IKARUA NI IVOLA VEI TIMOCI

1 O yau o Paula na yapositolo i Karisito Jisu me vaka na loma ni Kalou, meu vunautaka na bula e yalataki vei ira na duavata kei Karisito Jisu,+ 2 vei Timoci na luvequ lomani:+

Me tiko mada ga vei iko na loloma soli wale, na yalololoma, kei na vakacegu ni Kalou na Tamada, kei Karisito Jisu na noda Turaga.

3 Au vakavinavinaka vua na Kalou, o koya au cabora tiko vua na veiqaravi tabu ena lewaeloma e savasava me vakataki ira na noqu qase, niu sega sara ni guilecavi iko ena noqu kerekere, ena bogi kei na siga. 4 Niu nanuma mai na wainimatamu, dua na ka noqu via raici iko, meu rawa ni vakasinaiti ena marau. 5 Niu kila ni sega ni veivakaisini na nomu vakabauta,+ ni a tu e liu vei Loi na bumu kei Unaisi na tinamu na vakabauta qori, au nuidei ni sa tiko tale ga vei iko.

6 Qori na vuna au tukuna tale kina vei iko mo vakacaudreva me vaka na buka na isolisoli ni Kalou vei iko ena noqu tabaki iko e ligaqu.+ 7 Ni sega ni solia vei keda na Kalou na yalodatuvu,+ e solia ga na yaloqaqa,+ na yalololoma, kei na yalomatua. 8 O koya gona, mo kua ni maduataka nomu vunautaka na noda Turaga+ se noqu vesu tu ena vukuna, ia mo tu vakarau mo vakararawataki+ ena vuku ni itukutuku vinaka ni o vakararavi ena kaukaua ni Kalou.+ 9 E vakabulai keda o koya, e kacivi keda tale ga meda yalosavasava,+ sega ena vuku ni noda cakacaka, ena vuku ga ni nona inaki kei na nona loloma soli wale.+ A soli makawa sara qo vei keda ena vuku ni noda duavata kei Karisito Jisu, 10 ia qo e sa qai matata ena nona vakaraitaki mai na noda iVakabula o Karisito Jisu,+ o koya e vakaotia na mate,+ ena nona vakamatatataka vei keda ena itukutuku vinaka+ na ka meda cakava meda bula kina,+ meda tawavuca tale ga.+ 11 Au lesi meu vunautaka na itukutuku vinaka qo, meu kena yapositolo, meu kena qasenivuli.+

12 Qo na vuna au sotava tale tiko ga kina na veika rarawa,+ ia au sega ni madualaka.+ Au kilai koya au vakabauta, au nuidei tale ga ni na maroroya na ka kece au vakararavitaka vua me yacova na siga ya.+ 13 Taura matua na ivakarau ni vosa dina+ o rogoca vei au, ni o vakaraitaka na vakabauta kei na loloma i Karisito Jisu. 14 Mo maroroya na ka talei qo e nuitaki vei iko ena veidusimaki ni yalo tabu e tiko vei keda.+

15 Mo kila qo, nira sa biuti au na tagane kece ena yasana o Esia,*+ wili kina o Faijelo kei Erimojini. 16 Me tiko mada ga ena vuvale i Onesiforo+ na yalololoma ni Turaga, ni dau vakayaloqaqataki au qai sega ni maduataka noqu vesu tu ena sinucodo. 17 Ia ena gauna a tiko kina e Roma a vaqarai au matua, mani kunei au. 18 Me yalololoma mada ga vei koya na Turaga o Jiova* ena siga ya. O kila vinaka tale ga na nona veiqaravi mai Efeso.

2 O koya gona luvequ,+ mo vakaukauataki tiko mada ga ena loloma soli wale e tu vei Karisito Jisu, 2 vaka tale ga kina na ka o rogoca vei au me vaka era vakadinadinataka e levu,+ mo tukuna qo vei ira na tagane yalodina me rawa ni ganiti ira mera vakavulica vei ira eso tale. 3 Ni o sotia vinaka+ i Karisito Jisu, mo tu vakarau mo sotava na veika rarawa.+ 4 E sega ni dua na sotia ena vakaitavitaki koya* ena bula ni veika vakabisinisi,* me vakadonui koya kina o koya e vakacurumi koya me sotia. 5 Kena ikuri, ena sega ni vakaisalataki e dua e vakaitavi ena qito ke sega ni muria na lawa ni qito.+ 6 Na dauteitei gugumatua e dodonu me kania sara ga e liu na vua ni nona were. 7 Dau vakananuma na noqu vosa, ena qai vukei iko na Turaga mo yalomatua ena ka kece ga.

8 Nanuma ni a vakaturi mai na mate o Jisu Karisito,+ na kawa tale ga i Tevita,+ me vaka na itukutuku vinaka au vunautaka,+ 9 o koya au mai sotava kina na veika rarawa me yacova na noqu vesu me vaka e dua e daubasulawa.+ Ia e sega ni tarovi na tete ni vosa ni Kalou.+ 10 Qo na vuna au vosota kina na ka kece ena vukudra na digitaki,+ me rawa nira vakabulai tale ga ena vuku i Karisito Jisu ena lagilagi tawamudu. 11 E dina taucoko na vosa qo: Ke da mate vata, eda na bula vata tale ga.+ 12 Ke da vosota tiko ga, eda na veiliutaki vata tale ga vakatui.+ Ke da cakitaki koya, ena cakitaki keda tale ga o koya.+ 13 Ke da sega ni yalodina, ena yalodina tiko ga o koya, ni sega ni rawa ni cakitaki koya vakataki koya.

14 Tukuna tiko vei ira na ka kece qo, vakaroti* ira ena mata ni Kalou mera kua ni veiletitaka na vosa, na ka e sega sara ga na betena ni na vakaleqai ira na vakarorogo. 15 Gumatua sara mo vakaraitaka ena mata ni Kalou ni ganiti iko na nona veivakadonui, na tamata cakacaka e sega ni dua na ka e maduataka, e wasea vakadodonu na ivakavuvuli dina.+ 16 Ia mo cata na veivosaki tawayaga e veisaqasaqa kei na ka e savasava,+ ni o ira na dau vosa va qori e sa na qai torosobu tiko ga na nodra ivalavala tawavakalou, 17 na nodra vosa tale ga ena tete yani me vaka na vidikoso. Erau wili vei ira qori o Imeneo kei Filito.+ 18 O rau na tagane qo erau gole tani mai na ka dina, erau kaya ni sa yaco oti na veivakaturi,+ erau vakaleqa tiko kina na nodra vakabauta eso. 19 Ia na Kalou e vakarautaka e dua na yavu e dei, ena tu ga, qai volai ena yavu qo na vosa, “O Jiova* e kilai ira na nona tamata,”+ kei na vosa: “Mera vakanadakuya na ivalavala tawadodonu o ira kece era kaciva na yaca i Jiova.”*+

20 Era tu ena lomanivale levu na veimataqali iyaya, so e koula, so e siliva, so tale ga e kau, so e qele, so era vakayagataki ena inaki dokai, eso tale era vakayagataki ena inaki e sega soti ni dokai. 21 O koya gona, ke dua e yawaki ira qori, ena vaka na iyaya e vakayagataki ena inaki dokai, ena savasava, ena yaga vua na kena itaukei, ena vakarautaki ena cakacaka vinaka kece ga. 22 Mo dro tani gona mai na gagadre vakaitabagone, mo vakasaqara ga na yalododonu, na vakabauta, na loloma, na veiyaloni, kei ira na masuta na Turaga ena loma e savasava.

23 Mo cata na veileti lialia qai sega ni vakaibalebale,+ ni o kila ni na vakavu veivala. 24 E sega ni dodonu me veivala na bobula ni Turaga, me yalomalua ga vei ira kece,+ me qasenivuli vinaka, me vosota tu ga ni sotava na ka ca,+ 25 me yalomalua ni vakavulici ira na talaidredre,+ de dua ena vakadonuya na Kalou mera veivutuni, mera rawata kina na kilaka dodonu ni ka dina,+ 26 mera kilai yalodra tale, ra qai dro tani mai na dai ni Tevoro era sa lai coko bulabula tu kina, ni vinakata o koya mera cakava na lomana.+

3 Ia mo kila qo ni na duatani sara na iotioti ni veisiga,+ ena vakilai kina e levu na ka dredre. 2 Nira na dau lomani ira ga na tamata, era na lomana na ilavo, era na dau tukutukuni ira, era na qaciqacia, era na dau veibeci, era na talaidredre vei ira nodra itubutubu, era na sega ni dau vakavinavinaka, era na sega ni yalodina, 3 sa na yali vei ira na veilomani vakaveiwekani, era na sega ni via okati ena dua na veiyalayalati, era na dau vakauvosa,* era na sega ni lewa vinaka na yalodra, era na voravora,* era na sega ni vinakata na ka e dodonu, 4 era na dau veiliumuritaki, era na domoqa, era na dokadoka, era na lomana ga na marau era sega ni lomana na Kalou, 5 e vakarairai ga na nodra qarava na Kalou,+ e sega na kena dina, lako tani mai vei ira e va qo na nodra ivakarau. 6 Ni dau basika mai vei ira qo eso na tagane era dau lai vakacalai ira na veivuvale ena sala qaseqase sara, mera vesuki ira na yalewa malumalumu era bikai tu ena ivalavala ca qai vakamuai ira voli na nodra gagadre. 7 Era vuli tiko ga na yalewa qo, ia era sega ni kila rawa na ka dina.

8 Ia o ira na tagane qo era saqata na dina me vakataki Jani kei Jabari ena nodrau saqati Mosese, e leqa sara tu ga na nodra vakasama, e sega ni vakadonui nodra vakabauta. 9 Ena tini koso nodra sasaga nira sa raica na tamata kece na nodra sesewa, me vaka ga e yaco vei rau na tagane ya.+ 10 Ia o iko, o sa dau muria vinaka tu mai na noqu veivakavulici, noqu ivakarau ni bula,+ noqu inaki, noqu vakabauta, noqu vosovoso, noqu loloma, noqu vosota, 11 noqu vakacacani, kei na noqu rarawa me vaka e yacovi au mai Anitioki,+ mai Ikoniona,+ mai Lisitira,+ au vosota na veivakacacani qori, ia e vakabulai au na Turaga vei ira kece qo.+ 12 Io, o ira kece era via qarava na Kalou ena vuku i Karisito Jisu era na vakacacani tale ga.+ 13 Ia o ira na daucaka ca kei ira na dauveidabui era na qai torosobu ga, era na veivakacalai, era na vakacalai tale ga.+

14 Ia o iko mo muria tiko ga na ka o vakavulici kina, na ka o vakabauta ena gauna e vakadeitaki kina vei iko,+ ni o sega ni lecavi ira era vakavulici iko, 15 o kila tale ga na iVolatabu+ ni o se gone dramidrami,+ qo e vakavukui iko mo rawa kina ni vakabulai ena nomu vakabauti Karisito Jisu.+ 16 E vakavuna na Kalou+ na iVolatabu kece, e yaga me veivakavulici,+ me veivunauci, me veivakadodonutaki, me veidusimaki ena ka e dodonu,+ 17 me vakarautaki vinaka kina na tamata ni Kalou, me tu vakarau tale ga me vakayacora na cakacaka vinaka kece.

4 Au vakaroti iko ena mata ni Kalou kei Karisito Jisu, o koya ena lewai+ ira na bula kei ira na mate+ ena nona vakaraitaki+ mai kei na nona Matanitu:+ 2 Mo vunautaka na vosa,+ kua ni lokuyara ena gauna vinaka kei na gauna ca, mo veivunauci,+ mo veivakadodonutaki, mo veivakauqeti, me salavata kei na nomu vosota vakadede kei na nomu veivakavulici maqosa.+ 3 Ena yaco mai na gauna era na sega ni taleitaka na ivakavuvuli dina,+ era na muria na gagadre ni lomadra nira digia ga na nodra qasenivuli me vakavulici ira ena ka e via rogoca na daligadra.+ 4 Era na gole tani mera kua ni rogoca na ka dina, era na qai vuki mera rogoca na italanoa lasu. 5 Ia o iko, mo yalomatua tiko ena ka kece, vosota na ka rarawa,+ vakayacora na cakacaka ni italatala,* vakacavara vinaka na nomu cakacaka vakaitalatala.+

6 Au sa sova oti me vaka na isoro livi,+ sa voleka tale ga na gauna meu sereki kina.+ 7 Au sa vala oti ena ivalu vinaka,+ au sa vakaotia na veitaucici,+ au sa dei ena vakabauta. 8 Tekivu qo lako yani, sa waraki au tu na isala vakatui ni yalododonu+ ena solia vei au na Turaga, o koya na turaganilewa yalododonu,+ me noqu icovi ena siga ya,+ ia ena sega ni soli ga vei au, vei ira tale ga era vinakata na nona vakaraitaki mai.

9 Saga sara mo yaco totolo mai vei au. 10 Ni sa biuti au o Timasa+ ni lomana na veika ni vuravura qo,* e sa lako sara i Cesalonaika, o Kirisiki i Kalatia, o Taito i Talimetia. 11 O Luke duadua ga keirau tiko vata qo. Mo kauti Marika mai, ni yaga vakalevu vei au o koya ena cakacaka vakaitalatala. 12 Ia au sa talai Tikiko+ i Efeso. 13 Ena gauna o lako mai kina, kauta mai na kote au a biuta tu yani vei Karipo e Tiroa, kei na ivolavivigi, vakabibi na kena e caka ena kuli ni manumanu.

14 E dau vakararawataki au vakalevu o Alekisada na matai ni kopa. O Jiova* ga ena sauma na nona ivalavala.+ 15 O iko tale ga mo qarauni koya, ni a saqata vakalevu na neitou vosa.

16 Ena imatai ni noqu veilewai a sega ni dua e tu e yasaqu, era biuti au kece—me kua mada ga nira cudruvi. 17 Ia e tu e yasaqu na Turaga, e vakaukauataki au meu vakacavara sara noqu vunau mera rogoca na veimatanitu kece,+ au vakabulai tale ga mai na gusu ni laione.+ 18 Ena vakabulai au na Turaga mai na ka ca kece, ena maroroi au meu bula yani ena nona Matanitu vakalomalagi.+ Me vakalagilagi mada ga o koya me tawamudu. Emeni.

19 Au loloma vei Pirisila kei Akuila,+ kei ira na lewe ni vuvale i Onesiforo.+

20 E tiko yani i Korinica o Erasito,+ ia au biuti Tirofimo+ tu e Milito ni tauvimate. 21 Saga sara mo yaco mai ni bera na vulaililiwa.

E loloma tu yani o Upolo, o Putena, o Laino, o Kilotia, kei ira kece na veitacini.

22 Me laurai ena yalo o vakaraitaka ni tiko vei iko na Turaga. Me tiko mada ga kei kemuni na nona loloma soli wale.