Mo Dau Yalorawarawa tu Beka Ga?

SEGA ni vakatitiqataki ni vuqa era na kaya ni dua na ka vakasakiti ke da kilai nida tamata rawarawa, e dua e dau maravu na lomana, sega ni dau yalolekaleka, se matacati ira na tani. Ia e tiko e dua tale na yasana me vakasamataki, oya, ni rawa ni sivia tale na yalorawarawa. E kaya kina na iVolatabu: “Na nodra sautu [se, “yalorawarawa,” NW] na lialia era na rusa kina.” (Vosa Vakaibalebale 1:​32) Na cava e kena ibalebale?

E so na ivakadewa ni iVolatabu era vakadewataka na kena vosa taumada vakaiperiu me “lomawele” (American Standard Version), “cata ni yavalati” (The New American Bible), kei na “vakawelewele.” (The New English Bible) E semata gona na yalorawarawa ina vucesa kei na sakasaka, e tiko kina na vakasama ni yalowai se lialia.

Ena imatai ni senitiuri, era sega ni kauai qai sivia na nodra weletaka na nodra malumalumu vakayalo na lotu Vakarisito ena ivavakoso mai Leotisea. Era cibitaka ni ‘sega na nodra leqa,’ me kua gona nira yavalati. Ia a vakasalataki ira o Jisu Karisito mera yavala, mera vakabulabulataka tale na nodra gugumatua vakarisito.​—Vakatakila 3:​14-​19, VV.

Era kilaitani tale ga na tamata ena gauna i Noa ena nodra vakawelewele. Era ogataka ga na ka ni bula ni veisiga, era “kana . . . , ka gunu, ka vakawati ka veimusumusuki me ra vakawati . . . , era sega voli ga ni kila me yacova ni sa qai yaco sara na waluvu ka carai ira kece yani.” A tomana o Jisu ena nona kaya: “E na vaka tale ga kina na nona [“tiko,” NW] . . . na Luve ni Tamata.”​—Maciu 24:​37-​39, VV.

Era sa vakayacori na parofisai vakaivolatabu e dusia nida sa donuya tu oqo na nona “tiko na Luve ni Tamata,” o Jisu Karisito. Me kua mada ga nida vakawelewele se lomawele, da qai cata ni yavalati​—se meda yalorawarawa vakasivia.​—Luke 21:​29-​36.