Dei Cake Sara Mai na Koula Dina
DAU qarai vakalevu na koula baleta na totoka ni kena irairai, e dau dede tale ga. E taleitaki vakalevu baleta ni vaka me dau duadua tu ga na kena taliva kei na kena totoka. Na vuna baleta ni koula e vorata rawa na vakacaca ni wai, cagi, kei na sulifure, se cava tale e dau veivakacacani. Levu na iyaya koula era se taliva tu ga nira kune mai na irusarusa ni waqa era luvu tu kei na so tale na vanua, e dina ni sa sivi e vica vata na drau na yabaki.
Ia e kaya na iVolatabu ni tiko na ka e dei cake sara qai “talei vakalevu sara ka talei vakalailai na koula sa caca rawa ni sa vakatovolei e na bukawaqa.” (1 Pita 1:7) Na koula e “vakatovolei” se vakasavasavataki ena bukawaqa kei na so tale na kena icakacaka e rawa ni yacova na 99.9 na pasede na kena uasivi. Ia na koula sa vakasavasavataki e rawa ni rusa se waicala ni sota vata kei na wai e wakivata tu kina e tolu na ikava na hydrochloric acid kei na dua na ikava na nitric acid, na yaca ni wai oqo na aqua regia (royal water). E donu vinaka gona vakasaenisi na iVolatabu ni tukuna ni “koula sa caca rawa.”
Ia, ena yasana adua, na vakabauta dina vakarisito e ‘veivakabulai.’ (Iperiu 10:39) E rawata na tamata me vakamatea e dua e dei matua na nona vakabauta, me vaka a caka vei Jisu Karisito. Ia na vosa ni yalayala oqo e cavuti vei ira e dina na nodra vakabauta: “Dou gumatua mo dou yacova na mate, au na qai solia vei kemudou nai sala ni bula.” (Vakatakila 2:10) Na Kalou e nanumi ira vinaka tu na tamata yalodina era sa mate, ena vakaturi ira. (Joni 5:28, 29) Se mani levu vakacava na koula, ena sega ga ni rawata oya. E laurai gona ena tikina oqo ni vakabauta e talei cake sara mai na koula. Ia ena vinakati tale ga me vakadinadinataki se vakatovolei na vakabauta me qai kilai kina se talei dina se sega. A kaya o Pita ni ‘vakabauta sa vakatovolei’ e talei cake sara mai na koula. Era marau na iVakadinadina i Jiova mera vukei iko mo vulica na iVolatabu, mo tara cake kina me qai dei tiko ga na nomu vakabauta na Kalou o Jiova kei na Luvena o Jisu Karisito. A kaya o Jisu ni oqo na sala mo na rawata kina “na bula tawa mudu.”—Joni 17:3.