IMATAI NI PITA

1 O yau o Pita na yapositolo+ i Jisu Karisito, vei kemuni na tiko vulagi oni veiseyaki tu e Ponito, Kalatia, Kapatosia,+ Esia,* kei Picinia. O kemuni e digitaka 2 na Kalou na Tamada,+ e vakasavasavataki kemuni ena yalo tabu+ moni talairawarawa kina, me kureitaki tale ga vei kemuni na dra i Jisu Karisito:+

Me vakalevutaki mada ga vei kemuni na loloma soli wale ni Kalou kei na nona vakacegu.

3 Me vakacaucautaki na Kalou, na Tama ni noda Turaga o Jisu Karisito, ni a vakasucumi keda vou+ ena dua na inuinui e dei+ me salavata kei na nona loloma levu, ni vakaturi Jisu Karisito mai na mate,+ 4 moni taukena kina e dua na ivotavota e sega ni rusa rawa, e sega ni duka, e sega tale ga ni seavu rawa.+ E maroroi tu mai lomalagi me nomuni,+ 5 oni taqomaki ena kaukaua ni Kalou ena nomuni vakabauta na veivakabulai e vakarau vakatakilai ena iotioti ni itabagauna. 6 Qo e vakamarautaki kemuni vakalevu, e dina ni oni na vakararawataki mada vakalekaleka ena veimataqali veivakatovolei,+ 7 ia ni vakatovolei va qori na nomuni vakabauta+ e uasivia na koula e dau rusa, dina ni sa vakatovolei* oti ena bukawaqa, ena qai vu ni veivakacaucautaki, lagilagi, kei na veidokai ena nona vakatakilai o Jisu Karisito.+ 8 Oni se sega ni raici koya, ia oni lomani koya. Oni se sega ni raici koya ena gauna qo, ia oni vakaraitaka ni oni vakabauti koya, oni vakila tale ga na marau levu e sega ni tukuni rawa, 9 ni oni taura na isau ni nomuni vakabauta, oya na nomuni vakabulai.+

10 Era vakadikeva ra qai vakasaqara matua na veivakabulai qo na parofita era parofisaitaka na loloma soli wale a vakarautaki vei kemuni.+ 11 Era vakadikeva tiko se gauna cava, se na vakaevei na gauna e dusia vei ira na yalo tabu me baleti Karisito+ ni sa tukuni oti tu mai ni na vakararawataki na Karisito,+ kei na veika lagilagi ena qai muria mai. 12 E vakaraitaki vei ira ni nodra veiqaravi e baleti kemuni, e sega ni baleti ira ga. Mera vakadewataka na ka kece era tukuna o ira na vunautaka na itukutuku vinaka vei kemuni ena veidusimaki ni yalo tabu mai lomalagi.+ Na veika sara ga qo era dau via kila na agilosi.

13 O koya gona, vakarautaka nomuni vakasama ena cakacaka,+ ni yalomatua,*+ ni yavutaka nomuni inuinui ena loloma soli wale oni na vakila ena nona vakatakilai o Jisu Karisito. 14 Me vaka na gone talairawarawa, ni kua ni muria tiko na gagadre ca a tu vei kemuni e liu ni oni a lecaika, 15 ia me vaka ni Kalou Savasava o koya e kacivi kemuni, me savasava tale ga na nomuni ivalavala kece,+ 16 ni sa volai: “Moni savasava niu savasava o yau.”+

17 Ke oni masuti koya na Tamada e dau lewa na tamata yadua me vaka na nona ivalavala qai sega ni dau veitovaki,+ e dodonu moni dokai koya+ ena gauna oni tiko vulagi kina. 18 Me vaka oni kila, na ka e caca wale, na siliva kei na koula, a sega ni sereki*+ kemuni mai na nomuni ivalavala tawayaga e dewa mai vei ira na tukamuni.* 19 Oni sereki ga ena dra talei+ i Karisito,+ me vaka na dra ni lami savasava e sega ni ca e dua na tikina.+ 20 Io, a se kilai o koya ni bera na ivakatekivu kei vuravura,+ ia e qai vakaraitaki ena iotioti ni itabagauna ena vukumuni+ 21 oni mai vakabauta na Kalou ena vukuna,+ o koya e vakaturi Jisu mai na mate+ qai vakalagilagia+ me dei kina nomuni vakabauta kei na nomuni nuitaka na Kalou.

22 Ia qo ni oni sa vakasavasavataki kemuni ena nomuni talairawarawa ina ivakavuvuli dina, sa sega kina ni veivakaisini na nomuni veilomani vakaveitacini.+ O koya gona, me vu sara ga mai lomamuni na nomuni veilomani.+ 23 Oni sa vakasucumi vou,+ sega ena ka e vuca rawa, ena ka ga e sega ni vuca rawa+ e vaka na sorenikau bula,* e rawati ga ena vosa ni Kalou e bula qai dei.+ 24 Na “tamata kece e vaka na co, na nona lagilagi e vaka na senico, e dau malai na co, e qai mira na sena, 25 ia na vosa i Jiova* ena tu ga me tawamudu.”+ Qo ga na “vosa” e vunautaki vei kemuni me itukutuku vinaka.+

2 O koya gona, ni biuta laivi na ca kece,+ na lawaki kece, na veivakaisini, na vuvu, kei na kakase. 2 Me vaka na gone dramidrami,+ moni saga moni vinakata na wainisucu dina ena vosa ni Kalou, ni oni na tubu kina moni rawata na bula,+ 3 ni oni sa vakila na yalovinaka ni Turaga.

4 Moni lako vei koya na vatu bula era cata na tamata,+ ia e digitaki, e talei vua na Kalou.+ 5 O kemuni tale ga oni vatu bula, oni tarai cake moni vale vakayalo,+ moni matabete savasava, moni vakacabora kina na isoro vakayalo+ e vakadonuya na Kalou ena vuku i Jisu Karisito.+ 6 Me vaka e tukuni ena iVolatabu: “Raica! Au sa tuvana mai Saioni e dua na vatu e digitaki, me ivakadei ni tutunivale, na vatu e talei, o koya e vakaraitaka nona vakabauta ena sega ni mate wale nona vakanuinui.”*+

7 O koya gona, e talei vei kemuni o koya ni oni vakabauta, ia vei ira na sega ni vakabauta, “na vatu era cata na matai+ e sa mai ivakadei ni tutunivale”+ 8 “na vatu qo era vakatarabetaki kina, na vatu tale ga qo era vakacalai kina.”+ Era tarabe nira sega ni muria na vosa. Qo ga na itinitini ena waraki ira. 9 Ia o kemuni na “matatamata digitaki, na matabete vakatui, na matanitu tabu,+ na matatamata e taukena sara ga na Kalou,+ moni tukuna yani na lagilagi”+ i koya e kacivi kemuni mai na butobuto ina nona rarama uasivi.+ 10 Ni oni a sega ni tamata ni Kalou e liu, ia qo oni sa nona tamata,+ oni a sega ni lomani, ia qo oni sa lomani.+

11 Au vakamasuti kemuni na taciqu lomani me vaka oni kaitani oni qai tiko vulagi,+ moni vakatabui kemuni tiko ga mai na gagadre vakayago,+ na veika e valuti kemuni tiko.+ 12 Me vinaka tiko ga na nomuni itovo ena kedra maliwa na veimatanitu,+ nira beitaki kemuni ena cakacala, de ra na raica na nomuni ivakarau vinaka,+ era na qai vakalagilagia na Kalou ena siga ni nona veidikevi.

13 Ena vuku ni Turaga, ni talairawarawa ina veika kece e bulia na tamata,*+ se vua na tui+ me vaka ni cecere, 14 se vei ira na kovana ni talai ira mai mera totogitaki ira na daucaka ca ra qai vakacaucautaki ira na caka vinaka.+ 15 Ni loma ni Kalou moni caka vinaka tiko ga mera galu kina na tamata lecaika ena nodra vosa vakalialia.+ 16 Moni vakataki ira na tamata galala,+ moni kua ni vakayagataka na nomuni galala me iubi ni nomuni caka ca,+ moni vaka ga na dauveiqaravi ni Kalou.+ 17 Rokova na tamata kece,+ lomani ira na mataveitacini kece,+ rerevaka na Kalou,+ vakarokorokotaka na tui.+

18 Mera talairawarawa na dauveiqaravi vei ira na kedra itaukei ena nodra vakamarautaki ira,+ sega wale ga vei ira na yalorawarawa, vei ira tale ga na yalodredre. 19 Ke dua e vosota na veivakacacani se na veika tawadodonu ena vuku ni nona lewaeloma, qo e vinaka vua na Kalou.+ 20 Na cava na yaga ni nomuni vosota na kuita ni oni cakacala?+ Ia ke oni vosota na ka rarawa ena vuku ni nomuni caka vinaka, na nomuni vosota e vinaka vua na Kalou.+

21 Qo na vuna oni kacivi kina, ni a vakararawataki o Karisito ena vukumuni,+ e laiva vei kemuni na ivakarau moni muria voleka na weniyavana.+ 22 E sega ni valavala ca+ se kune e gusuna na veivakaisini.+ 23 Ni vakasewasewani+ e sega ni veivakasewasewani lesu.+ Ni vakararawataki+ e sega ni veivakarerei, ia e vakanuinui tiko ga vei koya e dau lewa+ vakadodonu. 24 E colata na noda ivalavala ca+ ena kau*+ meda mate kina ena ivalavala ca, da qai bula ena yalododonu. Na “we ni kena kuita oni vakabulai kina.”+ 25 Ni oni a vaka tu na sipi lako sese,+ ia qo oni sa lesu vua na ivakatawa,+ o koya e vakaraica na nomuni bula.

3 O kemuni tale ga na yalewa vakawati, ni vakamalumalumu vei ira na dui watimuni,+ ke ra sega ni talairawarawa ina vosa ni Kalou, ena rawa ni veisautaki ira na nomuni itovo, ke oni sega mada ga ni tukuna e dua na ka,+ 2 nira na raica ga na nomuni itovo savasava+ kei na nomuni veidokai dina. 3 Me kua ni kemuni idivi na veika e sau—na tali drauniulu, na vakaiukuuku koula+ se na tokari ni isulu saulevu— 4 me kemuni idivi ga na tamata e loma, e tokara na isulu e sega ni rusa rawa, oya na yalomalumalumu kei na yalomalua,+ e talei sara ena mata ni Kalou. 5 Era dau sauni ira tale ga va qo na yalewa yalosavasava era nuitaka na Kalou ena gauna e liu, nira vakamalumalumu vei ira na watidra, 6 me vaka na nona dau talairawarawa vei Eparama o Sera, ni kacivi koya turaga.+ Oni luvena tale ga ke oni caka vinaka tiko ga, oni qai sega ni rerevaka e dua na ka e dau veivakarerei.+

7 Kemuni tale ga na tagane vakawati, moni kilai* ira vinaka tiko ga na watimuni ena nomuni bula vata, ni rokovi ira+ nira ka malumalumu sara vei kemuni, nira yalewa, ni oni taukena vata+ na bula e rawati ena loloma soli wale ni Kalou, me kua ni tarovi na nomuni masu.

8 Kena ilutua, moni duavata kece ena nomuni rai,*+ ni veikauaitaki, ni veilomani vakaveitacini, ni veinanumi,+ ni yalomalumalumu.+ 9 Ni kua ni sauma na ca ena ca+ se na veivakasewasewani ena veivakasewasewani,+ moni sauma ena vosa ni veivakalougatataki,+ ni oni a kacivi ena sala qo, me nomuni kina na kalougata.

10 Ni “o koya e via marautaka na bula qai raica na siga vinaka, e dodonu me tarova na yamena mai na ka ca+ kei na tebenigusuna mai na veivakaisini. 11 Me gole tani mai na ka ca+ qai caka vinaka,+ me qara na veiyaloni, me gumatua sara kina.+ 12 E wanonovi ira tiko na yalododonu na mata i Jiova,* e vakarorogo tu na daligana ina nodra vakamamasu,+ ia e cati ira na daucaka ca na mata i Jiova.”*+

13 O koya gona, o cei me na vakaleqai kemuni ke oni gumatua ena nomuni cakava na ka vinaka?+ 14 Ke oni vakararawataki mada ga ena vuku ni ka dodonu, oni na marau ga.+ Ni kua ni rerevaka na ka era rerevaka* eso tale, ni kua tale ga ni lomaleqa kina.+ 15 Moni dokai Karisito ga e lomamuni me vaka ni Turaga, moni qai vakarau tu ena gauna kece moni vakamacalataka nomuni inuinui vei ira kece era taroga, moni vakayacora qo ena yalomalua+ kei na veidokai dina.+

16 Me vinaka tiko ga na nomuni lewaeloma,+ mera madua kina+ o ira na beitaki kemuni ra qai vakadiloya na nomuni itovo vinaka ni oni imuri i Karisito.+ 17 Ni vinaka cake moni vakararawataki ena nomuni cakava na ka e vinaka,+ ke vakatara na loma ni Kalou, e ca moni vakararawataki ena nomuni cakava na ka ca.+ 18 Ni mate ga vakadua o Karisito me baleta na ivalavala ca,+ na tamata yalododonu ena vukudra na sega ni yalododonu,+ me tuberi kemuni kina vua na Kalou.+ E vakamatei o koya ena yago vakayago,+ ia e qai vakabulai ena yago vakayalo.+ 19 Ena ituvaki qo e lako tale ga kina me lai vunau vei ira na kabula vakayalo ena valeniveivesu,+ 20 era a talaidredre ena gauna a wawa voli kina ena vosota na Kalou ena siga i Noa,+ ni ta tiko na waqa+ era vakabulai kina ena waluvu e le vica ga, eratou le walu.+

21 Na ka e yaco ya e tiko na kena ivakatakarakara ena vakabulai kemuni tale ga, ya na papitaiso (sega ni kena vakanadakui wale ga na dukadukali ni yago, ia na noda kerea vua na Kalou me savasava na noda lewaeloma),+ e rawati ga ena nona vakaturi o Jisu Karisito. 22 E sa tiko o koya ena ligaimatau ni Kalou,+ ni gole i lomalagi, era sa vakamalumalumutaki kece vua na agilosi, na veiliutaki, kei na lewa.+

4 Ni vakararawataki na yago i Karisito,+ moni vakaiyaragitaki tale ga ena rai vata ga a tu vua, ni o koya e vakararawataki na yagona sa tarovi koya mai na ivalavala ca,+ 2 ni nona inaki me cakava ga na loma ni Kalou+ ena vo ni nona bula, sega ni gagadre vakatamata.+ 3 Sa rauta na gauna sa oti, oni a vakaogai kemuni voli ena veika era dau vakayacora na tamata ni vuravura,+ ena ivalavala vakasisila,* ena nomuni garosa, gunu waini vakasivia, soqo ni marau vakalialia, veisisivi gunu, kei na ivakarau vakasisila ni qaravi matakau.+ 4 Era kurabui ra qai vosavakacacataki kemuni+ ni oni sa sega tale ni tomani ira ena sala qo, e tini ina vanua lolovira ni bula torosobu. 5 Ia o ira qo era na saumitaro vei koya e sa vakarau tu me lewai ira na bula kei ira na mate.+ 6 Qo sara ga na vuna e tukuni tale ga vei ira na mate*+ na itukutuku vinaka, mera na lewai kina ena rai vakatamata me salavata kei na ka vakayago, mera bula ga ena yalo tabu me salavata na rai ni Kalou.

7 Ia sa roro mai na icavacava ni ka kece. Moni yalomatua gona,+ moni qai yadra tiko ena nomuni gumatua ena masu.+ 8 E bibi duadua moni dau veilomani vakalevu,+ ni ubia e levu na ivalavala ca na loloma.+ 9 Moni dau veikauaitaki, ia me kua ni caka ena vosakudrukudru.+ 10 Na isolisoli oni dui rawata, ni vakayagataka ena nomuni veiqaravi me vaka ni oni dauniyau vinaka ni loloma soli wale ni Kalou e vakaraitaki ena levu na sala.+ 11 Ke dua e vosa me cavuta ga na vosa ni Kalou, ke dua e veiqaravi me vakararavi ga ena kaukaua e solia na Kalou,+ me vakalagilagi kina na Kalou ena ka kece+ ena vuku i Jisu Karisito. Me nona ga na Kalou na lagilagi kei na kaukaua me tawamudu. Emeni.

12 Kemuni na taciqu lomani, ni kua ni kurabuitaka na veivakatovolei katakata e tarai kemuni tiko+ moni nanuma kina ni dua na ka tani e yacovi kemuni. 13 Ia moni marau tiko ga+ ni oni vakaivotavota ena rarawa i Karisito,+ moni reki kina, moni marau vakalevu ena gauna e vakatakilai kina na nona lagilagi.+ 14 Ke oni vakasewasewani ena yaca i Karisito, moni marau ga,+ ni sa tiko vata kei kemuni na yalo sa lagilagi, io, na yalo ni Kalou.

15 Ia me kua ni dua vei kemuni e vakararawataki me vaka na daulaba, se daubutako, se daucakacala, se siova na ka e sega ni nona.+ 16 Ke dua e vakararawataki baleta ni lotu vaKarisito, me kua ni madua,+ ia me vakalagilagia tiko ga na Kalou ena yaca qo. 17 Ni sa kena gauna me tekivu kina na veilewai ena vale ni Kalou.+ Ia ke tekivu vei keda,+ na cava na kedra itinitini o ira na sega ni talairawarawa ina itukutuku vinaka ni Kalou?+ 18 “Ke dredre na nona vakabulai na tamata yalododonu, sa na qai vakaevei o koya e sega ni doka na Kalou kei koya na tamata ivalavala ca?”+ 19 O koya gona, o ira na vakararawataki nira cakava na loma ni Kalou mera vakanuinui* tiko vua na Dauveibuli yalodina ena nodra cakava tiko ga na ka e vinaka.+

5 O koya gona, au vakamasuti ira na qase ena kemuni maliwa, niu qase me vakataki ira, au ivakadinadina ni ka rarawa a sotava o Karisito, au vakaivotavota tale ga ena lagilagi ena qai vakatakilai mai:+ 2 Moni vakatawa na qelenisipi ni Kalou+ oni lesi moni kena ovasia,* ni kua ni qarava ena voraki, ena yalo ga e vinakata ena mata ni Kalou,+ me kua ena yalokocokoco,+ ena yalo ga e marautaka, 3 ni kua ni vakacolasau vei ira e taukeni ira na Kalou,+ moni nodra ivakaraitaki ga na qelenisipi.+ 4 Ena gauna e vakaraitaki mai kina na ivakatawa levu,+ ena qai soli vei kemuni na isala vakatui lagilagi e sega ni ca rawa.+

5 Moni vakamalumalumu tale ga na cauravou vei ira na qase.+ Ia moni sulumaka kece na yalomalumalumu ena nomuni veimaliwai baleta ni cati ira na viavialevu na Kalou, ia e vakaraitaka nona loloma soli wale vei ira na yalomalumalumu.+

6 O koya gona, moni vakamalumalumutaki kemuni ena liga kaukaua ni Kalou, ena qai vakacerecerei kemuni ena gauna lokuci,+ 7 moni biuta vua na nomuni lomaocaoca kece,+ ni kauaitaki kemuni o koya.+ 8 Moni yalomatua, ni yadra tiko!+ E veilakoyaki voli na kemuni meca, na Tevoro, me vaka na laione e tagi, e vakasaqara tiko e dua me tiloma.+ 9 Ia ni tudei ena nomuni vorati koya,+ me dei na nomuni vakabauta, ni oni kila ni veika rarawa vata ga qori era vakila tiko na tacimuni kece e vuravura.+ 10 Ia ni oni vakararawataki vakalekaleka, ena qai vakacavara na Kalou na nona vakarautaki kemuni, ni laurai na nona loloma soli wale ena ka kece e cakava, e kacivi kemuni tale ga ina nona lagilagi tawamudu+ ena vuku i Karisito. Ena vakataudeitaki kemuni,+ ena vakaukauataki kemuni,+ ena vakadeitaka na nomuni yavu. 11 Me nona mada ga na kaukaua me tawamudu. Emeni.

12 Ena veivuke i Silivenuse,*+ na tacida au okata me tamata yalodina, au vola yani vei kemuni e vica wale na ka me uqeti kemuni, me ivakadinadina dei tale ga ni qo dina na loloma soli wale ni Kalou vei kemuni moni tudei kina. 13 E loloma yani na marama* e tiko mai Papiloni, e digitaki tale ga me vakataki kemuni, e loloma tale ga yani o Marika+ na luvequ. 14 Ni veikidavaki ena iregu ni veilomani vakaveitacini.

Me tiko mada ga kei kemuni kece na tisaipeli i Karisito na vakacegu.