Na iValavala Vinaka e Vakarokorokotaki Kina na Kalou

O IRA era lomana na Kalou era guta mera dau vakavotuya na rarama vakayalo ni nona Vosa, na iVolatabu. Ena sala oqo era muria kina na ivakaro i Jisu: “Me caudre . . . na nomudou rarama e na matadra na tamata, me ra raica na nomudoui valavala vinaka, ka vakarokorokotaka na Tamamudou sa tiko mai lomalagi.” (Maciu 5:​16) E rawa ni vakarokorokotaki na Kalou ena vosa kei na ivalavala vinaka.

O ira na iVakadinadina i Jiova era qara mera vakamarautaka na Kalou ena nodra bulataka na ivakavuvuli vakaivolatabu kei na nodra saga mera vukei ira na so ena veika vakayalo. Era vakayacora oqo ena veivanua e se sega mada ga ni vakalawataki kina na nodra cakacaka vakaitalatala. Ena koroturaga ni dua na vanua oqori, era sa dau vakayaco soqo ni tikina kina ena veiyabaki na iVakadinadina, rauta nira lewe 6,000 ina 9,000 na tamata era dau tiko kina. Era sauma na kena valenisoqo ni dua na vale e dau vakaraitaki kina na iyaya makawa. Me vaka era dau cakava ena veiyabaki sa oti yani, ni bera na nodra soqo ena 1999, e vica vata na drau na iVakadinadina era cakacaka vakaukaua mera samaka na vale oqo, era vakarautaka e dua na misini ni rorogo kei na vica vata na udolu na idabedabe.

Na vakavakarau oqo e sega ni vunitaki rawa. Era kauaitaka o ira na vakailesilesi ni vale oqo na veika kece e vakayacori. Era raica tale ga ni dina ga era tiko kina e lewe 15,666, na iwiliwili levu duadua, ia e cicivaki ga vakavinaka na soqo, ra qai rakorako na iVakadinadina. Era drukataka tale ga o ira na vakailesilesi na sasamaki e qai vakayacori ni sa oti na soqo.

Ena nodra vakavinavinakataka na veika kece, era sa qai vakaliuci ira kina na iVakadinadina o ira na cicivaka tiko na vale oqo me vakarawarawataka na nodra lai vakayagataka tale na vale oqo ena yabaki e tarava. E dua tale na ka uasivi sara era cakava o ira na cicivaka tiko na vale oqo. Ena 15 Julai, 1999, era sa qai solia e dua na icovi ni vakavinavinaka vei iratou na komiti ni soqo. E ceuti toka ena ivakananumi na veivosa oqo, “na ivavakoso ni iVakadinadina i Jiova”​—e dua na ka veivakurabuitaki ena dua na vanua e vakatabui tu kina na nodra cakacaka ni veivakavulici ena iVolatabu.

Ena yabaki 2000/2001, era sa nanamaki tu e vica na milioni ena veiyasa i vuravura mera na tiko ena vica na drau na nodra soqo ni tikina na iVakadinadina i Jiova, e kena ulutaga na “Muria na Vosa ni Kalou.” Ena nomu tiko kina, oni na rawa ni dikeva vakataki kemuni na nodra ivalavala vinaka o ira era cuqena mera cakava na ka e tukuna tu na iVolatabu. Oqo na ivalavala vinaka e vakarokorokotaki kina na Kalou.