Veisiko i Idonisia

E 17,000 na yanuyanu e kovuta na vanua o Idonisia. Era kilai na kai Idonisia nira dauveikauaitaki, yalomalua, veinanumi ra qai veidokai.

E kedra kakana taleitaki na raisi kei na so na kakana vakaisaluaki, era taleitaka tale ga na vuata. E dau kena ivakarau ena so na vanua e kea, mera dabe na vuvale ena ibe ra qai kana ga e ligadra. Era kaya e levu na kai Idonisia ni kana vinaka kina na kakana.

Era dau taleitaka na droini, cakacaka ni liga, danisi, kei na ivakatagi. Dua na iyaya ni ivakatagi era dau vakayagataka na anklong, e caka mai na bitu lalai ra qai lili ena dua na kau e vakaitautauri. Ena yavalati na bitu qori me kilai kina na kedra irorogo. Era na vakaitavi e le vica ena gauna me vakatagitaki kina, ia e tiko ga na gauna era na kurea kina nodra dui anklong.

Me tekivu mai na ika15 ni senitiuri S.K., a tete ena vanua o Idonisia na vakabauta vakaIdu kei na vakabauta vakaBuda. Ena ika16 ni senitiuri, a veisautaka na nodra ivakarau vakavanua na vakabauta vakaMusolomani. Era yaco tale ga yani ena gauna qori na kai Urope mera vaqara isaluaki ni kakana, mani tauyavu kina na lotu ni Veivanua vaKarisito.

A tauyavu e Idonisia na isoqosoqo ni iVakadinadina i Jiova ena 1931, era kilai e vuravura raraba nira dauveivakavulici ena iVolatabu. Ena gauna qo sa sivia e 22,000 na iVakadinadina i Jiova mai Idonisia. Era saga tiko mera vakavulici ira na didivara era vakaitikotiko ena vanua qori. A caka wale ga qo e dua na nodra soqo lavotaki ena vosa vagalu, mera vakananuma na mate i Jisu Karisito, era tiko kina e sivia e le 500.