Na Sokalou Dina e Vakaduavatataka na Vuvale
E SE qai yabaki 13 o Maria ena gauna erau rogoca vata kina kei tacina o Lucy, na veika baleti Jiova kei na inuinui ena Parataisi e vuravura ni vakamacalataka tiko nodrau momo. Ni rau taleitaka rau mani tomani koya sara ina nodra Kingdom Hall na iVakadinadina i Jiova. E kurabuitaka o Maria na ivakamacala matata a soli mai kina. E duidui sara mai na nodratou valenilotu ni dau levu ga kina na lagasere! Rau sa makutu sara ga na vulica na iVolatabu kei na dua na iVakadinadina i Jiova.
Na ganedrau o Hugo, e taleitaka vakalevu na vuku vakavuravura kei na bula vakaidewadewa. E sega ni vakabauta na Kalou. Ia, ena gauna e curu tu kina ena mataivalu, a wilika na ivola Life—How Did It Get Here? By Evolution or by Creation? E kunea kina na isaunitaro e sega tale ni dua na lotu e rawa ni sauma. Ni oti nona veiqaravi ena mataivalu e via vaqaqacotaka nona vakabauta vou, me kila na Kalou ena nona vulica na iVolatabu qai tomani rau na ganena ina soqoni vakarisito. Rau papitaiso o Maria kei Lucy ena 1992 ni oti e rua na yabaki nodrau rogoca na ka dina, a papitaiso tale ga na ganedrau ni oti tale e rua na yabaki.
Ia, erau dei tu ga ena ivakavuvuli ni lotu Katolika na nodratou itubutubu rau qai sega ni bau kauai ena ka dina vakaivolatabu. Erau nanuma nira dau veivakasosataki na iVakadinadina i Jiova dina ga ni rau taleitaka na nodra itovo kei na isulusulu na iVakadinadina itabagone eratou dau sureta yani i vale na luvedrau. Na nodratou dau veitalanoataka tale ga na gone ena gauna ni kana na veika vinaka eratou vulica ena soqoni e vakavuna nodrau vila kila na itubutubu e levu tale na ka.
Ia, erau se dau vakadraunikau tiko ga na itubutubu. E dau mateni o tamadratou qai dau mokuti tinadratou. Na nodratou bula vakavuvale e sa vovoleka sara tiko ga ni kavoro. E qai curu i valeniveivesu me macawa rua o tamadratou ena vuku ni nona ivalavala ni dau mateni. Sa tekivu wilika ena gauna oya na iVolatabu. A wilika na vosa i Jisu me baleta na ivakatakilakila ni iotioti ni veisiga. E vakavuna sara ga nodrau lomatarotaro, rau mani gole kina vakaveiwatini ina Kingdom Hall rau qai ciqoma na veisureti ni vuli iVolatabu. Ni rau sa mai kila na ka dina, rau vakama taucoko na nodrau ivola ni vakadraunikau rau qai vakabulai mai na veivakalolomataki ni tevoro ni rau dau masuta na yaca i Jiova. E levu tale ga na veisau erau vakayacora ena nodrau ivakarau ni bula.
Vakasamataka mada na nodrau luluvu o Maria kei Lucy ena gauna e papitaisotaki nodratou itubutubu kina na ganedrau o Hugo ena dua na soqo ni tikina mai Bolivia ena 1999! Sa oti oqo e rauta ni ciwa na yabaki nodrau rogoca ena imatai ni gauna o Maria kei Lucy na veika me baleti Jiova kei na nona yalayala. Eratou sa cakacaka tiko vakaitalatala vakatabakidua na veiganeni ena gauna oqo. Dua na ka nodratou marautaka ni vakaduavatataka nodratou vuvale na sokalou dina!