iVakananumi ni Nodratou Vakamatei na iVakadinadina i Jiova

ENA 7 Maji, 2002, a cereki e dua na vatu ni ivakananumi ena tauni o Körmend, ena ra kei Hungary. E kedratou ivakananumi na tolu na iVakadinadina i Jiova eratou a mate ena ligadra na ito i Itala ena 1945.

E vakabiri toka na ivakananumi oqo ena lalaga ni vale sa vakayagataki tiko nikua me itikotiko liu ni bokobuka ena basoga ni sala na Hunyadi Road, na vanua a yaco kina na veivakamatei. E kedratou ivakananumi ‘na lotu Vakarisito eratou a vakamatei ni ratou sega ni via curu ena mataivalu ena Maji 1945. O Antal Hőnisch (1911-​1945), Bertalan Szabó (1921-​1945), kei János Zsondor (1923-​1945), eratou iVakadinadina i Jiova, 2002.’

Na veivakamatei oya a yaco ni vo ga e rua na vula me cava na iKarua ni iValu Levu. Na cava eratou vakamatei kina na lotu Vakarisito oya? Vakamacalataka na niusipepa ni Hungary na Vas Népe: “Ni taura o Itala na veiliutaki e Jamani, a vakamuai vakatabakidua na veivakacacani kei na veivakararawataki vei ira na Jiu kei ira na iVakadinadina i Jiova yalodina. Ra kolotaki ina keba ni veivakararawataki, ra vakamatei sara mada ga nira sega ni via cakitaka na nodra lotu. . . . Ena Maji 1945, e sega ni tukuni rawa na vakadomobula ni veivakararawataki a yaco ena ra kei Hungary. . . . Dua na kena inaki levu, oya mera vakau tani se ra vakamatei na iVakadinadina i Jiova.”

Na porokaramu e vauca na cereki ni vatu ni ivakananumi a wasei vakarua. A tekivu ena nodra vosa taumada na digitaki ena rumu ni vakatasuasua ni vale vakaturaga na Batthyány Castle. O ira na vosa e okati kina o Parofesa Szabolcs Szita, na iliuliu ni Holocaust Documentation Center e Budapest; o László Donáth, na lewe ni komiti ni palimedi e dau valataka na dodonu ni tamata yadua, ni matailawalawa lalai kei na lotu; kei Kálmán Komjáthy, a raica na nodratou vakamatei na lewe tolu oya, nikua sa dua na daunivakamacala me baleta na itukutuku makawa ni tauni o Körmend. Ni oti kece na vosa, era sa qai taubale kosova na loma ni tauni na sivia na lewe 500 na sureti me baleta na ikarua ni iwase ni porokaramu​—me lai cereka o Turaganikoro József Honfi na vatu ni ivakananumi.

Ena nona ivola ni vakamoce o Ján Žondor (János Zsondor), a uqeti ira kina na tacina lotu Vakarisito mera kua ni lolosi ena vukuna. A vola: “Au nanuma vinaka tu oqo na vosa i Joni ena Vakatakila 2:​10: ‘Dou gumatua mo dou yacova na mate.’ . . . Me qai tukuni vei iratou e vale kei ira na taciqu ena ivavakoso mera kua ni lolosi, niu na mate ena vuku ni ka dina, e sega ni baleta niu cakacala.”

[iYaloyalo ena tabana e 32]

Bertalan Szabó

[iYaloyalo ena tabana e 32]

Antal Hőnisch

[iYaloyalo ena tabana e 32]

Ján Žondor