O ‘Tekea Tiko Beka na Matanimoto’?
ENA gauna vakaivolatabu, e dau vakayagataki e dua na tolonikau balavu e tuki ena muana e liu na kaukamea momoto me usoraki kina na bulumakau ni siviyara. Na cava ena yaco ke cata na manumanu ni usoki tiko ena ka e vakatoka na iVolatabu me matanimoto qai tekea tani tiko? Ena vakararawataki koya ga.
A tukuna na matanimoto vaka oqo o Jisu Karisito ena gauna sa vakaturi oti kina, qai rairai vei Saula ni se qai lako tiko me lai vesuki ira e so na tisaipeli i Jisu. A rogoca o Saula ni kaya tiko mai o Jisu ena dua na rarama e remoremo: “I Saula, I Saula! A cava ko vakacacani au tiko kina? Me vaka ni na mavoa na manumanu e tekea na matanimoto, na kena i uso, e na vaka tale ga kina vei iko; na levu ga ni nomu vakacacani au, na levu ni nomu mavoa!” Ena nona vakacacani ira na lotu Vakarisito o Saula e sa veivala sara tiko ga kina kei na Kalou, ke tomana tiko oya ena leqa ga kina.—Cakacaka 26:14, VV.
Eda vaka tale beka ga oya, eda sega ni nakita na noda sa “tekea [tiko] na matanimoto”? Na iVolatabu e vakatautauvatataka na “vosa ni vuku” ina matanimoto, ni rawa ni keda iuso me vakadodonutaka na noda ilakolako. (Dauvunau 12:11) Ke da vakalaiva, ena rawa sara ga ni veiuqeti qai dusimaki keda vakadodonu na ivakasala ena Vosa ni Kalou. (2 Timoci 3:16) Ke da tekea tani tiko eda na rawa ga ni leqa kina.
E taura vakabibi o Saula na vosa i Jisu, e veisautaka nona itovo ni bula, qai yaco me o Paula—e dua na yapositolo lotu Vakarisito daulomani. Ena tawamudu tale ga noda vakalougatataki ke da muria na ivakasala vakalou.—Vosa Vakaibalebale 3:1-6.
[iTaba ni Credit Line ena tabana e 32]
L. Chapons/Illustrirte Familien-Bibel nach der deutschen Uebersetzung Dr. Martin Luthers