VEI IRA MAI FILIPAI

1 O keirau o Paula kei Timoci, keirau dauveiqaravi i Karisito Jisu, vei kemuni kece na yalosavasava oni tisaipeli i Karisito Jisu oni tiko e Filipai,+ o kemuni na ovasia kei na dauveiqaravi ni ivavakoso:+

2 Me tiko mada ga kei kemuni na loloma soli wale kei na vakacegu ni Kalou na Tamada, kei na Turaga o Jisu Karisito.

3 Dua na ka noqu dau vakavinavinaka vua na noqu Kalou ena gauna kece au nanumi kemuni kina. 4 Ena gauna kece au masulaki kemuni kina au dau marau tale ga,+ 5 ni oni tokona na vakatetei ni itukutuku vinaka ena imatai ni siga me yacova mai qo. 6 Au nuidei ena vuku ni tikina qo, ni o koya a tekivutaka vei kemuni na cakacaka vinaka qo ena vakaotia+ me yacova na siga i Karisito Jisu.+ 7 Oni dau lewe ni noqu vakanananu e veigauna, oya na vuna e va kina qo na noqu nanumi kemuni, nida vakaivotavota vata ena loloma soli wale ni Kalou ena noqu vesu tu qo,+ kei na kena taqomaki na itukutuku vinaka qai tauyavutaki vakalawa.+

8 E noqu ivakadinadina sara ga na Kalou niu diva meu raici kemuni kece me vaka ga na nona lomani kemuni o Karisito Jisu. 9 Au dau masulaka me tubu vakalevu na nomuni loloma,+ salavata kei na kilai ni veika dina,+ kei na nomuni kila vinaka na loma ni Kalou,+ 10 moni vakadeitaka kina na veika era bibi sara,+ moni kua ni vakamelei ena dua na ka, ni kua ni vakatarabetaka e dua+ me yacova na siga i Karisito, 11 moni vakasinaiti ena vua ni yalododonu ena vuku i Jisu Karisito,+ me vakalagilagi qai vakacaucautaki kina na Kalou.

12 Au vinakata moni kila raveitacini, ni ka kece e yacovi au e tete kina na itukutuku vinaka, 13 e kilai levu+ gona vei ira na Sotia ni Roma kei ira na kena vo niu vesu+ ena noqu muri Karisito, 14 e levu tale ga vei ira na tacida ena Turaga era nuidei ena noqu vesu qo, ra yaloqaqa kina ni tukuna na vosa ni Kalou ena doudou.

15 Eso era vunautaki Karisito ena nodra vuvu kei na veisisivi, ia eso tale era vunautaki Karisito ena inaki vinaka. 16 O ira qo era tukuni Karisito ena loloma, nira kila niu tiko eke me taqomaki kina na itukutuku vinaka.+ 17 Ia o ira era vunau ena vuvu kei na veisisivi era cakava ena nodra veiqati, era sega ni cakava ena inaki vinaka nira bukana meu vakararawataki ena noqu vesu tu qo. 18 Cava e qai yaco? Se mani inaki vinaka se inaki ca, au marau ga ni sa vunautaki o Karisito. Au na marau tiko ga 19 niu kila niu na bula ena vuku ni nomuni masu+ kei na veivuke ni yalo tabu e soli vei Jisu Karisito+ 20 me vaka na ka au namaka se nuitaka niu na sega ni maduataka e dua na ka, ia ena noqu vosa ena doudou ena vakacerecerei o Karisito ena vuku ni yagoqu me vaka ena veigauna sa oti kei na gauna qo, seu bula seu mate.+

21 Vei au, keu bula au bula vei Karisito,+ keu mate, ena yaga vei au.+ 22 Keu bula tiko ena yago vakayago, ena vua na noqu cakacaka, ia au sega ni tukuna se cava au digia. 23 E rua na ka qo e tarai au vakalevu, ia au vinakata meu sereki meu tiko vata kei Karisito,+ niu kila ni qo e vinaka cake sara.+ 24 Ia na noqu bula tiko ena yago vakayago ena yaga vakalevu vei kemuni. 25 Qo e dina taucoko, e dei kina na lomaqu ni dodonu meu tiko vata ga kei kemuni kece moni toso kina, moni vakila tale ga na marau e salavata kei na nomuni vakabauta, 26 moni marau vakalevu kina ena vukuqu ni oni imuri i Karisito ena noqu tiko vata tale kei kemuni.

27 Ni vakaitovotaki kemuni ga ena itovo e salavata kei na itukutuku vinaka i Karisito,+ seu lako yani meu lai raici kemuni se sega, ia meu rogoca ni oni dei tiko ga ena dua na rai, oni yalovata tale ga+ ena nomuni cuqena na vakabauta e yavutaki ena itukutuku vinaka, 28 moni kua sara ni rerevaki ira na kemuni meca. Na ka kece qo e ivakadinadina nira na rusa,+ ia o kemuni oni na bula.+ Na Kalou sara ga e vakaraitaka qo, 29 ni soli vei kemuni na ilesilesi dokai qo ena vuku i Karisito, moni kua wale ga ni vakabauti koya, moni vakararawataki tale ga ena vukuna.+ 30 Oya na vuna oni mai sotava kina na ka rarawa vata ga+ oni rogoca niu sotava tiko.

2 Ni oni veivakayaloqaqataki ena vuku i Karisito, ni oni veivakacegui ena loloma, ni oni veimaliwai vakayalo, ni oni veikauaitaki qai yalovinaka, 2 ni vakamarautaki au sara ena nomuni duavata ena vakasama, ena loloma, ena nomuni lomavata, me tautauvata tale ga na nomuni nanuma.+ 3 Moni kua ni cakava e dua na ka ena veileti+ se yalo ni nanumi koya ga,+ ia moni yalomalumalumu ena nomuni okati ira na kena vo mera uasivi kemuni,+ 4 ni oni sega ni kauaitaka ga na ka e baleti kemuni,+ ni kauaitaka tale ga na ka e baleti ira tale eso.+

5 Me tiko vei kemuni na ivakarau ni rai vata ga a tiko vei Karisito Jisu,+ 6 e dina ni vaka na Kalou,+ e sega ni bau vakasamataka me via tautauvata kei na Kalou.+ 7 Sega, e vakadravudravuataki koya, e okati koya me vaka na bobula+ ni mai bula vakatamata.+ 8 Ni mai bula tale ga vakatamata, e vakamalumalumutaki koya qai talairawarawa me yacova sara na mate,+ io, me mate ena kaunirarawa.*+ 9 Ena vuku ni tikina qo, e vakacerecerei koya kina na Kalou ena dua na itutu cecere+ qai solia vakayalololoma vua na yaca e uasivia na vo tale ni yaca,+ 10 mera tekiduru ena yaca i Jisu—o ira kece mai lomalagi, o ira e vuravura, kei ira e lomaniqele+— 11 mera vakatakila na yame kece ga ni Turaga o Jisu Karisito,+ me vakalagilagi kina na Kalou na Tamada.

12 O koya gona kemuni na wekaqu lomani, me vaka e dau nomuni ivakarau moni talairawarawa, sega wale ga ena noqu tiko vata kei kemuni, vakabibi niu yali, ni sasagataka tiko ga na nomuni bula ena rere kei na sautaninini. 13 Na Kalou sara ga e cakacaka tiko vei kemuni me salavata kei na ka e vinakata, moni kua kina ni vinakata wale ga, moni cakava sara ga. 14 Ena gauna kece, na ka oni cakava me kua ni caka ena vosakudrukudru+ kei na veiba,+ 15 moni kua kina ni beitaki ena dua na ka, moni tawacala, moni luve ni Kalou+ savasava ena kedra maliwa na itabatamata takelo qai talaidredre.+ Ena vuravura qo oni na rarama tiko yani me vaka na cina,+ 16 oni na taura matua tiko na vosa ni bula.+ Qori na vu ni noqu marau ena siga i Karisito niu kila ni sega ni tawayaga na noqu cici se na noqu cakacaka vagumatua. 17 Keu sova mada ga me vaka na isoro livi+ ena dela ni isoro+ kei na veiqaravi tabu* e uqeti kemuni kina nomuni vakabauta, au na reki au na marau vata kei kemuni kece. 18 Qori tale ga na ka moni rekitaka, moni marautaka vata kei au.

19 Au vakanuinui tiko vua na Turaga o Jisu, meu talai Timoci+ yani vei kemuni ena dua na gauna lekaleka qo, meu rawa ni marau ena noqu rogoca na kemuni itukutuku. 20 Niu sega tale ni kila e dua ena qarava vinaka na ka e baleti kemuni me vakataki koya. 21 Ni o ira na kena vo era qara ga na ka e baleti ira, era sega ni qara na ka e baleti Jisu Karisito. 22 Ia oni kila ni a vakadinadinataka o koya ni tamata nuitaki ni a vaka na luvequ+ ena nona tokoni au ena vakatetei ni itukutuku vinaka. 23 O koya sara ga qo au via tala yani vei kemuni niu dikeva oti na veika e baleti au. 24 Au vakanuinui tale tu ga vua na Turaga ni sega ni dede, au na sikovi kemuni tale ga yani.+

25 Ia au raica ni vinaka meu se talai Epafirotaito mada yani vei kemuni, na taciqu, na noqu itokani vakacakacaka, e noqu itokani sotia tale ga, o koya oni tala mai me qaravi au,+ 26 ni via raici kemuni kece, e yalolailai tale ga me vaka oni rogoca ni a tauvimate. 27 Io a tauvimate dina o koya, voleka sara ni mate. Ia e lomani koya na Kalou, e sega ni lomani koya ga, e lomani au tale ga meu kua kina ni rarawa tale vakasivia. 28 O koya gona, au sa talai koya yani vakatotolo moni marau kina ena nomuni raici koya, meu kua ni rarawa vakalevu kina o yau. 29 Ni ciqomi koya gona ena marau me vaka ga na nomuni dau ciqomi ira na imuri ni Turaga, ni vakamareqeti ira tale ga na tagane era vakataki koya,+ 30 ni a voleka sara ni mate ena vuku ni cakacaka ni Karisito ena nona solibula me mai qaravi au me sosomitaki kemuni ni oni sega ni tiko rawa eke.+

3 Meu tinia raveitacini, ni marau tiko ga ena vuku ni Turaga.+ E sega ni dredre vei au meu vola na ka vata ga au a vola mada yani, moni vinaka ga kina.

2 Ni qarauni ira na koli, ni qarauni ira na daucaka ca, ni qarauni ira na dau tavalaka na yago.+ 3 Ni o keda ga eda cili dina,+ eda vakayacora tiko na veiqaravi tabu ena veidusimaki ni yalo tabu ni Kalou, eda sakitaki Karisito Jisu+ da qai sega ni nuitaka na veika vakayago, 4 e tiko na yavu meu nuitaka tale ga kina na veika vakayago.

Ke dua tale e nanuma ni tiko na yavu me nuitaka kina na veika vakayago, e sega ni uasivi au:5 au cilivi ena ikawalu ni siga,+ ena matanitu o Isireli ena yavusa o Penijamini, au Iperiu,+ erau Iperiu na noqu itubutubu, au Farisi niu muria vinaka na lawa,+ 6 ena noqu yalogu au vakacacana kina na ivavakoso,+ ena vuku ni yalododonu e vu mai na lawa, au dodonu sara tu ga. 7 Ia na ka kece era dau yaga vei au, au sa okata mera tawayaga ena vuku i Karisito.+ 8 Io au okata mera tawayaga na ka kece ena vuku ni kena talei na kilai Karisito Jisu na noqu Turaga. Ena vukuna au bolea meu vakanadakuya na ka kece, au okata mera benu meu veivolekati kina kei Karisito 9 meu duavata kei koya. Meu kua kina ni nuitaka na noqu yalododonu, o koya e yavutaki ena Lawa, na yalododonu ga e yavutaki ena vakabauti+ Karisito,+ na yalododonu e vu mai vua na Kalou e yavutaki ena vakabauta,+ 10 meu kilai koya kei na kaukaua ni nona vakaturi,+ meu rarawa vata kei koya,+ meu yalorawarawa ni mate me vakataki koya,+ 11 meu rawa ni wili ena veivakaturi taumada mai na mate.+

12 Au se sega ni rawata na icovi se meu sa uasivi, ia au saga tiko ga+ meu rawata me vaka ni digitaki au o Karisito Jisu.+ 13 Raveitacini, au sega ni tukuna qo niu sa rawata, na ka ga au rawa ni kaya: Au sa guilecava na ka sa sivi,+ au tadolova na ka e tu mai liu,+ 14 au saga tiko na isausau meu rawata na icovi+ ni veikacivi ni Kalou i lomalagi+ ena vuku i Karisito Jisu. 15 O koya gona, me tiko kece vei keda na matua+ na rai qo, ke mani duatani na nomuni rai, na Kalou ena vakatakila vei kemuni na rai donu. 16 Ia se mani toso cava eda sa cakava, meda toso tiko ga i liu ena ivakarau vata ga qori.

17 Raveitacini, ni duavata ena nomuni vakatotomuri au,+ ni raici ira matua na muria na ka vata ga keitou a vakaraitaka vei kemuni. 18 Ni le levu—au dau cavuti ira e liu, ia qo au tagi niu cavuti ira tale—era sa meca ni kaunirarawa* i Karisito ena nodra itovo. 19 Na kedra itinitini na rusa, na nodra kalou na ketedra, era dokadokataka na ka e dodonu mera maduataka, era vakasamataka ga na veika ni vuravura.+ 20 Ia o keda, eda lewenivanua+ mai lomalagi,+ na vanua tale ga e tiko kina na ivakabula eda waraka tiko, na Turaga o Jisu Karisito,+ 21 o koya ena veisautaka na yagoda malumalumu me vaka na yagona lagilagi+ me salavata kei na kaukaua levu e tiko vua, me vakamalumalumutaka mada ga na ka kece vua.+

4 O koya gona kemuni na taciqu lomani, ni tudei+ ena nomuni muria na Turaga me vaka au sa tukuna oti mai. Au dau nanumi kemuni ni oni vu ni noqu marau kei na noqu isala vakatui.+

2 Au vakamasuti Uotia kei Sainitiki me duavata na nodrau rai ena Turaga.+ 3 Io, au vakasalataki kemuni tale ga na noqu itokani vakacakacaka yalodina,* moni vukei rau tiko ga na marama qo ni rau dau tokoni* au ena vuku ni itukutuku vinaka, vaka kina o Kelemedi, kei ira na vo ni noqu itokani vakacakacaka e volai na yacadra ena ivola ni bula.+

4 Moni marau tiko ga ena vuku ni Turaga. Au kaya tale moni marau!+ 5 Me kilai na nomuni yalorawarawa+ vei ira na tamata kece ga. Sa voleka na Turaga. 6 Moni kua ni lomaocaocataka e dua na ka,+ ia na ka kece me vakaraitaki vua na Kalou ena masu kei na kerekere salavata kei na vakavinavinaka,+ 7 ena qai taqomaka na lomamuni+ kei na nomuni vakasama na vakacegu+ ni Kalou e uasivia na vakasama kece, ena vuku i Karisito Jisu.

8 Meu tinia raveitacini, ni dau vakananuma na ka kece ga e dina, na ka kece ga e bibi, na ka kece ga e dodonu, na ka kece ga e savasava, na ka kece ga e uqeta na veilomani, na ka kece ga e rogo vinaka, na ka kece ga e kilikili, kei na ka kece ga e ganita me vakacaucautaki.+ 9 Na ka oni vulica, na ka oni ciqoma, na ka oni rogoca, kei na ka oni raica vei au, ni muria tiko ga na ka kece qori,+ ena qai tiko vata kei kemuni na Kalou ni vakacegu.

10 Niu dauveiqaravi ni Turaga, au marau vakalevu ni sa mai vakavoui tale na nomuni nanumi au.+ Oni dau nanumi au tu ga, a sega ga na gauna moni vakaraitaka kina. 11 Au sega ni tukuna tiko qo meu kere veivuke, niu sa vulica meu lomavakacegu ena ituvaki kece au sotava.+ 12 Au sa kila vinaka na bula ena gauna ni dravudravua,+ au kila vinaka tale ga na bula ena gauna ni sautu. Au sa vulica na ka meu cakava meu lomavakacegu kina ena ka kece kei na ituvaki kece, seu mamau seu viakana, seu vutuniyau seu ligalala. 13 Au rawata na ka kece ena vuku i koya e vakaukauataki au.+

14 Ia e vinaka dina na nomuni mai vukei au ena noqu rarawa. 15 Oni kila vinaka tale ga mai Filipai niu biubiu mai Masitonia ni oni sa rogoca na itukutuku vinaka, e sega tale ni dua na ivavakoso e vukei au se ciqoma noqu veivuke, o kemuni ga.+ 16 Mai Cesalonaika mada ga oni a vakauta yani vakarua vei au na ka au gadreva, sega ni vakadua ga. 17 Au sega ni vaqara iloloma tiko, au vinakata ga meu raica na vua oni na tubu vakalevu kina. 18 Ia sa tu qo na ka kece au gadreva, e levu sara. Au sa mamau, ni solia vei au o Epafirotaito+ na ka kece oni solia mai, e boivinaka,+ e isoro vakadonui, e taleitaka na Kalou. 19 Ia na noqu Kalou, o koya e levu tu vua na ka,+ ena qai vakarautaka vei kemuni na ka kece oni gadreva ena vuku i Karisito Jisu. 20 Me vakalagilagi na Kalou na Tamada me tawamudu. Emeni.

21 Au loloma vei ira kece na yalosavasava era duavata kei Karisito Jisu. Eratou loloma tale ga yani na taciqu eratou tiko vata kei au. 22 Era loloma yani vei kemuni na yalosavasava kece, vakabibi o ira na lewe ni vuvale i Sisa.+

23 Me tiko mada ga ena yalo oni vakaraitaka na loloma soli wale ni noda Turaga o Jisu Karisito.