Na Veisele e Sega ni Vakayagataki Kina na Dra​—“iWalewale sa Taurivaki Tiko Vakalevu ena Veiqaravi Vakavuniwai”

NA ruku ni ulutaga “Na Veisele e ‘Sega ni Vakayagataki Kina na Dra,’” e volatukutukutaka na ivoladraudrau na Maclean’s ni o ira na vuniwai e Canada taucoko era sa “vakavinakataka tiko e so na iwalewale vovou. Ena loma mada ga ni lima na yabaki sa oti, na veisele e sega ni vakayagataki kina na dra sa mai iwalewale sa taurivaki tiko vakalevu ena veiqaravi vakavuniwai.” E dua gona vei ira o Brian Muirhead, na vuniwai e dauniveivakamoceri ena Health Sciences Centre mai Winnipeg. Na cava sara mada e vaqara kina na veiqaravi vakavuniwai e sosomitaka kina na dra?

Ena 1986, a bolea o Vuniwai Muirhead me seleva e dua na kena turaga e yabaki 70 ni tauvi koya tu na bodra. Ena vuku ni nona vakabauta yavutaki vakaivolatabu ni dua o koya na iVakadinadina i Jiova, a qai kerea kina na veiqaravi vakavuniwai e sega ni gadrevi kina na soli dra. (Cakacaka 15:​28, 29) E tukuna na ivoladraudrau na Maclean’s ni o Vuniwai Muirhead “a qai vakayagataka e dua na iwalewale e sega soti ni dau vakayagataki vakalevu, oya me soli na saline solution vua na tauvimate me rawa ni drodro vinaka tiko ga kina e yagona na dra. A lako vinaka na iwalewale oya, qai vaqaqacotaka na ka a vakabauta tu o Muirhead ni ‘vaka me sa dau matau ga me keimami dau solia na dra. Au nanuma ni sa kena gauna oqo meda vaqara kina e so tale na kena isosomi.’”

Na kena sagai me caka na veisele e sega ni vakayagataki kina na dra e “vu ruarua mai vei ira era kauaitaka na levu ni dra ena soli ena gauna mai muri​—⁠kei na nodra rerevaka na tauvimate na veimatedewa e vu mai na soli ni dra.” Eda vakavinavinakataka na nodra vakadikeva na iwalewale vovou oqo na vuniwai, ni sega wale ga ni yaga oqo vei ira na iVakadinadina i Jiova, e yaga sara tale ga vei ira na tani. “E sega wale ga ni muduka na kena dau soli na dra ena vuqa na kisi, na veisele e sega ni vakayagataki kina na dra e lailai sara tale ga na leqa e sotavi kina​—⁠se mani vakacava sara na kena lailai​—⁠ena kena rawa ni dewa na mate mai na dra e tauvimate tu,” e kaya na ivoladraudrau na Maclean’s. Ia na dra sara mada ga e “sega ni tauvimate,” e se leqataki ga ni rawa ni veitakavi kina na mate ena kena vakaleqai na nona immune system (itataqomaki ni yago) na tauvimate.

E yavutaki ena cava na dei ni nodra vakabauta na iVakadinadina i Jiova me baleta na veiqaravi vakavuniwai e sosomitaka na dra? Oni na taleitaka mo ni wilika na brochure How Can Blood Save Your Life? Era na marautaka na iVakadinadina i Jiova mera solia e dua me nomuni.