“Na Me Yalewa Kila sa Matavinaka”

NA MATAVINAKA e sega ni vosa veiganiti me vakamacalataka e dua na me. Eda sa kila tu nira manumanu yaga na me, e rawa nira kania na ka kece ga, e kana vinaka na lewedra ra qai solia tale ga na sucu gunu vinaka​—ia ena veicalati toka kevaka eda vakatokai ira mera matavinaka.

Na cava ga e vakatauvatana kina na iVolatabu na yalewa vakawati me ‘vaka na teira dau loloma, kei na me yalewa kila sa matavinaka.’ (Vosa Vakaibalebale 5:​18, 19) Ni kilai ira vinaka na nodra manumanu ni veikau na Isireli o Solomoni, o koya e dua a vola na ivola na Vosa Vakaibalebale, ena dua gona na vuna vinaka na nona vakayagataka na ivakatautauvata oqo. (1 Tui 4:​30-33) De dua, e vakataki tamana ga o Tevita, ni dau vakadikevi ira na me kila ena nodra bula voli ena vanua e wavoliti Eni-keti, volekata na veibaravi ni Waitui Mate.

Era dau taleva vakawasoma na qele lalai ni me kila era bula volekata na vanua dravuisiga e Jutia na ivurevure ni wai e Eni-keti. Ni oqo ga na ivurevure ni wai nuitaki ena vanua dravuisiga oya, sa dau nodra vanua tu ga ni gunu na me kila na vanua o Eni-keti ena veisenitiuri. E rairai ibalebale ni yaca o Eni-keti na “nodra igunugunu na luve ni me,” sa ivakadinadina gona ni nodra dau lakova vakawasoma na luve ni me na vanua oqo. E ivakavakacegu i Tui Tevita ena gauna a vakasasataki koya kina o Tui Saula, dina ga ni a bula voli kina me vaka e dua e drotaki bula “e na dela ni veivatu ni me kila.”​—1 Samuela 24:​1, 2.

Ena gauna mada ga oqo e rawa ni o se sarava ga e Eni-keti na nodrau veimuri sobu vakadinamati i wai e dua na me kila tagane kei na dua na me kila yalewa. O na qai raica rawa na vuna e vakatauvatani kina na me kila yalewa kei na dua na yalewa vakawati yalodina. Na malumu ni nona ivakarau kei na kena irairai totoka e vakadinadinataki kina na ivalavala lokomi vakamarama. Na vosa “matavinaka” e rawa ni ivakaraitaki ni malumu kei na totoka ni irairai ni me kila yalewa.a

E veiganiti vua na me kila yalewa me kaukaua ia me itovo lokomi tale ga. Me vaka a vakaraitaka o Jiova vei Jope, ni dau vakasucu na me kila yalewa ena veiqaravatu, ena vanua veivatu e dredre me lakovi, e kunekunei dredre kina na kakana qai dau veisivi sara tale ga kina vakalevu na ivakarau ni katakata. (Jope 39:1) Dina ga ni sotavi na veituvaki dredre vaka oqo, e dau qarauni ira vinaka ga na luvena qai vakavulici ira ena rika kei na lade e delanivatu me vakataki koya ga. E dau taqomaki luvena tale ga vakavinaka na me kila yalewa mai vei ira na manumanu rerevaki. E kaya e dua a raica e dua na me kila yalewa ni rau a vala kei na dua na ikeli me rauta e veimama na aua, ia e taqomaki luvena vinaka koto ga e rukuna ena gauna kece oqori.

Era dau sotava tale ga na ituvaki dredre o ira na yalewa vakawati lotu Vakarisito ra qai tina, ena nodra susugi luvedra. Era vaka na me kila yalewa, ena nodra yalodina kei na nodra sega ni nanumi ira ga ena nodra qarava na nodra itavi soli vakalou. Era saga ena yaloqaqa na nodra taqomaki luvedra mai na ituvaki leqataki vakayalo. O koya gona, ena nona vakayagataka o Solomoni na ivakatautauvata oqo e sega ni vakalailaini ira kina na marama, e veivakamuai tiko ga ina itovo lokomi kei na totoka ni irairai ni yalewa​—na itovo lokomi vakayalo oqo e qai dau vakavatukanataki ena gauna voravora sara mada ga.

[iVakamacala e ra]

[iYaloyalo ena tabana e 31]

E dau vakaraitaka na yalewa vakawati qai tina lotu Vakarisito tale ga na itovo lokomi vakayalo ni dau qarava na nona itavi soli vakalou