Taro na Dauwiliwili
Na cava na papitaiso ena vukudra na mate?
Nona volavola tiko na yapositolo o Paula me baleta na veivakaturi i lomalagi, a vola e dua na tikina e vakavure vakasama. Ena iVolatabu Vakaviti, e tukuni kina: “Era na vakaevei ko ira sa papitaisotaki e na vukudra na mate? kevaka sa sega sara ni tu cake tale ko ira na mate, a cava era sa papitaisotaki kina e na vukudra na mate?” E dua tale na ivakadewa ni iVolatabu Vakaviti na Vakavakadewa Vou, e vakadewataka na tikinivolatabu oqo me: “A cava era na cakava ko ira era papitaisotaki e na vukudra na mate? Kevaka era na sega ni vakaturi cake tale na mate, na cava era papitaisotaki kina na tamata e na vukudra?”—1 Korinica 15:29.
E vakaibalebaletaka tiko beka e ke o Paula mera papitaiso na bula ena vukudra na mate era se bera ni papitaiso? Ena vaka beka oqori na kena ibalebale ena ivakadewa oqo vaka kina ena so tani tale na ivakadewa ni iVolatabu. Ia, nida dikeva vakavinaka na iVolatabu kei na vosa vakirisi taumada e vakayagataka e ke o Paula, e dusia ni sega ni vaka oqori na kena ibalebale. Ia, na ka e vakaibalebaletaka o Paula ni o ira na lotu Vakarisito lumuti era papitaiso, se tabadromuci, ina dua na ivakarau ni bula era na lai tini mate kina ena yalodina me vakataki Karisito. Oti, era na qai vakaturi ina bula vakayalo me vakataki Karisito ga.
E tokona na vakasama oqori na iVolatabu. Ena nona ivola vei ira mai Roma, a kaya o Paula: “Dou sa sega beka ni kila, koi keda kece sa papitaisotaki vei Jisu Karisito, eda sa papitaisotaki ki na nona mate?” (Roma 6:3) Ena nona ivola vei ira mai Filipai, a tukuna o Paula me baleti koya: “Me’u vakaivotavota e na nona rarawa [o Karisito] ka vakataki koya e na nona mate, me’u bau rawata tale ga na tu cake tale mai na mate.” (Filipai 3:10, 11, VV) E tukuna e ke o Paula ni nona bula e dua na imuri lumuti i Karisito ena okati kina na nona yalodina tiko ga ni vakatovolei, ni sotava e veisiga na ituvaki e rawa ni mate kina, qai kena itinitini ena rawa ni mate sara mada ga ena vuku ni nona yalodina, sa na qai vakaturi ena bula vakalomalagi.
Ia, me nanumi ni tikina oqo kei na veitikinivolatabu tale e so e sema vata na mate kei ira sa papitaiso, e vakaibalebaletaki ira na tamata bula papitaiso oti, sega ni o ira na mate. O Paula a tukuna tale ga vei ira na nona itokani lotu Vakarisito lumuti: “Ni dou a bulu vata kaya e na papitaiso: o koya talega dou sa tu cake tale kaya ni dou sa vakabauta na kaukauwa ni Kalou, o koya sa vakaturi koya cake tale mai na mate.”—Kolosa 2:12.
Na vosa vakirisi na hy·perʹ, e vakadewataki “ena vukudra” ena levu na ivakadewa ni iVolatabu ena 1 Korinica 15:29, e rawa ni kena ibalebale tale ga “ena inaki.” Me salavata kei na so tani tale na tikinivolatabu, e vakadewataka donu kina na tikina oqo na New World Translation of the Holy Scriptures: “Na cava era na cakava o ira era papitaisotaki ena inaki mera mate kina? Ke ra sega ni vakaturi cake tale na mate, na cava era papitaisotaki kina ena inaki oya?”