Na Cakacaka Vinaka e Vakalagilagia na Kalou
ERA vakalagilagia na Kalou na lotu Vakarisito dina ena nodra ivakarau kei na nodra cakacaka vinaka. (1 Pita 2:12, VV) E vakadinadinataki oqo ena ka e yaco mai Itali ena loma ni vica tiko ga na yabaki oqo.
Ena Sepiteba 1997, a kurea e so na yasa ni vanua o Marche kei Umbria e dua na uneune kaukaua, mani karusa kina e voleka ni 90,000 na vale. Era vukitotolo sara e so na ilawalawa iVakadinadina i Jiova ena nodra vukei ira era vakabauta vata kei ira tale ga na tani. Era vakarautaka na vale vaqiqi, iyaya ni moce, sitovu, idini livaliva, kei na levu tale na veika e gadrevi. Era sarasara na tani ena veivuke oqo.
E kaya na niusipepa na Il Centro: “Era liu sara ga ina vanua e vakacacani na iVakadinadina i Jiova e Roseto [ena yasana o Teramo], mera kauta kina na iyaya ni vakacoko . . . Era sotasota ena so na gauna mera masu vata, qai yaga na veivuke era solia na yalodina vei Jiova vei ira na vakaleqai, ra sega tale ga ni vakaduiduitaka na lotu.”
E Nocera Umbra, e dua vei ira na tauni e vakacacani sara vakalevu, e vola na kena turaganikoro vei ira na iVakadinadina i Jiova: “Au vakavinavinakataki kemuni vakalevu sara ena nomuni vukei ira na lewenivanua e Nocera. Au kila niu gusudra tale tiko ga na lewenitauni oqo.” Kuria oya, e solia na tabana e qaravi ira na lewenivanua ina Congregazione Cristiana dei Testimoni di Geova (iVavakoso Vakarisito ni iVakadinadina i Jiova) na sitivikiti ni vakavinavinaka kei na metali “me ivakadinadina ni nodra cakacaka kei na nodra gumatuataka na veivuke ena leqa tubukoso a yaco ena yasana o Umbria kei Marche.”
Ena Okotova 2000, a vakacaca e dua na waluvu levu ena yasayasa o Piedmont, ena vualiku kei Itali. Ra baci vukitotolo tale na iVakadinadina ena veivuke. Ra sarava tale na lewenivanua na veivuke. Ni lolomataka sara ga vei ira na iVakadinadina na yasana o Piedmont e dua na ivakananumi ni “cakacaka talei ni veivuke era cakava mera vukei kina na lewe i Piedmont era vakaleqai ena waluvu.”
A vakaroti ira na nona tisaipeli o Jisu Karisito: “Me cila vaka kina na nomudou rarama e matadra na tamata, me ra raica rawa na nomudou cakacaka vinaka, ka vakarokorokotaka na Tamamudou sa tiko mai lomalagi.” (Maciu 5:16, VV) Era sega ni via vakalagilagi ira ga na iVakadinadina i Jiova, ia era marautaka mera vakalagilagia na Kalou ena nodra “cakacaka vinaka” mera vukei kina na tiko tikivi ira, vakayalo se ena so tale na sala.