Na Tamata​—iVakatagedegede i Cake ni Manumanu?

“Meda kauai li ke duidui na yavu ni noda vakabauta na itekitekivu ni bula?”

A taroga na taro oqo e dua na goneyalewa yabaki 16 ni Brazil ena iucu ni nona vosa ena ulutaga “Na Tamata​—iVakatagedegede i Cake ni Manumanu?” Ni sa taura oti na nona ilavelave ni Awake!, 22 June, 1998 me baleta na ulutaga oya o nona qasenivuli, a sureti gonevuli sara me vakamacalataka ina nodratou kalasi.

E vakabibitaka na iVakadinadina gone oqo na leqa ni kena vakatavuvulitaki na bula vakaidewadewa ni yavutaki ga ena veika era sa bula rawa tu. Me kena ivakaraitaki, e levu era nanuma ni ivakavuvuli ni bula vakaidewadewa e vakamuai ira ina vakasama ni sa ivakarau ga ni bula e veisiga me tawamudu na veivaluvaluti, e bucina cake kina na vakabauta vaka Fascism kei na Nazism.

A vakamacalataka o gonevuli na duidui levu e koto vei rau na tamata kei na manumanu. E kaya: “Na tamata wale ga e rawa ni vakasama vakayalo. Na tamata wale ga e rawa ni sasagataka me kila na inaki ni bula. Na tamata wale ga era kauaitaka na mate, na vanua era vu mai kina, era gadreva tale ga mera bula tawamudu. E rui bibi gona kina meda taura na gauna me kilai kina se da a vu mai vakacava!”

A vakacaucautaka o qasenivuli na ivakamacala totoka oya. E kaya ni rawata vinaka nona itavi ni dau makututaka na iVakadinadina gone oqo na wilivola. E kilailevu e koronivuli na goneyalewa oqo ni dau gugumatua ni wilika na ivola yavutaki vakaivolatabu me vaka na Yadra! kei Na Vale ni Vakatawa.

Era kauaitaka dina na iVakadinadina i Jiova na vakayacoka ni ivakavuvuli ni bula vakaidewadewa e lomadra kei na nodra vakasama na itabagone. Oqo na vuna a veivakauqeti kina ina ivavakoso e lewena na goneyalewa oqo mera solia na iVakadinadina gone e yadua na ilavelave ni ivoladraudrau na Awake!, 22 June, 1998, vei ira nodra qasenivuli kei na nodra itokani e koronivuli. E veisoliyaki kina e rauta ni 230 na ivoladraudrau ena veikoronivuli ena korolevu oya. E vakaikere sara ina ivoladraudrau na Awake! na iliuliu ni tabana ni saenisi.

Io, eda na kauai ke duidui na yavu ni noda vakabauta na itekitekivu ni bula! E vakaraitaka na itabagone oqo kei ira na nona itokani ni nodra vakabauta ni tiko na Dauveibuli e vakaibalebale dina ina nodra bula.