“E Totoka Dina”

Oqori na ka rau a vola e dua na veiwatini mai Georgia, Mereke, me baleta na ivola Na Cava Sara Mada e Kaya na iVolatabu? Na ivola rokataki oqo e 224 na tabana, a tabaki ena 2005. Erau kaya na veiwatini: “Na ivola oqo e rawarawa ga na wilika, voleka ni tamata kece e rawa nira na wilika. Ia na titobu ni veika e koto kina ena vakaceguya tale ga na nodra gagadre vakayalo o ira era vuli vinaka.”

E veiuqeti sara mada ga na yaca ni ivola, me vaka rau a sotava e dua na veiwatini mai New Jersey, Mereke. Ni oti na nodra soqo ni tikina na iVakadinadina i Jiova e Florida, na vanua rau a taura mai kina na nodrau ivola, rau a vuka sara ina Bahamas ena nodrau ilakolako vagade. Gauna e vakadikeva tiko kina na nodrau iyaya, a raica sara e dua na vakailesilesi ni kasitaba na ivola, e wilika na yaca ni ivola qai kaya, “Au dau vinakata tu meu kila na isau ni taro oqo.” E marau na vakailesilesi ni rau solia vua na veiwatini iVakadinadina e dua na kena ilavelave.

Ena siga e tarava ni rau wilika tiko na ivola e baravi na veiwatini vata ga oya, a raica sara na ivola e dua na marama e kea e dau volivolitaki vei ira na saravanua. E kaya ni siga sara ga oya a masulaka kina vua na Kalou me baleta na kena saumi na taro e via tautauvata ga oya—Na cava sara mada e kaya na iVolatabu? A taroga na vanua e rawa ni volia kina na ivola qai marau dina na marama oqo ni rau solia vua na veiwatini iVakadinadina e dua na ivola a se vo tiko vei rau.

Na ivola, Na Cava Mada e Kaya na iVolatabu? sa vakadewataki ena sivia na 145 na vosa, sa tabaki oti tale ga e sivia e 40 na milioni na ilavelave. Ke oni kerea e dua na ilavelave, vakalewena na fomu oqo qai vakauta ina itikotiko e tabaki toka e ra se ena itikotiko e veiganiti ena tabana e 5 ni ivoladraudrau oqo.

□ Au kerea me dua na noqu ilavelave ni ivola e tabaki toka oqo.

□ Au kerea me dua e mai vakavulici au wale e vale ena iVolatabu.