Na iMatai ni Drodrolagi

O KILA beka na imatai ni ka a cakava o Noa kei na nona vuvale ni ratou sa sobu mai waqa? A vakacabora na isoro se isolisoli vua na Kalou. Sa rawa ni o raici koya ni cakava tiko oqori ena iyaloyalo e toka e ra. A cabora na isolisoli manumanu o Noa me vakaraitaka nona vakavinavinaka vua na Kalou ena nodratou vakabulai mai na waluvu levu.

O nanuma ni a marau o Jiova? Io. Sa qai yalataka vei Noa ni na sega tale ni vakarusai vuravura ena waluvu.

Sega ni dede sa mamaca na vanua taucoko, ratou sa qai tauyavutaka e dua na nodratou itikotiko vou o Noa kei na nona vuvale. E vosavakalougatataki iratou na Kalou qai kaya: ‘Dou vakaluveni qai tubu mo dou lewe vuqa ka vakatawa na vuravura.’

De dua nira na rogoca na tamata na veika e baleta na waluvu levu, era na qai rere de na yaco tale. A vakarautaka gona na Kalou e dua na ka me ivakananumi ni nona yalataka ni na sega tale ni luvuci na vuravura taucoko. O kila beka se cava na ivakananumi oya? Na drodrolagi.

E dau laurai na drodrolagi e lomalagi ni sa tau oti na uca qai cila tu na siga. E rairai levu tu na roka totoka ni drodrolagi. O sa bau raica oti e dua? O raica rawa na kena ena iyaloyalo oqo?

Oqo na vosa ni yalayala ni Kalou: ‘Au na sega tale vakadua ni vakarusai ira na tamata kece kei na manumanu ena dua na waluvu. Au na biuta tu na drodrolagi ena o, meu nanuma kina na noqu vosa ni yalayala.’

Ni o raica na drodrolagi, na cava o na vakananuma? Io, na yalayala ni Kalou ni na sega tale ni vakarusa na vuravura ena dua na waluvu levu.