IKARUA NI IVOLA VEI IRA MAI CESALONAIKA

1 Qo na ivola nei Paula, o Silivenuse,* kei Timoci+ vei kemuni ena ivavakoso e Cesalonaika oni duavata kei na Kalou na Tamada, kei na Turaga o Jisu Karisito:

2 Me tiko mada ga kei kemuni na loloma soli wale kei na vakacegu ni Kalou na Tamada kei na Turaga o Jisu Karisito.

3 E dodonu me keitou vakavinavinakataki kemuni tiko ga vua na Kalou raveitacini. E veiganiti qo, ni sa qai tubu vakalevu ga na nomuni vakabauta, oni dui saga tale ga moni dauloloma, e laurai vakalevu kina na nomuni veilomani.+ 4 Oya na vuna keitou dau sakitaki kemuni kina+ ina ivavakoso ni Kalou ena vuku ni nomuni vosota kei na vakabauta ena veivakacacani kece kei na veika dredre* oni sotava tiko.*+ 5 Qo e vakadinadinataka ni dau lewadodonu na Kalou, e ganiti kemuni kina na Matanitu ni Kalou, o koya oni vakararawataki tiko kina.+

6 Ni dodonu ga vua na Kalou me sauma na nomuni rarawa vei ira na dau vakararawataki kemuni.+ 7 Ia vei kemuni na vakararawataki, oni na vakacegui vata kei keitou ni vakatakilai mai lomalagi na Turaga o Jisu+ kei ira na nona agilosi kaukaua+ 8 ena yameyame ni bukawaqa, ena qai totogitaki ira na sega ni kila na Kalou kei ira na sega ni talairawarawa ina itukutuku vinaka ni noda Turaga o Jisu.+ 9 O ira sara ga qo, ena nodra sa lewai mera rusa tawamudu,+ era na kau tani mai na mata ni Turaga, mai na nona kaukaua lagilagi tale ga, 10 ena lako mai o koya ena gauna ya me vakalagilagi vata kei ira na nona yalosavasava, era na raici koya ena qoroqoro ena siga ya o ira kece era vakabauti koya, ni oni a vakabauta na ka kece keitou tukuna vei kemuni.

11 Oya na vuna keitou na dau masulaki kemuni me raica na noda Kalou ni ganiti kemuni na nomuni kacivi,+ me vakayagataka nona kaukaua me vakaotia tale ga na ka vinaka kece e vinakata, kei na cakacaka kece ni vakabauta. 12 Me vakalagilagi ena vukumuni na yaca ni noda Turaga o Jisu, moni vakalagilagi tale ga kina vata kei koya, me salavata kei na loloma soli wale ni noda Kalou kei na Turaga o Jisu Karisito.

2 Ia raveitacini, ena ka e vauca nona sa tiko na noda Turaga o Jisu Karisito+ kei na noda kumuni vata vua,+ keitou kerei kemuni 2 me kua ni vakasesei vakatotolo na nomuni vakasama, me kua tale ga ni vakataqayataki kemuni e dua na itukutuku e nanumi ni vu vakalou+ se itukutuku se ivola e nanumi ni neitou, e tukuni kina ni sa yaco mai na siga i Jiova.*+

3 Me kua ni dua e vakacalai kemuni ena dua na ka, ni na yaco mada e liu na vukitani+ kei na nona vakatakilai na daucaka ca,+ na luve ni rusa,+ sa na qai yaco mai na siga qori. 4 E dau veisaqa o koya, e dau vakalevulevui koya vei ira kece era vakatokai mera kalou se ka era sokaloutaki,* me lai dabe toka kina ena valenisoro ni Kalou me vakaraitaki koya e matanalevu ni dua tale ga na kalou. 5 Oni sa guilecava ni ka kece qo au dau tukuna vei kemuni nida se tiko vata voli?

6 Oni sa qai kila qo na ka e veitarovi tiko, ni na vakatakilai o koya ena nona gauna lokuci. 7 Sa dina, e sa cakacaka lo tiko mai na daucaka ca qo,+ me yacova ni sa kau laivi o koya e veitarovi tiko ena gauna qo. 8 Oti sa na qai vakatakilai mai na daucaka ca, ena vakarusai koya qori na Turaga o Jisu ena icegu ni gusuna+ ena gauna e vakatakilai+ kina ni sa tiko, ena vakawabokotaki koya tale ga. 9 Ia na nona tiko na daucaka ca e tokoni koya kina o Setani,+ e vakayacora rawa na veimataqali cakacaka veivakurabuitaki, na ivakatakilakila lasu kei na cakamana+ 10 ni vakayagataka na ka tawadodonu kece me vakacalai+ ira na vakarau vakarusai, me kedra itotogi ena nodra sega ni galeleta na ka dina e rawa nira vakabulai kina. 11 Oya na vuna e vakalaiva kina na Kalou me cakacaka i lomadra na rai cala mera vakabauta kina na ka lasu,+ 12 era na qai lewai kece nira sega ni vakabauta na ka dina, e vinaka cake ga vei ira na ka e sega ni dodonu.

13 Ia e dodonu me keitou vakavinavinaka tiko ga vua na Kalou ena vukumuni raveitacini, o kemuni e lomani kemuni o Jiova,* ni digitaki kemuni na Kalou mai na ivakatekivu+ moni vakabulai ena nona vakasavasavataki kemuni+ ena yalo tabu vaka tale ga kina na nomuni vakabauta na ka dina. 14 Qori sara ga na inaki e kacivi kemuni kina ena itukutuku vinaka keitou tukuna, moni taukena na lagilagi ni noda Turaga o Jisu Karisito.+ 15 O koya gona raveitacini, moni tudei,+ ni taura matua na ivakarau oni vakavulici kina,+ se mani cavuti se keitou vola yani. 16 Kena ikuri, na noda Turaga o Jisu Karisito kei na Kalou na Tamada, o koya e lomani keda,+ e dau vakacegui keda me tawamudu, e vakarautaka vei keda na inuinui+ ena vuku ni loloma soli wale, 17 me vakaceguya mada ga na lomamuni, me vakataudeitaki* kemuni tale ga ena cakacaka vinaka kece kei na vosa.

3 Meu tinia raveitacini, ni masulaki keitou tiko ga+ me tete kina vakatotolo na vosa i Jiova,*+ me dokai tale ga me vaka oni cakava tiko, 2 me keitou vakabulai tale ga vei ira na dau veivakaleqai kei na daucaka ca,+ nira sega ni vakabauta na tamata kece.+ 3 Ia e dau dina na Turaga, ena vakadeitaki kemuni, ena taqomaki kemuni me kua ni vakaleqai kemuni na vunica. 4 Ni keitou yalodei vua na Turaga ena vukumuni, ni oni sa cakava tiko na ka kece keitou vakarota vei kemuni, oni na cakava tiko ga. 5 Me dusimaka tiko mada ga na Turaga na lomamuni ena sala e dodonu moni lomana kina na Kalou,+ moni vosota+ tale ga ena vuku i Karisito.

6 Keitou vakaroti kemuni gona raveitacini ena yaca ni noda Turaga o Jisu Karisito, moni lako tani mai vei ira na veitacini e vakaveitalia tu na nodra bula+ ra qai sega ni muria na ivakarau oni rogoca vei keitou.+ 7 Oni kila vinaka na sala moni vakatotomuri keitou+ kina, ni sega ni vakaveitalia na neitou bula ena neitou tiko vata kei kemuni, 8 keitou sega ni kana wale+ vua e dua. Ia keitou buno keitou oga ena bogi kei na siga, keitou cakacaka me keitou kua kina ni vakacolata e dua vei kemuni+ ena levu na ka vakailavo. 9 E tu vei keitou na dodonu+ me keitou ciqoma eso na ka vei kemuni, ia keitou vinakata me keitou ivakaraitaki vei kemuni moni vakatotomuria.+ 10 Ena gauna tale ga keitou a tiko vata kina kei kemuni, e dau va qo na neitou ivakaro: “O koya e sega ni via cakacaka me kua ni kana.”+ 11 Keitou rogoca ni so vei kemuni era bula tu ga vakaveitalia,+ era sega sara ga ni cakacaka, ra qai dau siova na ka e sega ni nodra.+ 12 Keitou vakaroti ira qo, keitou kerei ira tale ga ena vuku ni Turaga o Jisu Karisito mera cakacaka galugalu ga, mera kania na kakana era dui bunoca.+

13 Vei kemuni raveitacini, ni kua ni soro ena nomuni cakava na ka vinaka. 14 Ia ke dua e sega ni talairawarawa ina neitou vosa e volai yani ena ivola qo, ni vakatakilakilataki koya, ni muduka nomuni veitokani vata kei koya+ me madua kina. 15 Ni kua ni okati koya me kemuni meca, ia ni vakasalataki koya tiko ga+ me vaka ni tacimuni.

16 Me vakacegui kemuni tiko mada ga ena sala kece na Turaga ni veivakacegui.+ Me tiko mada ga kei kemuni kece na Turaga.

17 O yau o Paula, na ivola ni vakabula qo au vola sara ga e ligaqu,+ e va qo na ivolavolai ni noqu ivola kece me kedra ivakatakilakila.

18 Me tiko mada ga kei kemuni kece na loloma soli wale ni noda Turaga o Jisu Karisito.