Wase e 31

Dolo Sila ena Siga ni Vakacecegu

E SEGA ni dede sa ratou biuti Jerusalemi ko Jisu kei iratou na nona tisaipeli ka lesu tale ki Kalili. Sa vula i tubutubu oqo, sa laurai mai na sola ni sila ena were. Eratou sa viakana na tisaipeli. Sa ratou qai doloka na sola ni sila ka kania. Ia me vaka ni Siga ni Vakacecegu, e sega ni tabonaki na veika eratou cakava.

O ira na i liuliu vakalotu mai Jerusalemi era se qai saga oti ga me ra vakamatei Jisu ni voroka na Siga ni Vakacecegu. Era kauta mai oqo na Farisi na ka me ra beitaka kina. “Raica, sa kitaka ko ira na nomu tisaipeli na ka e sega ni tara me caka e na siga ni vakacecegu,” era beitaki koya.

Na nodra veibeitaki na Farisi na doloki ni sila ka qiliraki ena liga me laukana e tautauvata kei na tatamusuki ka buturaki me vakacaginataki. Ia na qaqaco matua ni nodra vakaibalebaletaka na ka e vauca na cakacaka sa yaco kina me veivakaocai na Siga ni Vakacecegu, ia e a dodonu me vakavuyalorekireki, na gauna me ia kina na veibuli cake vakayalo. Sa qai kauta cake mai ko Jisu na i vakaraitaki vaka i Vola Tabu ni Kalou ko Jiova a sega ni nakita me kaukauwa sara vaka o ya na lawa ni kena vakatatabutaki na Nona Siga ni Vakacecegu.

Sa kaya kina ko Jisu ena gauna sa viakana kina ko Tevita kei ira na nona tamata, era mai cegu ena vale vakacevaceva ka kania na madrai dauraici. Na madrai o ya a se qai kau tani oti ga mai na mata i Jiova ka sosomitaka e so tale na ka vou, ka maroroi vakatabakidua ga me ra kania na bete. Ia, ena i tuvaki o ya, eratou a sega ni vakacalai kina ko Tevita kei ira na nona tamata ena nodra kania.

Ni solia tale e dua na i vakaraitaki, sa kaya kina ko Jisu: “Dou a sega beka ni wilika e na vunau, ni ra sa vakacacana na siga ni vakacecegu ko ira na bete e na vale ni soro, ka ra sa sega ni cala kina?” Io, ena Siga ni Vakacecegu sara mada ga o ira na bete era dauvakamate manumanu ka daucakava na cakacaka tani tale e so ena valenisoro ena nodra vakarautaka na i soro! “Ia ka’u sa kaya vei kemudou,” sa kaya ko Jisu, “Sa dua eke sa uasivi cake e na vale ni soro.”

Sa qai tomana ko Jisu ena nona vunauci ira na Farisi: “Kevaka dou sa kila na kenai balebale ni vosa oqo, Au sa vinakata na yalololoma, ka segai nai soro, dou a sega ni beitaki ira era sa sega ni cala.” Sa qai tinia o koya: “Ni sa Turaga talega ni siga ni vakacecegu na Luve ni Tamata.” Na cava mada e vakaibalebaletaka e ke ko Jisu? E vosa tiko ko Jisu me baleta na veiliutaki ni nona Matanitu ena loma ni dua na udolu na yabaki ka na solia na vakacegu.

Sa rauta oqo ni 6,000 na yabaki na nona vakararawataki voli mai na kawatamata ena veivakabobulataki i Setani na Tevoro, me sa i vakarau tu ni bula e veisiga na i tovo kaukauwa kei na veivaluvaluti. Ena yasana ka dua, na Siga ni Vakacecegu levu i Karisito e gauna me na rawati kina na vakacegu mai na rarawa kei na veivakasaurarataki vaka o ya. Maciu 12:1-8; Vunau Ni Soro 24:5-9; 1 Samuela 21:1-6; Tiko Voli mai na Lekutu 28:9; Osea 6:6.

▪ Na cava na ka era a beitaki kina na tisaipeli i Jisu, ia e qai sauma vakacava ko Jisu?

▪ Na cava e vakaraitaka ko Jisu ni ra malumalumu kina na Farisi?

▪ Na sala cava e yaco kina ko Jisu me “Turaga talega ni siga ni vakacecegu”?