“Rau Tukituki ena Neirau Matanikatuba”

“RUA na yabaki mosimosi dina vei keirau sa sivi qo, ni takali kina na neirau goneyalewa lomani.” Oqori na itekitekivu ni ivakamacala ni dua na niusiveva, na yacana na Le Progrès, e tabaki mai Saint-Étienne, Varanise.

“E tauvi Mélissa e dua na mate levu ni se qai vula tolu ga, na yacana na trisomy 18. Sa bau ca dina ni tarai keirau na leqa levu oqo, qai mavumavu dredre na kena mavoa. Keirau susugi ena vakabauta ni lotu Katolika, ia e sega ni cegu na neirau dau vakataroga lo ‘Ke bula tiko na Kalou, na cava e vakatara kina na leqa va qo?’” Macala i ke ni o koya na tina e vola na ivola oya e vusolo qai veilecayaki vakalevu na lomana. Kaya tale na nona ivola:

“Oti ga na veika oqo, rau tukituki e rua ena neirau matanikatuba. Au rai ga, au kila sara ni rau iVakadinadina i Jiova. Niu vakarau kaya vakamalua niu na sega ni vakarorogo, au raica sara na ivola e tiko e ligadrau. E vakamacalataka na vuna e vakatara kina na veika rarawa na Kalou. Au mani nanuma meu sa vakarogoci rau mada ga, ia e noqu inaki meu vakalasui rau. Vei au mada ga, sa rauti keitou vinaka vakavuvale na levu ni rarawa keitou sa sotava. Me icavai vei keitou na vosa sa madra na kena rogoci me vaka oqo, ‘Isa, sa kauti koya lesu na Kalou me vaka ga ni a soli koya vei kemudou.’ Sivia vakalailai na dua na aua na neitou veitalanoa kei rau na iVakadinadina i Jiova oya. Dua na vakacegu levu au vakila ni rau dabe toka ga rau qai vakarogoci au matua, ia ni rau sa biubiu, au vakadonuya sara me keitou na qai veivosaki tale. Sa sivi oqo e rua na yabaki mai na gauna keitou a veivosaki kina oya. Au se sega ni tavuki meu iVakadinadina i Jiova, ia au sa vuli iVolatabu tiko kei ira, au qai saga meu dau tiko wasoma ena nodra soqoni vakalotu.”