E Tiko na Ka e Bibi Cake Mai na iRairai e Sau

“VEI IRA NA TAMATA GONE, NA KA BIBI DUADUA VUA E DUA, OYA ME RAIRAI TOTOKA,” E KAYA E DUA NA LOTU VAKARISITO YALODINA SA KENA TURAGA.

Io, sa balavu mai na gauna na nona vakabibitaka tu na tamata na rairai vinaka wale ga e sau, e lai vakamamadataki kina na ka e bibi cake, oya na itovo vinaka. Ia o koya e buli keda, e raica na keda irairai e loma, veitalia se vakacava tu na keda irairai e sau. E ivakaraitaki uasivi kina vei keda o koya ena sala meda dau vakatulewataka kina vakayalomatua na ka. E kaya na Kalou ena iVolatabu: “Ni sa sega ni raica ko Jiova me vaka sa raica ko ira na tamata; ni sa raica na ka esau ko ira na tamata, ia sa raica na yalo ko Jiova.”​—1 Samuela 16:7.

Na ka e vinakati meda rairai totoka dina kina na tamata, e vure mai vua na Kalou. E vakaraitaka na nona Vosa ni ka bibi duadua me laurai vua e dua na tamata, oya na itovo vakayalo. E kaya na iVolatabu: “A ka lasu na saweka, ka sega ni yaga na matavinaka; ia na yalewa sa rerevaki Jiova, ena vakacaucautaki.” (Vosa Vakaibalebale 31:30) Io, na rairai vinaka e sau e rawa ni ubia na itovo ca. (Esiteri 1:​10-​12; Vosa Vakaibalebale 11:22) E dina ni na seavu yani na totoka vakayago, ia na vinaka ni itovo​—na ivakarau e taka mai lomada​—ena vinaka cake tiko ga qai dei.

O koya gona, e ka vakayalomatua kina meda vuataka na itovo me vaka na loloma, reki, vakacegu, vosota vakadede, yalomalua, yalololoma, vakabauta, yalomalumalumu, kei na ivalavala malua! (Kalatia 5:​22, 23) Nida cakava oqo, eda na rawata kina na itovo vinaka, o koya e bibi cake mai na irairai wale ga e sau.​—1 Pita 3:​3, 4.