Era Vuku Tale ga na Gone

E KAYA e dua na vosa vakaibalebale ni Nigeria: “Era vuku na uabula, ia era vuku tale ga na gone.” A vakadinata oqo o Edwin, e dua na qase ni ivavakoso vakarisito mai Nigeria.

Dua na siga, a kunea o Edwin e dua na kisi kaukamea lailai ena ruku ni nona desi mai vale.

“Na nei cei qo?” a tarogi iratou na le tolu na luvena o Edwin.

“Na noqu,” a sauma mai o Emmanuel, yabaki walu. Totolo sara nona tomana ni kisi kaukamea oya, e 12 ga na sedimita qai sa umea tu, e nona kisi ni cau ina cakacaka ni iVakadinadina i Jiova e vuravura raraba. “Au sega ni lako e veisiga ina Kingdom Hall,” e vakamacalataka, “au mani nanuma kina me dua na noqu kisi meu biuta kina na ivoli ni kequ kakana mamada keu sega ni vakayagataka.”

A dua tale ga na kisi ni sede i tama i Emmanuel e vale, me ka ni nodratou ilakolako ina soqo ni tikina e dau vakayacori e veiyabaki. Ia ni yaco na leqa tawanamaki e vale, sa vakayagataki tale kina na ilavo oya. Me kua ni vakayagataki ena dua tani tale na inaki na nona cau, a kauta kina o Emmanuel vua na dautukikaukamea e dua na kava makawa me lai tukia. Ni rogoca na turaga dautukikaukamea na inaki ni kava, sa qai vakayagataka na tikitiki ni kaukamea me tukia kina e dua na kisi lailai. A kerea na taci Emmanuel o Michael, yabaki lima, me dua tale ga na nona kisi.

A kurabuitaka o Edwin na ka eratou cakava na veitacini, mani tarogi iratou kina se cava na inaki ni nodratou kisi. A sauma o Michael: “Au via cau!”

Erau sega ni kila na nodratou itubutubu, ni ratou dau maroroya o Emmanuel, Michael, kei Uchei, na ganedrau yabaki ciwa, e dua na iwase ni ivoli ni kedratou vakasigalevu me ratou biuta ena nodratou kisi. Eratou vulica mai vei? Na gauna ga eratou sa qumia rawa kina na ilavo, sa tekivu vakavulici iratou na nodratou itubutubu me ratou biuta na ilavo ena kato ni cau ena Kingdom Hall. E laurai ni ratou bulataka sara ga na ka eratou vakavulici kina.

A dolavi na kisi ni sa sinai. Na isoqoni ni ilavo maroroi e $3.13 na ilavo ni Mereke​—e dua na uma ilavo levu me vakatauvatani kei na nodratou vanua, ni dau vica ga na drau na dola na kedra isau na tamata cakacaka ena dua na yabaki. Na cau vaka oqo e sa tokoni sara tiko ga kina na nodra cakacaka vakavunau na iVakadinadina i Jiova ena 235 na veivanua e vuravura raraba.