LELE I JEREMAIA
א [Alefa]*
1 Isa sa dabe duadua tiko na koro e dau levu kina na tamata!+
Sa yada o koya e dau levu na lewena ena veimatanitu!+
Sa vakacakacakataki vakaukaua na raluve ni veiyasana!+
ב [Peca]
2 E tabaka na tagi ena bogi,+ e drodro na wainimatana e baluna.
E sega ni dua vei ira kece ga na lomani koya e tu e kea me vakacegui koya.+
Era vakaisini koya nona itokani kece,+ era kena meca.
ג [Kimela]
3 Sa kau vakavesu o Juta+ ena vuku ni veivakararawataki kei na levu ni veivakabobulataki.+
E tiko vata ga kei ira na veimatanitu,+ e sega ni raica e dua na vanua ni vakacegu.
Era toboki koya o ira kece na dauvakararawataki koya ena gauna e rarawa tu kina.
ד [Teleca]
4 E tagi na gaunisala i Saioni, ni sega ni dua e gole yani ina soqo.+
E lala nona matamata kece,+ era vutugu nona bete.
Era lolosi nona goneyalewa, e rarawa vakalevu o koya.
ה [Ai]
5 Ia qo era sa lewai koya o ira na vakacacani koya, era sega ni kauai na kena meca.+
E vakararawataki koya o Jiova ena levu ni nona cala.+
Era kauta vakabobula na luvena o ira na kena meca.+
ו [Vau]
6 Sa oti kece na kena totoka na goneyalewa ni Saioni.+
O ira nona turaga era vaka na dia tagane era sega ni raica na co drokadroka.
Era oca nira lako e matana na dauveivakasavi.
ז [Sayini]
7 E nanuma o Jerusalemi na gauna ni nona rarawa ni sega na vanua me tiko kina,
Nona ka vakamareqeti kece mai na gauna makawa sara.+
Nira bale nona tamata ena liga ni kena meca, e sega ni dua me vukei koya,+
Era raici koya na meca ra qai dredrevaka ni sa bale.+
ח [Keca]
8 E valavala ca vakalevu o Jerusalemi.+
Oya na vuna e cati kina.
Era beci koya kece o ira na rokovi koya, nira raica nona luvawale.+
E vutugu o koya+ qai vakanadaku ena madua.
ט [Teca]
9 E tauva nona isulu na nona dukadukali.
E sega ni nanuma nona veisiga nimataka.+
E kidroataki na nona bale, e sega ni dua e vakacegui koya.
Isa Jiova moni raica noqu rarawa ni vakalevulevui koya na meca.+
י [Yota]
10 E dodoka na ligana na meca me taura kece na nona iyau.+
Ni raici ira na veimatanitu nira lako yani ena nona itikotiko tabu,+
O ira oni vakarota mera kua ni lako yani ina nomuni ivavakoso.
כ [Kafa]
11 Era vutugu kece nona tamata, era vaqara madrai.+
Era solia na nodra ka vakamareqeti me rawa kina na ka mera kania, mera bula.
Moni raica mada Jiova niu sa vaka e dua na yalewa* e sega na betena.
ל [Lameta]
12 Vakacava, e ka wale vei kemuni na lako tiko e gaunisala?
Moni raica mada!
E dua tale na ka mosimosi e tautauvata kei na ka mosimosi e caka vei au,
Ni vakararawataki au o Jiova ena siga ni nona cudru waqawaqa?+
מ [Memi]
13 E tala mai cake na bukawaqa ina suiqu,+ e vakamalumalumutaki ira yadua.
E tevuka na lawa me coko kina na yavaqu, e vakaukauataki au meu lesu.
E vakavuna meu yalewa galili.
Au tauvimate ena siga taucoko.
נ [Nuni]
14 E vesu noqu cakacala me vaka na ivua, e vesuka vata na ligana.
E biu e domoqu, e oti kina noqu kaukaua.
E soli au o Jiova e ligadra au sega ni valuta rawa.+
ס [Sameki]
15 O Jiova e kauti ira tani kece na tamata kaukaua era tiko vei au.+
E kaciva e dua na isoqosoqo me valuti au, me qaqi ira noqu cauravou.+
E butuka o Jiova na goneyalewa ni Juta ena ikeliniwaini.+
ע [Ayini]
16 Au tagicaka na ka kece qo,+ e drodro vakayauyau na wainimataqu.
Ni yawa vei au o koya me vakacegui au se vakabulabulataki au.
Era biu wale tu na luvequ ni qaqa na meca.
פ [Pe]
17 E dodoka na ligana o Saioni,+ e sega ni dua me vakacegui koya.
E vakarota o Jiova mera valuti Jekope na kena meca era wavoliti koya.+
Era vakasisilataki Jerusalemi.+
צ [Sati]
18 E yalododonu o Jiova,+ au beca na nona ivakaro.+
Moni vakarorogo kece na lewe ni veivanua, moni raica na noqu rarawa.
Era kau vakabobula na noqu goneyalewa kei na noqu cauravou.+
ק [Kofa]
19 Au kacivi ira na dau domoni au, ia era vakaisini au.+
Era mate ena koro na noqu bete kei ira na noqu qase,
Nira qara na kakana mera bula kina.+
ר [Resi]
20 Moni raica mada Jiova na noqu rarawa levu.
E yavavala na lomaqu.*
E saumaki na yaloqu e lomaqu, niu talaidredre sara ga.+
E veivakararawataki e tautuba na iseleiwau,+ e vaka na mate e lomanivale.
ש [Sini]
21 Era rogoca na lewenivanua na noqu vutugu, e sega ni dua me vakacegui au.
Era rogoca kece na kequ meca na noqu leqa.
Era reki ni oni vakayacora qori.+
Ia oni na kauta mai na siga oni a tukuna,+ nira na vakataki au ga.+
ת [Tau]
22 Me tiko mada ga e matamuni na nodra ca kece, moni totogitaki ira,+
Me vaka ga oni totogitaki au ena noqu cakacala kece.
Ni levu na noqu vutugu, e tauvimate na lomaqu.
א [Alefa]
2 Isa e solega na goneyalewa ni Saioni na o ni cudru i Jiova!
E kolotaka na lagilagi nei Isireli mai lomalagi i vuravura.+
E sega ni qai nanuma na itutuniyavana+ ena siga ni nona cudru.
ב [Peca]
2 E tiloma o Jiova na itikotiko kece nei Jekope, e sega ni lomana.
E vakarusa na nona vanua vakabai na goneyalewa ni Juta+ ena nona cudru levu.
Sa biu ina qele, e beca na matanitu+ kei na kena turaga.+
ג [Kimela]
3 E musuka na kaukaua* kece nei Isireli ena nona cudru waqawaqa.
E vakasuka o koya na ligana imatau ni toro mai na meca,+
E waqa na nona cudru vei Jekope me vaka na bukawaqa e yameca na ka kece e wavokita.+
ד [Teleca]
4 E loveca* na nona dakaititi me vaka na meca, e vakarau na ligana imatau me vaka na dauvakacaca,+
E vakamatei ira kece tiko ga era raraivinaka e matada.+
E sova na nona cudru me vaka na bukawaqa+ ena valelaca ni goneyalewa ni Saioni.+
ה [Ai]
5 E vaka na meca o Jiova,+
E tilomi Isireli.
E tiloma kece na nona valececere,
E vakarusa kece na nona vanua vakabai.
E vakalevutaka na nona rarawa kei na nona lele na goneyalewa ni Juta.
ו [Vau]
6 E vakacacana+ na nona valetabanikau me vaka na bure e tiko ena iteitei.
E vakavuna o Jiova me guilecavi e Saioni na soqo kei na siga ni vakacecegu,
E sega ni doka na tui kei na bete ena nona cudru katakata.+
ז [Sayini]
7 Sa biuta o Jiova na nona icabocabonisoro,
E beca o koya nona itikotiko tabu.+
E solia vei ira na meca na bai ni nona valececere.+
Era tabalaka na domodra ena vale i Jiova,+ me vaka ena siga ni soqo.
ח [Keca]
8 E nakita o Jiova me vakarusa na bai ni goneyalewa ni Saioni.+
E dodoka na wa ni vakarau.+
E sega ni vakasuka na ligana me veivakarusai.
E vakavuna me tagi na bainivalu kei na bai.
E bale ruarua.
ט [Teca]
9 E tabulu ena lomaniqele na nona matamata.+
E vakarusa qai vorolaka na nona ivakadei.
Era tiko ena veimatanitu na nona tui kei na nona turaga.+
E sega na lawa,* era sega mada ga ni raica na nona parofita na raivotu mai vei Jiova.+
י [Yota]
10 Era dabe vakanomodi ena qele na nona qase na goneyalewa ni Saioni.+
Era kaburaka e uludra na kuvuniqele, era vakaisulutaga.+
Era vakacuva na uludra ina qele na goneyalewa ni Jerusalemi.
כ [Kafa]
11 Sa malumalumu na mataqu ena levu ni tagi.+
E yavavala na lomaqu.*
E tasova na yatequ ina qele ni sa rusa na nodra goneyalewa* na kainoqu,+
Nira rebo na gone kei na gonedramidrami ena rara ni tauni.+
ל [Lameta]
12 Era tarogi tinadra tiko ga, “I vei na covuata kei na waini?”+
Nira rebo me vaka e dua e mavoa ena rara ni koro,
Nira voleka ni mate ena liga i tinadra.
מ [Memi]
13 Na ivakaraitaki cava meu tukuna vei iko?
Meu vakatauvatani iko kei na cava, na goneyalewa ni Jerusalemi?
Meu vakatauvatani iko kei na cava meu vakacegui iko, na goneyalewa ni Saioni?
Ni levu me vaka na wasawasa na nomu rusa.+ O cei ena vakabulai iko?+
נ [Nuni]
14 E lasu qai tawayaga na nodra raivotu na nomu parofita,+
Era sega ni vakaraitaka na nomu cala mo kua ni kau vakabobula+ kina,
Ia era raivotutaka tiko ga vei iko na itukutuku lasu e veivakacalai.+
ס [Sameki]
15 Era vakasausau kece e ligadra o ira na tavali e gaunisala nira vakalialiai iko.+
Era vakalukalu ena kurabui,+ era kurea na uludra vua na goneyalewa ni Jerusalemi, era kaya:
“Qo ga na koro era dau tukuna, ‘E totoka vakaoti, na nodra isakisaki kece e vuravura’?”+
פ [Pe]
16 Era dalaga vei iko na kemu meca.
Era vakalukalu, era katibati, era kaya: “Keimami sa tilomi koya.+
Qo na siga keimami waraka tiko!+ Sa yaco mai, keimami sa raica!”+
ע [Ayini]
17 E vakayacora o Jiova na ka e nakita,+ e vakayacora na ka e tukuna,+
Na ka e vakarota ena gauna makawa sara.+
E vakarusa ia e sega ni lomana.+
E vakavuna mera marautaki iko na kemu meca, e vakacerecerea na nodra kaukaua* na kemu meca.
צ [Sati]
18 E tagici Jiova na lomadra, na nona bai na goneyalewa ni Saioni.
Me dave na wainimatamu me vaka na uciwai ena siga kei na bogi.
Mo kua ni cegu, me kua ni vakacegu na yalokanimatamu.*
ק [Kofa]
19 Mo tucake! Mo tagiyaso ena bogi, ni tekivu na yadra.
Mo sova na lomamu me vaka na wai ena mata i Jiova.
Mo dodoka vua na ligamu mera bula kina na luvemu,
Era rebo ena tutu ni sala kece ena vuku ni viakana.+
ר [Resi]
20 Isa Jiova moni raici koya oni totogitaka.
Mera kania tiko ga na yalewa na luvedra,* na luvedra era vakasucuma,+
Se ra vakamatei na bete kei na parofita ena itikotiko tabu i Jiova?+
ש [Sini]
21 Era davo matemate ena qele e gaunisala na cauravou kei na kenaturaga.+
Era bale ena iseleiwau na noqu goneyalewa kei na noqu cauravou.+
Oni veivakarusai ena siga ni nomuni cudru, oni veivakamatei oni sega ni loloma.+
ת [Tau]
22 Oni kaciva na ka rerevaki mai na yasana kece me vaka na siga ni soqo.+
Ena siga ni cudru i Jiova, e sega ni dua e dro se bula,+
O ira na gone au vakasucuma au qai susuga, e vakamatei ira na kequ meca.+
א [Alefa]
3 O yau na tamata au kune rarawa ena ititoko ni nona cudru.
2 E cemuri au meu lako ena butobuto, sega ena rarama.+
3 Io, e saqati au tiko ga na ligana ena siga taucoko.+
ב [Peca]
4 E vakavuna me vuca na lewequ kei na kuliqu,
E musuka na suiqu.
5 E viribaiti au, e vakavolivoliti au ena ka gaga+ kei na rarawa.
6 E vakaukauataki au meu dabe ena vanua butobuto me vakataki ira na tamata sa mate makawa.
ג [Kimela]
7 E vakabaitaki au meu kua ni dro,
E vesuki au ena ivesu kopa bibi.+
8 Niu gadreva sara tu ga na veivuke, e bese ni rogoca* noqu masu.+
9 E latia na noqu sala ena vatu ta,
E vakavevea na noqu sala.+
ד [Teleca]
10 E waraki au lo tiko me vaka na bea, me vaka na laione ena ivunivuni.+
11 E dreti au tani mai na sala, e dresudresulaki* au.
E biuti au wale tu.+
12 E loveca* na nona dakaititi, e vakaduri au me vanai au ena gasau.
ה [Ai]
13 E vakacoba ina noqu ivi na gasau ni nona taga gasau.
14 Era dredrevaki au kece na lewe ni veivanua, e usutu ni nodra sere ena siga taucoko.
15 E vakamamautaki au ena ka gaga, e vagunuvi au ena kaugaga.+
ו [Vau]
17 Oni kauta tani vei au na vakacegu, au sa guilecava na ka vinaka.
18 Au mani kaya: “Sa oti na kequ totoka kei na noqu vakanuinui vei Jiova.”
ז [Sayini]
19 Moni nanuma na noqu rarawa kei na noqu biu wale tu,+ na kaugaga kei na ka gaga.+
20 Oni na nanuma sara ga, oni na lolou mai vei au.+
21 Au nanuma qo e lomaqu, oya na vuna au na wawa tiko kina.+
ח [Keca]
23 E ka vou ena veimataka,+ e levu na nomuni yalodina.+
24 “E noqu ivotavota o Jiova,”+ au kaya, “oya na vuna au na waraki koya kina.”+
ט [Teca]
25 E yalovinaka o Jiova vua e nuitaki koya,+ vua na tamata e qarai koya tiko.+
26 E vinaka meda waraka galugalu*+ na veivakabulai i Jiova.+
27 E vinaka vua na tamata me cola ivua ni se itabagone.+
י [Yota]
28 Me dabe duadua me galu ni vakacolata vua o koya.*+
29 Me biuta ga na gusuna ena kuvuniqele,+ de tiko na inuinui.+
30 Me solia na baluna vua e sabici koya, me cola ga na nona vakalialiai.
כ [Kafa]
31 Ni na sega ni biuti keda vakadua o Jiova.+
32 E veivakararawataki o koya, ia ena lomani keda tale ga me vaka na dei ni nona loloma levu.+
33 Ni sega ni lomana me vakaleqai se vakararawataki ira na luve ni tamata.+
ל [Lameta]
34 Me butuqaqi ira kece na kaivesu e vuravura ena ruku ni yavana,+
35 Me sega ni lewa vakadodonu na tamata e mata i koya e Cecere Duadua,+
36 Me lawakitaka na tamata ena nona kisi ni veilewai,
E sega ni taleitaka o Jiova na ivalavala va qori.
מ [Memi]
37 O cei gona me vosa rawa qai vakayacora, ni sega ni vakarota o Jiova?
38 Mai na gusu i koya e Cecere Duadua,
E sega ni lako mai kina na ka ca kei na ka vinaka.
39 Na cava me kudruvaka kina na tamata e bula tiko na vua ni nona ivalavala ca?+
נ [Nuni]
40 Meda vakaraica se dikeva mada na noda ivalavala,+ da qai lesu vei Jiova.+
41 Meda laveta cake na lomada kei na ligada vua na Kalou ni lomalagi:+
42 “Keimami sa cala, keimami talaidredre,+ oni sega ni vosoti keimami.+
ס [Sameki]
43 Ena cudru oni tarova neimami toro yani,+
Oni cicimuri keimami oni qai vakamatei keimami, ia oni sega ni yalovinaka.+
44 Oni tabonaki kemuni ena o, me kua ni rogo yani na neimami masu.+
45 Oni cakava me keimami ibenubenu, me keimami benu ena kedra maliwa na lewe ni veivanua.”
פ [Pe]
46 Era dalaga kece vei keimami na keimami meca.+
47 E yacovi keimami na domobula kei na dai,+ na veivakalalai kei na veivakarusai.+
48 E drodro mai mataqu na uciwai ni sa rusa na nodra goneyalewa na kainoqu.+
ע [Ayini]
49 E sega ni oti na drodro ni wainimataqu, e sega ni cegu,+
50 Me rai sobu mada mai lomalagi o Jiova me raica.+
51 E vakararawataki au na mataqu ena vukudra na goneyalewa kece ni noqu koro.+
צ [Sati]
52 Era vakasasataki au na kequ meca me vaka na manumanuvuka, ia e sega na vuna.
53 Era muduka* noqu bula ena qara, era vakaviriki au tiko ga ena vatu.
54 E drodrova na uluqu na wai, au qai kaya: “Au sa mate!”
ק [Kofa]
55 Au masuta na yacamuni Jiova mai na loma ni qara.+
56 Moni rogoca na domoqu, moni kua ni tabonaka na daligamuni niu kere veivuke moni vakabulai au.
57 Oni toro voleka mai ena siga au masuti kemuni kina. Oni kaya: “Mo kua ni rere.”
ר [Resi]
58 Oni totaki au ena veilewai kemuni Jiova, oni vakabulai au.+
59 Oni raica na cala e vakayacori vei au, kemuni Jiova, moni lewai au mada.+
60 Oni raica na nodra cudru kece, na ka kece era nakita mera saqati au kina.
ש [Sini] se [Shini]
61 Oni sa rogoca na nodra veivakalialiai kemuni Jiova, na ka kece era nakita mera saqati au kina,+
62 Na tebenigusudra na kequ meca, era vakasolokakanataki au ena siga taucoko.
63 Moni raici ira mada, era vakalialiai au ena nodra sere nira dabe se tucake!
ת [Tau]
64 Oni na sauma vei ira kemuni Jiova, me vaka na nodra ivalavala.
65 Oni na vakaukauataka na lomadra moni totogitaki ira.
66 Oni na cicimuri ira ena nomuni cudru Jiova, moni vakarusai ira mai na ruku ni nomuni lomalagi.
א [Alefa]
4 Isa sa sega ni tatibi na koula vinaka!+
Sa taqera na vatu tabu+ ena tutu ni sala kece!+
ב [Peca]
2 O ira na luvei Saioni era talei sara mai na koula savasava,
Era sa okati mera saqa qele,
Na cakacaka ni ligana na dautulituli!
ג [Kimela]
3 O ira mada ga na jakoli era solia na sucudra mera sucuma na luvedra,
Ia na goneyalewa ni kainoqu e yaloca+ mai me vaka na ositereji ni vanua talasiga.+
ד [Teleca]
4 Sa kabi na yamena na gonedramidrami e gadrona ni karamaca.
Era kere madrai+ na gone, ia e sega ni dua me solia vei ira.+
ה [Ai]
5 O ira era daukana vinaka era sa davo ena walokai e gaunisala.+
O ira na susu nira vakaisulu kulakula+ era mokota na ibinibini dravusa.
ו [Vau]
6 E bibi sara na kena itotogi* na goneyalewa ni kainoqu mai na kena itotogi o Sotoma ena nona ivalavala ca,+
Ni totolo na kena vakarusai qai sega na liga me vukei koya.+
ז [Sayini]
7 Era savasava sara na nona Nasaraiti+ mai na ucacevata, era vulavula sara mai na sucu.
Era damudamu vakalevu mai na lase, era vaka na sefaia taliva.
ח [Keca]
8 E loaloa sara na kedra irairai mai na qilaiso.
Era sega ni kilai e gaunisala.
E salulu na kuliniyagodra ena suidra,+ e vaka na buka madu.
ט [Teca]
9 E vinaka toka o ira na vakamatei ena iseleiwau vei ira na mate ena dausiga,+
Nira malumalumu, era lausua ni lailai na kakana ena were.
י [Yota]
10 Na ligadra na yalewa yalololoma e saqara na luvedra.+
E kedra kakana ni rarawa ni sa bale na goneyalewa ni kainoqu.+
כ [Kafa]
11 E vakaraitaka o Jiova na nona cudru,
E sovaraka na nona cudru levu.+
E waqaca o koya na buka e Saioni e yameca na kena yavu.+
ל [Lameta]
12 Era sega ni vakabauta na tui ni vuravura kei ira kece na lewe ni vanua bulabula
Me curu yani na dauvakacaca kei na meca ena matamata e Jerusalemi.+
מ [Memi]
13 Ena vuku ni nodra ivalavala ca na nona parofita, na cala ni nona bete,+
Era vakadavea na nodra dra na yalododonu era tiko kina.+
נ [Nuni]
14 Era veilakoyaki me vaka na mataboko+ e gaunisala.
Era vakadukadukalitaki ena dra,+
Me kua ni dua e tara na nodra isulu.
ס [Sameki]
15 “Moni lako tani! Oni dukadukali!” era kacivaka vei ira. “Moni lako tani! Moni lako tani! Kua ni tarai keimami!”
Ni sega na nodra vale, era veilakoyaki.
Era kaya na lewe ni veimatanitu: “Mera kua ni tiko vata kei keda.*+
פ [Pe]
16 E vakasavi ira na mata i Jiova,+
Ena sega ni vakadonui ira tale.
Era na sega ni dokai ira na bete na lewenivanua,+ se lomani ira na qase.”+
ע [Ayini]
17 Ia qo e oca wale na matada nida vaqara veivuke.+
Eda vaqara, eda vaqara na veivuke mai na matanitu e sega ni vakabulai keda rawa.+
צ [Sati]
18 Era cicimuria na weniyavada+ meda kua ni lako ena noda rara ni koro.
Sa voleka sara na keda itinitini, sa cava na noda gauna, ni sa yaco mai na keda itinitini.
ק [Kofa]
19 Era totolo vei ira na ikeli ni lomalagi+ o ira na cicimuri keda tiko.
Era cicimuri keda ena veiulunivanua, era waraki keda lo ena vanua talasiga.
ר [Resi]
20 Na icegu ni ucuda, na lumuti nei Jiova,+ sa vesu ena qara levu era taukena,+
Eda kaya me baleti koya: “Ena kena yaloyalo eda na bula vata kei ira na veimatanitu.”
ש [Sini]
21 Mo reki, mo marau vakalevu na goneyalewa ni Itomi+ ni o tiko ena vanua o Usi.
Ia ena soli tale ga vei iko na bilo,+ o na mateni, o na vakaluvawaletaki iko.+
ת [Tau]
22 Sa oti na itotogi ni nomu cakacala, o iko na goneyalewa ni Saioni.
Ena sega ni kauti iko tale vakavesu o koya.+
Ia ena cudruva na nomu cakacala, o iko na goneyalewa ni Itomi.
Ena vakavotuya o koya na nomu ivalavala ca.+
5 Moni nanuma mada Jiova na ka e yacovi keimami.
Moni raica ni keimami sa beci.+
2 Na neimami ivotavota sa soli vei ira na vulagi, na neimami vale vei ira na kaitani.+
3 Keimami sa luveniyali ni sega na tamai keimami, era vaka na yada na tinai keimami.+
4 Keimami volia na meimami wai,+ e saumi na neimami buka.
5 Era volekata na domo i keimami o ira na cicimuri keimami tiko,
Keimami oca ia keimami sega ni vakacegu.+
6 Keimami solia na liga i keimami vei Ijipita+ kei Asiria+ me rawa kina na keimami madrai.
7 Era sa takali na tukai keimami era valavala ca, ia keimami cola na nodra cakacala.
8 Era liutaki keimami na dauveiqaravi, e sega ni dua me kaliraki keimami mai ligadra.
9 Keimami bolemate me rawa na keimami madrai,+ ena vuku ni iseleiwau ni vanua talasiga.
10 E katakata me vaka na lovo na kuliniyago i keimami ena levu ni walokai.+
11 Era vakamaduataki* na yalewa vakawati e Saioni, o ira na goneyalewa ena veikoro e Juta.+
12 E vakaliligi ira na turaga na ligadra,+ era sega ni dokai na qase.+
13 Era laveta na cauravou na iqaqi, era bale na gonetagane ena cola buka.
14 Era sa yali na qase ena matamatanikoro,+ era sega ni qiriqiri na cauravou.+
15 Sa oti na marau ni loma i keimami, sa vuki na neimami meke me lolosi.+
16 Sa lutu na isala vakatui mai ulu i keimami. Keimami sa rarawa ni keimami valavala ca!
17 Ena vuku ni ka qo e tauvimate kina na loma i keimami,+
Ena vuku ni ka kece qo e buawa kina na mata i keimami,+
18 Ni sa lala tu na ulunivanua o Saioni,+ era veilakoyaki kina na fokisi.
19 Ia o kemuni Jiova, oni dabe tiko ena idabedabe vakaturaga me sega ni mudu.
Na nomuni idabedabe vakaturaga e baleta e dua na itabatamata ina dua na itabatamata.+
20 Na cava moni guilecavi keimami kina me tawamudu, moni biuti keimami vakadede?+
21 Moni vakalesui keimami vei kemuni, Jiova, keimami na makutu ni lesu yani vei kemuni.+
Moni vakavoutaka na neimami siga me vaka e liu.+
22 Ia oni sa biuti keimami sara ga.
Oni cudruvi keimami tiko ga vakalevu.+
Na wase 1-4 na sere ni lolosi ena matuavosa vakaIperiu, se iyatuvosa leleka.
Qo e dusi Jerusalemi.
Ipe., “wawa.”
Ipe., “ileu kece.”
Ipe., “butuka.”
Se “vakaotia.”
Se “ivakavuvuli.”
Ipe., “wawa.”
Dau cavuti me ivakaraitaki beka ni loloma se rarawa.
Ipe., “ileu.”
Ipe., “na luve ni yalokanimatamu.”
Se “na vua ni ketedra.”
Se “latia.”
Se rawa ni, “e vakawaleni au.”
Ipe., “butuka.”
Se “waraka ena vosovoso.”
Se “na Kalou.”
Ipe., “vagaluya.”
Ipe., “nona cala.”
Se “tiko vulagi eke.”
Se “kucuvi.”