Taro na Dauwiliwili

Era vauci vakacava na lotu Vakarisito nikua ena lawa ni veiwatini vakaveiwekani e koto ena Lawa i Mosese?

E sega ni vakamatatataki sara ena Lawa e solia o Jiova ina matanitu o Isireli na vakamau kei na kena icakacaka. Ia e vakatabuya e so na vakawati. Me kena ivakaraitaki, ena Vunau ni Soro 18:​6-​20, e vakaraitaki kina na vakatatabu vei ira era “veiwekani dina.” E vakamatatataka na tikina oqo ni o ira na veiwekani mera kua ni veiyacovi. O keda na lotu Vakarisito eda sega ni vauci ena Lawa i Mosese se kena ivakavuvuli. (Efeso 2:​15; Kolosa 2:​14) Ia e sega ni kena ibalebale qo ni na lewa ga na lotu Vakarisito se o cei me vakamautaka. E tiko e so na vuna e vaka kina oqo.

Kena imatai, e tiko na lawa ni matanitu ni noda dui vanua e vakatabuya na vakamau vei ira na veiwekani voleka, ra qai vakaroti na lotu Vakarisito mera muria na lawa ni nodra vanua. (Maciu 22:21; Roma 13:​1, VV) E duidui na lawa vaka oqo e veivanua. Levu na lawa vovou oqo era yavutaki ena bula ni tamata. E dinataki ni vakamau vakaveiwekani voleka era na bulicaki vakaca qai tauvimate kina na gone ke rau vakaluveni. Ena vuku ni ka oqo kei na nodra “talairawarawa . . . vei ira era veiliutaki,” na lotu Vakarisito era via vakamau mera na muria na lawa ni vakamau ni nodra vanua.

Sa qai tiko na ka e vakatarai kei na ka e sega ni vakatarai ena noda dui itikotiko. Voleka ni vanua kece e tiko kina na ivakavuvuli e vakatabuya na vakamau vakadra vata, e raici oqo me cala qai tabu. Ena rairai duidui vakalevu na vakatatabu me baleta nodrau tiko vata e rua ena duidui vanua, “ia na veivolekati ga ni nodrau veiwekani e rua, na kaukaua tale ga ni kena vakatabui me rau veiyacovi,” e kaya na Encyclopædia Britannica. Ke sega mada ga ni vakayacori na ka cala, era na sega ni via vakalecalecava na lotu Vakarisito na lawa kei na ivakavuvuli ni nodra vanua mera kua ni vakarogorogocataka kina na ivavakoso vakarisito se yaca ni Kalou.​—2 Korinica 6:3.

Me kua ni raibaleti na noda lewaeloma soli vakalou. Tamata kece era sucu mai sa rawa vei ira mera liaca na ka e cala kei na ka e donu, na ka e vinaka kei na ka e ca. (Roma 2:​15) E tukuna vei ira nodra lewaeloma na ka e dodonu mai na ka e vakatabui, vakavo ga ke sa mate tu nira dau cakava na ka ca. E vakaibalebaletaka na ka oqo o Jiova ni solia vei ira na Isireli na lawa e vakatabui kina na veiwatini vakaveiwekani voleka. Eda wilika: “Mo dou kakua ni muria nai valavala ni vanua ko Ijipita, dou a tiko kina: kei nai valavala ni vanua ko Kenani, ka’u sa kauti kemudou kina, mo dou kakua ni muria; ia mo dou kakua ni muria na nodra vunau.” (Vunau ni Soro 18:3) Era vakamareqeta na lotu Vakarisito nodra lewaeloma e yavutaki vakaivolatabu ra qai sega ni vinakata me vakacacani ena ivakarau ni nodra raica na veimatanitu na ka e dodonu kei na ka e cala.​—Efeso 4:​17-​19.

Na cava gona eda rawa ni tinimaka? Nira sega ni vauci na lotu Vakarisito ena Lawa i Mosese, e tukuna vakamatata ga vei ira nodra lewaeloma ni veiwatini vakaveiwekani voleka me vaka na tama kei luvena yalewa, tina kei na luvena tagane, kei rau na veiganeni e vakatabui vei ira na lotu Vakarisito.a Ni sa tete na veiwekani vakadra, era kila na lotu Vakarisito ni tiko na lawa kei na ivakavuvuli ni vakamau kei na ivakatagedegede e vakadonui ena noda dui vanua. Me dikevi vakabibi na tikina oqo me rawa nida muria kina na ivakaro vakaivolatabu: “Sa dodonu mo ni doka taucoko na tiko vakawati.”​—Iperiu 13:​4, VV.

[iVakamacala e ra]