai Jiova na nomuni Kalou,+ moni tara sara na itikotiko tabu nei Jiova na Kalou dina,+ moni kauta yani na kato ni veiyalayalati i Jiova kei na iyaya vakatabui ni Kalou dina+ ina vale e tara ena yaca i Jiova.”+