“Sa Rui Vinaka Vei Au o Jiova!”

ENA dua na yakavibogi totoka ni Maji 1985, era kauaitaka vakalevu kina na tagane kei na yalewa ena Tabana ni Volavola (Writing Department) ena nodra itikotiko liu na iVakadinadina i Jiova mai Niu Yoka e Mereke, na kena sauvi e dua na isausau vakasakiti. Oya, ena nona sa veiqaravi voli mai o Karl F. Klein ena cakacaka vakaitalatala vakatabakidua me 60 na yabaki. E kaya ena lomakatakata o Brother Klein: “Sa rui vinaka vei au o Jiova!” E kaya ni Same 37:4 e dua vei ira na tikinivolatabu e dau taleitaka vakalevu. E muri sa qai vakamarautaki ira kece ena nona vadiga na nona cello (vaiolini).

Ena 15 tale na yabaki e tarava, a cakacaka tiko ga ena tabana ni volavola o Brother Klein qai lewe tale ga ni iLawalawa Dauvakatulewa ni iVakadinadina i Jiova. Ena 3 Janueri, 2001, e yabaki 95 kina o Karl Klein, sa mai vakacegu vakadua ena nona ilesilesi e vuravura ena yalodina.

A sucu o Karl mai Jamani. Eratou qai toki na nona vuvale i Mereke, mani lai susu kina o Karl mai Chicago e Illinois. Ni rau se gone ga erau dau taleitaka dina na iVolatabu o Karl kei na tacina o Ted. A papitaiso o Karl ena 1918, qai veika vakasakiti e rogoca mai ena nodra soqo ni tikina na Gonevuli ni iVolatabu ena 1922 a uqeti koya me taleitaka kina na cakacaka vakaitalatala ena nona bula taucoko. E sega ni via calata na cakacaka vakavunau ena dua na macawa, e vakayacora sara tiko ga oqo ena iotioti ni vica na macawa ni nona bula.

A bau dua tale ga vei ira na cakacaka ena itikotiko liu ena 1925 o Karl, a cakacaka taumada ena vanua ni tabaivola. Dua na ka na nona dau taleitaka na ivakatagi, ena vica vata na yabaki e dau vadiga o koya na cello ena dua na matavakatagi e dau lai vakatagi tiko mai ena vale ni walesi ni isoqosoqo. Oti oya e lai cakacaka ena Tabana ni Veiqaravi (Service Department), a marautaka voli kina na veimaliwai kei koya e qarava tiko na tabana oya, o T. J. Sullivan. Donuya toka na gauna oya, a vakawati kina o Ted, rau lesi kei na watina o Doris me rau lai veiqaravi vakadaukaulotu e Puerto Rico.

Rauta ni 50 na yabaki a cakacaka voli kina o Karl Klein ena Tabana ni Volavola, sega ni tukuni rawa na nona yaga ina tabana oqo ni dau taleitaka me vakekeli qai buta vinaka tale ga ena iVolatabu. Ena 1963, rau vakamau kina o Karl kei Margareta, e dua na daukaulotu mai Jamani e veiqaravi voli e Bolivia. Ena nona dau veitokoni gona vakayalololoma o Margareta, vakabibi ni sa tautauvimate o watina, a se rawa ni cakacaka tiko ga kina o Karl, dina ni sa sivita mada ga na yabaki era dau vakacegu kina e vuqa. Na nona dau vosa vakadodonu o Karl, lako vata na nona dau mamarau ni daunivakatagi, e guiguilecavi dredre kina na nona ivunau ena veivavakoso kei na veisoqo ni tikina. Ena dua na gauna lekaleka ni bera ni mate, a liutaka o koya na kena dau veivosakitaki na tikinivolatabu ena vuvale levu e Peceli mai Niu Yoka. Era marautaka qai yaga tale ga vei ira kece.

Era le levu na dau wilika Na Vale ni Vakatawa era na nanuma na italanoa veivakauqeti ni veika a sotava ena nona bula o Brother Klein, a tabaki ena itabataba ni 1 Okotova, 1984. O na marautaka ke o wilika na italanoa oya, se mo wilika tale mada qai vakasamataka tiko ni o koya e volavola oqori a veiqaravi tiko me 15 tale na yabaki. E lotu Vakarisito yalodina qai vu mai lomana nona veiqaravi.

Me vaka ni o koya e dua na lumuti ni Turaga, a gadreva dina mai vu ni lomana o Brother Klein me na lai veiliutaki kei Karisito mai lomalagi. Eda vakabauta ni sa vakayacora o Jiova na gagadre oqori.​—Luke 22:28-30.

[iYaloyalo ena tabana e 31]

O Karl ena 1943 kei T. J. Sullivan kei rau o Ted kei Doris

[iYaloyalo ena tabana e 31]

O Karl kei Margareta, Okotova 2000