TIKO VOLI MAI NA LEKUTU

1 E qai vosa vei Mosese o Jiova ena valelaca ni veitavaki,+ ena vanua talasiga mai Saineai,+ ena imatai ni siga ni ikarua ni vula, ena ikarua ni yabaki, nira sa biubiu mai Ijipita+ na Isireli. E kaya: 2 “Mo wiliki+ ira yadudua na isoqosoqo taucoko ni Isireli,* me vaka na nodra vuvale, me vaka na nodra mataqali, me vaka na iwiliwili ni yacadra na tagane kece. 3 O iko kei Eroni mo drau volayacataki ira me vaka na nodra ilawalawa,* o ira kece era yabaki 20 lako cake,+ e rawa nira curu ena mataivalu ni Isireli.

4 “Me tomani kemudrau e dua na turaga mai na yavusa yadua, eratou iliuliu ni mataqali yadua i tamadratou.+ 5 Qo na yacadratou na turaga eratou na tu kei kemudrau: o Ilisuri+ na luvei Siteuri mai na yavusa i Rupeni, 6 o Silumieli+ na luvei Surisatai mai na yavusa i Simioni, 7 o Nasoni+ na luvei Aminatapi mai na yavusa i Juta, 8 o Nicaneli+ na luvei Suari mai na yavusa i Isakari, 9 o Iliapi+ na luvei Eloni mai na yavusa i Sepuloni, 10 vei ira na luvei Josefa: o Ilisama na luvei Amiute mai na yavusa i Ifireimi+ kei Kamelieli na luvei Pitasuri mai na yavusa i Manasa, 11 o Epitani+ na luvei Kitionai mai na yavusa i Penijamini, 12 o Eieseri+ na luvei Amisatai mai na yavusa i Tani, 13 o Pakieli+ na luvei Okirani mai na yavusa i Aseri, 14 o Eliasafi+ na luvei Tiueli mai na yavusa i Kata, 15 kei Eira+ na luvei Enani mai na yavusa i Nafitalai. 16 Qo o iratou na digitaki mai na isoqosoqo. Eratou turaga+ ena yavusa i tamadratou, eratou iliuliu ni veiudolu ni Isireli.”+

17 Erau qai kauti ratou mai na turaga qori o Mosese kei Eroni, ni sa kacivaki mai na yacadratou. 18 Eratou soqoni ira kece na isoqosoqo ena imatai ni siga ni ikarua ni vula, me volai yadudua kina na yacadra, me vaka na nodra vuvale kei na nodra mataqali, era yabaki 20 lako cake,+ 19 me vaka e vakaroti Mosese kina o Jiova. E volayacataki ira gona o koya ena vanua talasiga mai Saineai.+

20 O ira na luvei Rupeni, na kawa ni ulumatua+ i Isireli, e volai na yacadra, me vaka na nodra vuvale, kei na nodra mataqali. Era wili yadudua na tagane kece era yabaki 20 lako cake era rawa ni curu ena mataivalu, 21 na kedra iwiliwili na volayacataki mai na yavusa i Rupeni e 46,500.

22 O ira na kawa i Simioni+ e volai na yacadra, me vaka na nodra vuvale kei na nodra mataqali. Era wili yadudua na tagane kece era yabaki 20 lako cake era rawa ni curu ena mataivalu, 23 na kedra iwiliwili na volayacataki mai na yavusa i Simioni e 59,300.

24 O ira na kawa i Kata+ e volai na yacadra, me vaka na nodra vuvale kei na nodra mataqali. Era wili na tagane kece era yabaki 20 lako cake era rawa ni curu ena mataivalu, 25 na kedra iwiliwili na volayacataki mai na yavusa i Kata e 45,650.

26 O ira na kawa i Juta+ e volai na yacadra, me vaka na nodra vuvale kei na nodra mataqali. Era wili na tagane kece era yabaki 20 lako cake era rawa ni curu ena mataivalu, 27 na kedra iwiliwili na volayacataki mai na yavusa i Juta e 74,600.

28 O ira na kawa i Isakari+ e volai na yacadra, me vaka na nodra vuvale kei na nodra mataqali. Era wili na tagane kece era yabaki 20 lako cake era rawa ni curu ena mataivalu, 29 na kedra iwiliwili na volayacataki mai na yavusa i Isakari e 54,400.

30 O ira na kawa i Sepuloni+ e volai na yacadra, me vaka na nodra vuvale kei na nodra mataqali. Era wili o ira kece na tagane era yabaki 20 lako cake era rawa ni curu ena mataivalu, 31 na kedra iwiliwili na volayacataki mai na yavusa i Sepuloni e 57,400.

32 O ira na kawa i Josefa e volai na yacadra era luvei Ifireimi,+ me vaka na nodra vuvale kei na nodra mataqali. Era wili o ira kece na tagane era yabaki 20 lako cake era rawa ni curu ena mataivalu, 33 na kedra iwiliwili na volayacataki mai na yavusa i Ifireimi e 40,500.

34 O ira na kawa i Manasa+ e volai na yacadra, me vaka na nodra vuvale kei na nodra mataqali. Era wili o ira kece na tagane era yabaki 20 lako cake era rawa ni curu ena mataivalu, 35 na kedra iwiliwili na volayacataki mai na yavusa i Manasa e 32,200.

36 O ira na kawa i Penijamini+ e volai na yacadra, me vaka na nodra vuvale kei na nodra mataqali. Era wili o ira kece na tagane era yabaki 20 lako cake era rawa ni curu ena mataivalu, 37 na kedra iwiliwili na volayacataki mai na yavusa i Penijamini e 35,400.

38 O ira na kawa i Tani+ e volai na yacadra, me vaka na nodra vuvale kei na nodra mataqali. Era wili o ira kece na tagane era yabaki 20 lako cake era rawa ni curu ena mataivalu, 39 na kedra iwiliwili na volayacataki mai na yavusa i Tani e 62,700.

40 O ira na kawa i Aseri+ e volai na yacadra, me vaka na nodra vuvale kei na nodra mataqali. Era wili o ira kece na tagane era yabaki 20 lako cake era rawa ni curu ena mataivalu, 41 na kedra iwiliwili na volayacataki mai na yavusa i Aseri e 41,500.

42 O ira na kawa i Nafitalai+ e volai na yacadra, me vaka na nodra vuvale kei na nodra mataqali. Era wili o ira kece na tagane era yabaki 20 lako cake era rawa ni curu ena mataivalu, 43 na kedra iwiliwili na volayacataki mai na yavusa i Nafitalai e 53,400.

44 Qo o ira e volayacataka o Mosese, Eroni, kei ratou na le 12 na turaga e Isireli, eratou dui matataka na nodratou mataqali. 45 Era volayacataki na Isireli kece ena nodra mataqali, era yabaki 20 lako cake era rawa ni curu ena mataivalu ni Isireli, 46 na kedra iwiliwili kece na volayacataki e 603,550.+

47 Ia o ira ga na Livai+ era sega ni volayacataki kei ira na kena vo, ena yavusa i nodra qase.+ 48 E mani tukuna vei Mosese o Jiova: 49 “O ira ga na yavusa i Livai me kua ni volai na yacadra, me kua tale ga ni okati na kedra iwiliwili kei ira na vo ni Isireli.+ 50 Mo lesi ira na Livai mera raica na valeniveitavaki ni iVakadinadina,+ na kena iyaya taucoko ni veiqaravi, kei na ka kece ga e tu kina.+ Era na veikauyaka na valeniveitavaki kei na kena iyaya+ kece, era na veiqaravi kina,+ era na qai keba wavokita na valeniveitavaki.+ 51 Ni tokitaki na valeniveitavaki, o ira ga na Livai era na biuta sobu,+ ia ni vakaduri tale na valeniveitavaki, o ira ga na Livai era na vakaduria. Ke torova na valeniveitavaki e dua e sega ni vakadonui,* me vakamatei+ sara ga.

52 “O ira kece na Isireli mera birika na nodra valelaca ena keba era lesi kina, na tamata yadua ena nona iwasewase*+ ni tolu na yavusa, me vaka na nodra ilawalawa.* 53 Ia o ira na kawa i Livai mera birika na nodra valelaca me wavokita na valeniveitavaki ni iVakadinadina, mera kua kina ni cudruvi na isoqosoqo ni Isireli,+ me nodra itavi tale ga na Livai na qaravi ni valeniveitavaki ni iVakadinadina.”+

54 Era cakava na Isireli na ka kece e vakaroti Mosese kina o Jiova. Era cakava sara ga na ka e tukuni vei ira.

2 E qai kaya o Jiova vei Mosese kei Eroni: 2 “Mera keba na Isireli ena vanua e lesi ina nodra iwasewase ni tolu na yavusa,+ na tamata yadua me volekata na ivakatakilakila ni nona mataqali. Mera keba wavoki, mera qara ina valelaca ni veitavaki.

3 “Era na keba ena yasana ina tokalau donuya na icabecabe ni siga na tolu na yavusa ena keba i Juta, me vaka na nodra ilawalawa,* ia o Nasoni+ na luvei Aminatapi ena liutaki ira na luvei Juta. 4 Na iwiliwili ni nona mataivalu era volayacataki e 74,600.+ 5 Ena keba e yasana na yavusa i Isakari, ia o Nicaneli+ na luvei Suari ena liutaki ira na luvei Isakari. 6 Na iwiliwili ni nona mataivalu era volayacataki e 54,400.+ 7 Tarava na yavusa i Sepuloni, ia o Iliapi+ na luvei Eloni ena liutaki ira na luvei Sepuloni. 8 Na iwiliwili ni nona mataivalu era volayacataki e 57,400.+

9 “Na iwiliwili kece era volayacataki ena mataivalu ni keba i Juta e 186,400. O ira qo mera tokitaka duadua e liu+ nodra keba.

10 “Ena tiko ena yasana vaka ina ceva na tolu na yavusa ena keba i Rupeni,+ me vaka na nodra ilawalawa,* ia o Ilisuri+ na luvei Siteuri ena liutaki ira na luvei Rupeni. 11 Na iwiliwili ni nona mataivalu era volayacataki e 46,500.+ 12 Ena keba e yasana na yavusa i Simioni, ia o Silumieli+ na luvei Surisatai ena liutaki ira na luvei Simioni. 13 Na iwiliwili ni nona mataivalu era volayacataki e 59,300.+ 14 Tarava na yavusa i Kata, ia o Eliasafi+ na luvei Riueli ena liutaki ira na luvei Kata. 15 Na iwiliwili ni nona mataivalu era volayacataki e 45,650.+

16 “Na iwiliwili kece ni mataivalu ni keba i Rupeni era volayacataki e 151,450, o ira qo na ikarua+ ni iwasewase mera tokitaka na nodra keba.

17 “Ni tokitaki na valelaca ni veitavaki,+ ena tiko ena lomadonu ni keba kece na nodra keba na Livai.

“Mera dau lako ena ituvatuva vata ga era dau keba kina,+ mera dui tu ga ena nodra vanua, me vaka na nodra iwasewase ni tolu na yavusa.

18 “Ena tiko ena yasana vaka ina ra na tolu na yavusa ena keba i Ifireimi, me vaka na nodra ilawalawa,* ia o Ilisama+ na luvei Amiute ena liutaki ira na luvei Ifireimi. 19 Na iwiliwili ni nona mataivalu era volayacataki e 40,500.+ 20 Ena keba e yasana na yavusa i Manasa,+ ia o Kamelieli+ na luvei Pitasuri ena liutaki ira na luvei Manasa. 21 Na iwiliwili ni nona mataivalu era volayacataki e 32,200.+ 22 Tarava na yavusa i Penijamini, ia o Epitani+ na luvei Kitionai ena liutaki ira na luvei Penijamini. 23 Na iwiliwili ni nona mataivalu era volayacataki e 35,400.+

24 “Na iwiliwili kece ni mataivalu i Ifireimi era volayacataki e 108,100, o ira qo na ikatolu+ ni iwasewase mera tokitaka na nodra keba.

25 “Ena tiko ena yasana vaka ina vualiku na tolu na yavusa ena keba i Tani, me vaka na nodra ilawalawa,* ia o Eieseri+ na luvei Amisatai ena liutaki ira na luvei Tani. 26 Na iwiliwili ni nona mataivalu era volayacataki e 62,700.+ 27 Ena keba e yasana na yavusa i Aseri, ia o Pakieli+ na luvei Okirani ena liutaki ira na luvei Aseri. 28 Na iwiliwili ni nona mataivalu era volayacataki e 41,500.+ 29 Tarava na yavusa i Nafitalai, o Eira+ na luvei Enani ena liutaki ira na luvei Nafitalai. 30 Na iwiliwili ni nona mataivalu era volayacataki e 53,400.+

31 “Na iwiliwili kece ni mataivalu i Tani era volayacataki e 157,600. O ira qo era na muri+ duadua nira tokitaka na nodra keba, me vaka na nodra iwasewase ni tolu na yavusa.”

32 Qo o ira kece na Isireli era volayacataki ena nodra mataqali, na kedra iwiliwili kece na volayacataki ena keba me baleta na mataivalu e 603,550.+ 33 Ia o ira na Livai era sega ni volayacataki+ kei ira na vo ni Isireli,+ me vaka e vakarota o Jiova vei Mosese. 34 Era cakava na Isireli na ka kece e vakaroti Mosese kina o Jiova. Qo na iwalewale ni nodra dau keba ena nodra iwasewase ni tolu na yavusa+ kei na nodra tokitaka nodra keba,+ o ira yadua me vaka na nodra vuvale me vaka tale ga na nodra mataqali.

3 Qo na iyatukawa* i Eroni kei Mosese ena siga e vosa kina o Jiova vei Mosese ena Ulu i Saineai.+ 2 Qo na yacadratou na luvei Eroni: o Netapi e ulumatua, o Epaiu,+ o Eliesa,+ kei Icama.+ 3 O iratou qo na luvei Eroni, eratou bete lumuti, eratou buli* me ratou veiqaravi vakabete.+ 4 Ia erau mate ena mata i Jiova o Netapi kei Epaiu ni rau cabora ena mata i Jiova+ na qilaiso waqa e sega ni vakadonui, ena vanua talasiga kei Saineai, a sega tale ga na luvedrau tagane. Ia o Eliesa+ kei Icama+ erau veiqaravi tiko ga vakabete kei Eroni na tamadrau.

5 E kaya vei Mosese o Jiova: 6 “Kauti ira mai liu na yavusa i Livai,+ mera duri ena mata i Eroni na bete, era na qai veiqaravi+ vua. 7 Mera vakayacora na nodra itavi vua kei na isoqosoqo taucoko ena mata ni valelaca ni veitavaki, ena nodra qarava tiko na cakacaka e vauca na valeniveitavaki. 8 Mera qarava na iyaya+ kece ni valelaca ni veitavaki, mera vakayacora tale ga na nodra itavi vei ira na Isireli nira qarava tiko na cakacaka e vauca na valeniveitavaki.+ 9 Mo soli ira na Livai vei Eroni kei rau na luvena. O ira qo era isolisoli, era solia vua na Isireli.+ 10 Mo lesi Eroni kei rau na luvena me ratou vakayacora na nodratou itavi+ vakabete, ke toro yani e dua e sega ni vakadonui,* me vakamatei.”+

11 E kaya tale o Jiova vei Mosese: 12 “Ia o yau, raica! Au kauti ira na Livai mai na kedra maliwa na Isireli me isosomi ni nodra ulumatua* kece na Isireli,+ era na qai noqu na Livai. 13 Era noqu na ulumatua kece.+ Ena siga au mokuta kina na ulumatua kece ena vanua o Ijipita,+ au vakatabuya mera noqu na ulumatua kece ni Isireli, mai na tamata ina manumanu.+ E dodonu mera noqu. O yau o Jiova.”

14 E kaya tale o Jiova vei Mosese ena vanua talasiga kei Saineai:+ 15 “Volayacataki ira na luvei Livai me vaka na nodra mataqali kei na nodra vuvale. Mo volayacataki ira kece na tagane era vula dua lako cake.”+ 16 E volayacataki ira o Mosese me vaka e tukuna o Jiova, me vaka sara ga e vakaroti vua. 17 Qo na yacadratou na luvei Livai: O Kerisoni, o Koaca, kei Mirari.+

18 Qo na yacadrau na luvei Kerisoni me vaka na nodrau vuvale: O Lipini kei Semeai.+

19 O iratou na luvei Koaca me vaka na nodratou vuvale o Amirami, Isiari, Epironi, kei Usieli.+

20 O rau na luvei Mirari me vaka na nodrau vuvale o Mali+ kei Musi.+

Qo na nodra vuvale na Livai, me vaka na nodra mataqali.

21 Era cadra mai vei Kerisoni na vuvale nei Lipini+ kei na vuvale nei Semeai. Qo gona na nodra vuvale na Kerisoni. 22 Na iwiliwili kece ni tagane vula dua lako cake era volayacataki e 7,500.+ 23 Era keba toka na nodra vuvale na Kerisoni mai na daku ni valeniveitavaki+ ena yasana donuya na ra. 24 Na nodra turaga ni mataqali na Kerisoni, o Eliasafi na luvei Laeli. 25 Na nodra itavi na luvei Kerisoni+ ena valelaca ni veitavaki mera qarava na valeniveitavaki kei na valelaca,+ na kena iubi,+ na ilati*+ ni icurucuru ni valelaca ni veitavaki, 26 na ilatilati+ ni rara, na ilati*+ ni icurucuru ni rara e wavokita na valeniveitavaki kei na icabocabonisoro, kei na wa ni valelaca, kei na cakacaka kece e vauca na itavi qori.

27 Era cadra mai vei Koaca na nodra vuvale na Amirami, na nodra vuvale na Isiari, na nodra vuvale na Epironi, kei na nodra vuvale na Usieli. Qo na nodra vuvale na Koaca.+ 28 Era le 8,600 taucoko na tagane vula dua lako cake, qai nodra itavi mera qarava na vanua tabu.+ 29 Era keba toka vaka ena ceva ni valeniveitavaki+ na vuvale na Koaca. 30 Na nodra turaga ni mataqali na vuvale i Koaca o Elisafani na luvei Usieli.+ 31 Na nodra itavi mera qarava na Kato,+ na teveli,+ na itutu ni cina,+ na icabocabonisoro,+ na iyaya+ e taurivaki ena veiqaravi ena vanua tabu, na ilati,*+ kei na cakacaka kece e vauca na itavi qori.+

32 Na nodra iliuliu na turaga ni yavusa i Livai o Eliesa+ na luvei Eroni na bete, e liutaki ira kece na qarava na cakacaka ni vanua tabu.

33 Era cadra mai vei Mirari na nodra vuvale na Mali kei na nodra vuvale na Musi. Qo o rau na vuvale i Mirari.+ 34 Na iwiliwili kece ni tagane mai na vula dua lako cake era volayacataki e 6,200.+ 35 Na nodra turaga ni mataqali na vuvale na Mirari, o Surieli na luvei Epaieli. Era keba toka ena vualiku ni valeniveitavaki.+ 36 Na nodra itavi na luvei Mirari mera raica na feremi+ ni valeniveitavaki, na kau balavu me ivakadei+ kei na duru,+ na veleti e sivi vakalomana, na kena iyaya+ kece, kei na cakacaka kece e taurivaki kina,+ 37 kei na duru kece era wavolita na rara, na veleti e sivi vakalomana,+ na pini ni valelaca, kei na wa ni valelaca.

38 O iratou na keba ena mata ni valeniveitavaki ena tokalau, ena mata ni valelaca ni veitavaki ena yasana e qara ina icabecabe ni siga, o Mosese, Eroni kei rau na luvena. Eratou na qarava na cakacaka ni tikina tabu, ni qo e nodratou itavi ena vukudra na Isireli. Ke toro yani e dua e sega ni vakadonui,* me vakamatei.+

39 O ira kece na Livai era vula dua lako cake, erau volayacataka o Mosese kei Eroni me vaka na nodra vuvale ena ivakaro i Jiova, era le 22,000 na tagane.

40 E qai kaya vei Mosese o Jiova: “Volayacataki ira kece na ulumatua tagane ni Isireli vula dua lako cake,+ wiliki ira, qai vola na yacadra. 41 Mo tauri ira na Livai mera noqu—o yau o Jiova—me isosomi ni nodra ulumatua kece na Isireli,+ qai kauta na nodra manumanu na Livai me isosomi ni nodra manumanu kece na Isireli+ era sucu mai e liu.” 42 Sa qai volayacataka na nodra ulumatua kece na Isireli o Mosese, me vaka ga e vakaroti koya kina o Jiova. 43 Na iwiliwili kece ni ulumatua tagane era volayacataki mai na vula dua lako cake e 22,273.

44 E tukuna tale vei Mosese o Jiova: 45 “Mo tauri ira na Livai me isosomi ni nodra ulumatua kece na Isireli, taura tale ga na nodra manumanu na Livai me isosomi ni nodra manumanu na Isireli, mera qai noqu na Livai. O yau o Jiova. 46 Na kedra iwiliwili na ulumatua tagane ni Isireli e sivia na kedra iwiliwili na Livai+ ena 273, mo taura mai me kedra ivoli yadudua+ 47 e lima na sikeli* vua na tamata yadua,+ me vaka na ivakarau tudei ni sikeli ena vanua tabu.* E dua na sikeli e 20 na kera.*+ 48 Mo solia vei Eroni kei ira na luvena na ilavo e vakarautaki me kedra ivoli na Isireli era sivia na kedra iwiliwili.” 49 Mani taura o Mosese na ilavo e vakarautaki me kedra ivoli na Isireli mai vei ira e sivia na kedra iwiliwili na Livai. 50 E taura mai na ilavo vei ira na ulumatua ni Isireli, e 1,365 na sikeli, me vaka na ivakarau tudei ni sikeli ena vanua tabu. 51 E qai solia o Mosese na ilavo me kedra ivoli vei Eroni kei ira na luvena, me vaka ga na vosa* i Jiova, me vaka ga e vakaroti Mosese kina o Jiova.

4 E kaya tale vei Mosese kei Eroni o Jiova: 2 “Mera wili na luvei Koaca+ ena kedra maliwa na yavusa i Livai, me vaka na nodra vuvale kei na nodra mataqali, 3 o ira kece na yabaki 30+ ina 50+ ena ilawalawa e lesi mera veiqaravi ena valelaca ni veitavaki.+

4 “Qo na nodra itavi na luvei Koaca ena valelaca ni veitavaki.+ E dua na itavi tabu sara: 5 Ena gauna kece e vakarau toso kina na keba, me curu yani o Eroni kei rau* na luvena, me ratou luvata na ilati,+ ratou qai ubia kina na kato+ ni iVakadinadina. 6 Eratou na ubia na kato ena kulinisili, tarava yani e dua na uma isulu karakarawa, qai curumaki na kena ivua+ e dau colati kina.

7 “Me ratou ubia na teveli ni madrai dauraici+ ena isulu karakarawa ratou qai biuta kina na veleti, na bilo, na boulu, kei na itakitaki ni isoro livi,+ me tu ga ena teveli na madrai+ e dau cabori. 8 Me ratou ubia na ka kece qori ena isulu kulakula, oti me ubi tale ena iubi kulinisili, qai curumaki na kena ivua+ e dau kau kina. 9 Me ratou taura mai e dua tale na isulu karakarawa me ubi kina na cina+ kei na kena itutu,+ na kena iqamu ni vauvau ni cina, na itawatawa ni bukawaqa,+ kei na itawatawa kece ni waiwai me waqa tiko ga kina na cina. 10 Eratou na ologa na itutu ni cina kei na kena iyaya kece ena kulinisili, qai biuta ena dua na vata me dau kau kina. 11 Eratou na ubia tale ga na icabocabo+ koula ena isulu karakarawa, oti ena ubi tale ena kulinisili, qai curumaki na kena ivua+ e dau kau kina. 12 Eratou na taura na iyaya+ kece e dau vakayagataki nira veiqaravi ena vanua tabu qai ologa ena isulu karakarawa, ena olo tale ena kulinisili qai biu ena dua na vata me dau kau kina.

13 “Me ratou kauta laivi na dravusa* mai na icabocabo,+ qai ubia na icabocabo ena isulu e caka mai na vutinisipi lokaloka. 14 Eratou na biuta e delana na kena iyaya kece e dau vakayagataki ni ratou vakacaboisoro: na itawatawa ni bukawaqa, na icula, na isivi, na boulu, na iyaya kece ni icabocabo,+ oti me ratou ubia tale ena kulinisili, qai curumaki na kena ivua+ e dau kau kina.

15 “Me ratou qai ubia vakaoti o Eroni kei rau na luvena na vanua tabu+ kei na iyaya kece ni vanua tabu ni sa vakarau toso na ilakolako. Oti era na curu yani na luvei Koaca mera kauta,+ ia era na sega ni tara na vanua tabu de ra na mate.+ Qo na nodra itavi* na luvei Koaca me baleta na valelaca ni veitavaki.

16 “Na itavi nei Eliesa+ na luvei Eroni na bete me raica na waiwai ni cina,+ na ka boivinaka e dau vakamai,+ na isoro kakana e dau cabori, kei na waiwai ni veilumuti.+ E nona itavi me raica na valeniveitavaki kei na ka kece e tu kina, okati kina na vanua tabu kei na kena iyaya.”

17 E kaya tale vei Mosese kei Eroni o Jiova: 18 “Me kua ni kawaboko na nodra yavusa na vuvale na Koaca+ mai na kedra maliwa na Livai. 19 Qo na ka mo cakava mera bula tiko ga, mera kua kina ni mate nira torova na veika tabu sara.+ Me ratou na curu yani o Eroni kei rau na luvena, me ratou qai lesia vei ira na nodra dui cakacaka kei na ka mera kauta. 20 Mera kua ni curu yani qai raica mada ga vakalailai na veika tabu, de ra na mate.”+

21 E qai tukuna vei Mosese o Jiova: 22 “Mera wili na luvei Kerisoni,+ me vaka na nodra mataqali kei na nodra vuvale. 23 Mo volayacataki ira kece na yabaki 30 ina 50 ena ilawalawa e lesi mera veiqaravi ena valelaca ni veitavaki. 24 Qo na itavi mera qarava na vuvale na Kerisoni kei na ka mera kauta:+ 25 Era na colata na isulu ni valeniveitavaki+ kei na valelaca ni veitavaki, na kena iubi kei na iubi kulinisili e toka e delana,+ kei na ilati* me icurucuru ni valelaca ni veitavaki,+ 26 na ilatilati ni rara,+ na ilati* ni icurucuru ni rara+ e wavokita na valeniveitavaki kei na icabocabonisoro, na dali ni valelaca kei na kena iyaya kece, kei na ka kece e vakayagataki ena veiqaravi. Qori na itavi mera qarava. 27 Na veiqaravi kece kei na nodra icolacola na Kerisoni+ me veidusimaki kina o Eroni kei rau na luvena, dou na lesia na icolacola kece qo me nodra itavi. 28 Qo na veiqaravi era na vakayacora na vuvale na Kerisoni me baleta na valelaca ni veitavaki,+ ena qai veidusimaki ena nodra itavi o Icama+ na luvei Eroni na bete.

29 “Mera volayacataki tale ga na luvei Mirari,+ me vaka na nodra vuvale kei na nodra mataqali. 30 Mo volayacataki ira na yabaki 30 ina 50, o ira kece ena ilawalawa e lesi mera veiqaravi ena valelaca ni veitavaki. 31 Qo na nodra itavi+ me baleta na nodra veiqaravi ena valelaca ni veitavaki: na feremi+ ni valeniveitavaki, na kau balavu era ivakadei,+ na kena duru+ kei na veleti e sivi vakalomana,+ 32 na duru+ ni rara e wavolita tu, na kedra veleti e sivi vakalomana,+ na pini ni valelaca+ kei na kena wa, na kedra iyaya kece, kei na cakacaka kece e vauca na itavi qori. Dou na lesia yadudua vei ira na yaca ni yaya mera kauta. 33 Qo na nodra itavi na vuvale era luvei Mirari+ me baleta na valelaca ni veitavaki, era na veiqaravi ena veidusimaki i Icama na luvei Eroni na bete.”+

34 Sa qai volayacataki ira na luvei Koaca+ me vaka na nodra vuvale kei na nodra mataqali, o Mosese, o Eroni, kei ratou na iliuliu+ ni isoqosoqo, 35 o ira kece na yabaki 30 ina 50 ena ilawalawa e lesi mera veiqaravi ena valelaca ni veitavaki.+ 36 Era le 2,750+ taucoko na volayacataki me vaka na nodra vuvale. 37 Qo o ira na volayacataki mai na vuvale i Koaca, o ira kece na veiqaravi ena valelaca ni veitavaki. E qai vola na kedra iwiliwili o Mosese kei Eroni me vaka e vakarota o Jiova ena gusu i Mosese.+

38 O ira na luvei Kerisoni+ era volayacataki me vaka na nodra vuvale kei na nodra mataqali, 39 o ira kece na yabaki 30 ina 50 ena ilawalawa e lesi mera veiqaravi ena valelaca ni veitavaki. 40 Era le 2,630+ taucoko era volayacataki me vaka na nodra vuvale kei na nodra mataqali. 41 Qo na volayaca e caka vei ira na vuvale era luvei Kerisoni, o ira kece na veiqaravi ena valelaca ni veitavaki. E volayacataki ira o Mosese kei Eroni me vaka e vakarota o Jiova.+

42 O ira na luvei Mirari era volayacataki me vaka na nodra vuvale kei na nodra mataqali, 43 o ira kece na yabaki 30 ina 50 ena ilawalawa e lesi mera veiqaravi ena valelaca ni veitavaki.+ 44 Era le 3,200+ taucoko na volayacataki me vaka na nodra vuvale. 45 Qo na volayaca e caka vei ira na vuvale era luvei Mirari, e volayacataki ira o Mosese kei Eroni, me vaka e vakarota o Jiova ena gusu i Mosese.+

46 E volayacataki ira kece na Livai me vaka na nodra vuvale kei na nodra mataqali o Mosese, o Eroni, kei ratou na turaga ni Isireli eratou veiliutaki, 47 era yabaki 30 ina 50, ra qai lesi kece mera veiqaravi, mera colata tale ga na icolacola ena valelaca ni veitavaki.+ 48 Era le 8,580+ taucoko na volayacataki. 49 Me vaka e vakarota o Jiova ena gusu i Mosese, era volayacataki me vaka na itavi era lesi kina kei na nodra icolacola. Era volayacataki me vaka e vakaroti Mosese kina o Jiova.

5 E tukuna tale vei Mosese o Jiova: 2 “Vakaroti ira na Isireli mera vakatala tani mai na keba na vukavuka kece,+ kei ira kece e lako tani mai vei ira e dua na ka,+ kei ira kece era vakadukadukalitaki ena yago ni tamata mate.+ 3 Moni vakatalai ira se ra tagane se ra yalewa. Moni vakatalai ira ina taudaku ni keba, me kua ni vakadukadukalitaki+ kina na nodra keba, o ira au tiko*+ ena kedra maliwa.” 4 Era cakava qori na Isireli ra qai vakatalai ira ina taudaku ni keba. Era cakava sara ga na Isireli na ka e tukuna o Jiova vei Mosese.

5 E kaya tale vei Mosese o Jiova: 6 “Tukuna vei ira na Isireli, ‘Ke dua na tagane se yalewa e valavala ca qai sega ni yalodina vei Jiova, sa cala+ na tamata oya. 7 Me vakatusa+ o koya* na valavala ca e sa* cakava, me vakasuka tale ga na ka kece e lavaki me isau ni nona cala qai taqa tale e cake e dua na ikalima,+ me solia qori vei koya a cala kina. 8 Ke sega na wekana voleka me taura na ka e saumi, me vakasukai vei Jiova, ena qai nona na bete, me ikuri ni tamanisipi ni veisorovaki me sorovaki koya kina e cala.+

9 “‘Na cau tabu kece+ era solia na Isireli vua na bete, sa na nona.+ 10 Na veika vakatabui ni tamata yadua, ena nona tiko ga. Na ka ga era dui solia vua na bete, ena nona na bete.’”

11 E kaya tale vei Mosese o Jiova: 12 “Vosa vei ira na Isireli qai tukuna vei ira, ‘Qo na ka me caka ke lako sese e dua na yalewa qai sega ni yalodina vei watina, 13 e veiyacovi kei na dua tale na tagane,+ a sega ni kila o watina qai sega tu ga ni kilai, mani vakadukadukalitaki koya, ia e sega ni dua na ivakadinadina ni ka e cakava, e sega tale ga ni tobo: 14 Se mani vuvu o tagane qai lomatarotarotaka na yalodina i watina, ni sa vakadukadukalitaki koya, se vuvu o tagane qai lomatarotarotaka na yalodina i watina, ni se sega ni vakadukadukalitaki koya o yalewa, 15 me qai kauti watina vua na bete o tagane, me kauta tale ga yani e dua na ikatini na efa* falawa varile me nona isoro o yalewa. Me kua ni vakawaiwaitaka se biuta kina na drega boivinaka ni qori na isoro kakana ni vuvu, na isoro kakana me ivakananumi ni cala.

16 “‘Ena kauti yalewa yani na bete me lai vakaduri koya ena mata i Jiova.+ 17 Ena tawana na wai vakatabui na bete ena dua na itawatawa qele, ena taura eso na kuvuniqele mai na fuloa ni valeniveitavaki qai biuta ena wai. 18 Ena qai vakaduri yalewa o bete ena mata i Jiova, e sereka na ulu i yalewa, e biuta ena qeteqeteniligana na isoro kakana me ivakananumi, oya na isoro kakana ni vuvu,+ ena tiko ena liga ni bete na waigaga e vu ni veicudruvi.+

19 “‘Ena vakavuna o bete me bubului o yalewa, qai kaya vua: “Ke o sega dina ni veiyacovi kei na dua tale na tagane ni o se vakarurugi tu ena lewa+ i watimu, o sega tale ga ni lako sese mo dukadukali kina, mo galala mada ga mai na revurevu ni wai gaga qo e vu ni veicudruvi. 20 Ia ke o lako sese dina ni o se vakarurugi tu ena lewa i watimu, ni o vakadukadukalitaki iko, o qai veiyacovi kei na dua tale na tagane,+ sega ni o watimu—” 21 Ena qai vakavuna o bete me bubului o yalewa, ena vosa ni bubului e okati kina na veicudruvi, ena qai kaya vua na yalewa na bete: “Me vakavuna o Jiova mo ka ni veicudruvi kei na vosa ni bubului vei ira na nomu tamata, ni vakavuna o Jiova me lutu* na sagamu,* me vuce tale ga na ketemu. 22 Ena curu yani ena nomu wawa na wai e vu ni veicudruvi qo, me vuce kina na ketemu, qai vakavuna me lutu* na sagamu.*” Me kaya sara o yalewa: “Emeni! Emeni!”*

23 “‘Me qai vola na vosa ni veicudruvi qo na bete ena ivola, oti me savata laivi ena wai gaga. 24 Ena qai vagunuvi yalewa ena wai gaga e vu ni veicudruvi, me curumi yalewa kina na wai e vu ni veicudruvi qai veivagagai. 25 Me qai taura mai na liga i yalewa na isoro kakana ni vuvu+ na bete qai yalovaka ena mata i Jiova, ena qai kauta voleka yani ina icabocabo. 26 Ena kauta na bete e dua na iluku na isoro kakana me isoro ni ivakananumi, me qai vakama ena icabocabo+ me kubou cake, oti ena vagunuvi yalewa ena wai. 27 Ni sa vagunuvi koya oti, ke vakadukadukalitaki koya o yalewa qai sega ni yalodina vei watina ena dua na ka e cakava, ena curumi koya na wai e vu ni veicudruvi qai veivagagai, ena vuce na ketena, ena lutu* na sagana,* ena cudruvi o koya ena kedra maliwa na kainona. 28 Ke a sega ni vakadukadukalitaki koya o yalewa qai savasava, ena galala mai na itotogi va qori, ena rawa ni kunekune qai vakaluveni.

29 “‘Qo na lawa ni vuvu,+ ni lako sese e dua na yalewa qai vakadukadukalitaki koya ni se vakarurugi tu ena lewa i watina, 30 se ni vuvu e dua na tagane qai kasamitaki watina ni sega ni yalodina, me kauti watina me lai tucake ena mata i Jiova, me qai vakayacora na lawa kece qo na bete vei yalewa. 31 Ena galala mai na cala o tagane, ia ena totogitaki o watina ena vuku ni nona cala.’”

6 E vosa tale vei Mosese o Jiova qai kaya: 2 “Vosa vei ira na Isireli qai tukuna, ‘Ke vakayacora e dua na tagane se yalewa e dua na bubului bibi vei Jiova me bula vakaNasaraiti,*+ 3 me vakatabui koya mai na waini kei na alakaolo tale eso. Me kua ni gunuva na viniqa ni waini se viniqa ni alakaolo cava ga.+ Me kua ni gunuva na wai cava ga e caka mai na vuanivaini, se kania na vuanivaini, se mani beti ga se sigani. 4 Ena siga kece e Nasaraiti voli kina, me kua ni kania e dua na ka e caka mai na vunivaini, mai na vuanivaini vou yaco sara ina kulina.

5 “‘Ena siga kece e bubuluitaka kina me Nasaraiti, me kua sara ni tara na uluna na itoro.+ Me vakatabui tiko o koya ni vakatubuulu tiko me yacova na siga sa vakacavari kina nona tawasei koya vei Jiova. 6 Me kua ni torova* e dua na tamata sa mate tu ena siga kece e tawasei koya kina vei Jiova. 7 Ke mate mada ga na tamana, se tinana, se tacina se ganena, me kua ni vakadukadukalitaki koya,+ ni toka e uluna na ivakatakilakila ni nona Nasaraiti vua na nona Kalou.

8 “‘Ena siga kece e Nasaraiti voli kina, e vakatabui o koya vei Jiova. 9 Ke mate vakasauri e yasana e dua+ qai vakadukadukalitaka na ulu e ivakatakilakila ni nona tawasei koya vua na Kalou,* me tasia na uluna+ ena siga e vakadeitaka kina nona vakasavasavataki. Me tasia ena ikavitu ni siga. 10 Ia ena ikawalu ni siga, me kauta mai e rua na kukuru se rua na ruve gone vua na bete ena icurucuru ni valelaca ni veitavaki. 11 Ena vakarautaka na bete e dua me isoro ni ivalavala ca kei na dua tale me isoro kama, qai sorovaki koya kina ena vuku ni nona ivalavala ca+ me baleta na tamata sa mate tu. Ena siga oya ena vakatabui kina na uluna. 12 Me vakatabui koya tale vei Jiova me baleta na siga kece ni nona bula vakaNasaraiti, ena kauta yani e dua na luvenisipi tagane yabaki dua me isoro ni cakacala. Ia ena sega ni wili na veisiga sa oti, ni sa vakadukadukalitaka na nona bula vakaNasaraiti.

13 “‘Qo na lawa me baleti koya e Nasaraiti: Ena siga e cava kina nona bula vakaNasaraiti,+ ena kau yani o koya ena icurucuru ni valelaca ni veitavaki. 14 Me cabora e kea vei Jiova na nona isoro: e dua na luvenisipi tagane vinaka yabaki dua me isoro kama,+ dua na lami yalewa vinaka yabaki dua me isoro ni ivalavala ca,+ kei na dua na tamanisipi vinaka me isoro ni veiyaloni,+ 15 e dua na basikete madrai sega ni vakaleveni e buli vaka na mama mai na falawa vinaka sara e vakawaiwaitaki, na madrai mamare sega ni vakaleveni e boro ena waiwai, kei na kedra isoro kakana,+ na kedra isoro livi+ tale ga. 16 Ena cabora qori ena mata i Jiova na bete, ena qai cabora nona isoro ni ivalavala ca kei na nona isoro kama. 17 Ena cabora vei Jiova na tamanisipi me isoro ni veiyaloni kei na basikete madrai sega ni vakaleveni, ena qai cabora na bete na kena isoro kakana+ kei na kena isoro livi.

18 “‘Me qai tasia na Nasaraiti na drauniuluna+ e se bera ni koti* ena icurucuru ni valelaca ni veitavaki, ena kauta na drauniuluna e vakatubura ni bula voli vakaNasaraiti, qai biuta ena buka e waqa tu ena ruku ni isoro ni veiyaloni. 19 Me taura na bete na taba ni tamanisipi e saqa,+ dua na madrai sega ni vakaleveni e buli vaka na mama mai na basikete, kei na dua na madrai mamare sega ni vakaleveni, qai biuta ena qeteqete ni liga i koya na Nasaraiti, ni sa tasia oti na ivakatakilakila ni nona bula vakaNasaraiti. 20 Me qai yalovaka na ka qori na bete me isoro yalovaki ena mata i Jiova.+ E ka tabu oya me kena na bete, wili kina na sarisari ni isoro yalovaki kei na yava e cautaki.+ Sa qai rawa ni gunu waini o koya a Nasaraiti tu.

21 “‘Qo na lawa e vauca na Nasaraiti+ e bubului: Ke bubului o koya qai rawa ni cabora vei Jiova e dua na isoro e sivia na ka e lavaki me baleta nona bula vakaNasaraiti, me cakava sara nona bubului ena vuku ni lawa e vauca nona bula vakaNasaraiti.’”

22 E vosa tale vei Mosese o Jiova, e kaya: 23 “Tukuna vei Eroni kei rau na luvena, ‘Vosa vakalougatataki+ ira va qo na Isireli. Kaya vei ira:

24 “Me vakalougatataki iko+ o Jiova qai maroroi iko.

25 Me serau mada ga vei iko+ na mata i Jiova, me lomani iko tale ga.

26 Me tacake mada ga vei iko na mata i Jiova, me solia tale ga vei iko na vakacegu.”’+

27 Mera vakatoka na yacaqu vei ira na lewe i Isireli,+ meu vakalougatataki ira+ kina.”

7 Ena siga e vakacavara kina o Mosese na vakaduri ni valeniveitavaki,+ e lumuta+ qai vakatabuya vata na kena iyaya kece, na icabocabo kei na kena iyaya kece.+ Ni sa lumuta qai vakatabuya na veika qo,+ 2 eratou qai lai vakacaboisoro na turaga ni Isireli,+ eratou iliuliu ena nodratou mataqali. Qo o iratou na turaga ni yavusa eratou liutaka na volayaca 3 eratou kauta ena mata i Jiova na nodratou isolisoli e ono na kareti vakaiubi kei na 12 na bulumakau tagane, e dua na kareti me nodrau e rua na turaga rau qai yadua na bulumakau tagane, ratou lai vakaraitaka sara ena mata ni valeniveitavaki. 4 E kaya vei Mosese o Jiova: 5 “Mo ciqoma mai vei ira na veika qo, nira na vakayagataki ena veiqaravi ena valelaca ni veitavaki, mo qai solia vei ira na Livai, vei ira yadua me vakatau ena ka e gadrevi ena nodra dui itavi.”

6 E ciqoma o Mosese na kareti kei na bulumakau tagane qai solia sara vei ira na Livai. 7 E solia vei ira na luvei Kerisoni e rua na kareti kei na va na bulumakau tagane, me vaka na ka e gadrevi ena nodra itavi,+ 8 qai solia vei ira na luvei Mirari e va na kareti kei na walu na bulumakau tagane me vaka na ka e gadrevi ena nodra itavi, ena veidusimaki i Icama, na luvei Eroni na bete.+ 9 Ia e sega ni solia e dua na ka vei ira na luvei Koaca ni nodra itavi mera veiqaravi ena vanua tabu,+ ra qai colata tale ga na veika tabu e tabadra.+

10 Eratou kauta yani nodratou isolisoli na turaga me sevutaki*+ kina na icabocabonisoro ena siga e lumuti kina. Ni ratou lai vakaraitaka na turaga ena mata ni icabocabonisoro na nodratou isolisoli, 11 e kaya vei Mosese o Jiova: “Ena vica na siga veitaravi, eratou na kauta yadudua mai e veisiga na turaga na nodratou isolisoli me baleta na sevutaki ni icabocabonisoro.”

12 Ena imatai ni siga e mai vakaraitaka na nona isolisoli o Nasoni+ na luvei Aminatapi mai na yavusa i Juta. 13 E nona isolisoli e dua na disi siliva e 130 na sikeli* na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,*+ erau sinai ruarua ena falawa vinaka sara e vakawaiwaitaki me isoro kakana,+ 14 e dua na bilo* koula e 10 na sikeli na kena bibi, e sinai ena ka boivinaka e dau vakamai, 15 e dua na bulumakau tagane, dua na tamanisipi, kei na dua na lami tagane yabaki dua me isoro kama,+ 16 e dua na luvenime me isoro ni ivalavala ca,+ 17 ia me isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Nasoni na luvei Aminatapi.+

18 Ena ikarua ni siga, e mai vakaraitaka na nona isolisoli o Nicaneli+ na luvei Suari, e nodra turaga na Isakari. 19 E kauta me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ erau sinai ruarua ena falawa vinaka sara e vakawaiwaitaki me isoro kakana,+ 20 e dua na bilo koula e tini na sikeli na kena bibi, e sinai ena ka boivinaka e dau vakamai, 21 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 22 e dua na luvenime me isoro ni ivalavala ca,+ 23 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Nicaneli na luvei Suari.

24 Ena ikatolu ni siga, o Iliapi+ na luvei Eloni, na nodra turaga na luvei Sepuloni, 25 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ erau sinai ruarua ena falawa vinaka sara e vakawaiwaitaki me isoro kakana,+ 26 e dua na bilo koula e 10 na sikeli na kena bibi, e sinai ena ka boivinaka e dau vakamai, 27 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 28 e dua na luvenime me isoro ni ivalavala ca,+ 29 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Iliapi+ na luvei Eloni.

30 Ena ikava ni siga, o Ilisuri+ na luvei Siteuri, na nodra turaga na luvei Rupeni, 31 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 32 e dua na bilo koula e 10 na sikeli na kena bibi, e sinai ena ka boivinaka e dau vakamai, 33 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 34 e dua na luvenime me isoro ni ivalavala ca,+ 35 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Ilisuri+ na luvei Siteuri.

36 Ena ikalima ni siga, o Silumieli+ na luvei Surisatai, na nodra turaga na luvei Simioni, 37 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 38 e dua na bilo koula e 10 na sikeli na kena bibi, e sinai ena ka boivinaka e dau vakamai, 39 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 40 e dua na luvenime me isoro ni ivalavala ca,+ 41 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Silumieli+ na luvei Surisatai.

42 Ena ikaono ni siga, o Eliasafi+ na luvei Tiueli, na nodra turaga na luvei Kata, 43 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 44 e dua na bilo koula e 10 na sikeli na kena bibi, e sinai ena ka boivinaka e dau vakamai, 45 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 46 e dua na luvenime me isoro ni ivalavala ca,+ 47 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Eliasafi+ na luvei Tiueli.

48 Ena ikavitu ni siga, o Ilisama+ na luvei Amiute, na nodra turaga na luvei Ifireimi, 49 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 50 e dua na bilo koula e 10 na sikeli na kena bibi, e sinai ena ka boivinaka e dau vakamai, 51 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 52 e dua na luvenime me isoro ni ivalavala ca,+ 53 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Ilisama+ na luvei Amiute.

54 Ena ikawalu ni siga, o Kamelieli+ na luvei Pitasuri, na nodra turaga na luvei Manasa, 55 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 56 e dua na bilo koula e tini na sikeli na kena bibi, e sinai ena ka boivinaka e dau vakamai, 57 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 58 e dua na luvenime me isoro ni ivalavala ca,+ 59 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Kamelieli+ na luvei Pitasuri.

60 Ena ikaciwa ni siga, o Epitani+ na luvei Kitionai, na nodra turaga+ na luvei Penijamini, 61 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 62 e dua na bilo koula e 10 na sikeli na kena bibi, e sinai ena ka boivinaka e dau vakamai, 63 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 64 e dua na luvenime me isoro ni ivalavala ca,+ 65 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Epitani+ na luvei Kitionai.

66 Ena ikatini ni siga, o Eieseri+ na luvei Amisatai, na nodra turaga na luvei Tani, 67 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 68 e dua na bilo koula e 10 na sikeli na kena bibi, e sinai ena ka boivinaka e dau vakamai, 69 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 70 e dua na luvenime me isoro ni ivalavala ca,+ 71 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Eieseri+ na luvei Amisatai.

72 Ena ika11 ni siga, o Pakieli+ na luvei Okirani, na nodra turaga na luvei Aseri, 73 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 74 e dua na bilo koula e 10 na sikeli na kena bibi, e sinai kina na ka boivinaka e dau vakamai, 75 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 76 e dua na luvenime me isoro ni ivalavala ca,+ 77 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Pakieli+ na luvei Okirani.

78 Ena ika12 ni siga, o Eira+ na luvei Enani, na nodra turaga na luvei Nafitalai, 79 e kauta mai me nona isolisoli e dua na disi siliva e 130 na sikeli na kena bibi kei na dua na boulu siliva e 70 na sikeli na kena bibi, ena ivakarau tudei ni sikeli ena vanua tabu,+ e sinai ruarua ena falawa vinaka sara e vakawaiwaitaki me isoro kakana,+ 80 e dua na bilo koula e 10 na sikeli na kena bibi, e sinai ena ka boivinaka e dau vakamai, 81 e dua na luvenibulumakau tagane, dua na tamanisipi, kei na dua na lami tagane yabaki dua me isoro kama,+ 82 e dua na luvenime me isoro ni ivalavala ca,+ 83 me qai isoro ni veiyaloni+ e rua na bulumakau, lima na tamanisipi, lima na me tagane, kei na lima na lami tagane yabaki dua. Qo na isolisoli i Eira+ na luvei Enani.

84 Qo na isolisoli eratou lai vakaraitaka yani na turaga ni Isireli me sevutaki+ kina na icabocabonisoro ena gauna e lumuti kina: e 12 na disi siliva, 12 na boulu siliva, 12 na bilo koula,+ 85 na disi siliva yadua e 130 na sikeli na kena bibi, kei na boulu siliva yadua e 70 na sikeli na kena bibi, na siliva kece e 2,400 na sikeli na kena bibi, ena ivakarau tudei ni sikeli ena vanua tabu,+ 86 na 12 na bilo koula e sinai ena ka boivinaka, e 10 na sikeli na bibi ni bilo yadua ena ivakarau tudei ni sikeli ena vanua tabu, na koula kece ni bilo e 120 na sikeli na kena levu. 87 Na manumanu kece ni isoro kama e 12 na bulumakau tagane, 12 na tamanisipi, 12 na lami tagane yabaki dua, kei na kena isoro kakana, kei na 12 na luvenime me isoro ni ivalavala ca, 88 ia na manumanu kece e kau yani me isoro ni veiyaloni e 24 na bulumakau tagane, 60 na tamanisipi, 60 na me tagane, kei na 60 na lami tagane yabaki dua. Qo na isolisoli me sevutaki+ kina na icabocabonisoro ni sa lumuti+ oti.

89 Ena gauna kece e curu kina ena valelaca ni veitavaki o Mosese me vosa vua na Kalou,*+ e dau rogoca e dua na domo ni vosa tiko vua mai na dela ni isogo+ ena kato ni iVakadinadina, e dau vosa vua na Kalou mai na kedrau maliwa na jerupi.+

8 E vosa vei Mosese o Jiova, e kaya: 2 “Vosa vei Eroni qai tukuna vua, ‘Na gauna o waqara kina na cina, na vitu na cina qori me vakararamataka na vanua ena mata ni itutu ni cina.’”+ 3 E qai cakava qori o Eroni: E waqara na kena cina me rarama kina na vanua ena mata ni itutu ni cina,+ me vaka e vakaroti Mosese kina o Jiova. 4 Qo na icakacaka ni itutu ni cina: E buli ni tukilaki+ na koula mai na yavana yaco sara ina sena, mai na koula tukilaki. E caka na itutu ni cina me vaka e vakaraitaka vei Mosese o Jiova ena raivotu.+

5 E vosa tale vei Mosese o Jiova, e kaya: 6 “Kauti ira na Livai mai vei ira na Isireli, vakasavasavataki ira.+ 7 Mo vakasavasavataki ira va qo: Kureitaka vei ira na wai e savata laivi na ivalavala ca, mera tasia na yagodra taucoko, mera savata na nodra isulu, ra qai vakasavasavataki ira.+ 8 Era na qai kauta e dua na luvenibulumakau tagane+ kei na falawa vinaka sara e vakawaiwaitaki me isoro kakana,+ mo kauta e dua tale na luvenibulumakau tagane me isoro ni ivalavala ca.+ 9 Mo qai kauti ira na Livai mera lai tu ena mata ni valelaca ni veitavaki, qai kumuni ira na isoqosoqo taucoko ni Isireli.+ 10 Ni o sa kauti ira na Livai mera lai tu ena mata i Jiova, mera tabaki ira na Livai+ ena ligadra o ira na Isireli. 11 Me qai soli* ira na Livai ena mata i Jiova o Eroni, me nodra isoro yalovaki+ na Isireli, me qai nodra itavi mera qarava na cakacaka i Jiova.+

12 “Era na tabaka na Livai na ulu ni bulumakau tagane+ ena ligadra. Oti ya era qai cabora e dua me isoro ni ivalavala ca, dua tale me isoro kama vei Jiova mera sorovaki+ kina na Livai. 13 O na kauti ira na Livai mera lai tu ena mata i Eroni kei rau na luvena, qai soli* ira mera isoro yalovaki vei Jiova. 14 Mo wasei ira tani na Livai mai vei ira na Isireli, era na qai noqu+ na Livai. 15 Oti oya, era na lai veiqaravi ena valelaca ni veitavaki na Livai. Qo na ka mo cakava ni o vakasavasavataki ira qai soli* ira mera isoro yalovaki. 16 O ira qo era isolisoli, era solia vei au na Isireli. Era isosomi ni nodra ulumatua* kece na Isireli,+ au na tauri ira mera noqu. 17 Era noqu na ulumatua kece e Isireli, se ra mani tamata se manumanu.+ Au vakatabui ira mera noqu ena siga au mokuti ira kina na ulumatua kece ni Ijipita.+ 18 Au na tauri ira na Livai me isosomi ni ulumatua kece ni Isireli. 19 Au na soli ira na Livai vei Eroni kei rau na luvena, mera isolisoli mai vei ira na Isireli, mera qarava na itavi ena vukudra na Isireli ena valelaca ni veitavaki,+ ra qai veisorovaki ena vukudra na Isireli, mera kua kina ni totogitaki na Isireli,+ nira torova yani na vanua tabu na lewe i Isireli.”

20 Era cakava qo vei ira na Livai o Mosese, o Eroni, kei ira kece na isoqosoqo ni Isireli. Me vaka ga na ka kece e vakarota o Jiova vei Mosese ena vukudra na Livai, qori sara ga na ka era cakava na Isireli vei ira. 21 Era sa qai vakasavasavataki ira na Livai, era savata tale ga na nodra isulu,+ oti e soli* ira o Eroni mera isoro yalovaki ena mata i Jiova.+ E qai veisorovaki ena vukudra o Eroni me vakasavasavataki ira.+ 22 Oti oya era curu sara na Livai mera veiqaravi ena valelaca ni veitavaki, ena mata i Eroni kei rau na luvena. Me vaka ga na ka e vakarota o Jiova vei Mosese ena vukudra na Livai, qori sara ga na ka era cakava vei ira.

23 E vosa tale o Jiova vei Mosese, e kaya: 24 “Qo e baleti ira na Livai: O koya ga e yabaki 25 lako cake ena lewena na ilawalawa era lai veiqaravi ena valelaca ni veitavaki. 25 Ia ni sa yabaki 50 sa na cegu o koya mai na ilawalawa era veiqaravi, sa na sega tale ni veiqaravi. 26 E rawa ni vukei ira na tacina era qarava tiko na nodra itavi ena valelaca ni veitavaki, me kua ga ni cakava o koya na cakacaka ni veiqaravi e kea. Qo na ka mo cakava ena vukudra na Livai kei na nodra itavi.”+

9 E vosa vei Mosese o Jiova ena vanua talasiga kei Saineai ena imatai ni vula+ ena ikarua ni yabaki nira sa biuta mai na vanua o Ijipita, e kaya: 2 “Mera vakarautaka na Isireli na isoro ni Lakosivia+ ena kena gauna lokuci.+ 3 Moni vakarautaka ena ika14 ni siga ni vula qo ena kena gauna lokuci, ni sa karobo.* Moni vakarautaka me vaka na kena ivakaro kece kei na kena ivakarau tudei kece.”+

4 E mani tukuna o Mosese vei ira na Isireli mera vakarautaka na isoro ni Lakosivia. 5 Era sa qai vakarautaka na isoro ni Lakosivia ena ika14 ni siga ni imatai ni vula, ni sa karobo,* ena vanua talasiga kei Saineai. Me vaka ga na ka kece e vakaroti Mosese kina o Jiova, qori sara ga na ka era cakava na Isireli.

6 Era a tiko eso era sa mai dukadukali nira tara na yagonimate,+ era sega kina ni vakarautaka na isoro ni Lakosivia ena siga oya. Era mani lako yani ena mata i Mosese kei Eroni ena siga+ ya 7 qai kaya vua: “Keimami dukadukali ni keimami tara na yagonimate. Na cava me keimami tarovi kina mai na cabori ni isoro vei Jiova ena kena gauna lokuci vei ira na Isireli?”+ 8 E kaya vei ira o Mosese: “Ni wawa i keri, meu lai rogoca mada na ivakaro i Jiova me baleti kemuni.”+

9 E qai kaya vei Mosese o Jiova: 10 “Tukuna vei ira na Isireli, ‘Veitalia sara ke dukadukali e dua vei kemuni se na nomuni itabatamata era na muri mai ni tara na yagonimate+ se ni gole ena dua na ilakolako yawa, me na vakarautaka tiko ga o koya na isoro ni Lakosivia vei Jiova. 11 Mera vakarautaka qori ena ika14 ni siga ni ikarua ni vula,+ ni sa karobo.* Mera kania vata kei na madrai sega ni vakaleveni kei na kakanadraudrau+ gaga. 12 Mera kua ni vakavoca e dua na tikina me yacova na mataka,+ mera kua tale ga ni musuka e dua na suina.+ Mera vakarautaka me vaka na ivakaro kece me baleta na Lakosivia. 13 Ke dua e savasava tu, se a sega ni gole ena dua na ilakolako yawa, qai vakawaletaka na vakarautaki ni isoro ni Lakosivia, me muduki laivi* na tamata oya vei ira na kainona,+ ni a sega ni cabora na isoro i Jiova ena kena gauna lokuci. Ena saumitaro na tamata oya ena nona ivalavala ca.

14 “‘Ke tiko kei kemuni e dua na vulagi, me vakarautaka tale ga o koya na isoro ni Lakosivia vei Jiova.+ Me cakava o koya me vaka ga na ivakaro ni Lakosivia kei na kena ivakarau tudei.+ Me dua ga na ivakaro vei kemuni, vei koya e tiko vulagi kei na itaukei ni vanua.’”+

15 Ena siga e vakaduri kina na valeniveitavaki,+ e solega na valeniveitavaki na o, na valelaca ni iVakadinadina, ia e toka ena dela ni valeniveitavaki na ka e vaka na irairai ni bukawaqa ena bogi me yacova na mataka.+ 16 Ena va tiko qori na ka e yaco: E dau solega na o ena siga, ia ena vaka na irairai ni bukawaqa ena bogi.+ 17 Na gauna kece e tubu cake kina na o mai na valelaca, era dau biubiu+ sara na Isireli, ia na vanua e lai toka kina vakadua na o, era na keba+ sara e kea na Isireli. 18 Ena veivakaroti i Jiova era dau biubiu kina na Isireli, ena veivakaroti tale ga i Jiova era dau keba+ kina. Na balavu ga ni gauna e solega toka kina na o na dela ni valeniveitavaki, era na keba voli ga. 19 Ke mani vica vata na siga e toka voli ga na o ena dela ni valeniveitavaki, era na talairawarawa tiko ga vei Jiova na Isireli ra qai sega ni biubiu.+ 20 Ena so na gauna e rawa ni vica na siga na kena toka na o ena dela ni valeniveitavaki. Ena veivakaroti i Jiova era dau keba tiko ga, ena veivakaroti tale ga i Jiova era dau biubiu kina. 21 So na gauna ena tiko voli ga na o mai na bogi me yacova na mataka, ni tubu cake ena mataka, era na biubiu sara. Se mani tubu cake na o ena siga se bogi, era na biubiu+ tale ga ena gauna qori. 22 Se mani rua na siga, se dua na vula, se dede sara na toka ni o ena dela ni valeniveitavaki, era na keba toka ga na Isireli ra qai sega ni biubiu. Ia ni sa tubu cake, era na biubiu sara. 23 Ena veivakaroti i Jiova era dau keba kina, ena veivakaroti tale ga i Jiova era dau biubiu kina. Era dei ena nodra itavi vei Jiova, nira muria na ivakaro i Jiova ena gusu i Mosese.

10 E qai kaya vei Mosese o Jiova: 2 “Cakava e rua na nomu biukila,+ mo cakava mai na siliva tukilaki, qai vakayagataka mera soqoni mai kina na isoqosoqo qai tokitaki kina na keba. 3 Ni uvuci ruarua, mera soqoni yani vei iko na isoqosoqo taucoko ena icurucuru ni valelaca ni veitavaki.+ 4 Ke uvuci e dua, era na soqoni ga yani vei iko na turaga, o ira na iliuliu ni veiudolu ni Isireli.+

5 “Ni o uvuca me veitubuyaki na kena rorogo, mera biubiu sara o ira na keba toka ena tokalau.+ 6 Ni o uvuca me veitubuyaki na rorogo ni biukila ena ikarua ni gauna, mera biubiu sara o ira na keba toka ena ceva.+ Me veitubuyaki va qori na rorogo ni biukila ena gauna kece me biubiu kina e dua vei ira.

7 “Ke ra kacivi vata mai na ivavakoso, me uvuci ruarua na biukila,+ ia me kua ni veitubuyaki na kena rorogo. 8 Mera dau uvuca na biukila+ na bete era luvei Eroni, ena qai vakayagataki ruarua tiko me ivakaro tudei ena nomuni itabatamata kece.

9 “Ke oni gole ena ivalu ena nomuni vanua moni valuti ira na dau veivakasaurarataki era vakasagai kemuni tiko, ni vakarogoya na kaci ni ivalu ena biukila,+ ena qai nanumi kemuni o Jiova na nomuni Kalou, ni qai vakabulai vei ira na kemuni meca.

10 “Ena nomuni gauna ni marau+—na nomuni soqo,+ kei na itekivu ni nomuni veivula—moni uvuca na biukila ena vuku ni nomuni isoro kama+ kei na nomuni isoro ni veiyaloni,+ qori mera ivakananumi vei kemuni ena mata ni nomuni Kalou. O yau o Jiova na nomuni Kalou.”+

11 Ena ika20 ni siga ni ikarua ni vula,+ ena ikarua ni yabaki, e tubu cake na o mai na valeniveitavaki+ ni iVakadinadina. 12 Era biubiu sara na Isireli mai na vanua talasiga kei Saineai me vaka na ivakarau ni nodra dau biubiu,+ e lai tu na o ena vanua talasiga e Perana.+ 13 Qori na imatai ni gauna era biubiu kina me vaka na ivakaro i Jiova ena gusu i Mosese.+

14 Era mani biubiu e liu na tolu na yavusa ena keba ni luvei Juta me vaka na nodra ilawalawa,* e liutaka na ilawalawa qori o Nasoni+ na luvei Aminatapi. 15 E liutaka na ilawalawa ni yavusa ni luvei Isakari o Nicaneli+ na luvei Suari. 16 E liutaka na ilawalawa ni yavusa ni luvei Sepuloni o Iliapi+ na luvei Eloni.

17 Ni biu sobu na valeniveitavaki,+ era na biubiu sara na luvei Kerisoni+ kei ira na luvei Mirari+ era kauta na valeniveitavaki.

18 Era biubiu tarava na tolu na yavusa ena keba i Rupeni me vaka na nodra ilawalawa,* e liutaki ira na ilawalawa qori o Ilisuri+ na luvei Siteuri. 19 E liutaka na ilawalawa ni yavusa ni luvei Simioni o Silumieli+ na luvei Surisatai. 20 E liutaka na ilawalawa ni yavusa ni luvei Kata o Eliasafi+ na luvei Tiueli.

21 Era biubiu sara o ira na luvei Koaca era colata tiko na iyaya+ ni tikina tabu. Me vakaduri na valeniveitavaki ena gauna era yaco yani kina.

22 Era biubiu tarava na tolu na yavusa ena keba ni luvei Ifireimi me vaka na nodra ilawalawa,* qai liutaki ira o Ilisama+ na luvei Amiute. 23 E liutaka na ilawalawa ni yavusa ni luvei Manasa o Kamelieli+ na luvei Pitasuri. 24 E liutaka na ilawalawa ni yavusa ni luvei Penijamini o Epitani+ na luvei Kitionai.

25 Sa qai biubiu na tolu na yavusa ena keba ni luvei Tani me vaka na nodra ilawalawa,* mera yadra tiko ena daku ni keba kece, qai liutaki ira na ilawalawa o Eieseri+ na luvei Amisatai. 26 E liutaka na ilawalawa ni yavusa ni luvei Aseri o Pakieli+ na luvei Okirani. 27 E liutaka na ilawalawa ni yavusa ni luvei Nafitalai o Eira+ na luvei Enani. 28 Qo na ituvatuva ni biubiu era muria na Isireli kei na nodra ilawalawa* ena gauna era dau biubiu kina.+

29 E qai tukuna o Mosese vei Opapi, na kai Mitiani na luvei Riueli*+ na vugoi Mosese: “Keimami sa na lako ina vanua e kaya o Jiova, ‘Au na solia vei kemuni.’+ Meda lako vata,+ keimami na caka vinaka vei iko, ni sa yalataka o Jiova vei Isireli na veika vinaka.”+ 30 Ia e tukuna vua o koya: “Au na sega ni lako. Au na lesu ga ina noqu vanua kei ira na wekaqu.” 31 E mani tukuna kina o koya: “Yalovinaka kua ni biuti keimami, ni o kila vinaka na vanua me keimami keba kina ena vanua talasiga, mo kauti* keimami tiko ga. 32 Ke o lako kei keimami,+ na ka vinaka cava ga e vakaraitaka vei keimami o Jiova, keimami na vakaraitaka sara ga vei iko.”

33 Era tekivu lako mai na ulunivanua i Jiova+ ena ilakolako siga tolu, e liu tiko vei ira na kato+ ni veiyalayalati i Jiova ena ilakolako siga tolu qo mera vaqara e dua na vanua mera vakacegu kina.+ 34 E qai vakarurugi ira tiko na o i Jiova+ ena siga, nira biuta mai na vanua era keba tu kina.

35 Ena gauna kece e dau tokitaki kina na Kato, ena kaya o Mosese: “I Jiova, ni tucake+ mera veiseyaki kina na kemuni meca, mera dro tani mai matamuni o ira na sevaki kemuni.” 36 Ia ni lai tu vakadua, ena kaya: “I Jiova, ni lesu mai vei ira na veiudolu na Isireli era sega ni wiliki* rawa.”+

11 Era tekivu vosa kudrukudru ena rarawa na tamata ena mata i Jiova. Ni rogoca qori o Jiova, e tubu sara ga na nona cudru, qai waqa vei ira na bukawaqa mai vei Jiova, qai yameca eso ena ibili ni keba. 2 Nira tekivu tagi vei Mosese na tamata, e qai kerekere vei Jiova+ o koya, mani boko na bukawaqa. 3 E qai vakatokai na vanua oya me o Tapera* ni a yameci ira+ e kea na bukawaqa mai vei Jiova.

4 Ia era kusikusima qai nanumi ira+ ga na ilawalawa duikaikai*+ era tiko ena kedra maliwa, ra mani tagi tale na Isireli qai kaya: “O cei ena solia na keda lewe ni manumanu?+ 5 Sa dua na ka na noda vakananuma na ika eda dau kania wale mai Ijipita, na kiukaba tale ga, na meleni, na varasa, kei na qaliki!+ 6 Ia qo eda sa malumalumu tiko yani. Na ka wale ga e tu qo e matada na mana.”+

7 Ia na mana+ e vaka na sore ni koriada,+ na kena irairai ga e vaka na drega ni deliamo.* 8 Era na lako yani na tamata ra qai tomika, era qaqia ena iqaqi se ra vutuka ena tabili lalai. Era qai vakasaqara ena kuro se ra bulia me madrai rauni,+ na kena ikanakana e vaka na madrai kamikamica e vakawaiwaitaki. 9 Ni lutu na tegu ena bogi ena keba, e lulutu tale ga na mana.+

10 E rogoca o Mosese na nodra tagi tiko na tamata, mai na dua na vuvale ina dua tale na vuvale, na tamata yadua ena icurucuru ni nona valelaca. Sa qai cudru ga vakalevu o Jiova,+ e rarawa tale ga vakalevu o Mosese. 11 E kaya vei Jiova o Mosese: “Na cava oni vakalolomataka kina na nomuni dauveiqaravi? Na cava au sega ni nanumi kina e matamuni, moni vakataqara kina vei au na nodra icolacola bibi na tamata kece qo?+ 12 Au kunekunetaki ira kece qo? Seu vakasucumi ira moni kaya kina vei au, ‘Roqoti ira e lomaseremu, me vaka ga e roqota na gone dramidrami e dua na dauveimei,’* ina vanua oni bubuluitaka moni solia vei ira na tukadra?+ 13 Meu lai kauta mai vei na lewe ni manumanu me soli vei ira kece qo? Nira tagi tiko ga e mataqu, era kaya, ‘Solia mai na lewe ni manumanu me keimami kania!’ 14 Au sega ni rawa ni colata duadua tiko ga na ka e vauci ira na tamata kece qo, ni sa rui sivia tale vei au.+ 15 Ke oni cakava tiko ga va qo vei au, yalovinaka ni vakamatei au ga.+ Keu nanumi e matamuni, meu kua ni raica tale e dua na leqa levu.”

16 E tukuna vei Mosese o Jiova: “Kumuna vei au e 70 na tagane vei ira na qase ni Isireli, na tagane o kila mera qase qai iliuliu vei ira na tamata,+ kauti ira ina valelaca ni veitavaki, mera lai duri vata kei iko e kea. 17 Au na lako sobu yani+ me daru veivosaki e kea,+ au na qai taura laivi mai eso na noqu yalo tabu+ e tiko vei iko meu solia vei ira, era na qai vukei iko moni colata vata na nodra icolacola bibi, mo kua kina ni colata duadua.+ 18 Mo kaya vei ira na tamata, ‘Moni vakasavasavataki kemuni ni oni na kana lewe ni manumanu sara ga nimataka,+ ni sa rogoca o Jiova na nomuni tagi+ ena nomuni kaya: “O cei ena solia mai na keimami lewe ni manumanu? E vinaka vei keimami mai Ijipita.”+ O Jiova ena solia dina vei kemuni na lewe ni manumanu, oni na qai kana.+ 19 Oni na sega wale ga ni kana me dua na siga, se 2 na siga, se 5 na siga, se 10 na siga, se 20 na siga, 20 ia ena dua taucoko na vula, yacova ni sa basika mai na ucumuni qai vakasisila vei kemuni,+ ni oni cati Jiova, o koya e tiko ena kemuni maliwa, oni lai tagicaka kina e matana: “Na cava keimami lako tani mai kina e Ijipita?”’”+

21 E tukuna sara o Mosese: “Na tamata au maliwai ira tiko qo era le 600,000+ era taubale voli, oni se kaya ga, ‘Au na solia vei ira na lewe ni manumanu mera kania tiko me dua taucoko na vula’! 22 Ke vakamatei e vica vata na qelenisipi kei na qelenibulumakau, ena rauti ira? Ke qolivi mai na ika kece ni wasawasa, ena rauti ira?”

23 E qai kaya vei Mosese o Jiova: “Sa lekaleka na liga i Jiova?+ O na raica qo se na yaco dina vei iko na ka au tukuna se sega.”

24 E mani gole o Mosese qai tukuna na vosa i Jiova vei ira na tamata. E kumuni ira mai na le 70 na tagane mai vei ira na nodra qase, qai vakarota mera duri wavokita na valelaca.+ 25 E lako sobu mai o Jiova ena o+ qai vosa vua,+ e taura laivi mai eso na yalona tabu+ e tu vua qai biuta yadua vei ira na le 70 na qase. Ni sobuti ira ga na yalo qori e vaka sara na parofita*+ na nodra ivalavala, ia e sega ni yaco tale.

26 Erau tu ga ena keba e rua na tagane. Na yacadrau o Elitati, kei Metati. E qai tekivu sobuti rau na yalo qori ni rau wili vata kei ira na volai na yacadra, ia erau a sega ni lako ina valelaca. E mani vaka sara na parofita na nodrau ivalavala ena keba. 27 E cici yani e dua na cauravou qai tukutuku vei Mosese: “Sa vaka tiko na parofita na nodrau ivalavala o Elitati kei Metati ena keba!” 28 E qai vosa mai o Josua+ na luvei Nuni, e nona italai voli o Mosese mai na gauna se tamata gone kina, e kaya: “I Mosese noqu turaga, tarovi rau!”+ 29 Ia e kaya vua o Mosese: “O vuvu ena vukuqu? Kua, au diva mera parofita kece na tamata i Jiova, ena qai solia vei ira o Jiova na yalona!” 30 Oti sa qai suka ina keba o Mosese kei ira na qase ni Isireli.

31 E qai vakaliwava o Jiova e dua na cagi, e tekivu kauti ira na manumanuvuka* mai wasawasa qai vakalutumi ira wavolita na keba,+ qai vaka na ilakolako siga dua ena dua na yasana, kei na ilakolako siga dua ena dua tale na yasana, ni wavolita tu na keba taucoko, qai via rua na kiupiti* na kedra vavaku ena qele. 32 Era qai kumuni manumanuvuka* tiko na tamata ena siga kece oya lai bogi taucoko, lai siga tale e tarava. E sega ni dua e lailai mai na tini na omeri* na ka e kumuna, oti ya era biuta na kedra me robota na keba taucoko. 33 Ia ni se tu ga na lewe ni manumanu ena maliwa ni batidra, ni bera ni mamai, sa waqa mai na cudru i Jiova vei ira na tamata, e qai tekivu mokuti ira na tamata o Jiova ena veivakamatei levu sara.+

34 Era qai vakatoka na vanua ena yaca Kipiroci-ateva,*+ nira bulu e kea na tamata kusikusima era nanumi ira ga.+ 35 Era biubiu sara mai Kipiroci-ateva mera gole vaka i Eseroci, era lai tiko voli e Eseroci.+

12 Erau tekivu vosavakacacataki Mosese o Miriama kei Eroni me baleta na yalewa ni Kusi a vakawatitaka, ni taura o koya e dua na yalewa ni Kusi me watina.+ 2 Erau kaya: “E vosa duadua ga vei Mosese o Jiova? E sega ni vosa tale ga vei keirau+ o koya?” E qai vakarorogo tiko o Jiova.+ 3 Ia o Mosese na tamata yalomalumalumu duadua vei ira na tamata kece*+ ena dela i vuravura.

4 E vakasauri ga nona tukuna o Jiova vei Mosese, Eroni kei Miriama: “Dou lako yani, kemudou tolutolu ina valelaca ni veitavaki.” Eratou mani lako yani na le tolu. 5 E qai lako sobu mai o Jiova ena duru o,+ e lai tu ena icurucuru ni valelaca qai kacivi Eroni kei Miriama. Erau toso sara yani i liu. 6 E kaya sara: “Yalovinaka, rogoca na noqu vosa. Ke maliwai kemuni e dua na parofita i Jiova, au na vakatakilai au vua ena raivotu,+ au na vosa tale ga vua ena tadra.+ 7 Ia e sega ni va qori vei Mosese na noqu dauveiqaravi! Sa tataunaki tu vua noqu vale taucoko.*+ 8 Au vosa sara ga vua e matana,*+ e sega ni dua na ka e vunitaki, sega ena vatavatairalago, qai dau raica o koya na iyaloyalo i Jiova. Na cava gona drau sega ni rere kina ni vosavakacacataki Mosese na noqu dauveiqaravi?”

9 E waqa gona vei rau na cudru i Jiova, oti sa qai biuti rau o koya. 10 E toso tani na o mai na dela ni valelaca, raica! sa tauvi Miriama tu na vukavuka e vulavula me vaka na ucacevata.+ E qai vuki yani vei Miriama o Eroni, qai raica ni sa tauvi vukavuka tu o koya.+ 11 Sega ni bera sa vosa vei Mosese o Eroni: “Au vakamasuti kemuni noqu turaga! Yalovinaka ni kua ni beitaki keirau ena ivalavala ca qo! Na ka lialia keirau sa cakava. 12 Yalovinaka, me kua ni vaka tiko ga e dua sa mate tu, sa vuca veimama tu na lewena ni sucu mai!” 13 Sa qai tekivu tagi vei Jiova o Mosese, e kaya: “Kemuni na Kalou, yalovinaka ni vakabulai koya! Ni yalovinaka sara!”+

14 E kaya vei Mosese o Jiova: “Vakacava ke kasivita na matana o tamana, ena sega ni madua tu me vitu na siga? Me korotinitaki o koya ena taudaku ni keba+ me vitu na siga, oti ena rawa ni kau tale mai loma.” 15 E mani korotinitaki ena taudaku ni keba o Miriama me vitu na siga,+ era sega ni tokitaka na nodra keba me yacova ni kau lesu yani o Miriama. 16 Oti era biuti Eseroci+ ra lai keba sara ena vanua talasiga kei Perana.+

13 E vosa vei Mosese o Jiova, e kaya: 2 “Tala yani eso na tagane mera lai yamata* ena vanua o Kenani, na vanua au solia vei ira na Isireli. Mo tala e dua na tagane mai na yavusa yadua ni nodra qase, eratou iliuliu+ yadua vei ira.”+

3 E talai ratou sara o Mosese mai na vanua talasiga kei Perana,+ ena veivakaroti i Jiova. O iratou kece qo eratou turaga vei ira na Isireli. 4 Qo na yacadratou: o Samua na luvei Sakuri mai na yavusa i Rupeni, 5 o Safati na luvei Orai mai na yavusa i Simioni, 6 o Kelepi na luvei Jifune mai na yavusa i Juta,+ 7 o Ikiali na luvei Josefa mai na yavusa i Isakari, 8 o Osia na luvei Nuni mai na yavusa i Ifireimi,+ 9 o Paliti na luvei Rafu mai na yavusa i Penijamini, 10 o Katieli na luvei Soti mai na yavusa i Sepuloni, 11 o Kati na luvei Susi ena yavusa i Josefa,+ mai na yavusa i Manasa,+ 12 o Amieli na luvei Kimali mai na yavusa i Tani, 13 o Sicuri na luvei Maikeli mai na yavusa i Aseri, 14 o Napi na luvei Vofisi mai na yavusa i Nafitalai, 15 o Kueli na luvei Maki mai na yavusa i Kata. 16 Qori na yacadratou na tagane e tala o Mosese me ratou lai yamata ena vanua. Ia o Mosese e vakatokai Osia na luvei Nuni me o Josua.*+

17 Ni talai ratou yani o Mosese me ratou lai yamata ena vanua o Kenani, e kaya vei ratou: “Dou gole cake i kea ina Nikepi, dou cabe sara ina veiulunivanua.+ 18 Dou raica mai se vakacava tu na vanua,+ ke ra kaukaua se malumalumu na tamata era tiko kina, era le lailai se le levu, 19 ke vinaka se ca na vanua, ke ra vakaitikotiko ena koro era taqomaki vinaka tu se keba wale ga. 20 Dou raica tale ga mai ke vanua vutuniyau* se dravudravua,*+ ke ra tu kina na kau se sega. Dou yaloqaqa+ dou kauta mai eso na vuata ni vanua.” Qo sara ga na gauna e dau dreu kina na isevu ni vuanivaini.+

21 Eratou lako cake eratou lai yamata ena vanua oya, mai na vanua talasiga o Jini+ yaco i Riopi,+ volekati Lepo-emaci.*+ 22 Ni ratou lako cake ina Nikepi, eratou yaco sara i Epironi,+ e tiko kina o Eimani, Sesei, kei Talimei,+ o iratou na Anakimi.+ Ia a vitu na yabaki na kena tara e liu o Epironi ni bera o Soani mai Ijipita. 23 Ni ratou yaco yani ina Buca* o Esikoli,+ eratou musuka sara e kea e dua na isoso vuanivaini se lili tu e tabana, erau qai colata ena ivua e rua na tagane, eso tale ga na pomekaraneti kei na vuanilolo.+ 24 Eratou mani vakatoka na vanua oya me Buca* o Esikoli,*+ ni ratou musuka mai kina na Isireli na isoso vuata.

25 Oti e 40 na siga,+ eratou sa qai suka yani na lai yamata ena vanua. 26 Eratou lesu yani vei Mosese, kei Eroni, kei ira kece na isoqosoqo ni Isireli e Ketesa,+ ena vanua talasiga kei Perana. Eratou mai tukutuku sara vei ira kece na isoqosoqo, eratou vakaraitaka tale ga vei ira na vuata ni vanua. 27 Qo na ka eratou tukuna vei Mosese: “Keitou sa curuma mai na vanua o talai keitou kina, e drodro dina kina na sucu kei na oni,+ qo gona na kena vuata.+ 28 Ia o ira na tamata era tiko ena vanua era kaukaua, qai ka lelevu na koro vakabai. Keitou raici ira tale ga na Anakimi e kea.+ 29 Era vakaitikotiko ena vanua e Nikepi+ o ira na Amalekaiti,+ era vakaitikotiko ena veiulunivanua o ira na Itaiti, na Jepusaiti,+ kei na Amoraiti,+ o ira na kai Kenani+ era vakaitikotiko ena baravi,+ ena bati tale ga ni Joritani.”

30 E qai saga o Kelepi mera yalovakacegu na tamata ni ratou duri tu ena mata i Mosese ni kaya: “Meda lako cake sara ga qo, eda na taukena dina, nida na vakamalumalumutaka dina ga.”+ 31 Ia eratou kaya na tagane eratou lako cake kei koya: “Eda na sega ni rawa ni lako cake meda valuti ira na tamata, nira kaukaua cake vei keda.”+ 32 Eratou tukuna tiko ga na itukutuku ca+ vei ira na Isireli me baleta na vanua eratou lai yamata kina, eratou kaya: “Na vanua keitou lakosivita me keitou yamata kina e dau tilomi ira na tiko kina, o ira kece tale ga na tamata keitou raica kina era tamata vakaitamera.+ 33 Keitou raici ira na Nefilimi mai kea, era luvei Anaki,+ era kawa ni Nefilimi, ia keitou sa vaka ga na vodre, vei ira, vei keitou tale ga.”

14 E qai tubu cake na domodra na isoqosoqo taucoko, era tagi tiko ga, ra qai qoqolou tiko ena bogi taucoko oya.+ 2 Era tekivu vosakudrukudrutaki Mosese kei Eroni na Isireli kece,+ era vosataki rau tale ga na isoqosoqo taucoko, era kaya: “Ke da mate ga ena vanua o Ijipita, se meda mate ga ena vanua talasiga qo! 3 Na cava e kauti keda mai kina ena vanua qo o Jiova meda bale kina ena iseleiwau?+ Era na kau yani o ira na watida kei na luveda mera itokinivalu.+ Vinaka cake ga meda suka i Ijipita, se vakacava?”+ 4 Era bau veikayaka sara: “Meda lesia e dua na iliuliu qai suka tale i Ijipita!”+

5 Erau mani tekicuva ina qele o Mosese kei Eroni e matadra na ivavakoso kece ni Isireli era soqoni tu. 6 Erau qai dresulaka nodrau isulu o Josua+ na luvei Nuni kei Kelepi+ na luvei Jifune, erau a maliwai ratou tale ga na lai yamata ena vanua, 7 rau qai tukuna qo vei ira kece na isoqosoqo ni Isireli: “Na vanua keitou lako sivita me keitou lai yamata kina sa bau dua dina na vanua vinaka.+ 8 Ke taleitaki keda o Jiova, ena kauti keda sara ga ina vanua qo qai solia vei keda, na vanua e drodro kina na sucu kei na oni.+ 9 Ni kua ga ni talaidredre vei Jiova, ni kua tale ga ni rerevaki ira na tamata ena vanua,+ nida na tilomi ira.* Sa kau laivi vei ira na nodra veitaqomaki, qai tiko kei keda o Jiova.+ Kua sara ni rerevaki ira.”

10 Era bosea ga na isoqosoqo mera vakaviriki rau ena vatu.+ E qai basika mai na lagilagi i Jiova ena valelaca ni veitavaki vei ira kece na lewe i Isireli.+

11 Sa qai kaya vei Mosese o Jiova: “Ena vakacava na dede ni nodra beci au o ira na tamata qo,+ ena vakacava tale ga na dede ni nodra sega ni vakabauti au, veitalia mada ga na ivakatakilakila kece au cakava ena kedra maliwa?+ 12 Laivi au meu kuitataki ira ena matedewa qai cemuri ira tani, laivi au tale ga meu cakava mo dua na matanitu e levu cake qai kaukaua cake vei ira.”+

13 Ia e tukuna vei Jiova o Mosese: “Oni a kauti ira mai na tamata qo ena kedra maliwa na kai Ijipita ena nomuni kaukaua, nira na rogoca na kai Ijipita,+ 14 era na qai talanoataka vei ira na lewenivanua qo. Era sa rogoca tale ga ni o kemuni Jiova oni tiko ena kedra maliwa na tamata+ qo, oni qai rairai sara ga e matadra.+ O kemuni o Jiova, e vakarurugi ira na nomuni o, oni liu tiko vei ira ena duru o ena siga kei na duru bukawaqa ena bogi.+ 15 Ke oni vakamatei ira na tamata kece qo ena dua vata ga na gauna,* era na kaya na veimatanitu era sa rogoca na kemuni irogorogo: 16 ‘Sa sega ni kauti ira rawa na tamata qo o Jiova ina vanua e bubuluitaka me solia vei ira, e mani vakamatei ira ena vanua talasiga.’+ 17 Ia qo yalovinaka Jiova, me levu mada ga na nomuni kaukaua, me vaka oni yalataka ni oni kaya: 18 ‘O Jiova e berabera ni cudru, e vuabale na dei ni nona loloma,*+ e dau vosota na cala kei na malumalumu, ia ena sega ni laivi koya e cala mai na kena itotogi, na nodra cala na tama ena totogitaki ira kina na luvedra, vei ira na ikatolu ni itabatamata kei na ikava ni itabatamata.’+ 19 Yalovinaka, ni vosota na nodra cala na tamata qo, me vaka ga oni vosoti ira voli mai Ijipita me yacova mai qo, ni uasivi dina ga na dei ni nomuni loloma.”+

20 E qai tukuna o Jiova: “Au sa vosoti ira me vaka na nomu vosa.+ 21 Ia ena dua tale na yasana, me vaka ga niu bula dina tiko, ena vakasinaiti vuravura na lagilagi i Jiova.+ 22 Ia o ira kece era raica na noqu lagilagi kei na noqu ivakatakilakila+ au cakava mai Ijipita kei na vanua talasiga, ra qai vakatovolei au+ tiko ga vakatini me yacova mai qo, ra bese tale ga ni rogoca na domoqu+ 23 era na sega ni raica na vanua au yalataka vei ira na nodra qase. Io, o ira kece era sega ni dokai au era na sega ni raica.+ 24 Ia ni duatani sara na yalo e tiko vei Kelepi na noqu dauveiqaravi+ qai muri au voli o koya ena lomana taucoko, au na kauti koya sara ga ina vanua sa lakova oti, era na taukena tale ga na nona kawa.+ 25 Nira se tiko ena buca* na Amalekaiti kei ira na kai Kenani,+ moni biubiu nimataka ni lako ena vanua talasiga ni oni muria na gaunisala e toka donuya na Wasa Damudamu.”+

26 E kaya sara vei Mosese kei Eroni o Jiova: 27 “Ena vakacava na dede ni nodra vosakudrukudrutaki au tiko na isoqosoqo ca qo?+ Au sa rogoca na nodra vosakudrukudrutaki au na Isireli.+ 28 Tukuna vei ira, ‘“Me vaka ga niu bula dina tiko,” e kaya o Jiova, “Au na cakava vei kemuni na ka au sa rogoca ni oni tukuna!+ 29 Oni na bale mate ena vanua talasiga qo,+ io, na kemuni iwiliwili kece na yabaki 20 lako cake oni a volayacataki, o kemuni kece na vosakudrukudrutaki au.+ 30 Ena sega ni dua vei kemuni ena curuma na vanua au bubuluitaka* meu solia moni tiko kina,+ vakavo ga o Kelepi na luvei Jifune kei Josua na luvei Nuni.+

31 “‘“Au na qai kauti ira na luvemuni, oni tukuna nira na kau yani mera itokinivalu,+ era na qai kila na vanua oni sa mai cata.+ 32 Ia na yagomuni mate ena bale ena vanua talasiga qo. 33 O ira na luvemuni era na mai ivakatawanisipi ena vanua talasiga me 40 na yabaki,+ era na qai saumitaro ena nomuni sega ni yalodina* me yacova ni sa mate na iotioti ni tamata ena vanua talasiga.+ 34 Me vaka ga na iwiliwili ni siga oni lai yamata kina ena vanua, ena 40 na siga,+ dua na siga me dua na yabaki, dua na siga me dua na yabaki, ena 40 na yabaki+ na nomuni saumitaro tiko ena nomuni cala, moni kila kina na ibalebale ni nomuni saqati au.*

35 “‘“O yau o Jiova, au sa vosa. Qo na ka au na cakava vei ira na ilawalawa ca kece qo, o ira na soqoni mai mera saqati au: Ena vanua talasiga qo ena yacovi ira kina na kedra itinitini, era na qai mate i ke.+ 36 O iratou na tagane e tala yani o Mosese me ratou lai yamata ena vanua, ratou qai bukana mera vosakudrukudrutaki koya na isoqosoqo taucoko, ni ratou kauta lesu mai na itukutuku ca me baleta na vanua,+ 37 io, o iratou na tagane eratou kauta lesu mai na itukutuku ca me baleta na vanua, eratou na moku, eratou na mate ena mata i Jiova.+ 38 O Josua ga na luvei Nuni kei Kelepi na luvei Jifune, rau a maliwai ratou na lai yamata ena vanua, erau na bula tiko ga.”’”+

39 Ni sa tukuna o Mosese na vosa qo vei ira na Isireli kece, era sorova sara na veitagicaki. 40 Ia era sou vakamataka, ra sasaga sara i dela ni ulunivanua, era kaya: “Keimami sa vakarau lako cake tu qo ina vanua e kaya o Jiova, ni keimami sa valavala ca.”+ 41 Ia e kaya o Mosese: “Na cava oni beca tiko kina na ivakaro i Jiova? Ena sega ni yaga qori. 42 Ni kua ni lako cake, ni sega ni tiko kei kemuni o Jiova, oni na vakadrukai tale ga vei ira na kemuni meca.+ 43 Nira na sotavi kemuni mai kea na Amalekaiti kei ira na kai Kenani,+ oni na qai bale ena iseleiwau. Ni oni sa sega ni muri Jiova voli, ena sega ni tiko kei kemuni o Jiova.”+

44 Ia era lako cake ina dela ni ulunivanua ena nodra viavialevu,+ e sega ga ni toso laivi mai na lomadonu ni keba o Mosese kei na kato ni veiyalayalati i Jiova.+ 45 Era qai siro mai na Amalekaiti kei ira na kai Kenani era tu ena ulunivanua oya, era mokuti ira, ra qai vakavuna mera veiseyaki me yaco sara i Orima.+

15 E vosa tale o Jiova vei Mosese, e tukuna: 2 “Vosa vei ira na Isireli qai kaya vei ira, ‘Ni oni sa yaco yani ena vanua au solia vei kemuni moni lai vakaitikotiko kina+ 3 oni qai vakacaboisoro vei Jiova ena bukawaqa, mai na qelenibulumakau se qelenisipi—se mani isoro kama+ se isoro ni bubului bibi se isolisoli e sega ni lavaki,+ se isoro donuya na nomuni soqo sa loku oti tu,+ me talei* kina vei Jiova na kena iboi+— 4 o koya e vakacaboisoro me lai cabora tale ga vei Jiova na isoro kakana e caka mai na dua na ikatini na efa* falawa vinaka sara+ qai wakivata kei na dua na ikava na hini* waiwai. 5 Mo cabora tale ga na waini me isoro livi, me dua na ikava na hini, mo cabora vata kei na isoro kama+ se ni cabori na lami tagane yadua. 6 Se, me baleta na tamanisipi, mo cabora me isoro kakana e rua na ikatini ivakarau efa falawa vinaka sara, qai wakivata kei na dua na ikatolu na hini waiwai. 7 Mo cabora na waini me isoro livi, na kena levu me dua na ikatolu na hini, me talei* vei Jiova na kena iboi.

8 “‘Ia ke o cabora na bulumakau tagane me isoro kama,+ se isoro ni bubului bibi,+ se isoro ni veiyaloni vei Jiova,+ 9 mo cabora vata kei na bulumakau tagane qori na isoro kakana+ e caka mai na tolu na ikatini na ivakarau efa falawa vinaka sara, qai wakivata kei na veimama na hini waiwai. 10 Mo cabora tale ga na waini me isoro livi,+ na kena levu e veimama na hini, qo e cabori ena bukawaqa me talei* vei Jiova na kena iboi. 11 Me va qori na ka me caka ena bulumakau tagane yadua, se tamanisipi yadua, se lami tagane yadua, se me. 12 Se mani vakacava na levu ni ka oni cabora, me va sara ga qori na ka moni cakava vei ira yadua, me vaka na kedra iwiliwili. 13 Me va qo na icakacaka ni nodra lai cabora yadua na kawa dina ni Isireli na nodra isoro ena bukawaqa, me talei* vei Jiova na kena iboi.

14 “‘Ke dua e tiko vulagi ena kemuni maliwa se dua tale sa vica vata na itabatamata nona tiko vata mai kei kemuni, e cabora tale ga ena bukawaqa na isoro e talei* vei Jiova na kena iboi, me cakava o koya me vakataki kemuni ga.+ 15 Ena dua ga na lawa vei kemuni na lewe ni ivavakoso kei na vulagi e vakaitikotiko kei kemuni. Ena lawa tudei ena nomuni itabatamata kece. O koya e tiko vulagi ena tautauvata kei kemuni ena mata i Jiova.+ 16 Me dua ga na lawa kei na lewa vei kemuni kei ira na tiko vulagi kei kemuni.’”

17 E vosa tale vei Mosese o Jiova, e kaya: 18 “Vosa vei ira na Isireli qai tukuna vei ira, ‘Ni oni sa yaco yani ena vanua au kauti kemuni tiko kina 19 oni qai kania na madrai* kece ena vanua,+ me dua na nomuni cau vei Jiova. 20 Moni cautaka na isevu+ ni nomuni falawa matailelevu me madrai e buli me vaka na mama. Moni cautaka qori me vaka na cau mai na rara ni butu covuata. 21 Moni dau cautaka vei Jiova ena nomuni itabatamata kece eso na isevu ni nomuni falawa matailelevu.

22 “‘Ia ke oni cakava vakacalaka e dua na cala ni qai sega ni cakava na ivakaro kece qo e tukuna o Jiova vei Mosese, 23 na ka kece e vakarota o Jiova vei kemuni ena gusu i Mosese, mai na siga e vakarota kina o Jiova me yacova na nomuni veitabatamata, 24 ia ke a yaco vakacalaka ra qai sega ni kila na isoqosoqo, mera cabora na isoqosoqo taucoko e dua na luvenibulumakau tagane me isoro kama e talei* vei Jiova na kena iboi, na kena isoro kakana tale ga kei na kena isoro livi me vaka ga na kena ivakarau,+ kei na dua na luvenime me isoro ni ivalavala ca.+ 25 Ena qai sorovaki ira na isoqosoqo taucoko ni Isireli na bete, era na qai vosoti kina,+ ni a vakacalaka, era na qai kauta yani na nodra isoro e vakamai vei Jiova kei na nodra isoro ni ivalavala ca ena mata i Jiova ena vuku ni nodra vakacalaka. 26 Era na vosoti na isoqosoqo taucoko ni Isireli kei ira na tiko vulagi ena kedra maliwa, ni a yaco qori vakacalaka ena vukudra na tamata kece.

27 “‘Ke dua na tamata e valavala ca vakacalaka, me kauta yani e dua na me yalewa yabaki dua me isoro ni ivalavala ca.+ 28 Ena qai sorovaki koya e vakacalaka na bete ni a sega ni nakita na nona ivalavala ca ena mata i Jiova, me veisorovaki kina, ena qai vosoti o koya.+ 29 Me dua ga na lawa vei ira na kawa dina ni Isireli kei na vulagi e tiko ena kedra maliwa, ena ka e sega ni nakiti.+

30 “‘Ia o koya e nakita na ka e cakava,+ se mani tiko vulagi se kawa dina ni Isireli, e sa vosabeci Jiova tiko, me muduki laivi* vei ira na kainona. 31 Ni sa cata o koya na vosa i Jiova qai beca na nona ivakaro, me vakamatei laivi sara ga+ o koya. Sa bale ga vua na nona cala.’”+

32 Nira tiko voli ena vanua talasiga na Isireli, era raica sara ni cabuka tiko ena Siga ni Vakacecegu+ e dua na tagane. 33 Era kauti koya yani vei Mosese, Eroni, kei na isoqosoqo taucoko, o ira na raici koya ni cabuka tiko. 34 Era mani vesuki koya toka+ ni se sega ni vakamatatataki se cava me caka vua.

35 E qai kaya vei Mosese o Jiova: “Me vakamatei laivi sara ga o koya,+ mera vakaviriki koya ena vatu na isoqosoqo taucoko ena taudaku ni keba.”+ 36 Era mani kauti koya ina taudaku ni keba na isoqosoqo taucoko ra qai virilaki koya ena vatu me mate, me vaka ga e vakaroti Mosese kina o Jiova.

37 E kaya tale vei Mosese o Jiova: 38 “Vosa vei ira na Isireli qai tukuna vei ira mera cakava me vakatalitali na bele ni nodra isulu ena nodra itabatamata kece, mera qai biuta e dua na wa karakarawa ena dela ni bele ni isulu e vakatalitali tu.+ 39 ‘Me va qori na talitali ni bele ni nomuni isulu, moni dau raica qai nanuma tiko kina na ivakaro kece i Jiova, moni cakava sara.+ Moni kua kina ni muria ga na lomamuni kei na matamuni, moni lai saqamua kina vakayalo.+ 40 Qo ena uqeti kemuni moni nanuma, oni na qai cakava sara na noqu ivakaro kece, moni qai savasava vua na nomuni Kalou.+ 41 O yau o Jiova na nomuni Kalou, au kauti kemuni tani mai na vanua o Ijipita meu vakadinadinataka kina niu nomuni Kalou.+ O yau o Jiova na nomuni Kalou.’”+

16 E qai lako yani o Kora+ na luvei Isari,+ na luvei Koaca,+ e luvei Livai,+ e tomani koya o Tecani kei Epairami erau luvei Iliapi,+ kei Oni na luvei Peleci, eratou luvei Rupeni.+ 2 Eratou tucake kei na le 250 na tagane ni Isireli, era iliuliu ni isoqosoqo, era tamata digitaki ni ivavakoso, era turaga rogo mera saqati Mosese. 3 Era soqoni vata yani mera saqati+ Mosese kei Eroni, era tukuna vei rau: “Sa rui sivia tale vei kemudrau! E vakatabui na isoqosoqo taucoko,+ o ira kece, qai tiko ena kedra maliwa o Jiova.+ Na cava gona drau vakacerecerei kemudrau kina vei ira na ivavakoso i Jiova?”

4 Ni rogoca qo o Mosese, e tekicuva sara. 5 E qai tukuna vei Kora kei ira kece na nona ito: “Ena mataka, ena vakatakila o Jiova se o cei e nona tamata,+ se o cei e vakatabui qai dodonu me torovi koya,+ na tamata ga e digia,+ ena torovi koya. 6 Moni cakava qo: O Kora kei ira kece na nomu ito,+ ni taura na itawatawa ni bukawaqa,+ 7 qai tawana kina na bukawaqa kei na ka boivinaka ena mata i Jiova nimataka, na tamata ga ena digia o Jiova,+ o koya qori e vakatabui. Sa rui sivia tale vei kemuni na luvei Livai!”+

8 E qai kaya vei Kora o Mosese: “Yalovinaka, ni vakarorogo na luvei Livai. 9 Vakacava e lailai vei kemuni na nona wasei kemuni na Kalou ni Isireli mai na isoqosoqo ni Isireli,+ qai vakatarai kemuni moni torovi koya moni veiqaravi ena valeniveitavaki i Jiova, moni tu tale ga e matadra na isoqosoqo moni qaravi ira,+ 10 qai kauti iko mai kei ira na tacimu na luvei Livai moni volekati koya? Moni saga tale ga me nomuni na cakacaka vakabete?+ 11 Ena vuku ni ka qo, o iko kei ira kece na nomu ito era kumuni mai, oni sa saqati Jiova. Ia o Eroni, o cei o koya moni vosakudrukudrutaki koya kina?”+

12 E talatala sara o Mosese me rau lako yani vua o Tecani kei Epairami+ erau luvei Iliapi, ia erau kaya: “Keirau na sega ni lako yani! 13 Vakacava e lailai vei iko na nomu kauti keimami tani mai na vanua e drodro kina na sucu kei na oni, me keimami vakamatei kina ena vanua talasiga?+ O sa via lewai keimami tale ga?* 14 Ena gauna mada ga qo, o se sega ni kauti keimami ina vanua e drodro kina na sucu kei na oni,+ se solia vei keimami e dua na ivotavota ni qele kei na loganivaini. O sa via leuta na yalokanimatadra na tamata oya? Keirau na sega ni lako yani!”

15 E cudru sara ga o Mosese qai kaya vei Jiova: “Kua ni raica mai na nodra isoro kakana. E sega mada ga ni dua na asa au kauta tani vei ira, se meu vakaleqa e dua vei ira.”+

16 E qai kaya vei Kora o Mosese: “Mo rairai yani kei ira kece na nomuni ito ena mata i Jiova nimataka, o iko, o ira, kei Eroni. 17 Na tamata yadua me kauta na nona itawatawa ni bukawaqa qai biuta kina na ka boivinaka, era na qai dui kauta na nodra itawatawa ni bukawaqa ena mata i Jiova, me 250 na itawatawa ni bukawaqa, o iko tale ga kei Eroni mo drau yadua mai na itawatawa ni bukawaqa.” 18 Era dui kauta yani na nodra itawatawa ni bukawaqa, era biuta kina na bukawaqa kei na ka boivinaka, ra qai lai duri tu ena icurucuru ni valelaca ni veitavaki vata kei Mosese kei Eroni. 19 Ni sa kumuni ira yani nona ito o Kora+ mera saqati rau ena icurucuru ni valelaca ni veitavaki, sa qai basika mai na lagilagi i Jiova vei ira na isoqosoqo taucoko.+

20 E qai tukuna vei Mosese kei Eroni o Jiova: 21 “Drau tawasei kemudrau tani mai na kedra maliwa na ilawalawa qo, meu vakawabokotaki ira wale ga qo.”+ 22 Sega ni bera na nodrau tekicuva ina qele, rau kaya: “Kemuni na Kalou, na Kalou e solia na igu ni bula vua na tamata* kece ga,+ na cava moni cudruvi ira kina na isoqosoqo taucoko ena nona valavala ca e dua wale ga na tamata?”+

23 E qai tukuna vei Mosese o Jiova: 24 “Vosa vei ira na isoqosoqo qai kaya vei ira, ‘Ni lako tani mai na yasana e wavolita tu na valelaca i Kora, Tecani, kei Epairami!’”+

25 E tucake sara o Mosese qai lako yani vei Tecani kei Epairami, era tomani koya tale ga na qase ni Isireli.+ 26 E kaya vei ira na isoqosoqo: “Yalovinaka ni toso tani mai na nodratou valelaca na tamata ca qo, kua sara ni tara e dua na ka eratou taukena, moni kua kina ni vakarusai laivi ena nodratou valavala ca.” 27 Sega ni bera nira sa toso tani mai na nodratou valelaca o Kora, Tecani, kei Epairami, ena veiyasana kece, erau qai curu mai tuba o Tecani kei Epairami, erau duri tu ena mata ni nodrau valelaca kei na watidrau, na luvedrau tagane kei na nodrau lalai.

28 E qai tukuna o Mosese: “Ena ka qo oni na kila kina ni talai au mai o Jiova meu cakava na ka kece qo, ni sega ni vu ga mai lomaqu:* 29 Ke ra mate na tamata qo me vaka nodra mate na tamata kece qai tautauvata na kedra itotogi, kena ibalebale e sega ni talai au mai o Jiova.+ 30 Ia ke cakava vei ira o Jiova e dua na ka veivakurabuitaki, mani tadola na qele* qai tilomi ira kei na ka kece era taukena, mera lutu bulabula ina iBulubulu,* oni na qai kila nira beci Jiova sara ga na tamata qo.”

31 Ni tauca oti ga na vosa qori, e qai tawase na qele e rukudra.+ 32 E qai tadola na vanua* qai tilomi ira kei na nodra vuvale kei ira kece era nei Kora,+ wili kina na ka kece era taukena. 33 Era qai lutu bulabula ina iBulubulu,* kei ira kece era wili vei ratou, qai ubi ira na vanua, ra qai takali sara mai na kedra maliwa na ivavakoso.+ 34 Era qai veidroyaki na Isireli kece era tu wavokiti ira nira rogoca nodra qoqolou tiko, ra qai kaya: “Keimami rere de tilomi keimami na vanua!” 35 E qai lako mai vei Jiova na bukawaqa+ qai yameci ira na 250 na tagane era cabora tiko na ka boivinaka.+

36 E qai kaya vei Mosese o Jiova: 37 “Tukuna vei Eliesa na luvei Eroni na bete, me kauta tani mai na loma ni bukawaqa na itawatawa ni bukawaqa,+ nira ka tabu. Tukuna tale ga vua me ceburaka vakayawa na dravusa. 38 Na nodra itawatawa ni ka boivinaka na tagane era mate ena vuku ni nodra valavala ca, me caka kina na veleti kaukamea mamare me iubi ni icabocabonisoro,+ nira a kauta yani qori ena mata i Jiova, me vakatabui kina. Me ivakatakilakila qori vei ira na Isireli.”+ 39 Mani taura o Eliesa na bete na itawatawa kopa ni ka boivinaka era kauta yani o ira era sa kamayavu, ra qai tukilaka qori me iubi ni icabocabonisoro, 40 me vaka ga e tukuna vua o Jiova ena gusu i Mosese. Qo na veivakadreti vei ira na Isireli, me kua kina ni toro voleka yani e dua e sega ni vakadonui,* e sega ni kawa i Eroni me vakama na ka boivinaka ena mata i Jiova,+ me kua kina ni dua e vakataki Kora kei ira na nona ito.+

41 Ena siga ga e tarava, era tekivu vosakudrukudrutaki Mosese kei Eroni na isoqosoqo taucoko ni Isireli,+ era kaya: “O kemudrau, drau sa vakamatei ira na tamata i Jiova.” 42 Nira sa kumuni yani na isoqosoqo mera saqati Mosese kei Eroni, era qara sara ina valelaca ni veitavaki, qai raica! sa solega tu na o, sa qai tekivu basika mai na lagilagi i Jiova.+

43 Erau lako sara ena mata ni valelaca ni veitavaki o Mosese kei Eroni,+ 44 e qai tukuna vei Mosese o Jiova: 45 “Drau tawasei kemudrau mai na kedra maliwa na isoqosoqo qo, meu vakawabokotaki ira kina wale ga qo.”+ Ni rau rogoca ga qori erau tekicuva ina qele.+ 46 Oti e kaya vei Eroni o Mosese: “Taura mai na itawatawa ni bukawaqa, tawana kina na bukawaqa mai na icabocabonisoro+ kei na ka boivinaka, lako totolo sara vei ira na ilawalawa qai veisorovaki ena vukudra,+ ni sa waqa yani na cudru i Jiova. Sa tekivu na kuita!” 47 E taura sara mai o Eroni me vaka e tukuna o Mosese, qai cici yani ena kedra maliwa na ivavakoso, ia raica! sa tekivu na kuita ena kedra maliwa na tamata. E mani biuta na ka boivinaka ena kena itawatawa qai veisorovaki sara ena vukudra na tamata. 48 E duri tu ga o koya ena kedra maliwa na mate kei na bula, sa qai mudu na kuita. 49 Era le 14,700 taucoko o ira na mate ena kuita, e sega ni wili kina o ira na mate ena vuku i Kora. 50 Ni qai lesu yani vei Mosese o Eroni ena icurucuru ni valelaca ni veitavaki, sa mudu na kuita.

17 E kaya tale vei Mosese o Jiova: 2 “Vosa vei ira na Isireli qai taura mai vei ira e dua na ititoko ena yavusa yadua, mai vei ratou na turaga ni yavusa yadua,+ me 12 taucoko na ititoko. Vola na yacadratou yadua ena nodratou ititoko. 3 Mo vola na yaca i Eroni ena ititoko i Livai, ni ratou yadua na ititoko na iliuliu ni yavusa yadua. 4 Lai biuta sara ena valelaca ni veitavaki ena mata ni Kato ni iVakadinadina,+ ena vanua au dau rairai kina vei kemudrau.+ 5 Ena qai kubu mai na ititoko i koya au digitaka,+ au na tinia kina na nodra vosakudrukudrutaki au tiko na Isireli,+ era vosakudrukudrutaki kemudrau tale tiko ga kina.”+

6 E qai vosa vei ira na Isireli o Mosese, eratou sa qai solia vua na ititoko na liuliu ni yavusa—dua na ititoko dua na iliuliu ni yavusa, e 12 na ititoko—qai tu vata kei na nodra ititoko na ititoko i Eroni. 7 E lai biuta sara o Mosese na ititoko qori ena mata i Jiova, ena valelaca ni iVakadinadina.

8 Ena siga e tarava, ni qai curu yani o Mosese ina valelaca ni iVakadinadina, raica! sa kubu tu na ititoko i Eroni ena vuku ni vale i Livai, e kubu tiko qai seraka na sena, e vuataka tale ga na amodi dreu. 9 Sa qai kauta yani i tuba o Mosese na ititoko kece a tu ena mata i Jiova vei ira kece na lewe i Isireli. Era raica, ratou qai taura na iliuliu na nodratou dui ititoko.

10 E qai tukuna vei Mosese o Jiova: “Biuta lesu na ititoko i Eroni+ ena mata ni iVakadinadina me maroroi tu me ivakatakilakila+ vei ira na luve ni talaidredre,+ me mudu kina na nodra vosakudrukudrutaki au tiko, mera kua tale ga ni mate.” 11 E cakava sara o Mosese na ka e vakaroti koya kina o Jiova. E cakava sara ga na ka e tukuni vua.

12 Era qai tukuna vei Mosese na Isireli: “Keimami sa na mate dina ga, keimami na kawaboko, keimami na kawaboko kece! 13 Ke dua e torova mada ga yani na valeniveitavaki i Jiova, ena mate!+ Me keimami mate kece tu va ya?”+

18 E qai kaya vei Eroni o Jiova: “O iko kei rau na luvemu kei na nomu mataqali dou na saumitaro ena cala cava ga e caka ena vuku ni tikina tabu,+ dou na saumitaro tale ga o iko kei rau na luvemu ena cala cava ga e caka ena vuku ni nomudou itavi vakabete.+ 2 Kauti ira voleka tale ga mai na tacimu ena yavusa i Livai, na nodra yavusa na nomu qase, mera tomani iko kina ra qai qaravi iko+ kei rau na luvemu ena mata ni valelaca ni iVakadinadina.+ 3 Mera vakayacora nodra itavi vei iko kei na valelaca taucoko.+ Ia mera kua ga ni torova na iyaya ni vanua tabu kei na icabocabo, mera kua ni mate kina o ira se o kemudou.+ 4 Era na tomani iko ra qai vakayacora na nodra itavi me baleta na valelaca ni veitavaki kei na veiqaravi kece ena valelaca, ia me kua ni toro volekati kemuni e dua e sega ni vakadonui.*+ 5 Moni qarava na nomuni itavi me baleta na vanua tabu+ kei na icabocabo,+ me kua kina ni cudruvi+ tale na lewe i Isireli. 6 O yau sara ga au kauti ira tani mai na tacimudou, na Livai, ena kedra maliwa na Isireli, mera isolisoli vei kemudou.+ Era soli vei Jiova me qaravi kina na cakacaka ni valelaca ni veitavaki.+ 7 O iko kei rau na luvemu e nomudou itavi na veiqaravi vakabete e vauca na icabocabo kei na ka e tiko e loma ni ilatilati,+ dou na colata na itavi qori.+ Au sa solia vei kemudou na isolisoli ni veiqaravi vakabete, ke toro voleka yani e dua e sega ni vakadonui,* me vakamatei.”+

8 E kaya tale vei Eroni o Jiova: “O yau sara ga au sa solia mo lewa na cau e dau soli vei au.+ Au solia vei iko kei rau na luvemu e dua na iwase ni veika tabu kece era cautaka mai na Isireli me kemudou ivotavota tudei.+ 9 Qo ena kemudou mai na isoro tabu sara era cabori ena bukawaqa: na isoro kece era cabora wili kina na nodra isoro kakana,+ na nodra isoro ni ivalavala ca,+ kei na nodra isoro ni cakacala+ era kauta mai vei au. Qori na ka tabu sara me kemu kei rau na luvemu. 10 Mo kania qori ena vanua tabu sara.+ E rawa nira kania na tagane kece. Ena ka tabu qori vei iko.+ 11 E kemu tale ga qo: na isolisoli era cautaka+ vata kei na nodra isoro yalovaki+ kece na Isireli. Au sa solia vei iko kei ira na luvemu tagane kei ira na luvemu yalewa, me kemuni ivotavota tudei.+ O ira kece e savasava ena nomu vale e rawa nira kania.+

12 “Na waiwai kece e vinaka duadua, na waini vou kece e vinaka duadua kei na covuata, na kedra isevu,+ era solia vei Jiova, au sa solia vei iko.+ 13 Na isevu matua kece mai na nodra qele era na kauta mai vei Jiova, ena nomu.+ O koya ga e savasava ena nomu vale e rawa ni kania.

14 “Na ka kece ga sa vakatabui* e Isireli ena nomu.+

15 “Na imatai ni ka e sucu vei ira na kabula kece,*+ era na solia vei Jiova, se mani tamata se manumanu, me nomu. Ia mo volia lesu sara ga na ulumatua ni tamata,+ na imatai ni luve ni manumanu dukadukali e sucu mo volia lesu tale ga.+ 16 Mo volia lesu ena ilavo e vakarautaki ni sa vula dua lako cake, me vaka na isau sa cakacakataki tu me lima na sikeli* siliva,+ me salavata kei na ivakarau tudei ni sikeli ena vanua tabu.* E 20 na kera.* 17 Ia me kua ga ni voli lesu na imatai ni luvenibulumakau tagane e sucu, se na imatai ni lami tagane e sucu, se na imatai ni luvenime e sucu.+ Era ka tabu. Mo kureitaka ena icabocabonisoro na kedra dra,+ me qai vakamai ena bukawaqa na kedra uro me kubou cake, me talei* vei Jiova na kena iboi.+ 18 Ena kemu tale ga na lewedra. Me vaka ga na sarisari ni isoro yalovaki, me kemu tale ga na yava imatau.+ 19 Na ka tabu kece era na cautaka vei Jiova na Isireli,+ au sa solia vei iko, vei ira na luvemu tagane kei na luvemu yalewa era tiko kei iko, me kedra ivotavota tudei.+ Qo na veiyalayalati tudei ena masima,* ena mata i Jiova, me baleti iko kei na nomu kawa e tiko kei iko.”

20 E qai kaya vei Eroni o Jiova: “O na sega ni vakaivotavota ena nodra qele, ena sega ni dua na nomu iwasewase ni qele ena kedra maliwa.+ O yau na nomu iwasewase kei na nomu ivotavota ena kedra maliwa na Isireli.+

21 “Ia raica, au sa solia vei ira na luvei Livai na ikatini ni ka kece ga+ e Isireli me nodra ivotavota, me idole ni veiqaravi era vakayacora tiko, na veiqaravi ena valelaca ni veitavaki. 22 Mera kua tale ni torova na valelaca ni veitavaki na lewe i Isireli, de ra valavala ca ra qai mate. 23 O ira sara ga na Livai mera na vakayacora tiko na veiqaravi ena valelaca ni veitavaki, o ira sara ga era na saumitaro ena nodra cala.+ E ivakaro tudei ena nomuni itabatamata kece, mera kua ni taukena e dua na ivotavota ena kedra maliwa na Isireli.+ 24 Niu sa solia me nodra ivotavota na Livai na ikatini ni nodra cau na lewe i Isireli, era na cautaka vei Jiova. Oya na vuna au kaya kina vei ira, ‘Mera kua ni taukena e dua na ivotavota ena kedra maliwa na Isireli.’”+

25 E qai kaya vei Mosese o Jiova: 26 “Tukuna vei ira na Livai, ‘Oni na taura mai vei ira na Isireli na ikatini au sa solia vei kemuni me nomuni ivotavota,+ ia mai na ikatini qori, moni taura kina e dua na ikatini me nomuni cau vei Jiova.+ 27 Ena qai wili qori me nomuni cau, me vaka na covuata mai na rara ni butu covuata,+ se na levu ni waini mai na ikeliniwaini se na levu ni waiwai mai na ikeliniwaiwai. 28 Ena sala qo oni na solia tale ga vei Jiova e dua na cau mai na ikatini kece oni taura vei ira na Isireli, mai na ka qori moni qai solia kina na cau vei Jiova, vei Eroni na bete. 29 Oni na cautaka vei Jiova na veimataqali cau mai na isolisoli vinaka duadua era soli vei kemuni,+ mera ka tabu.’

30 “Mo kaya vei ira, ‘Ni oni sa cautaka na kedra ka vinaka duadua, ena wili vei ira na Livai me vaka ga na covuata mai na rara ni butu covuata, me vaka tale ga na waini mai na ikeliniwaini se na waiwai mai na ikeliniwaiwai. 31 Moni kania qori ena vanua cava ga oni via kania kina, o kemuni kei ira nomuni lewenivale, ni qori na isau ni nomuni veiqaravi ena valelaca ni veitavaki.+ 32 Oni na sega ni valavala ca ena vuku ni ka qo, moni cautaka ga na kedra ka vinaka duadua, ia moni kua sara ni vakadukadukalitaka na nodra veika tabu na Isireli, de oni mate.’”+

19 E vosa tale vei Mosese kei Eroni o Jiova, e kaya: 2 “Qo na ivakaro mai na lawa e vakarota o Jiova, ‘Tukuna vei ira na Isireli mera kauta mai vei iko e dua na bulumakau yalewa vinaka, e damudamu qai sega ni ca e dua na tikina,+ e se sega tale ga ni taqa e domona e dua na ivua. 3 Drau solia vei Eliesa na bete, ena kauta o koya ina taudaku ni keba me qai vakamatei e matana. 4 Oti me tara o Eliesa na bete eso na kena dra ena iqaqaloniligana, qai kureitaka vakavitu na kena dra donuya na mata ni valelaca ni veitavaki.+ 5 Ena qai vakamai e matana na bulumakau yalewa. Ena kama kece na kulina, lewena, kena dra kei na dena.+ 6 Ena taura na bete na kau sitari, na isopi,+ kei na isulu kulakula, qai viritaka i loma ni buka sa kama tu kina na bulumakau. 7 Ena qai savata nona isulu na bete, ena sili tale ga o koya* ena wai, oti sa qai rawa ni curu ina keba, ia ena dukadukali tiko na bete me yacova na yakavi.

8 “‘O koya e vakama na bulumakau ena savata na nona isulu qai sili o koya* ena wai, ena dukadukali tiko me yacova na yakavi.

9 “‘Ena kumuna na dravusa ni bulumakau e dua na tamata savasava,+ qai biuta ena taudaku ni keba ena dua na vanua savasava, mera qai maroroya tiko na isoqosoqo ni Isireli me dau vakarautaki kina na wai ni veivakasavasavataki.+ Qori na isoro ni ivalavala ca. 10 O koya e kumuna na dravusa ni bulumakau ena savata nona isulu qai dukadukali tiko me yacova na yakavi.

“‘Qo ena lawa tudei vei ira na Isireli kei na vulagi era tiko ena kedra maliwa.+ 11 O koya e tara e dua na tamata mate, ena dukadukali me vitu na siga.+ 12 O koya qori me na vakasavasavataki koya ena wai* ena ikatolu ni siga, ena qai savasava ena ikavitu ni siga. Ia ke sega ni vakasavasavataki koya ena ikatolu ni siga, ena sega ni savasava ena ikavitu ni siga. 13 O koya e tara na yago ni tamata mate qai sega ni vakasavasavataki koya, e sa vakadukadukalitaka na valeniveitavaki i Jiova,+ me muduki laivi* na tamata oya vei ira na Isireli.+ Ena dukadukali tiko ga ni a sega ni kureitaki vua na wai ni veivakasavasavataki.+ E tiko ga vua na nona dukadukali.

14 “‘Qo na lawa me muri ni mate ena valelaca e dua: O ira kece na curu ina valelaca kei ira kece sa tiko rawa e loma ni valelaca, era na dukadukali tiko me vitu na siga. 15 E dukadukali na itawatawa kece e dola tu ni sega ni vesu kina e dua na isogo.+ 16 O ira kece na tu mai lomanivanua era tara na tamata e vakamatei ena iseleiwau, se na yagonimate, se na sui ni tamata, se ibulubulu, ena dukadukali tiko me vitu na siga.+ 17 Mera lai kauta mai ena vuku i koya e dukadukali eso na dravusa ni isoro ni ivalavala ca a vakamai, qai sova yani na waidranu ena dua na itawatawa. 18 Ena qai taura mai na isopi+ e dua na tamata savasava,+ ena tonia ena wai qai kureitaka ena valelaca, ena itawatawa kece kei na tamata kece era tu e kea, vei koya tale ga e tara na sui se na tamata e vakamatei se na yagonimate se na ibulubulu. 19 Na tamata savasava ena kureitaka qori vei koya e dukadukali ena ikatolu ni siga kei na ikavitu ni siga, ena qai vakasavasavataki koya mai na ivalavala ca ena ikavitu ni siga.+ Me savata na nona isulu qai sili ena wai, ena qai savasava tale o koya ena yakavi.

20 “‘Ia na tamata e dukadukali tiko qai sega ni via vakasavasavataki koya, me muduki laivi* mai na ivavakoso na tamata qori,+ ni sa vakadukadukalitaka na tikina tabu i Jiova. A sega ni kureitaki vua na wai ni veivakasavasavataki, e dukadukali o koya.

21 “‘Qo ena lawa tudei vei ira: O koya e kureitaka na wai ni veivakasavasavataki+ me savata na nona isulu, o koya tale ga e tara na wai ni veivakasavasavataki ena dukadukali tiko me yacova na yakavi. 22 Ena dukadukali na ka e tara o koya e dukadukali tiko, na tamata tale ga e tara qori ena dukadukali tiko me yacova na yakavi.’”+

20 Ena imatai ni vula, era lako yani ina vanua talasiga o Jini na isoqosoqo taucoko ni Isireli, ra lai tiko sara e Ketesa+ na tamata. A mate qai bulu e kea o Miriama.+

2 Ia e sega na medra wai na isoqosoqo,+ ra qai kumuni vata mera saqati Mosese kei Eroni. 3 Era veiba kei Mosese,+ era kaya vua: “Ke keimami se mate ga nira mate na taci keimami ena mata i Jiova! 4 Na cava drau kauta mai kina na ivavakoso i Jiova ina vanua talasiga qo me keimami mai mate i ke kei na neimami manumanu?+ 5 Na cava drau liutaki keimami tani mai kina e Ijipita me keimami lako mai ina vanua ca qo?+ E sega ni vanua ni sorenikau kei na vuanilolo kei na vaini kei na pomekaraneti, qai sega na wai me gunuvi.”+ 6 Erau qai gole tani mai na matadra na ivavakoso, rau lako sara ina icurucuru ni valelaca ni veitavaki, rau qai tekicuva ina qele, e qai tekivu laurai vei rau na lagilagi i Jiova.+

7 E qai tukuna vei Mosese o Jiova: 8 “Taura na ititoko, kaciva vata mai na isoqosoqo, o iko kei Eroni na tuakamu, vosa ina vatu e matadra me vure mai na wai, o na qai kauta mai na medra wai mai na vatu, qai solia vei ira na isoqosoqo kei na nodra manumanu na ka mera gunuva.”+

9 E taura sara na ititoko o Mosese mai na mata i Jiova,+ me vaka ga e vakaroti kina. 10 Oti erau kaciva vata mai na ivavakoso o Mosese kei Eroni ena mata ni vatu, qai kaya vei ira o koya: “Ni rogoca sara qo ni yavu tamata talaidredre! Me keirau kauta mai na vatu qo na memuni wai?”+ 11 E dodoka na ligana o Mosese qai samuta vakarua na vatu ena nona ititoko, e tekivu coka mai tuba na wai, era gunu sara na isoqosoqo kei na nodra manumanu.+

12 E muri sa qai tukuna vei Mosese kei Eroni o Jiova: “Ni drau sega ni vakaraitaka ni drau vakabauti au, drau qai sega ni vakarokorokotaki au e matadra na lewe i Isireli, drau na sega sara ga ni kauta na ivavakoso qo ina vanua au na solia vei ira.”+ 13 Qori na wai kei Meripa,*+ era a veiba kina kei Jiova na Isireli, me vakarokorokotaki kina o koya ena kedra maliwa.

14 E qai tala yani eso mai Ketesa o Mosese mera lai tukutuku vua na tui Itomi:+ “Qo na ka e kaya o Isireli na tacimu,+ ‘O kila vinaka na ka dredre kece keimami vakila. 15 Era gole i Ijipita na tamai keimami,+ keimami lai tu e Ijipita me vica vata na yabaki,*+ ra qai vakalolomataki keimami kei ira na tamai keimami na kai Ijipita.+ 16 Keimami qai tagi vei Jiova,+ mani rogoci keimami o koya qai tala mai e dua na agilosi+ qai kauti keimami tani mai Ijipita, ia keimami sa mai tu qo e Ketesa, e dua na koro ena iyalayala ni nomu vanua. 17 Yalovinaka, me keimami takoso ena nomu vanua. Keimami na sega ni takosova e dua na nomu were se loganivaini, keimami na sega tale ga ni gunu mai na dua na toevu. Keimami na muria ga na Gaunisala ni Tui, qai sega ni gole ina imawi se imatau me yacova ni keimami sa takosova na nomu vanua.’”+

18 Ia e kaya vua o Itomi: “Kua ni takosova na neimami vanua. Ke o na cakava qori au na tavaki iko ena noqu iseleiwau.” 19 Era qai tukuna vua na Isireli: “Keimami na muria cake ga na gaunisala levu, ke keimami gunuva na memu wai vata kei na neimami manumanu, keimami na sauma.+ Na ka ga keimami vinakata, me keimami taubale takoso.”+ 20 Ia se tukuna ga o koya: “Mo kua ni takoso.”+ E qai lako yani me lai tavaki koya o Itomi, na nona ilala levu, kei na mataivalu* kaukaua. 21 E cata gona o Itomi me takosova na nona vanua o Isireli, e mani gole tani mai vua o Isireli.+

22 Era biubiu mai Ketesa na lewe i Isireli, na isoqosoqo taucoko, ra qai lako ina Ulu i Ori.+ 23 E qai tukuna o Jiova vei Mosese kei Eroni ena Ulu i Ori, ena iyalayala ni vanua o Itomi: 24 “Ena lai vakadavori vata kei ira na wekana* o Eroni.+ Ena sega ni curu ina vanua au na solia vei ira na Isireli, ni drau a beca na noqu ivakaro me baleta na wai mai Meripa.+ 25 Kauti Eroni kei Eliesa na luvena, qai kauti rau cake mai na Ulu i Ori. 26 Luvata na isulu vakabete i Eroni,+ vakaisulutaki Eliesa+ kina na luvena, ena mate e kea o Eroni.”*

27 E cakava sara ga o Mosese me vaka e vakaroti koya kina o Jiova, ratou qai cabeta na Ulu i Ori e matadra na isoqosoqo taucoko. 28 E qai luvata na isulu vakabete i Eroni o Mosese, e vakadarama vei Eliesa na luvena. Sa qai mate e kea ena dela ni ulunivanua o Eroni.+ Erau sa qai siro mai na ulunivanua o Mosese kei Eliesa. 29 Nira raica na isoqosoqo kece ni sa mate o Eroni, sa qai lolositaki Eroni tu na vuvale kece i Isireli me 30 na siga.+

21 Ni rogoca na tui Arati+ e kai Kenani e tiko ena Nikepi, ni sa lako yani o Isireli ni muri vaka i Acarimi, e valuti Isireli o koya qai kauta vakavesu eso. 2 E mani bubului vei Jiova o Isireli: “Ke oni soli ira na tamata qo ena ligaqu, au na vakarusa sara ga na nodra koro.” 3 E rogoca gona na domo i Isireli o Jiova, e qai soli ira na kai Kenani vei ira, era vakarusai ira sara kei na nodra koro. Era mani vakatoka na vanua oya me o Orima.*+

4 Nira tomana na nodra ilakolako mai na Ulu i Ori+ ena sala e gole ina Wasa Damudamu, mera lako wavokita kina na vanua o Itomi,+ ra qai oca na tamata ena ilakolako ya. 5 Era vosavakacacataki Mosese+ tiko ga kei na Kalou, era kaya: “Na cava drau kauti keimami tani kina mai Ijipita, me keimami mai mate ena vanua talasiga? E sega mada ga na kakana kei na wai,+ keimami sa mai cata* tale ga na madrai vakasisila qo.”+ 6 E mani tala yani o Jiova na gata poisoni* ena kedra maliwa na Isireli, ra qai katilaki ira tiko ga, era mate kina e levu na Isireli.+

7 Era mani lako yani vei Mosese, era kaya: “Keimami sa valavala ca ni keimami vosavakacacataki Jiova kei iko.+ Vakamamasu mada vei Jiova me kauta laivi vei keimami na gata poisoni.” E qai vakamamasu ena vukudra na tamata o Mosese.+ 8 E qai kaya vei Mosese o Jiova: “Cakava e dua na ivakatakarakara ni gata poisoni* qai biuta ena dua na kau dodonu. Ni sa laukati ga e dua, me raica sara o koya me bula tiko kina.” 9 E bulia sara o Mosese e dua na gata kopa+ qai biuta ena dua na kau+ dodonu, ni katia ga e dua na tamata na gata qai raica na gata kopa, e bula o koya.+

10 Oti ya era biubiu sara na Isireli, ra lai keba e Opoci.+ 11 Era qai biuti Opoci, ra lai keba sara e Iyeparimi,+ ena vanua talasiga donui Moapi, ena yasana e qara ina tokalau. 12 Era qai biubiu mai kea, ra lai keba donuya na Buca* kei Sereti.+ 13 Era biubiu mai kea ra lai keba sara ena yasayasa ni Arinoni,+ e toka ena vanua talasiga e tekivu mai na nodra iyalayala na Amoraiti, na Arinoni qo na iyala kei Moapi, ena tadrua kei Moapi kei ira na Amoraiti. 14 Oya na vuna e cavuti kina ena ivola ni iValu i Jiova “O Vaepa e Sufa kei na veibuca* ni Arinoni, 15 na baba* ni veibuca,* yaco sara ina itikotiko kei Ari qai sema kei na iyalayala i Moapi.”

16 Oti ya, era lako i Pieri. Qo na toevu e kaya kina o Jiova vei Mosese: “Kumuni ira mai na tamata, meu solia vei ira na wai.”

17 Ena gauna oya, e lagata kina o Isireli na sere qo:

“Tovure mai, o iko na toevu!​—Sauma* sara!

Mai na vanua talasiga oya, era lako sara i Matana, 19 mai Matana ra dewa i Nelieli, mai Nelieli ra dewa i Pamoci.+ 20 Era lako mai Pamoci ina buca e tiko ena yasana* o Moapi,+ ena ulu i Pisika,+ e tu mai rukuna na Jesimoni.*+

21 E tala yani o Isireli eso na italai vei Sioni na nodra tui na Amoraiti, e kaya:+ 22 “Me keimami takoso mada ena nomu vanua. Keimami na sega ni gole ina dua na were se loganivaini. Keimami na sega ni gunu mai na dua na toevu. Keimami na muria tiko na Gaunisala ni Tui me yacova ni keimami sa takosova na nomu vanua.”+ 23 Ia e sega ni vakatarai Isireli o Sioni me takosova na nona vanua. E soqoni ira ga na nona tamata kece o Sioni qai lako yani me saqati Isireli ena vanua talasiga e yaco i Jeasa qai tekivu vala kei Isireli.+ 24 Ia e vakadrukai koya o Isireli ena iseleiwau,+ qai taura kece na nona vanua+ mai na Arinoni+ yaco sara i Japoki,+ volekati ira na kawa i Amoni, ni o Jaseri+ na iyalayala ni nodra vanua na Amoni.+

25 E taura na koro kece qori o Isireli, era lai vakaitikotiko sara ena nodra koro kece na Amoraiti,+ mai Esiponi kei na kena tauni lalai.* 26 O Esiponi na koro nei Sioni, na nodra tui na Amoraiti, o koya a vala kei na tui Moapi qai taura kece mai vua na nona vanua me yaco sara i Arinoni. 27 Qori e vu mai kina na vosa vakaibalebale ni veivakanini:

“Lako mai i Esiponi.

Me tara na koro nei Sioni, me vakataudeitaki.

28 Ni sa waqa mai Esiponi na buka, na yameyame mai na tauni nei Sioni.

Sa yameci Ari mai Moapi, o ira na turaga ni vanua cecere kei Arinoni.

29 O na rarawa Moapi! Oni na rusa na tamata nei Kimosi!+

E vakavuna o koya mera veidroyaki voli na luvena tagane, ra qai vesu na luvena yalewa vei Sioni, na nodra tui na Amoraiti.

31 E tekivu vakaitikotiko o Isireli ena nodra vanua na Amoraiti. 32 E tala yani eso na tagane o Mosese mera lai yamata e Jaseri.+ Era vakavua na kena tauni lalai,* ra qai vakasavi ira na Amoraiti era tu e kea. 33 Oti era gole cake sara ena Sala i Pasani. E qai lako yani o Oki+ na tui Pasani kei ira kece na nona tamata mera vala e Etirei.+ 34 E kaya vei Mosese o Jiova: “Kua ni rerevaki koya,+ niu na soli koya kei ira kece na nona tamata kei na nona vanua ina ligamu,+ o na qai cakava vua na ka vata ga o cakava vei Sioni na nodra tui na Amoraiti, o koya a vakaitikotiko mai Esiponi.”+ 35 Era mani mokuti koya tiko ga, kei ratou na luvena tagane, kei ira kece na nona tamata, me yacova ni sa sega ni vo e dua na nona tamata,+ ra qai lai taukena na nona vanua.+

22 Era qai biubiu na Isireli, ra lai keba toka ena buca dravuisiga kei Moapi ena tai adua ni Joritani mai Jeriko.+ 2 E raica o Pelaki+ na luvei Sipori na ka kece e cakava o Isireli vei ira na Amoraiti, 3 qai domobulataki ira na tamata o Moapi, nira sa rui le levu, e rerevaki ira sara ga na Isireli+ o Moapi. 4 E qai kaya o Moapi vei ira na qase ni Mitiani:+ “Na ivavakoso qo ena kanilaka kece na noda vanua, me vaka ga na bulumakau tagane e dau kanilaka na co ni vanua.”

A tui Moapi tiko ena gauna oya o Pelaki na luvei Sipori. 5 E tala o koya eso na italai vei Pelami na luvei Piori, mai Picori+ donuya na Uciwai* ena nona vanua dina. E talatala vua, e kaya: “Raica! Sa lako tani mai Ijipita e dua na matatamata. Raica! Era sa robota na dela* i vuravura,*+ ra qai vakaitikotiko sara ga qo e mataqu. 6 Yalovinaka, lako mai, cudruva na matatamata qo ena vukuqu,+ nira kaukaua cake vei au. Deu na rawa ni vakadrukai ira qai cemuri ira laivi mai na vanua, niu kila vinaka ni na kalougata o koya o vosavakalougatataka, qai kalouca o koya o cudruva.”

7 Era lako sara vei Pelami na qase ni Moapi kei na qase ni Mitiani, era kauta yani e ligadra na isau ni daurairai, ra qai lako vei Pelami,+ era vakadewataka vua na itukutuku i Pelaki. 8 E kaya vei ira o koya: “Dou moce i ke ena bogi nikua, au na qai mai kaya tale vei kemudou na vosa cava ga e tukuna o Jiova vei au.” Eratou mani tiko ga kei Pelami na turaga ni Moapi.

9 E qai lako mai vei Pelami na Kalou qai kaya:+ “O cei o iratou na tagane eratou tiko qo kei iko?” 10 E kaya o Pelami vua na Kalou dina: “E vakauta mai vei au e dua na itukutuku o Pelaki na luvei Sipori, na tui Moapi, e kaya, 11 ‘Raica! Na matatamata era lako tani mai Ijipita era sa robota tu na dela* i vuravura.* Mo lako mai qai cudruvi ira ena vukuqu.+ Deu na rawa ni valuti ira qai cemuri ira laivi.’” 12 Ia e kaya na Kalou vei Pelami: “Mo kua ni lako vata kei ratou. Kua ni cudruvi ira na tamata, nira sa vakalougatataki.”+

13 E tucake ena mataka o Pelami, e kaya sara vei ratou na turaga mai vei Pelaki: “Dou lako ina nomudou vanua, ni besetaka o Jiova meu lesu vata kei kemudou.” 14 Eratou biubiu sara na turaga ni Moapi, eratou lesu vei Pelaki qai kaya: “E bese ni lako mai kei keitou o Pelami.”

15 Ia e tala tale eso na turaga o Pelaki, era le levu cake ra qai dokai cake vei ratou na imatai ni ilawalawa. 16 Era gole yani vei Pelami era kaya vua: “Qo na ka e tukuna o Pelaki na luvei Sipori, ‘Yalovinaka, kua ni laiva e dua na ka me tarova nomu lako mai vei au, 17 niu na rokovi iko vakalevu, au na qai cakava na ka ga o tukuna vei au meu cakava. Yalovinaka, lako mai, qai cudruva na matatamata qo ena vukuqu.’” 18 Ia e sauma o Pelami vei ira na dauveiqaravi i Pelaki: “Ke mani solia vei au o Pelaki na nona vale e sinai tu ena siliva kei na koula, au na sega ga ni cakava rawa e dua na ka e sega ni vakarota o Jiova na noqu Kalou, se mani lailai se levu.+ 19 Ia yalovinaka sara, ni tiko tale i ke ena bogi nikua, meu kila kina se cava tale ena tukuna vei au o Jiova.”+

20 E qai lako mai vei Pelami na Kalou ena bogi, e kaya vua: “Ke ra gole mai na tagane qori mera mai kacivi iko, mo lako vata kei ira. Ia mo cavuta ga na vosa au tukuna vei iko mo kaya.”+ 21 E mani tucake ena mataka o Pelami, vakarautaka nona idabedabe ena daku ni nona asa,* qai gole sara kei ira na turaga ni Moapi.+

22 Ia e waqa na cudru ni Kalou ni sa lako o koya, qai lai tu mai gaunisala na agilosi i Jiova me tarovi koya. E vodo voli o Pelami ena nona asa, rau salavata kei koya e rua nona dauveiqaravi. 23 Ni raica na asa ni duri tu e gaunisala na agilosi i Jiova, qai taura tu e ligana e dua na iseleiwau, e saga sara me gole tani mai na gaunisala me tiva ina were. Ia e tekivu mokulaka na asa o Pelami me suka tale i gaunisala. 24 E duri tu ga na agilosi i Jiova ena sala qiqo ena maliwa ni rua na loganivaini, e lalagavatu na yasana ruarua. 25 Ni raica ga na agilosi i Jiova na asa, e ravita sara na lalagavatu qai vakataotaka na yava i Pelami ena lalaga, e tekivu mokulaka tale o Pelami.

26 E tasivi tale na agilosi i Jiova qai lai duri tu ena dua na vanua qiqo, e dredre kina na gole ina imatau se na imawi. 27 Ni raica ga na agilosi i Jiova na asa, e davo sara ni se vodo tu ga o Pelami, e katakata sara ga o Pelami qai mokulaka tiko ga na asa ena nona ititoko. 28 Sa qai vakavuna o Jiova me vosa na asa,*+ e kaya vei Pelami: “Na cava au cakava vei iko mo mokulaki au kina vakatolu?”+ 29 E sauma o Pelami vua na asa: “Baleta ga ni o vakalialiai au. Ke a tu e ligaqu e dua na iseleiwau, keu sa vakamatei iko!” 30 E kaya tale vei Pelami na asa: “Vakacava au sega ni nomu asa o dau vodoka ena nomu bula taucoko me yacova mai nikua? Bau dua na gauna au cakava kina va qo vei iko?” E sauma o koya: “Sega!” 31 E qai dolava na mata i Pelami o Jiova,+ e mani raica o koya ni duri tu e gaunisala na agilosi i Jiova, e tu e ligana e dua na iseleiwau. Sega ni bera ni sa cuva o koya qai davo vakatoboicu.

32 E qai tukuna na agilosi i Jiova vua: “Na cava o mokuta kina vakatolu na nomu asa? Raica! O yau sara ga, au lako mai meu mai tataro, ni ka o cakava e sega ni vaka na noqu inaki.+ 33 E raici au na asa qai saga me gole tani mai vei au vakatolu.+ Kaya mada ke a sega ni gole tani mai vei au! Keu sa vakamatei iko oti qai bula ga na asa.” 34 E tukuna o Pelami vua na agilosi i Jiova: “Au sa valavala ca, niu sega ni kila ni o kemuni ga oni duri tu e gaunisala moni tavaki au. Ia ke ca e matamuni, au na lesu tale.” 35 Ia e kaya vei Pelami na agilosi i Jiova: “Lako vata kei ira na tagane qo, ia mo cavuta na vosa au tukuna vei iko.” E mani tomani ira na turaga nei Pelaki o Pelami.

36 Ni rogoca ga o Pelaki ni sa yaco yani o Pelami, sega ni bera nona lai tavaki koya ena koro kei Moapi e toka ena bati ni Arinoni, ena iyalayala ni vanua. 37 E kaya vei Pelami o Pelaki: “Au sega ni talatala yani vei iko? Na cava o sega ni lako mai kina vei au? O nanuma niu sega ni rawa ni rokovi iko vakalevu?”+ 38 E sauma o Pelami vei Pelaki: “Au sa lako mai qo vei iko. Ia ena bau vakatarai vei au meu tukuna e dua na ka? Au na rawa ni tukuna ga na vosa e biuta i gusuqu na Kalou.”+

39 Mani salavata kei Pelaki o Pelami, rau yaco sara i Kiriaci-usoci. 40 E cabora na bulumakau kei na sipi o Pelaki, qai vakauta eso vei Pelami kei ira na turaga era tiko kei koya. 41 Ena mataka, e kauti Pelami cake i Pamoci-peali o Pelaki, e rawa ni raici ira na tamata kece mai kea.+

23 E qai tukuna o Pelami vei Pelaki: “Tara eke e vitu na icabocabonisoro,+ vakarautaka vei au e vitu na bulumakau tagane, kei na vitu na tamanisipi.” 2 E cakava sara o Pelaki na ka e tukuna o Pelami. E qai cabora o Pelaki kei Pelami e dua na bulumakau tagane kei na dua na tamanisipi ena icabocabonisoro yadua.+ 3 E qai kaya o Pelami vei Pelaki: “Tu ga eke ena yasa ni nomu isoro kama, au na lako mada. De na veitaratara mai vei au o Jiova. Na ka ga e vakatakila vei au, au na kaya vei iko.” E mani lako o koya ina dua na delana lala.

4 E qai veitaratara kei Pelami na Kalou,+ e tukuna vua o Pelami: “Au vakarautaka e vitu na icabocabonisoro mera yatuni tu, au qai cabora e dua na bulumakau tagane kei na dua na tamanisipi ena icabocabonisoro yadua.” 5 E qai biuta na vosa qo o Jiova ena gusu i Pelami:+ “Lesu vei Pelaki, qo na ka mo kaya.” 6 E mani suka o koya qai raica ni duri tu ena yasa ni nona isoro kama o Pelaki kei ira kece na turaga ni Moapi. 7 E cavuta sara o koya na vosa vakaibalebale qo:+

‘Mai cudruvi Jekope mada ena vukuqu.

Io, mai vosabeci Isireli mada.’+

 8 Meu cudruva vakacava na tamata e sega ni cudruva na Kalou?

Meu vosabeca vakacava na tamata e sega ni vosabeca o Jiova?+

11 E kaya sara vei Pelami o Pelaki: “Na cava o sa cakava vei au? Au kauti iko mai mo cudruvi ira na kequ meca, ia qo e sega ni dua tale na ka o cakava, o sa vosa vakalougatataki ira ga.”+ 12 Mani kaya o koya: “Meu sa kua ni cavuta na vosa cava ga e biuta e gusuqu o Jiova?”+

13 E kaya vua o Pelaki: “Yalovinaka, daru lako mada ina dua tale na yasana mo raici ira kina. O na raica ga e dua na kedra iwase, o na sega ni raici ira kece. Mo cudruvi ira mai kea ena vukuqu.”+ 14 E kauti koya sara ena veidelana e Sofimi, ena dela i Pisika,+ e cakava e vitu na icabocabonisoro qai cabora e dua na bulumakau tagane kei na tamanisipi ena icabocabonisoro yadua.+ 15 E mani kaya o Pelami vei Pelaki: “Tu ga eke ena yasa ni nomu isoro kama, meu lai veitaratara mada kei koya e kea.” 16 E veitaratara sara o Jiova vei Pelami qai biuta e gusuna na vosa qo:+ “Lesu vei Pelaki, qo na ka mo tukuna.” 17 E lako yani vua qai raica ni wawa tiko o koya ena yasa ni nona isoro kama, ra qai tu kei koya na turaga ni Moapi. E taroga vua o Pelaki: “Na cava sa tukuna o Jiova?” 18 E qai cavuta o koya na vosa vakaibalebale qo ni kaya:+

“Duri mai Pelaki, qai vakarorogo.

Rogoci au mada, luvei Sipori.

Ni kaya e dua na ka o koya, ena sega ni cakava?

Ni sa vosa o koya, ena sega ni vakayacora?+

22 Na Kalou e kauti ira tani mai Ijipita.+

O koya e vaka na ileu ni bulumakau tagane kila vei ira.+

Ena gauna qo ena rawa ni tukuni me baleti Jekope kei Isireli:

‘Raica na ka sa cakava na Kalou!’

25 E qai kaya vei Pelami o Pelaki: “Ena dua na yasana, ke o sega ni rawa ni cudruvi koya, mo kua tale ga ni vosa vakalougatataki koya.” 26 E kaya vei Pelaki o Pelami: “Au a sega ni kaya vei iko, ‘Au na cakava na ka kece ga e tukuna o Jiova’?”+

27 E kaya vei Pelami o Pelaki: “Yalovinaka lako mai meu kauti iko ina dua tale na vanua. De na qai donu ena mata ni Kalou dina mo cudruvi koya mai kea ena vukuqu.”+ 28 E mani kauti Pelami o Pelaki ina dela i Piori, e qara yani i Jesimoni.*+ 29 E qai tukuna vei Pelaki o Pelami: “Tara mada eke e vitu na icabocabonisoro, qai vakarautaka vei au e vitu na bulumakau tagane, vitu tale ga na tamanisipi.”+ 30 E cakava sara o Pelaki me vaka ga e tukuna o Pelami, e qai cabora ena icabocabonisoro yadua e dua na bulumakau tagane kei na dua na tamanisipi.

24 Ni raica o Pelami ni taleitaka* o Jiova me vakalougatataki Isireli, sa sega ni qai gole tale me lai qara na itukutuku vuni ni leqa,+ ia e vagolea na matana ina vanua talasiga. 2 Ni tacake o Pelami qai raici Isireli ni keba tu vakayavusa,+ e qai sobuti koya na yalo ni Kalou.+ 3 E cavuta sara o koya na vosa vakaibalebale qo:+

10 E katakatataki Pelami sara ga o Pelaki. E sau na ligana ena veibeci qai tukuna vei Pelami: “Au a kacivi iko mai mo cudruvi ira na kequ meca,+ ia e sega ni dua tale na ka o cakava, o vosa vakalougatataki ira ga ena gauna tolutolu qo. 11 Ia qo mo lesu totolo i vale. A noqu inaki meu rokovi iko vakalevu,+ ia raica! O Jiova e tarovi iko mo kua ni rokovi.”

12 E kaya o Pelami vei Pelaki: “Au sega ni bau tukuna vei ira na italai o tala mai, 13 ‘Ke mani solia vei au o Pelaki na nona vale e sinai tu kina na siliva kei na koula, au na sega ni cakava rawa e dua na ka ena noqu lewa* ga, me beci kina na ivakaro i Jiova, se mani vinaka se ca. Au na tukuna ga na ka ena kaya vei au o Jiova’?+ 14 Ia qo au sa lako yani vei ira na noqu tamata. Mai, meu vakasalataki iko mada ena ka era na cakava na tamata qo vei ira na nomu tamata ena veigauna se bera mai.”* 15 E qai cavuta o koya na vosa vakaibalebale qo:+

20 Ni raici Amaleki, e tosoya tale nona vosa vakaibalebale ni kaya:

21 Ni raici ira na Kenaiti,+ e tosoya tale nona vosa vakaibalebale ni kaya:

“E taqomaki vinaka na nomu itikotiko, e tu ena vatu na nomu vale.

22 Ia ena vakamai Keini* e dua.

Ena vakacava na dede ni nona kauti iko vakavesu o Asiria?”

23 E tosoya tale o koya nona vosa vakaibalebale ni kaya:

“Isa! O cei ena bula ni sa cakava qo na Kalou?

Ena rusa vakadua tale ga o koya.”

25 E tucake sara o Pelami+ qai gole lesu i nona itikotiko. E gole tale ga o Pelaki ena nona ilakolako.

25 Nira vakaitikotiko voli e Sitimi+ na Isireli, era tekivu veiyacovi tawadodonu kei ira na goneyalewa ni Moapi.+ 2 Era veisureti na yalewa ena vakacaboisoro vei ira na nodra kalou,+ era tekivu kana ra qai cuva na Isireli vei ira na nodra kalou.+ 3 Era mani sokalou* tale ga na Isireli vei Peali ni Piori,+ e qai waqa na cudru i Jiova vei ira na Isireli. 4 E kaya vei Mosese o Jiova: “Tauri ira kece na iliuliu* ni tamata qo, vakaliligi ira ena mata i Jiova ni se siga tu,* me suka tani kina mai Isireli na cudru waqawaqa i Jiova.” 5 E kaya sara o Mosese vei ira na turaganilewa ni Isireli:+ “Moni dui vakamatea na wekamuni era veitomani ena sokalou vei* Peali ni Piori.”+

6 Ia ena gauna sara ga oya, e lako mai e dua vei ira na Isireli ni kauta voleka yani vei ira na tacina e dua na yalewa ni Mitiani,+ ena mata i Mosese kei na isoqosoqo taucoko ni Isireli, nira se tagi voli ena icurucuru ni valelaca ni veitavaki. 7 Ni raica qori o Finiasi+ na luvei Eliesa, na luvei Eroni na bete, e sega tale ni wawa ni sa tucake mai na kedra maliwa na isoqosoqo qai taura e dua na moto e ligana. 8 E muria yani na tagane ni Isireli ena loma ni valelaca, qai cokai rau vata na tagane ni Isireli kei na yalewa me curubasikata na yago tabu i yalewa. Sa qai mudu na kedra kuita na Isireli.+ 9 Era le 24,000 era mate mai na kuita.+

10 E qai kaya vei Mosese o Jiova: 11 “O Finiasi+ na luvei Eliesa, na luvei Eroni na bete, sa vagolea tani na noqu cudruvi ira na lewe i Isireli, ni a sega ni vakalaiva tu ga o koya na itovo veibeci e caka vei au ena kedra maliwa.+ Qo na vuna au sega kina ni vakawabokotaki ira na Isireli, niu vinakata meu sokaloutaki duadua ga.+ 12 Mo kaya gona, ‘Au sa solia vua na noqu veiyalayalati ni vakacegu. 13 Ena qai veiyalayalati tawamudu ni veiqaravi vakabete vei koya kei na nona kawa era taravi koya mai,+ ni a sega ni vakalaiva tu ga o koya na itovo veibeci e caka vua na nona Kalou,+ e qai sorovaki ira na lewe i Isireli.’”

14 Na yaca ni tagane ni Isireli e vakamatei kei na yalewa ni Mitiani o Simiri, na luvei Salu, e dua na turaga ni nodra mataqali na Simioni. 15 Na yaca ni yalewa ni Mitiani e vakamatei o Kosipi, na luvei Suri,+ o koya e iliuliu ni mataqali ena dua na yavusa e Mitiani.+

16 E qai tukuna vei Mosese o Jiova: 17 “Moni vakasaurarataki ira na kai Mitiani qai mokuti ira,+ 18 nira vakasaurarataki kemuni ena nodra cakacaka vakailawaki vei kemuni ena vuku i Piori,+ kei Kosipi na luvena yalewa e dua na iliuliu ni Mitiani, na ganedra a vakamatei+ ena siga e tau kina na kuita ena vuku i Piori.”+

26 Ni sa tau oti na kuita,+ e qai kaya o Jiova vei Mosese kei Eliesa, na luvei Eroni na bete: 2 “Taura na kedra iwiliwili na isoqosoqo taucoko ni Isireli era yabaki 20 lako cake, me vaka na nodra mataqali, me wiliki o ira kece e rawa nira curu ena mataivalu ni Isireli.”+ 3 E qai vosa vei ira o Mosese kei Eliesa+ na bete ena buca dravuisiga kei Moapi,+ ena yasa ni Joritani volekati Jeriko,+ erau kaya: 4 “Taura na kedra iwiliwili mai na yabaki 20 lako cake, me vaka ga e vakaroti Mosese kina o Jiova.”+

Qo o ira na luvei Isireli era biubiu mai na vanua o Ijipita: 5 O Rupeni+ na ulumatua nei Isireli, na luvei+ Rupeni: O Enoke era basika kina na mataqali i Enoke, o Palu era basika kina na mataqali i Palu, 6 o Esironi era basika kina na mataqali i Esironi, o Kamai era basika kina na mataqali i Kamai. 7 Qo na nodra veimataqali na Rupeni, era le 43,730 na volai na yacadra.+

8 Na luvei Palu o Iliapi. 9 Eratou luvei Iliapi o Nimueli, Tecani, kei Epairami. O Tecani kei Epairami qo erau digitaki mai vei ira na isoqosoqo, erau tomani ira na ilawalawa i Kora+ nira saqati Mosese+ kei Eroni, ena gauna era saqati Jiova kina.+

10 E mani tadola* na qele qai tilomi ira kece. Ia o Kora, a mate kei ira na nona ito ni yameci ira na le 250 na tagane+ na bukawaqa. O ira qo era ivakaraitaki meda vuli kina.+ 11 Ia eratou a sega ni mate na luvei Kora.+

12 Qo o ira na luvei Simioni+ me vaka na nodra veimataqali: O Nimueli era basika kina na mataqali i Nimueli, o Jamini era basika kina na mataqali i Jamini, o Jakini era basika kina na mataqali i Jakini, 13 o Sira era basika kina na mataqali i Sira, o Saula era basika kina na mataqali i Saula. 14 Qo o ira na mataqali na Simioni: 22,200.+

15 Qo o ira na luvei Kata+ me vaka na nodra veimataqali: O Sifoni era basika kina na mataqali i Sifoni, o Aki era basika kina na mataqali i Aki, o Suni era basika kina na mataqali i Suni, 16 o Osini era basika kina na mataqali i Osini, o Eri era basika kina na mataqali i Eri, 17 o Aroti era basika kina na mataqali i Aroti, o Areli era basika kina na mataqali i Areli. 18 Qo na nodra mataqali na luvei Kata, era le 40,500 na volai na yacadra.+

19 Erau luvei Juta+ o Eri kei Onani.+ Ia erau a mate mai na vanua o Kenani o Eri kei Onani.+ 20 Qo o ira na luvei Juta me vaka na nodra veimataqali: O Sela+ era basika kina na mataqali i Sela, o Feresi+ era basika kina na mataqali i Feresi, o Sira+ era basika kina na mataqali i Sira. 21 Qo o ira na luvei Feresi: O Esironi+ era basika kina na mataqali i Esironi, o Emuli+ era basika kina na mataqali i Emuli. 22 Qo na nodra mataqali na Juta, era le 76,500 na volai na yacadra.+

23 Qo o ira na luvei Isakari+ me vaka na nodra veimataqali: O Tola era basika kina na mataqali i Tola,+ o Pua era basika kina na mataqali i Pua, 24 o Jasupi era basika kina na mataqali i Jasupi, o Simironi era basika kina na mataqali i Simironi. 25 Qo na nodra mataqali na Isakari, era le 64,300 na volai na yacadra.+

26 Qo o ira na luvei Sepuloni+ me vaka na nodra veimataqali: O Sereti era basika kina na mataqali i Sereti, o Eloni era basika kina na mataqali i Eloni, kei Jalieli era basika kina na mataqali i Jalieli. 27 Qo na nodra mataqali na Sepuloni, era le 60,500 na volai na yacadra.+

28 Erau luvei Josefa+ o Manasa kei Ifireimi me vaka na nodrau veimataqali.+ 29 Qo o ira na luvei Manasa:+ O Mekiri+ era basika kina na mataqali i Mekiri. O Mekiri e qai tamai Kiliati.+ O Kiliati era basika kina na mataqali i Kiliati. 30 Qo o ira na luvei Kiliati: O Ieseri era basika kina na mataqali i Ieseri, kei Eleki era basika kina na mataqali i Eleki, 31 o Esirieli era basika kina na mataqali i Esirieli, o Sikemi era basika kina na mataqali i Sikemi, 32 o Simita era basika kina na mataqali i Simita, kei Eferi era basika kina na mataqali i Eferi. 33 O Silofati na luvei Eferi e sega na luvena tagane, e vakaluveni yalewa+ ga, na yacadratou na luvei Silofati yalewa+ o Mala, Noa, Okila, Milika, kei Tirisa. 34 Qo na nodra mataqali na Manasa, era le 52,700 na volai na yacadra.+

35 Qo o ira na luvei Ifireimi+ me vaka na nodra veimataqali: O Sucela+ era basika kina na mataqali i Sucela, o Pekeri era basika kina na mataqali i Pekeri, kei Teani era basika kina na mataqali i Teani. 36 Qo o ira na luvei Sucela: O Erani era basika kina na mataqali i Erani. 37 Qo na nodra mataqali na luvei Ifireimi, era le 32,500 na volai na yacadra.+ Qo o ira na luvei Josefa me vaka na nodra veimataqali.

38 Qo o ira na luvei Penijamini+ me vaka na nodra veimataqali: O Pela+ era basika kina na mataqali i Pela, o Asipeli era basika kina na mataqali i Asipeli, o Eirami era basika kina na mataqali i Eirami, 39 o Sifufami era basika kina na mataqali i Sifufami, o Ufami era basika kina na mataqali i Ufami. 40 Erau luvei Pela o Ariti kei Neamani:+ O Ariti era basika kina na mataqali i Ariti, kei Neamani era basika kina na mataqali i Neamani. 41 Qo o ira na luvei Penijamini me vaka na nodra veimataqali, era le 45,600 na volai na yacadra.+

42 Qo o ira na luvei Tani+ me vaka na nodra veimataqali: O Suami era basika kina na mataqali i Suami. Qo o ira na mataqali i Tani me vaka na nodra veimataqali. 43 Era le 64,400+ na volai na yacadra mai na nodra vuvale kece ena mataqali i Suami.

44 Qo o ira na luvei Aseri+ me vaka na nodra veimataqali: O Imina era basika kina na mataqali i Imina, o Isivi era basika kina na mataqali i Isivi, o Piria era basika kina na mataqali i Piria, 45 vei ira na luvei Piria: o Eperi era basika kina na mataqali i Eperi, kei Malikieli era basika kina na mataqali i Malikieli. 46 Na yaca ni luvei Aseri yalewa o Sara. 47 Qo na nodra mataqali na luvei Aseri, era le 53,400 na volai na yacadra.+

48 Qo o ira na luvei Nafitalai+ me vaka na nodra veimataqali: O Jasieli era basika kina na mataqali i Jasieli, o Kuni era basika kina na mataqali i Kuni, 49 o Jeseri era basika kina na mataqali i Jeseri, kei Silemi era basika kina na mataqali i Silemi. 50 Qo o ira na mataqali i Nafitalai me vaka na nodra veimataqali, era le 45,400 na volai na yacadra.+

51 Qo na kedra isoqoni na volayacataki vei ira na Isireli: 601,730.+

52 Oti oya e kaya vei Mosese o Jiova: 53 “Me votai vei ira qori na qele me ivotavota, me vaka ga na iwiliwili ni yaca era volai.*+ 54 Vei ira na iwasewase lelevu, mo vakalevutaka na ivotavota, vei ira na iwasewase lalai, mo vakalailaitaka na ivotavota.+ Na ivotavota ni iwasewase yadua me vakatau ena kedra iwiliwili na volayacataki. 55 Ia me vakawirimadigitaki+ na ivotavota ni qele. Mera taura na nodra ivotavota me vaka na yaca ni yavusa i tamadra. 56 Na ivotavota yadua ena vakadeitaki ena vakawirimadigi qai votai ena kedra maliwa na iwasewase lelevu kei na iwasewase lalai.”

57 Qo o ira na Livai era volayacataki+ me vaka na nodra veimataqali: O Kerisoni era basika kina na mataqali i Kerisoni, o Koaca+ era basika kina na mataqali i Koaca, o Mirari era basika kina na mataqali i Mirari. 58 Qo na nodra veimataqali na Livai: Na mataqali na Lipini,+ na mataqali na Epironi,+ na mataqali na Mali,+ na mataqali na Musi,+ kei na mataqali na Kora.+

E qai tamai Amirami o Koaca.+ 59 Na yaca i wati Amirami o Jokapeti,+ na luvei Livai yalewa, e vakasucuma vei Livai o watina mai Ijipita. E qai luvena vei Amirami o Eroni, Mosese, kei Miriama na ganedrau.+ 60 Oti eratou qai sucu na luvei Eroni o Netapi, Epaiu, Eliesa, kei Icama.+ 61 Ia erau mate o Netapi kei Epaiu ni rau cabora na bukawaqa e sega ni vakadonui ena mata i Jiova.+

62 Na kedra isoqoni na volayacataki e 23,000, o ira kece na tagane vula dua lako cake.+ Nira sega ni volayacataki ena kedra maliwa na Isireli,+ ni na sega ni soli vei ira e dua na ivotavota ena kedra maliwa na Isireli.+

63 Qo o ira e volayacataka o Mosese kei Eliesa na bete ni rau volayacataki ira na Isireli ena buca dravuisiga kei Moapi, ena yasa ni Joritani e Jeriko. 64 Ia vei ira qo, sa sega ni tu e dua a volayacataka o Mosese kei Eroni na bete ena gauna e tauri kina na kedra iwiliwili na Isireli ena vanua talasiga kei Saineai.+ 65 Ni a kaya o Jiova me baleti ira qori: “Era na mate sara ga ena vanua talasiga.”+ E sega gona ni vo vei ira qori e dua na tamata, vakavo ga o Kelepi na luvei Jifune kei Josua na luvei Nuni.+

27 Eratou qai toro yani na luvei Silofati yalewa,+ na luvei Eferi, na luvei Kiliati, na luvei Mekiri, na luvei Manasa, mai na vuvale i Manasa, na luvei Josefa. Qo na yacadratou na luvena yalewa: O Mala, Noa, Okila, Milika, kei Tirisa. 2 Eratou tu ena mata i Mosese kei Eliesa na bete, e matadra na turaga+ kei na isoqosoqo taucoko, ena icurucuru ni valelaca ni veitavaki, eratou kaya: 3 “Sa mate ena vanua talasiga o neitou tata, ia a sega ni maliwai ira na ilawalawa era yalovata mera saqati Jiova, o ira na ito i Kora,+ ia a mate ena vuku ni nona ivalavala ca qai sega ni dua na luvena tagane. 4 Na cava me bokoci kina na yaca i neitou tata mai na nona vuvale, baleta wale ga ni sega na luvena tagane? Solia vei keitou e dua na ivotavota ena kedra maliwa na taci neitou tata.” 5 E mani vakaraitaka ena mata i Jiova+ o Mosese na ka e baleti ratou.

6 Qo na ka sa qai tukuna vei Mosese o Jiova: 7 “Eratou dina tiko na luvei Silofati. Mo solia sara ga vei ratou e dua na ivotavota me ratou taukena ena kedra maliwa na taci tamadratou qai solia vei ratou na ivotavota i tamadratou.+ 8 Tukuna tale ga vei ira na Isireli, ‘Ke mate e dua na tagane qai sega na luvena tagane, moni solia vei luvena yalewa na nona ivotavota. 9 Ke sega na luvena yalewa, moni solia na nona ivotavota vei ratou na tacina. 10 Ke sega na tacina, moni qai solia na nona ivotavota vei ratou na taci tamana. 11 Ia ke sega na taci tamana, moni solia na nona ivotavota vua na wekana vakadra voleka duadua ena nona vuvale, me qai taukena o koya. Qo na lewa sa vakalawataki vei ira na Isireli, me vaka ga e vakaroti Mosese kina o Jiova.’”

12 E qai kaya vei Mosese o Jiova: “Lako cake ina ulunivanua qo o Aparimi,+ qai raica na vanua au na solia vei ira na Isireli.+ 13 Ni o sa raica oti, o na qai lai davo vata kei ira na wekamu,*+ me vakataki Eroni ga na tuakamu,+ 14 ena gauna era veiba kina kei au o ira na isoqosoqo ena vanua talasiga o Jini, drau vorata na noqu lewa meu vakarokorokotaki e matadra ena vuku ni wai.+ Qo na wai e Meripa+ mai Ketesa,+ ena vanua talasiga o Jini.”+

15 E qai tukuna vei Jiova o Mosese: 16 “Me lesia mada ga o Jiova, na Kalou e solia na igu ni bula ina tamata kece ga, e dua na tagane me liutaka na isoqosoqo, 17 o koya ena lako yani qai lako mai e matadra, o koya tale ga ena liutaki ira yani qai kauti ira mai, mera kua kina ni vaka na sipi e sega na kedra ivakatawa na isoqosoqo i Jiova.” 18 E kaya sara vei Mosese o Jiova: “Kauti Josua na luvei Nuni, ni duatani sara na yalo e tiko vua, mo qai tabaki koya+ ena ligamu. 19 Mo qai vakaduri koya ena mata i Eliesa na bete kei na isoqosoqo taucoko, mo qai lesi koya e matadra.+ 20 Mo qai solia vua eso na nomu lewa,*+ mera vakarorogo kina vua o ira na isoqosoqo taucoko ni Isireli.+ 21 Ena tu o koya ena mata i Eliesa na bete, ena qai vakatataro o koya ena vukuna me vaka na lewa ni Urimi+ ena mata i Jiova. Ena nona lewa era na lako kina, ena nona lewa tale ga era na curu mai, o koya kei ira na Isireli kece era tiko kei koya, kei na isoqosoqo taucoko.”

22 E mani cakava o Mosese me vaka ga e vakaroti koya kina o Jiova. E kauti Josua qai vakaduri koya ena mata i Eliesa na bete, e matadra tale ga na isoqosoqo taucoko, 23 e tabaki koya ena ligana qai lesi koya,+ me vaka ga na vosa i Jiova ena gusu i Mosese.+

28 E kaya tarava vei Mosese o Jiova: 2 “Vakaroti ira na Isireli qai tukuna vei ira, ‘Ni qarauna moni dau cabora vei au na noqu isoro, na kequ madrai. Na noqu isoro e cabori ena bukawaqa me talei* vei au na kedra iboi, mera cabori ena kena gauna lokuci.’+

3 “Qai kaya vei ira, ‘Qo na isoro oni na cabora vei Jiova ena bukawaqa: e rua na lami tagane vinaka yabaki dua me isoro kama e cabori wasoma.+ 4 Dua na lami tagane o na cabora ena mataka, dua tale na lami tagane ni sa karobo,*+ 5 me cabori vata kei na kena isoro kakana, qo e dua na ikatini na efa* falawa vinaka sara, qai veiwaki kei na dua na ikava na hini* waiwai ni olive e vutuki.+ 6 Qo na isoro kama+ e cabori wasoma, a tauyavutaki ena Ulu i Saineai, me cabori ena bukawaqa vei Jiova, me talei* vua na kena iboi, 7 me cabori vata kei na kena isoro livi, me dua na ikava na hini, me baleta na lami tagane yadua.+ Mo sova na alakaolo ena vanua tabu me isoro livi vei Jiova. 8 Mo qai cabora na lami tagane adua ni sa karobo.* Na kena isoro kakana vata ga kei na kena isoro livi a cabori ena mataka, mo cabora me isoro e vakamai ena bukawaqa, me talei* vei Jiova na kena iboi.+

9 “‘Ia ena Siga ni Vakacecegu,+ me dau cabori e rua na lami tagane vinaka yabaki dua, me kena isoro kakana e ruanaikatini na ivakarau efa falawa vinaka sara, qai vakawaiwaitaki, me cabori vata na kena isoro livi. 10 Qo na isoro kama ni Siga ni Vakacecegu, e cabori vata kei na isoro kama e cabori wasoma kei na kena isoro livi.+

11 “‘Ena itekivu ni veivula, oni na dau cabora me nomuni isoro kama vei Jiova e rua na luvenibulumakau tagane, dua na tamanisipi, kei na vitu na lami tagane vinaka yabaki dua,+ 12 e tolunaikatini na ivakarau falawa vinaka sara e vakawaiwaitaki me isoro kakana+ me baleta na bulumakau tagane yadua, me qai ruanaikatini na ivakarau falawa vinaka sara e vakawaiwaitaki me isoro kakana me baleta e dua na tamanisipi,+ 13 e dua na ikatini na ivakarau falawa vinaka sara e vakawaiwaitaki me isoro kakana me baleta na lami tagane yadua, me isoro kama, me talei* na kena iboi,+ me isoro e cabori ena bukawaqa vei Jiova. 14 Ena kedra isoro livi e veimama na hini waini me baleta e dua na bulumakau tagane,+ e dua na ikatolu na hini me baleta na tamanisipi,+ qai dua na ikava na hini me baleta e dua na lami tagane.+ Qo na isoro kama ena cabori tiko e veivula, ena yabaki taucoko. 15 Me cabori tale ga vei Jiova me isoro ni ivalavala ca e dua na me gone, me ikuri ni isoro kama e cabori wasoma kei na kena isoro livi.

16 “‘Ena ika14 ni siga ni imatai ni vula, ena siga ni Lakosivia i Jiova.+ 17 Ena dua na soqo ena ika15 ni siga ni vula tiko ga qori. Ena laukana na madrai sega ni vakaleveni me vitu na siga.+ 18 Ena imatai ni siga, ena dua na soqoni tabu. Moni kua ni cakava e dua na cakacaka kaukaua. 19 Oni na cabora me isoro kama vei Jiova ena bukawaqa, e rua na luvenibulumakau tagane, dua na tamanisipi, kei na vitu na lami tagane yabaki dua. Moni cabora na manumanu vinaka.+ 20 Moni cabora vata na kena isoro kakana na falawa vinaka sara e vakawaiwaitaki,+ qo me tolunaikatini na ivakarau falawa e cabori vata kei na bulumakau tagane, me qai ruanaikatini na ivakarau falawa e cabori vata kei na tamanisipi. 21 Oni na cabora vata e dua na ikatini na ivakarau falawa kei na lami tagane yadua, me caka yadudua ena vitu na lami tagane na ka qori, 22 kei na dua na me, me isoro ni ivalavala ca moni sorovaki kina. 23 Sa na tu mada na isoro kama e dau cabori ena mataka, oya na isoro kama e cabori wasoma, oni na cabora tale ga qo. 24 Me va qori tiko na kena iwalewale ena siga yadua me vitu na siga, moni cabora na kakana,* na isoro e vakamai ena bukawaqa me talei* vei Jiova na kena iboi. Me cabori vata na isoro kama e cabori wasoma kei na kena isoro livi. 25 Ena ikavitu ni siga moni cakava e dua na soqoni tabu.+ Moni kua ni cakava e dua na cakacaka kaukaua.+

26 “‘Ena siga e tamusuki kina na isevu ni ka oni kaburaka,+ ni oni cabora vei Jiova na isoro kakana vou,+ me dua na nomuni soqoni tabu donuya na nomuni soqo ni macawa.+ Moni kua ni cakava kina e dua na cakacaka kaukaua.+ 27 Oni na cabora me isoro kama e talei* vei Jiova na kena iboi, e rua na luvenibulumakau tagane, dua na tamanisipi, kei na vitu na lami tagane e yabaki yadua,+ 28 me kena isoro kakana na falawa vinaka sara e vakawaiwaitaki, qo me tolunaikatini na ivakarau e cabori vata kei na bulumakau tagane yadua, me qai ruanaikatini na ivakarau e cabori vata kei na dua na tamanisipi, 29 me cabori vata kei na lami tagane yadua e dua na ikatini na ivakarau falawa, me caka yadudua ena vitu na lami tagane na ka qori, 30 kei na dua na me gone moni sorovaki kina.+ 31 Oni na cabora qori me ikuri ni isoro kama e cabori wasoma kei na kena isoro kakana. Me manumanu vinaka kece,+ me cabori vata kei na kena isoro livi.

29 “‘Ena imatai ni siga ni ikavitu ni vula, me dua na nomuni soqoni tabu. Moni kua ni cakava e dua na cakacaka kaukaua.+ Qo na siga moni uvuca kina na biukila.+ 2 Oni na cabora me isoro kama e talei* vei Jiova na kena iboi e dua na luvenibulumakau tagane, dua na tamanisipi, kei na vitu na lami tagane yabaki dua, me ka vinaka kece, 3 me kena isoro kakana na falawa vinaka sara e vakawaiwaitaki, me tolunaikatini na ivakarau efa me baleta na bulumakau tagane, me ruanaikatini na ivakarau me baleta na tamanisipi, 4 kei na dua na ikatini na ivakarau me baleta na lami tagane yadua mai na vitu na lami tagane, 5 kei na dua na me tagane gone me isoro ni ivalavala ca moni sorovaki kina. 6 Qo me ikuri ga ni isoro kama ni veivula kei na kena isoro kakana,+ na isoro kama e cabori wasoma, kei na kena isoro kakana,+ kei na kena isoro livi,+ era dau cabori me vaka ga na kena ivakarau, me talei* na kena iboi ni cabori ena bukawaqa vei Jiova.

7 “‘Ena ikatini ni siga ni ikavitu ni vula qo, me dua na nomuni soqoni tabu,+ moni qai vakararawataki* kemuni. Moni kua ni cakava e dua na cakacaka.+ 8 Oni na cabora me isoro kama e talei* vei Jiova na kena iboi e dua na luvenibulumakau tagane, dua na tamanisipi, kei na vitu na lami tagane yabaki dua, me ka vinaka kece.+ 9 Me qai kena isoro kakana na falawa vinaka sara e vakawaiwaitaki, me tolunaikatini na ivakarau me cabori kei na bulumakau tagane, me qai ruanaikatini na ivakarau me cabori vata kei na dua na tamanisipi, 10 e dua na ikatini na ivakarau me baleta na lami tagane yadua mai na vitu na lami tagane, 11 kei na dua na me gone me isoro ni ivalavala ca, me ikuri ga ni isoro ni ivalavala ca ni veibuluti,+ na isoro kama e cabori wasoma, kei na kena isoro kakana, kei na kena isoro livi.

12 “‘Ena ika15 ni siga ni ikavitu ni vula, me dua na nomuni soqoni tabu. Moni kua ni cakava e dua na cakacaka kaukaua, moni cakava e dua na nomuni soqo vei Jiova me vitu na siga.+ 13 Oni na qai cabora ena bukawaqa me isoro kama+ e talei* vei Jiova na kena iboi, e 13 na luvenibulumakau tagane, me 2 na tamanisipi, 14 na lami tagane yabaki dua, me ka vinaka kece.+ 14 Me qai kena isoro kakana na falawa vinaka sara e vakawaiwaitaki, me tolunaikatini na ivakarau me baleta na 13 na bulumakau tagane yadua, me ruanaikatini na ivakarau me baleta na tamanisipi yadua mai na 2 na tamanisipi, 15 kei na dua na ikatini na ivakarau me baleta na lami tagane yadua mai na 14 na lami tagane, 16 kei na dua na me gone me isoro ni ivalavala ca, qori me ikuri ga ni isoro kama e cabori wasoma, na kena isoro kakana,+ kei na kena isoro livi.

17 “‘Ena ikarua ni siga, me 12 na luvenibulumakau tagane, 2 na tamanisipi, kei na 14 na lami tagane yabaki dua, me ka vinaka kece,+ 18 kei na kena isoro kakana kei na kena isoro livi me baleta na bulumakau tagane, na tamanisipi, kei na lami tagane me vaka na kedra iwiliwili kei na kena ivakarau, 19 kei na dua na me gone me isoro ni ivalavala ca, me ikuri ga ni isoro kama e cabori wasoma, kei na kena isoro kakana, kei na kena isoro livi.+

20 “‘Ena ikatolu ni siga, me 11 na bulumakau tagane, 2 na tamanisipi, kei na 14 na lami tagane yabaki dua, me ka vinaka kece,+ 21 kei na kena isoro kakana kei na kena isoro livi me baleta na bulumakau tagane, na tamanisipi, kei na lami tagane me vaka na kedra iwiliwili kei na kena ivakarau, 22 kei na dua na me, me isoro ni ivalavala ca, me ikuri ga ni isoro kama e cabori wasoma, na kena isoro kakana, kei na kena isoro livi.+

23 “‘Ena ikava ni siga, me 10 na bulumakau tagane, 2 na tamanisipi, kei na 14 na lami tagane yabaki dua, me ka vinaka kece,+ 24 me cabori vata kei na kena isoro kakana kei na kena isoro livi me baleta na bulumakau tagane, na tamanisipi, kei na lami tagane me vaka na kedra iwiliwili kei na kena ivakarau, 25 kei na dua na me gone me isoro ni ivalavala ca, me ikuri ga ni isoro kama e cabori wasoma, na kena isoro kakana, kei na kena isoro livi.+

26 “‘Ena ikalima ni siga, me 9 na bulumakau tagane, 2 na tamanisipi, kei na 14 na lami tagane yabaki dua, me ka vinaka kece,+ 27 kei na kena isoro kakana kei na kena isoro livi me baleta na bulumakau tagane, na tamanisipi, kei na lami tagane me vaka na kedra iwiliwili kei na kena ivakarau, 28 kei na dua na me, me isoro ni ivalavala ca, me ikuri ga ni isoro kama e cabori wasoma, na kena isoro kakana, kei na kena isoro livi.+

29 “‘Ena ikaono ni siga, me 8 na bulumakau tagane, 2 na tamanisipi, kei na 14 na lami tagane yabaki dua, me ka vinaka kece,+ 30 kei na kena isoro kakana kei na kena isoro livi me baleta na bulumakau tagane, na tamanisipi, kei na lami tagane me vaka na kedra iwiliwili kei na kena ivakarau, 31 kei na dua na me, me isoro ni ivalavala ca, me ikuri ga ni isoro kama e cabori wasoma, na kena isoro kakana, kei na kena isoro livi.+

32 “‘Ena ikavitu ni siga, me 7 na bulumakau tagane, 2 na tamanisipi, kei na 14 na lami tagane yabaki dua, me ka vinaka kece,+ 33 kei na kena isoro kakana kei na kena isoro livi me baleta na bulumakau tagane, na tamanisipi, kei na lami tagane me vaka na kedra iwiliwili kei na kena ivakarau, 34 kei na dua na me, me isoro ni ivalavala ca, me ikuri ga ni isoro kama e cabori wasoma, na kena isoro kakana, kei na kena isoro livi.+

35 “‘Ena ikawalu ni siga, me dua na nomuni soqo bibi. Moni kua ni cakava e dua na cakacaka kaukaua.+ 36 Oni na cabora me isoro kama na isoro e cabori ena bukawaqa me talei* vei Jiova na kena iboi, e dua na bulumakau tagane, dua na tamanisipi, kei na vitu na lami tagane yabaki dua, me ka vinaka kece,+ 37 kei na kena isoro kakana kei na kena isoro livi me baleta na bulumakau tagane, na tamanisipi, kei na lami tagane me vaka na kedra iwiliwili kei na kena ivakarau, 38 kei na dua na me, me isoro ni ivalavala ca, me ikuri ga ni isoro kama e cabori wasoma, na kena isoro kakana, kei na kena isoro livi.+

39 “‘Qo na ka moni cabora vei Jiova ena nomuni soqo kece sa loku tu,+ me ikuri ga ni nomuni isoro ni bubului+ kei na nomuni isolisoli sega ni lavaki+ oni cabora me nomuni isoro kama,+ kei na nomuni isoro kakana,+ na nomuni isoro livi,+ kei na nomuni isoro ni veiyaloni.’”+ 40 E tukuna o Mosese vei ira na Isireli na ka kece e vakaroti koya kina o Jiova.

30 E vosa o Mosese vei ira na iliuliu+ ni nodra yavusa na Isireli, e kaya: “Qo na vosa e vakarota o Jiova: 2 Ke yalayala vei Jiova e dua na tamata,+ se bubuluitaka+ me okati koya ga ena dua na yalayala ni vakatatabu, me kua ni vakacala o koya na nona vosa.+ Me vakayacora sara o koya na ka kece e yalataka ni na cakava.+

3 “Ke yalayala vei Jiova e dua na yalewa se okati koya ena dua na yalayala ni vakatatabu ni se goneyalewa qai tiko voli ena vale i tamana 4 mani rogoca o tamana nona vosa ni yalayala, se na nona yalayala ni vakatatabu e okati koya kina, qai sega ni saqata o tamana, ena vakabau na nona vosa ni yalayala kece, ena vakabau tale ga na yalayala ni vakatatabu kece e okati koya kina o goneyalewa. 5 Ia ke tarovi koya o tamana ni rogoca ni okati koya ga o goneyalewa ena vosa ni yalayala, se na yalayala ni vakatatabu, sa na sega ni vakabau qori. Ena vosoti koya o Jiova ni a tarovi koya o tamana.+

6 “Ia ke mani vakawati o yalewa ni se vauci koya tu nona vosa ni yalayala, se na yalayala vakariri e okati koya ga kina 7 mani rogoca o watina, ia e sega ni saqata ena siga e rogoca kina, ena vakabau nona vosa ni yalayala, se nona yalayala ni vakatatabu e okati koya tu ga kina. 8 Ia ke tarovi koya o watina ena siga e rogoca kina, e rawa ni bokoca o tagane na yalayala oya, se na yalayala vakariri e okati koya tu ga kina o yalewa,+ ena qai vosoti koya o Jiova.

9 “Ia ke yalayala e dua na yada se yalewa sa sere, na ka kece e okati koya tu kina, ena vauci koya tiko ga.

10 “Ia ke okati koya tu e dua na yalewa ena yalayala, se na yalayala ni vakatatabu ni se tiko ena vale i watina 11 mani rogoca o watina qai sega ni saqata se cata, ena vakabau na nona yalayala kece se na yalayala ni vakatatabu cava ga e okati koya tu kina. 12 Ia ena siga e rogoca kina o watina, ke sa bokoca vakadua o tagane na yalayala cava ga se yalayala ni vakatatabu e bubului kina o yalewa, sa na sega ni vakabau qori.+ Sa bokoca o watina, ena vosoti yalewa o Jiova. 13 Na yalayala cava ga, se bubului cava ga e okati kina e dua na yalayala ni vakatatabu se na cakacaka ni veivakuai, ena vakatau vei tagane na kena vakadeitaki se bokoci. 14 Ia ke sega sara ga ni saqata o watina mai na dua na siga ina dua tale na siga, sa vakadeitaka tale ga o koya na nona yalayala kece o yalewa, se nona yalayala kece ni vakatatabu e okati koya ga kina o yalewa. E vakadeitaka o tagane ni a sega ni saqata mai na siga e rogoca kina ni cakava o yalewa. 15 Ia ke bokoca e muri o koya, ni oti e dua na gauna mai na siga e rogoca kina, ena colata o koya na ca ni ka e cakava o watina.+

16 “Qo na lawa a vakaroti Mosese kina o Jiova me baleta na tagane kei watina yalewa, o tama tale ga kei luvena goneyalewa e se tiko voli e nona vale.”

31 E qai tukuna vei Mosese o Jiova: 2 “Veisausaumi+ vei ira na kai Mitiani+ ena vukudra na Isireli. Oti oya, o na qai lai davo vata kei ira na wekamu.”*+

3 E qai vosa vei ira na tamata o Mosese, e kaya: “Vakaiyaragitaki ira na tagane mai na kemuni maliwa mera vala* kei Mitiani, me tau kina vei Mitiani na cudru i Jiova. 4 Moni tala e 1,000 mai na yavusa yadua kece kei Isireli ena mataivalu.” 5 Mai vei ira na veiudolu ni Isireli,+ e qai lesi e 1,000 mai na yavusa yadua, e 12,000 era vakaiyaragi mera vala.*

6 E qai talai ira yani o Mosese, e le 1,000 mai na yavusa yadua mera curu ena mataivalu, vata kei Finiasi+ na luvei Eliesa na bete ni mataivalu, e taura tu e ligana na iyaya tabu kei na biukila ni sikinala.+ 7 Era veivaluvaluti kei Mitiani, me vaka e vakaroti Mosese kina o Jiova, ra qai vakamatei ira kece na tagane. 8 Era vakamatea na tui kei Mitiani, qo o Ivai, Rekemi, Suri, Ure, kei Repa, na lima na tui kei Mitiani, vata kei na kena vo era vakamatei. Era vakamatei Pelami tale ga+ na luvei Piori ena iseleiwau. 9 Ia era kauta vakavesu na yalewa kei na gone ni Mitiani o ira na Isireli. Era kovea tale ga na nodra manumanu susu kece, na nodra manumanu kece, kei na ka kece era taukena. 10 Ra qai vakama na nodra koro kece era vakaitikotiko kina, kei na nodra keba* kece ena bukawaqa. 11 Era kovea na itokinivalu kei na iyau kece ga, na tamata kei na manumanu. 12 Ra qai kauta yani na bobula, na iyau era kovea mai kei na itokinivalu vei Mosese, kei Eliesa na bete, kei ira na isoqosoqo ni Isireli, ina keba ena buca dravuisiga kei Moapi,+ volekata na Joritani e Jeriko.

13 E lai tavaki ira ena taudaku ni keba o Mosese kei Eliesa na bete, o ira kece tale ga na turaga ni isoqosoqo. 14 Ia e katakatataki ira na tagane era lesi ena ilala dauvala o Mosese, qo o ira na turaga ni veiudolu kei ira na turaga ni veiyadrau, era suka tiko mai ena ilakolako vakaivalu. 15 E kaya vei ira o Mosese: “Oni sa maroroi ira kece na yalewa mera bula? 16 Raica! O ira sara ga qori ena vosa i Pelami era vakavuna mera tawayalodina+ vei Jiova na Isireli, ena ka e vauci Piori,+ me tau kina na kuita vei ira na isoqosoqo i Jiova.+ 17 Ni vakamatei ira na tagane yadua ena kedra maliwa na gone, vakamatei ira tale ga na yalewa yadua era sa veiyacovi kei na tagane. 18 Ia moni vakabulai ira ga na goneyalewa kece era se sega ni veiyacovi kei na tagane.+ 19 Moni qai keba ena taudaku ni keba me vitu na siga. O kemuni yadua sa vakamatea e dua, kei kemuni yadua sa tara e dua sa vakamatei,+ moni vakasavasavataki kemuni+ ena ikatolu ni siga kei na ikavitu ni siga, o kemuni kei ira oni vesuka mai. 20 Moni qai vakasavasavataka na isulu kece ga, na ka kece e caka mai na kulinimanumanu, na ka kece e caka mai na vutinime, kei na iyaya kau kece.”

21 E qai kaya na bete o Eliesa vei ira na tamata ivalu era lai vala: “Qo na ivakaro mai na lawa e vakarota o Jiova vei Mosese, 22 ‘Na koula wale ga, na siliva, kopa, kaukamea, tini, kei na uma, 23 na ka kece e rawa ni tavuni ena bukawaqa, moni biuta ena bukawaqa, ena qai savasava. Oti me qai vakasavasavataki tale ga ena wai.+ Ia na ka kece e sega ni rawa ni tavuni ena bukawaqa, moni vakasavasavataka ena wai. 24 Moni qai savata na nomuni isulu ena ikavitu ni siga, moni savasava, oti oni rawa ni lesu ina keba.’”+

25 Qo na ka e qai tukuna o Jiova vei Mosese: 26 “Taura na iwiliwili ni iyau e kovei mai, wilika ruarua na tamata kei na manumanu era kau mai vakavesu, cakava qo kei Eliesa na bete, kei ira na iliuliu ni mataqali ena isoqosoqo. 27 Vota na iyau e kovei mai ena rua na iwasewase me wasei vei ira ena mataivalu era lai vakaitavi ena ivalu kei ira na kena vo kece ena isoqosoqo.+ 28 Me ivakacavacava vei Jiova, mo taura mai vei ira na sotia era lai vala e dua na kabula mai na veiya500, mai na tamata, na qelenibulumakau, na asa, kei na qelenisipi. 29 Mo taura qori mai na nodra veimama qai solia vei Eliesa na bete, me cau i Jiova.+ 30 Mai na veimama e soli vei ira na Isireli, mo kauta e dua mai na veiya50, mai na tamata, na qelenibulumakau, asa, qelenisipi, kei na veimataqali manumanu, qai solia vei ira na Livai,+ era dau qarava na itavi me baleta na valeniveitavaki i Jiova.”+

31 Erau cakava o Mosese kei Eliesa na bete me vaka sara ga na ka e vakaroti Mosese kina o Jiova. 32 Na itokinivalu, na vo ni ka era kovea mai na tamata ena ilakolako, e 675,000 na sipi, 33 e 72,000 na bulumakau, 34 qai 61,000 na asa. 35 Na yalewa era se sega ni veiyacovi kei na tagane+ era le 32,000 na yalewa. 36 Na veimama e nodra iwasewase na lako ena ivalu e 337,500 taucoko na sipi. 37 Ia na ivakacavacava vei Jiova mai na sipi e 675 kece. 38 E 36,000 taucoko na bulumakau, ia e 72 mera ivakacavacava vei Jiova. 39 E 30,500 taucoko na asa, ia e 61 mera ivakacavacava vei Jiova. 40 Era le 16,000 na tamata, qai 32 vei ira era ivakacavacava vei Jiova. 41 E qai solia o Mosese na ivakacavacava me cau i Jiova vei Eliesa na bete,+ me vaka ga e vakarota o Jiova vei Mosese.

42 Mai na nodra veimama na Isireli, o koya a wasea tani o Mosese mai na nodra ivotavota na tagane era lai valu, 43 na veimama ni sipi qori e 337,500 taucoko, 44 e 36,000 na bulumakau, 45 e 30,500 na asa, 46 ia era le 16,000 na tamata. 47 Sa qai taura o Mosese mai na nodra veimama na Isireli, e dua mai na veiya50, mai na tamata kei na manumanu, qai solia vei ira na Livai,+ era dau qarava na itavi ni valeniveitavaki i Jiova,+ me vaka ga e vakaroti Mosese kina o Jiova.

48 Ia o ira na tagane era lesi mai na veiudolu ena mataivalu,+ o ira na iliuliu ni veiudolu, kei ira na iliuliu ni veiyadrau, era lako yani vei Mosese, 49 ra qai tukuna vei Mosese: “O ira na nomu dauveiqaravi era sa taura na kedra iwiliwili na tamata ivalu keimami liutaki ira tiko, e sega ni bau dua e tukuni ni yali mai vei keimami.+ 50 Me keimami kauta yadua vei Jiova na ka keimami dui kunea mai me isoro vei Jiova, na iyaya koula, na qatoniyava, na qatoniliga, na mama vakaturaga, na saunidaliga, na iukuuku tale eso, me keimami sorovaki kina ena mata i Jiova.”

51 Erau mani ciqoma o Mosese kei Eliesa na bete na koula era kauta yani, na iukuuku kece. 52 Na koula kece era cautaka vei Jiova e 16,750 na sikeli* na kena levu, mai vei ira na iliuliu ni veiudolu, kei ira na iliuliu ni veiyadrau. 53 Ia o ira na tamata ivalu era dui taura me nodra na iyau e kovei mai. 54 Erau ciqoma o Mosese kei Eliesa na bete na koula era kauta yani na iliuliu ni veiudolu, kei ira na iliuliu ni veiyadrau, erau qai biuta ena valelaca ni veitavaki me veivakadreti* vei ira na tamata ni Isireli ena mata i Jiova.

32 Sa levu sara mai nodra manumanu na luvei Rupeni+ kei ira na luvei Kata,+ ra qai raica ni vanua totoka vei ira na manumanu na vanua o Jaseri+ kei Kiliati. 2 Era mani toro yani na luvei Kata kei ira na luvei Rupeni vei Mosese, Eliesa na bete, kei ira na iliuliu ni isoqosoqo ra qai kaya: 3 “O Ataroci, Taiponi, Jaseri, Nimira, Esiponi,+ Elale, Sipami, Nipo,+ kei Pioni,+ 4 na vanua sa vakamalumalumutaka o Jiova e matadra na isoqosoqo ni Isireli,+ e vanua vinaka vei ira na manumanu, qai levu na nodra manumanu na nomuni tamata.”+ 5 Era kaya tale: “Ke keimami nanumi e matamuni, me soli na vanua qo mera taukena na nomuni dauveiqaravi. Kua ga ni vakavuna me keimami takosova na Joritani.”

6 E qai tukuna vei ira na luvei Kata kei na luvei Rupeni o Mosese: “Mera lai vala ga na tacimuni ni oni tiko ga eke o kemuni? 7 Na cava moni vakayalolailaitaki ira kina na lewe i Isireli, mera kua kina ni takoso ina vanua ena solia dina vei ira o Jiova? 8 Qori na ka era a cakava na tamamuni niu talai ira mai Ketesa-parinea mera lai raica na vanua.+ 9 Ni ratou cabe yani ina Buca* kei Esikoli+ qai raica na vanua, eratou vakayalolailaitaki ira na lewe i Isireli mera kua ni lako ina vanua ena solia vei ira o Jiova.+ 10 E waqa na cudru i Jiova ena siga oya, mani bubuluitaka kina o koya:+ 11 ‘Na tagane kece yabaki 20 lako cake era biuti Ijipita mai, era na sega ni raica na vanua+ au a yalataka vei Eparama, Aisake, kei Jekope,+ nira sega ni muri au ena lomadra taucoko— 12 vakavo ga o Kelepi+ na luvei Jifune na Kenisaiti, kei Josua+ na luvei Nuni, ni rau muri Jiova ena lomadrau taucoko.’+ 13 E qai waqa na cudru i Jiova vei Isireli qai vakavuna o koya mera veilakoyaki voli ena vanua talasiga me 40 na yabaki,+ me yacova ni sa yacovi ira na itabatamata kece era a caka ca tiko ena mata i Jiova na kedra itinitini.+ 14 Ia qo oni sa duri cake moni sosomitaki ira na tamamuni, moni dua na ilawalawa tamata ivalavala ca, oni vakatubura na cudru waqawaqa i Jiova vei Isireli. 15 Ke oni sega ni muri koya, ena biuti ira tale o koya ena vanua talasiga, oni na kauta ga mai na veivakarusai vei ira na tamata kece qo.”

16 Era torovi koya ra qai kaya: “Me keimami tara eke na nodra baivatu na neimami manumanu, kei na koro me nodra na luvei keimami. 17 Ia keimami na vakavakarau tu ga ena ivalu+ qai lako e matadra na Isireli, me yacova ni keimami sa kauti ira yani ina nodra vanua, nira na vakaitikotiko na luvei keimami ena koro vakabai, e taqomaki vinaka mai vei ira na lewenivanua. 18 Keimami na sega ni lesu ina neimami vale me yacova nira sa vakatikiniqele kece na Isireli, me nodra ivotavota.+ 19 Ni keimami na sega ni vakaivotavota kei ira ena tai adua ni Joritani lako yani, ni keimami sa taura na neimami ivotavota ena yasa ni Joritani ena tokalau.”+

20 E tukuna vei ira o Mosese: “Ke oni cakava qo: Taura na nomuni iyaragi ena mata i Jiova moni lai vala,+ 21 ke oni taura kece na nomuni iyaragi ni qai takosova na Joritani ena mata i Jiova, ni cemuri ira kece na kena meca mai matana+ 22 me yacova ni sa vakamalumalumutaki na vanua ena mata i Jiova,+ oti oni rawa ni lesu+ qai galala mai na nomuni cala ena mata i Jiova kei Isireli. Oni na qai taukena na vanua qo ena mata i Jiova.+ 23 Ke oni sega ni cakava qo, oni na valavala ca vei Jiova. Ia moni kila tiko ni na qai sauti kemuni na nomuni valavala ca. 24 Oni rawa gona ni tara na koro me nodra na luvemuni kei na bai ni nomuni qelenimanumanu,+ ia moni vakayacora na ka oni yalataka.”

25 Era kaya vei Mosese na luvei Kata kei na luvei Rupeni: “Era na cakava na nomuni dauveiqaravi me vaka ga e vakarota tiko na neimami turaga. 26 Era na tiko ga ena koro kei Kiliati na luvei keimami, na wati keimami, kei na neimami manumanu,+ 27 ia na nomuni dauveiqaravi era na takoso i tai, o ira kece na vakaiyaragi mera lai vala ena mata i Jiova,+ me vaka ga na nomuni vosa na neimami turaga.”

28 E mani tauca o Mosese e dua na ivakaro vei Eliesa na bete, vei Josua na luvei Nuni, vei ratou tale ga na iliuliu ni mataqali ena yavusa i Isireli. 29 E kaya vei ratou o Mosese: “Ke ra takoso kei kemuni ena Joritani o ira na luvei Kata kei na luvei Rupeni, o ira kece na vakaiyaragi tu mera lai vala ena mata i Jiova, qai vakamalumalumutaki na vanua e matamuni, oni na qai solia vei ira na vanua o Kiliati mera taukena.+ 30 Ia ke ra sega ni taura na iyaragi mera takoso kei kemuni i tai adua, era na vakaitikotiko ga ena kemuni maliwa ena vanua o Kenani.”

31 Era sauma sara na luvei Kata kei na luvei Rupeni: “Keimami na cakava ga na ka e tukuna o Jiova vei ira na nomuni dauveiqaravi. 32 Keimami na taura na iyaragi qai takoso ena mata i Jiova ina vanua o Kenani,+ ia na ivotavota keimami na taukena ena tiko ga ena tai qo ni Joritani.” 33 E mani solia vei ira o Mosese—vei ira na luvei Kata, na luvei Rupeni+ kei na veimama ni yavusa i Manasa,+ na luvei Josefa—na matanitu i Sioni+ na nodra tui na Amoraiti, kei na matanitu i Oki+ na tui Pasani, na vanua kei na kena koro ena veiyasana oya, kei na koro ni veivanua yavolita.

34 O ira tale ga na luvei Kata era tarai* Taiponi,+ Ataroci,+ Aroeri,+  35 Atiroci-sofani, Jaseri,+ Jokipa,+ 36 Peci-nimira,+ kei Peci-arani,+ qo era koro vakabai kaukaua ra qai tara na kedra baivatu na manumanu. 37 O ira na luvei Rupeni era tarai Esiponi,+ Elale,+ Kiriaceimi,+ 38 Nipo,+ kei Peali-mioni+—sa veisau na yacadra—kei Sipima, ra qai tekivu vakayacana na koro era tara tale.

39 Era lako yani vakaivalu na luvei Mekiri+ e luvei Manasa mera kabai Kiliati, ra qai cemuri ira na Amoraiti era tiko kina. 40 E soli Kiliati o Mosese vei Mekiri, na luvei Manasa, mani tekivu vakaitikotiko kina o koya.+ 41 E lako tale ga yani vakaivalu o Jairi na luvei Manasa qai valuta na nodra koro valelaca, e qai tekivu vakatoka me yacadra o Avoci-jairi.*+ 42 E qai lako yani vakaivalu o Nopa mani valuti Kinaci kei na kena tauni lalai,* e mani tekivu vakatokayacataka ga vua me o Nopa.

33 Qo na nodra ilakolako na lewe i Isireli, nira biubiu mai na vanua o Ijipita+ me vaka na nodra ilawalawa,*+ ena nodrau veidusimaki o Mosese kei Eroni.+ 2 E vakavola o Mosese na veivanua era biuta mai ena nodra ilakolako me vaka e vakarota o Jiova, qo gona na nodra ilakolako nira biubiu mai na dua na vanua ina dua tale:+ 3 Era biubiu mai Ramisese+ ena imatai ni vula, ena ika15 ni siga ni imatai ni vula.+ Ena siga ga e oti kina na Lakosivia,+ era biubiu ena nuidei* na Isireli e matadra na kai Ijipita kece. 4 Ena gauna kece qori, era buluta tiko na ulumatua kece o ira na kai Ijipita ni mokuti ira ena kedra maliwa+ o Jiova, ni a totogitaka na nodra kalou o Jiova.+

5 Era mani biubiu mai Ramisese na Isireli, era lai keba sara e Sukoci.+ 6 Era qai biubiu mai Sukoci, era lai keba e Ecami,+ ena iyalayala ni vanua talasiga. 7 Era biuti Ecami, era lesu tale i Pieiroci, e donui Peali-sifoni,+ ra qai keba ena mata i Mikitoli.+ 8 Oti ya era biubiu mai Pieiroci, ra qai takoso yani e loma ni wasawasa+ ina vanua talasiga,+ qai siga tolu nodra lako voli ena vanua talasiga e Ecami,+ ra qai keba e Mara.+

9 Era biubiu sara mai Mara, era gole i Elimi. E tu e Elimi e 12 na waivure kei na 70 na vuniniuniu, era mani keba e kea.+ 10 Oti era biubiu mai Elimi, era lai keba ena bati ni Wasa Damudamu. 11 Era biubiu sara mai na Wasa Damudamu, era lai keba ena vanua talasiga o Sini.+ 12 Era qai biubiu mai na vanua talasiga o Sini, era lai keba sara e Tofika. 13 Oti ya, era biubiu mai Tofika, era lai keba e Alusi. 14 Era sa qai biubiu mai Alusi, era lai keba sara e Rifitimi,+ na vanua a sega kina na wai mera gunuva na tamata. 15 Era biubiu tale mai Rifitimi, era lai keba tu ena vanua talasiga kei Saineai.+

16 Era biubiu mai na vanua talasiga kei Saineai, era lai keba sara e Kipiroci-ateva.+ 17 Era biubiu mai Kipiroci-ateva mera lai keba sara i Eseroci.+ 18 Oti ya era biuti Eseroci era lai keba sara e Ricima. 19 Era qai biubiu mai Ricima era lai keba e Rimoni-peresi. 20 Era biuti Rimoni-peresi era lai keba e Lipina. 21 Era biubiu mai Lipina era lai keba e Risa. 22 Oti era biuti Risa era lai keba e Kielaca. 23 Era biubiu mai Kielaca era lai keba sara e Ulu i Seperi.

24 Oti ya era biuti Ulu i Seperi era lai keba e Arata. 25 Era qai biubiu mai Arata era lai keba e Makeloci. 26 Era biuti+ Makeloci era lai keba e Teaci. 27 Oti oya era biubiu mai Teaci era lai keba e Tara. 28 Era biubiu sara mai Tara era lai keba e Micika. 29 E muri era biuti Micika era lai keba e Asimona. 30 Oti era biubiu mai Asimona era lai keba e Moseroci. 31 Era qai biubiu mai Moseroci era lai keba e Pinei-yekani.+ 32 Era biuti Pinei-yekani era lai keba e Ori-akitikati. 33 Era qai biuti Ori-akitikati era lai keba sara e Jotipaci.+ 34 E muri era biubiu mai Jotipaci era lai keba e Apirona. 35 Era biubiu sara mai Apirona era lai keba e Esioni-keperi.+ 36 Oti ya era biuti Esioni-keperi era lai keba ena vanua talasiga o Jini,+ oya e Ketesa.

37 E muri era biubiu mai Ketesa era lai keba e Ulu i Ori,+ e toka ena iyalayala ni vanua o Itomi. 38 E qai gole cake ina Ulu i Ori o Eroni na bete ena lewa i Jiova, qai mate e kea ena ika40 ni yabaki nira sa biubiu oti na Isireli mai na vanua o Ijipita, ena imatai ni siga ni ikalima ni vula.+ 39 Sa yabaki 123 o Eroni ena gauna e mate kina e Ulu i Ori.

40 Ia o tui Arati,+ na kai Kenani a tiko voli ena Nikepi ena vanua o Kenani, e rogoca sara nira sa lako tiko yani na Isireli.

41 Era sa qai biuti Ulu i Ori+ era lai keba e Salimona. 42 Oti ya era biubiu mai Salimona era lai keba e Pinoni. 43 Era biuti Pinoni sara era lai keba e Opoci.+ 44 Era qai biubiu mai Opoci era lai keba e Iye-aparimi, e toka ena iyalayala kei Moapi.+ 45 E muri era biuti Iyimi era lai keba e Taiponi-kata.+ 46 Oti ya era biubiu mai Taiponi-kata era lai keba sara e Alimoni-tipilaceimi. 47 Era biuti Alimoni-tipilaceimi era lai keba ena veiulunivanua kei Aparimi+ e toka ena mata i Nipo.+ 48 Oti era sa qai biubiu mai na veiulunivanua kei Aparimi, era lai keba sara ena buca dravuisiga kei Moapi donuya na Joritani e Jeriko.+ 49 Era keba voli ga donuya na Joritani, mai Peci-isimoci me yaco i Epeli-sitimi+ ena buca dravuisiga kei Moapi.

50 E vosa vei Mosese o Jiova ena buca dravuisiga kei Moapi donuya na Joritani e Jeriko, e kaya: 51 “Vosa vei ira na Isireli qai tukuna vei ira, ‘Oni na takosova na Joritani moni butuka yani na vanua o Kenani.+ 52 Moni cemuri ira kece na lewenivanua mai matamuni qai vakarusa nodra ka kece era ceuti ena vatu,+ kei na nodra matakau kaukamea+ kece, moni vakarusa tale ga na nodra vanua cecere kece ni sokalou.+ 53 Oni na qai taukena na vanua qai tiko kina, niu na solia sara ga vei kemuni na vanua moni taukena.+ 54 Moni vota na vanua ena vakawirimadigi+ ena kedra maliwa na nomuni vuvale. Moni vakalevutaka na nodra ivotavota na iwasewase lelevu, moni vakalailaitaka na nodra ivotavota na iwasewase lalai.+ Ena vakatau ena vakawirimadigi na nodra ivotavota na tamata yadua. Oni na taura na veika e nomuni me ivotavota ena veiyavusa i tamamuni.+

55 “‘Ke oni sega ni cemuri ira tani na lewenivanua mai matamuni,+ o ira oni na vakavoca era na ka votivoti e matamuni ra qai ka cogacoga e yasamuni, era na qai vakararawataki kemuni voli ena vanua oni na lai vakaitikotiko kina.+ 56 Au na qai cakava vei kemuni na ka au a nanuma meu cakava vei ira.’”+

34 E vosa tale vei Mosese o Jiova, e kaya: 2 “Mo vakamacalataka qo vei ira na Isireli: ‘Ni oni sa lako ena vanua o Kenani,+ qo na vanua ena soli vei kemuni me ivotavota, na vanua o Kenani me vaka na kena iyalayala.+

3 “‘Na nomuni iyalayala ena ceva ena tekivu mai na vanua talasiga o Jini volekati Itomi, ia na nomuni iyalayala ena ceva ena yasana vaka ina tokalau, ena tekivu mai na bati ni Wasa Tuituina.*+ 4 Na nomuni iyalayala qori ena gole vaka ina baba kei Akirapimi ena ceva,+ yaco sara i Sini, qai lai cava ena ceva kei Ketesa-parinea.+ Ena qai dewa yani i Asatari+ yaco sara i Asimoni. 5 Na iyalayala e Asimoni ena gole vaka ina Waimaca* kei Ijipita, qai lai cava donuya na Wasawasa.*+

6 “‘Na nomuni iyalayala ena ra na Wasa Levu* kei na baravi. Qori me nomuni iyalayala ena ra.+

7 “‘Ia qo ena nomuni iyalayala ena vualiku: Moni vakatakilakilataka na nomuni iyalayala me tekivu mai na Wasa Levu yaco i Ulu i Ori. 8 Mai Ulu i Ori, moni vakatakilakilataka na iyalayala volekati Lepo-emaci,*+ qai lai cava mai Sitati.+ 9 Na iyalayala qo ena yaco sara i Sifironi, ia ena lai cava mai Asaenani.+ Qo me nomuni iyalayala ena vualiku.

10 “‘Moni qai vakatakilakilataka me nomuni yalayala ena tokalau, me tekivu mai Asaenani yaco i Sifami. 11 Mai Sifami, ena yaco sara na iyalayala i Ripila, ina tokalau kei Eini, ena dewa sobu na iyalayala qai takosova na baba ena tokalau ni Wasa o Kinereci.*+ 12 Na iyalayala qori ena yaco sara ina Joritani, qai lai cava ena Wasa Tuituina.+ Ena nomuni vanua+ qo kei na iyalayala e tu wavolita.’”

13 E qai vakasalataki ira na Isireli o Mosese, e kaya: “Qo na vanua oni na wasea ena wirimadigi moni taukena,+ me vaka ga e vakarota o Jiova me soli vei ira na ciwa veimama na yavusa. 14 Nira sa taura oti na nodra ivotavota+ na yavusa i Rupeni me vaka na nodra mataqali, na yavusa i Kata me vaka na nodra mataqali, kei na veimama ni yavusa i Manasa. 15 E rua veimama na yavusa erau sa taura oti na nodrau ivotavota, mai na yasayasa vakaJoritani volekati Jeriko, oya ena tokalau ena icabecabe ni siga.”+

16 E vosa tale vei Mosese o Jiova, e kaya: 17 “Qo na yacadrau na tagane erau na wasea vei kemuni na vanua moni taukena: O Eliesa+ na bete kei Josua+ na luvei Nuni. 18 Oni na qai kauta mai na yavusa yadua e dua na turaga me wasea na vanua me nomuni ivotavota.+ 19 Qo na yacadratou na tagane: o Kelepi+ na luvei Jifune mai na yavusa i Juta,+ 20 o Simueli na luvei Amiute mai na nodra yavusa na luvei Simioni,+ 21 o Ilitati na luvei Kisiloni mai na yavusa i Penijamini,+ 22 na turaga o Puki na luvei Jokili mai na nodra yavusa na luvei Tani,+ 23 na turaga o Anieli na luvei Efoti mai na nodra yavusa na luvei Manasa,+ o ira na luvei Josefa,+ 24 na turaga o Kemueli na luvei Sifitani, mai na nodra yavusa na luvei Ifireimi,+ 25 na turaga o Elisafani na luvei Parinaki mai na nodra yavusa na luvei Sepuloni,+ 26 na turaga o Palitieli na luvei Asana mai na nodra yavusa na luvei Isakari,+ 27 na turaga o Eiute na luvei Silomi mai na nodra yavusa na luvei Aseri,+ 28 na turaga o Pitaeli na luvei Amiute mai na nodra yavusa na luvei Nafitalai.”+ 29 Qo o iratou e vakarota o Jiova me ratou wasea na vanua vei ira na Isireli ena vanua o Kenani.+

35 E vosa tale vei Mosese o Jiova ena buca dravuisiga e Moapi, donuya na Joritani+ e Jeriko, e kaya: 2 “Vakasalataki ira na Isireli mera solia eso na koro vei ira na Livai mera tiko kina, mai na ivotavota era na taukena,+ mera solia tale ga vei ira na Livai na vanua veico era wavokita tu na koro.+ 3 Era na tiko na koro qori, ia na kedra vanua veico me ikanakana ni nodra qelenimanumanu, na nodra iyau kei na nodra manumanu kece tale eso. 4 Na vanua veico ni koro oni na solia vei ira na Livai, me 1,000 na kiupiti* mai na lalaga me wavokita na koro. 5 Moni vakarautaka ena taudaku ni koro e 2,000 na kiupiti ena yasana ina tokalau, e 2,000 na kiupiti ena yasana ina ceva, e 2,000 na kiupiti ena yasana ina ra, e 2,000 na kiupiti ena yasana ina vualiku, me toka e lomadonu na koro. Qo ena kedra vanua veico na nodra koro.

6 “Na koro oni na solia vei ira na Livai, ena 6 na koro ni idrodro,+ oni na solia me dau dro kina o koya e veivakamatei,+ kei na 42 tale na koro. 7 Moni solia vei ira na Livai e 48 taucoko na koro kei na kedra vanua veico.+ 8 Na koro oni solia vei ira ena kau mai ena nodra ivotavota na Isireli.+ O ira na iwasewase levu oni na taura mai kina vakalevu, ia o ira na iwasewase lalai oni na taura mai kina e vica ga.+ Ena solia na iwasewase yadua eso na nodra koro vei ira na Livai, me vakatau ena ivotavota e taura.”

9 E vosa tale vei Mosese o Jiova, e kaya: 10 “Vosa vei ira na Isireli qai tukuna vei ira, ‘Oni takosova tiko na Joritani moni lako ina vanua o Kenani.+ 11 Moni digia na koro e veiganiti mera koro ni idrodro, me dau dro kina o koya e vakamatea vakacalaka e dua.+ 12 Na koro qori me dau nomuni idrodro, moni drovaki koya kina e nona itavi me sauma na dra,+ me kua kina ni mate o koya e veivakamatei me yacova ni sa lewai e matadra na isoqosoqo.+ 13 Qori na inaki ni ono na koro ni idrodro oni vakarautaka. 14 Oni na solia e tolu na koro ena tai qo ni Joritani,+ kei na tolu tale na koro ena vanua o Kenani,+ me ratou koro ni idrodro. 15 Na ono na koro qori me idrodro vei ira na Isireli, vei koya e vulagi,+ kei koya e mai vakaitikotiko ena kedra maliwa, o koya ga e vakamatea vakacalaka e dua me dro e kea.+

16 “‘Ia ke mokuti koya ena iyaya kaukamea, mani mate kina, sa laba o koya. Me vakamatei sara ga o koya e laba.+ 17 Ke mani viriki koya ena vatu e rawa ni veivakamatei mani mate kina, sa laba o koya. Me vakamatei sara ga o koya e laba. 18 Ke mokuti koya ena iyaya kau e rawa ni veivakamatei mani mate kina, sa laba o koya. Me vakamatei sara ga o koya e laba.

19 “‘O koya e nona itavi me sauma na dra, ena vakamatei koya e laba. Ni sotavi koya ga ena vakamatei koya sara. 20 Ke mate ni biligi koya ena yaloca se viriki koya ena dua na ka ena inaki ca,*+ 21 se mokuti koya ena ligana ni sevaki koya mani mate kina, ena vakamatei sara ga o koya e veimoku. E daulaba o koya. Ena gauna ga erau sota kina, me vakamatea na daulaba o koya e nona itavi me sauma na dra.

22 “‘Ke a biligi koya vakacalaka qai sega ni cakava ena yaloca, se viriki koya ena dua na ka, ia e sega ni ca na nona inaki,*+ 23 se sega ni raici koya qai vakavuna me lutuki koya e dua na vatu, ia e sega ni kena meca se saga me mavoa, mani mate kina na tamata oya, 24 mera muria na idusidusi qo+ na isoqosoqo, mera qai vakatulewa vei koya e veimoku kei koya e nona itavi me sauma na dra. 25 Me vakabulai koya e veivakamatei na isoqosoqo mai na liga i koya e nona itavi me sauma na dra, ra qai vakasukai koya ina nona koro ni idrodro a dro tu kina, me na tiko e kea o koya me yacova ni sa mate na bete levu e lumuti ena waiwai tabu.+

26 “‘Ia ke lakosivita o koya e veivakamatei na iyalayala ni nona koro ni idrodro a dro kina 27 qai kunei koya ena taudaku ni iyalayala ni nona koro ni idrodro o koya e nona itavi me sauma na dra, mani vakamatei koya, ena sega ni beitaki ena vakadavedra o koya. 28 Ni dodonu me tiko ga ena nona koro ni idrodro me yacova ni sa mate na bete levu. Ia ni sa mate na bete levu, e rawa ni lesu o koya e veivakamatei ina vanua e taukena.+ 29 Na veika kece qo me lawa ni vakataulewa vei kemuni ena nomuni itabatamata kece, ena vanua kece oni vakaitikotiko kina.

30 “‘O koya ga e vakamatea e dua na tamata, me vakamatei ni sa laba,+ ena nodra itukutuku* na ivakadinadina,+ ia ena sega ni dua e vakamatei ena itukutuku ni dua ga na ivakadinadina. 31 Moni kua ni ciqoma e dua na ivoli me vakabulai kina o koya e laba, ni dodonu ga me mate, me vakamatei sara ga o koya.+ 32 Moni kua tale ga ni ciqoma e dua na ivoli ena vuku i koya e dro ina nona koro ni idrodro, me vakatarai koya me tiko tale ena nona vanua ni se bera ni mate na bete levu.

33 “‘Moni kua sara ni vakadukadukalitaka na vanua oni tiko kina, ni vakadukadukalitaka na vanua+ na dra, ena sega tale ga ni dua na veisorovaki ena vuku ni dra sa vakadavei ena vanua, vakavo ga na dra i koya e vakadavea.+ 34 Moni kua sara ni vakadukadukalitaka na vanua oni tiko kina, niu vakaitikotiko kina, ia o yau o Jiova, au tiko voli ena kedra maliwa na lewe i Isireli.’”+

36 Era lako yani na iliuliu ni vuvale ni kawa i Kiliati, na luvei Mekiri,+ na luvei Manasa ena vuvale ni luvei Josefa, era toro yani ra qai vosa ena mata i Mosese kei ira na turaga, era iliuliu ni vuvale vei ira na Isireli. 2 Era kaya: “A vakarota o Jiova vua na noqu turaga, me vota na vanua ena vakawirimadigi+ me ivotavota vei ira na Isireli, a vakarota tale ga o Jiova vua na noqu turaga me solia na ivotavota nei Silofati, na taci keimami, vei ratou na luvena yalewa.+ 3 Ke ratou vakawatitaka na tagane mai na dua tale na yavusa e Isireli, sa na kau tani na nodratou ivotavota na yalewa mai na nodra ivotavota na tamai keimami, me sa lai wili ena ivotavota ni yavusa eratou sa na lai lewena, qo me sa na kau tani mai na neimami ivotavota sa vakawirimadigitaki oti. 4 Ni yaco na yabaki ni Jupili+ me baleti ira na lewe i Isireli, ena wili na nodratou ivotavota na yalewa ena ivotavota ni yavusa eratou sa lai lewena, me sa na kau tani na nodratou ivotavota mai na ivotavota ni nodra yavusa na tamai keimami.”

5 E qai vakaroti ira na Isireli o Mosese, me vaka na ivakaro i Jiova: “E donu na ka era tukuna tiko na yavusa ni luvei Josefa. 6 Qo na vosa e vakarota o Jiova me baleti ratou na luvei Silofati: ‘O koya ga e donu vei ratou, eratou rawa ni vakawatitaka. Ia me ratou vakawati ga ena dua na vuvale mai na yavusa i tamadratou. 7 Me kua ni veidewayaki na nodra ivotavota na Isireli mai na dua na yavusa ina dua tale na yavusa, nira taura tiko ga na Isireli na ivotavota ni yavusa i tukadra. 8 Na yalewa kece era vakaivotavota ena kedra maliwa na yavusa ni Isireli, me vakawatitaka e dua e kawa ni yavusa i tamana,+ mera taukena tiko ga kina na Isireli na ivotavota i tukadra. 9 Me kua ni veidewayaki na ivotavota mai na dua na yavusa ina dua tale na yavusa, ni dodonu mera taura tiko ga na nodra dui ivotavota na veiyavusa ni Isireli.’”

10 Eratou vakayacora sara na luvei Silofati me vaka e vakaroti Mosese kina o Jiova.+ 11 O ratou na luvei Silofati,+ o Mala, Tirisa, Okila, Milika, kei Noa, eratou qai vakawatitaka na luvei taci tamadratou. 12 Na tagane eratou vakawatitaka eratou tagane ga mai na vuvale i Manasa na luvei Josefa me tiko ga kina na nodratou ivotavota ena yavusa ni vuvale i tamadratou.

13 Qo na ivakaro kei na lewa e solia vei ira na Isireli o Jiova ena gusu i Mosese ena buca dravuisiga e Moapi, donuya na Joritani e Jeriko.+