iMatai ni iVola Vei Timoci
6 Mera kila na bobula* kece ni dodonu mera rokovi ira tiko ga vakalevu na kedra itaukei,+ me kua ni vosavakacacataki kina na yaca ni Kalou kei na nona ivakavuvuli.+ 2 Mera kua tale ga ni raici ira sobu na kedra itaukei o ira na bobula era tiko ena vakabauta na kedra itaukei, baleta nira veitacini. Ia e dodonu me vinaka cake sara na nodra veiqaravi, ni o ira na vakila tiko na yaga ni nodra veiqaravi vinaka era vakabauta vata, era tacidra lomani tale ga.
Mo veivakavulici mo qai veivakasalataki tiko ga ena ka kece qo. 3 Ke dua e vakatetea e duatani tale na ivakavuvuli qai sega ni duavata kei na ivakasala yaga+ ni noda Turaga o Jisu Karisito, se na ivakavuvuli e sega ni salavata kei na noda qarava na Kalou,+ 4 e dokadoka o koya, e sega ni kila e dua na ka.+ E leqa nona vakasama ena nona dau via veileti kei na nona veibataka na vosa.+ Qo e basika kina na vuvu, na veivala, na vakauvosa,* na kasami ca, 5 kei na nodra veileti katakata eso ena vuku ni ka lalai wale ga, ni sa vakacalai tu na nodra vakasama,+ sa buawa vei ira na ka dina, era nanuma mera rawaka ena nodra qarava na Kalou.+ 6 E levu dina na ka ena rawati ena noda qarava na Kalou,+ kei na noda lomavakacegu. 7 Nida sega ni kauta mai vuravura e dua na ka, ena sega tale ga ni dua na ka eda kauta tani yani.+ 8 O koya gona, ke sa tiko na kakana, na isulu,* meda lomavakacegu ena veika qo.+
9 Ia o ira na qara na bula vutuniyau era na temaki, era na coriti,+ ena curumi ira tale ga e levu na gagadre ca e veivakaleqai, na ka kece qo ena vakavuna na nodra leqa kei na nodra rusa.+ 10 Ni levu sara na ka ca e vu mai na lomani ni ilavo. Nira vakasaqara qo eso, era vakamuai tani kina mai na vakabauta, ra qai sualaka na yagodra taucoko ena levu na mosi.+
11 Ia o iko na tamata ni Kalou, mo dro tani mai na ka kece qo. Mo vakasaqara ga na veika e dodonu, na qarava na Kalou, na vakabauta, na loloma, na vosota, kei na yalomalua.+ 12 Mo vala ena ivalu vinaka ni vakabauta, mo taura dei na bula tawamudu o kacivi kina, na bula vata ga o vunautaka sara vakavinaka e matadra e levu na ivakadinadina.
13 Au vakaroti iko ena mata ni Kalou, na vu ni nodra bula na ka kece, ena mata i Karisito Jisu tale ga, na ivakadinadina a vunau sara ga vakavinaka ena mata i Ponitio Pailato,+ 14 mo muria vinaka sara na ivakaro me kua ni dua na ka e vakalewai vei iko se mo vakamelei kina, me yacova na nona vakaraitaki mai na noda Turaga o Jisu Karisito,+ 15 ena kena gauna, ena qai vakaraitaki koya na Turaga Kaukaua mamarau. O koya e nodra Tui o ira na veiliutaki vakatui, e nodra Turaga tale ga o ira na veiliutaki vakaturaga,+ 16 o koya ga e sega ni mate rawa,+ e tiko ena rarama e sega ni torovi rawa,+ e sega ni dua na tamata e raici koya se rawa ni raici koya.+ Me nona mada ga na vakarokoroko kei na kaukaua me tawamudu. Emeni.
17 Vakaroti ira na vutuniyau ena veika ni vuravura* qo mera kua ni dokadoka, mera kua tale ga ni vakanuinui ena iyau e sega ni dei.+ Mera vakanuinui ga vua na Kalou, o koya e vakarautaka vakayauyau vei keda na ka kece meda marau kina.+ 18 Tukuna vei ira mera cakava na ka e vinaka, mera vakaitavi vakalevu ena cakacaka yaga, mera lomasavu, mera yalosolisoli,+ 19 mera maroroya me nodra na yavu vinaka ni bula e se bera mai,+ mera taura matua kina na bula dina.+
20 I Timoci, qarauna vinaka na ka e sa nuitaki vei iko,+ lako tani mai na veivosaki tawayaga e beci kina na ka e savasava, kei na veivosaki veicalati e nanumi tu ni “kilaka.”+ 21 Na sakitaki ni kilaka va ya, era gole tani kina eso mai na vakabauta.
Me tiko mada ga kei kemuni na loloma soli wale ni Kalou.