iKarua ni iVola Vei Ira mai Korinica

1 O yau o Paula na yapositolo i Karisito Jisu me salavata kei na loma ni Kalou, kei Timoci+ na tacida, vei kemuni na ivavakoso ni Kalou oni tiko mai Korinica, vei kemuni tale ga na yalosavasava e Akaia taucoko.+

2 Me sobuti kemuni mada ga na loloma soli wale kei na vakacegu ni Kalou na Tamada, kei na Turaga o Jisu Karisito.

3 Me vakacaucautaki na Kalou, na Tama ni noda Turaga o Jisu Karisito,+ na Tama ni yalololoma,+ na Kalou e dau vakacegui keda ena ka kece,+ 4 e vakacegui* keda ena veika dredre kece eda sotava,+ meda vakacegui ira+ kina era sotava na veimataqali ituvaki dredre ena vakacegu vata ga e vakacegui keda kina na Kalou.+ 5 Ni levu dina na ka rarawa eda sotava ena noda vakabauti Karisito,+ eda vakacegui tale ga vakalevu ena vuku i Karisito. 6 Ke keitou sotava na veika dredre, e kena inaki moni vakacegui moni vakabulai tale ga kina, ke keitou vakacegui, e kena inaki moni vosota kina na rarawa vata ga keitou sotava. 7 E dei vinaka tu na neitou nuitaki kemuni, e dina nida na rarawa vata, ia keitou kila nida na vakacegui vata tale ga.+

8 Ni keitou sega ni vinakata raveitacini moni lecava na veivakararawataki keitou sotava ena yasana o Esia.*+ Keitou sega sara ga ni taqea rawa, keitou sega mada ga ni kila se keitou na bula se sega.+ 9 Keitou nanuma ni keitou sa totogimate, ia me keitou kua ni nuitaki keitou, me keitou nuitaka ga na Kalou+ e dau vakaturi ira na mate. 10 E vakabulai keitou gona ena ituvaki rerevaki ya, keitou kila ni na vakabulai keitou tale. Keitou nuitaki koya tale ga ni na vakabulai keitou+ ena veisiga se bera mai. 11 E rawa ni oni tokoni keitou ena nomuni masulaki keitou,+ mera cabora kina e levu na nodra masu ni vakavinavinaka ena vuku i keitou me baleta na veika e soli vakayalololoma vei keitou.+

12 E tiko na ka me keitou sakitaka ena neitou itovo e vuravura, vakabibi vei kemuni, ni keitou a savasava, keitou dau dina tale ga me salavata kei na loma ni Kalou. Qo e sega ni vuku vakatamata,+ e loloma soli wale ga ni Kalou. E ivakadinadina tale ga ni ka qo na neitou lewaeloma. 13 Keitou sega ni vola yani e dua tale na ka, na ka ga oni wilika rawa qai kila, au nuitaka ni oni na kila vinaka tiko ga na veika qo, 14 me vaka ga na nomuni kila vinaka eso na ka, eso vei kemuni oni sakitaki keitou, me vaka ga ni keitou na sakitaki kemuni ena siga ni noda Turaga o Jisu.

15 O koya gona, ena noqu nuidei qo, au a nakita kina meu lako yani e liu vei kemuni moni vakamarautaki tale.* 16 Au nakita meu sikovi kemuni ena noqu ilakolako i Masitonia, mai kea, au na lesu tale yani vei kemuni, oti moni talaci au ena noqu ilakolako i Jutia.+ 17 Au taura vakamamada na ka au sa nakita? Vakacava, au nakita meu cakava eso na ka ena vuku ni noqu gagadre ga vakatamata, meu kaya “Io, io” oti au kaya tale “Sega, sega”? 18 Ni daudina na Kalou, keitou na sega gona ni vakaio, oti me keitou vakasega tale. 19 E “io” ga na “io” vua na Luve ni Kalou, o Karisito Jisu. E sega ni “io” me qai “sega” tale, o koya keitou vunautaka vei kemuni, o yau, o Silivenuse,* kei Timoci.+ 20 Se mani levu vakacava na ka e yalataka na Kalou, era “io” kece ena vuku i luvena.+ O koya gona, ena vukuna tale ga e tukuni kina na “Emeni” vua na Kalou,+ me vakalagilagi kina ena vukuda. 21 Na Kalou ga e vakadeitaka ni o kemuni kei keitou eda nei Karisito, e lumuti keda tale ga.+ 22 Sa solia tale ga vei keda na ivakadei+ kei na ivakatakilakila ni ka me muri mai, oya ni sobuta na lomada na yalo tabu.+

23 Au kaciva na Kalou me noqu ivakadinadina. Au se sega ni lako yani i Korinica niu sega ni vinakata moni rarawa vakalevu. 24 Keitou sega ni lewa na nomuni vakabauta,+ keitou nomuni itokani vakacakacaka ga moni marau kina, ni oni dei tiko ga ena vuku ni nomuni vakabauta.