Buli na iMatai ni Tagane kei na Yalewa

A tea o Jiova e dua na were ena vanua e vakatokai o Iteni. E levu kina na senikau, na vunikau, kei na manumanu. Oti e bulia na Kalou mai na kuvuniqele na imatai ni tagane o Atama, qai uvuca e ucuna na icegu ni bula. Kila na cava? E yaco na tagane qori me tamata bula! E tukuna o Jiova vei Atama me raica vinaka na were, me vakayacani ira tale ga na manumanu.

E tukuna vei Atama o Jiova e dua na lawa bibi. E kaya: ‘O rawa ni kania na vuata mai na vunikau kece, vakavo ga e dua. Ke o kana mai na vunikau qori, o na mate.’

Dua na gauna e muri, e kaya o Jiova: ‘Au na bulia e dua me dau vukei Atama.’ E vakavuna sara me mocelutu o Atama, qai vakayagataka e dua na sui ni sarisarina me bulia kina na watina. Na yacana o Ivi. Rau tekivuna o Atama kei Ivi na imatai ni vuvale. Na cava e kaya o Atama ni raici watina? Ena levu ni nona marau, e kaya: ‘Raica mada na ka e cakava o Jiova mai na sui ni saresarequ! E vakataki au ga.’

E kaya o Jiova vei Atama kei Ivi me rau vakaluveni, mera tawana na vuravura na nodrau kawa. A vinakata mera marau ra qai duavata ni vakatetea e vuravura taucoko na parataisi, me vaka ga na were o Iteni. Ia a sega ni yaco. Baleta? Eda na vulica qori ena wase tarava.