“iVakaraitaki ni Duavata”

OQO sara ga na ulutaga ena niusiveva mai Indaiatuba, e São Paulo, mai Brazil. O cei e ivakaraitaki? E kaya na dauvolavola: “O ira na iVakadinadina i Jiova era lalawataka tiko mera tara e dua na ‘Kingdom Hall’ vou, na yaca ni nodra valenilotu se valenisoqoni, ra qai ivakaraitaki vinaka ni veitokoni e guiguilecavi dredre.”

E laurai na nodra duavata na iVakadinadina i Jiova ena ituvaki vaka oqo. E tomana gona kina na ivakamacala ena niusiveva: “E veivakayaloqaqataki dina meda raici ira na turaga, na marama, kei ira na itabagone era bolecakacaka vata mera tara e dua na vale, mera soqo vata kina ena nodra qaravi Kalou.”

Era ivakaraitaki vinaka talega ena so tale na basogana na iVakadinadina i Jiova. E tomana tale na ivakamacala ena niusiveva: “Era sega wale ga ni vuli se masu vata, ia e nodra isausau tale ga mera vukei ira na daumateni kei ira era vakabobulataki tu ena wainimate gaga, ra qai vakavulici ira na tamata ena sala ni duavata kei na veilomani.” Era cakava rawa vakacava oqo? Era kila na iVakadinadina i Jiova ni vulici kei na vakaitovotaki ni ivakavuvuli vakaivolatabu, e vukea e dua me vakavinakataka na nona malumalumu. Oya na vuna era gumatua ni tukuna kina vei ira na tani na veika era vulica ena iVolatabu. E tinia na ivakamacala ena niusiveva me baleti ira na iVakadinadina, ni nodra “ivakaraitaki, e sega ni vakabekataki ni gadrevi me vakatotomuri.”

E dola raraba tu na soqoni ni iVakadinadina i Jiova vei ira na lewenivanua qai sega ni gadrevi kina na soli. Oni sureti mo ni sikova e dua na Kingdom Hall e voleka vei kemuni.