Taro na Dauwiliwili

Na gauna cava e lumuti kina “na Loqi Tabu Uasivi” me vaka e parofisaitaki tu ena Taniela 9:​24 (NW)?

Na parofisai ena Taniela 9:​24-​27 e baleta na nona basika na “Mesaia na Turaga”​—⁠na Karisito. Na kena sa parofisaitaki oti tu ni na lumuti “na Loqi Tabu Uasivi,” e sega ni vakaibalebaletaki ina lumuti ni Loqi Tabu Sara ni valenisoro mai Jerusalemi. Ia, na matavosa “na Loqi Tabu Uasivi” e vakaibalebaletaki ina itikotiko vakalomalagi ni Kalou​—⁠na Loqi Tabu Sara mai lomalagi​—⁠ena valenisoro levu vakayalo i Jiova.a​—⁠Iperiu 8:​1-5; 9:​2-​10, 23.

A tekivu vakayagataki ena gauna cava na valenisoro vakayalo ni Kalou? Meda raica mada na ka e yaco ni sa papitaiso o Jisu ena 29 S.K. Me vakatekivu mai na gauna oya, sa vakayacori kina vei Jisu na Same 40:​6-8. Sa qai mai vakamacalataka e muri na yapositolo o Paula ni a masulaka o Jisu vua na Kalou: “A i soro kei na i madrali ko ni sa sega ni vinakata, ia ko ni sa vakarautaka ga vei au na yago.” (Iperiu 10:​5, VV) E kila o Jisu ni “sa sega ni vinakata” na Kalou na isoro manumanu me vakacabori tiko ga ena valenisoro e Jerusalemi. Me kena isosomi, sa vakarautaka o Jiova na yago e uasivi me cabora o Jisu me isoro. E tomana o Jisu ni vakamacalataka mai vu ni lomana: “Raica, au sa lako mai, (au a volai e nai vola vivigi,) me’u cakava na ka ko sa vinakata, na Kalou.” (Iperiu 10:⁠7) E a ciqoma vakacava o Jiova? E tukuna na Kosipeli i Maciu: “Ia ni sa papitaisotaki oti ko Jisu sa cabe sara mai wai, ka raica, sa qai tadola mai na lomalagi, ka sa raica sara ko koya na Yalo ni Kalou ni sa lako sobu mai me vaka na ruve, ka mai ro toka vua. Sa qai rogo mai e dua na domo mai lomalagi, ka kaya, ‘Oqo na noqu Gone ni Toko, au sa dau vinakata vakalevu.’”​—⁠Maciu 3:​16, 17, VV.

Ni sa vakadonuya na Kalou o Jiova na vakacabori ni yago i Jisu me isoro, e kena ibalebale ni sa tauyavu kina e dua na icabocabonisoro e uasivita na icabocabonisoro vakayago ena valenisoro mai Jerusalemi. Na icabocabonisoro na “loma” ni Kalou, se dua na ituvatuvanaki me vakadonui kina na yago i Jisu vakatamata me isoro. (Iperiu 10:​10, NW) Ni sa lumuti o Jisu ena yalo tabu e vakaibalebaletaka ni sa tekivutaka na Kalou na nona ituvatuvanaki kece ni valenisoro vakayalo.b O koya gona, ena gauna ni papitaiso i Jisu, sa lumuti kina na itikotiko vakalomalagi ni Kalou, se sa wasei tani, “na Loqi Tabu Uasivi” ena ituvatuvanaki ni valenisoro levu vakayalo.

[iVakamacala e ra]

[iYaloyalo ena tabana e 27]

E a lumuti “na Loqi Tabu Uasivi” ena gauna a papitaiso kina o Jisu