E Rawa Beka ni Bula na Tauvimate ena Nona Vakabauta?

NIDA tauvimate, e macala ga nida na saga meda vakacegui mai na mosi eda sotava, meda sereki mai na ivau ni mate. Sega ni vakabekataki ni o kila na ka e kaya na iVolatabu me baleti Jisu Karisito, ena nona a vakabulai ira wasoma na tauvimate mai na veimataqali mate a tauvi ira, ra vakacegui kina mai na kedra mate. Ia, a rawa vakacava na veivakabulai oya? “E na kaukauwa levu ni Kalou,” e kaya na iVolatabu. (Luke 9:42, 43; Cakacaka 19:11, 12) O koya gona, e vu ni veivakabulai na yalo tabu ni Kalou, e sega ni nona vakabauta ga o koya e tauvimate. (Cakacaka 28:7-9) Sa rauta me sega ni dau kaya vei ira na tauvimate o Jisu mera vakatusa e liu na nodra vakabauti koya, ni vakatau kina na nodra vakabulai.

O na vaqaqa beka: ‘E ka beka ga ni gauna makawa na veivakabulai vakacakamana, se na tokaruataki tale na kena mataqali a cakava o Jisu? Na cava e rawa nira nuitaka o ira e mosimosi se bibi sara na kedra mate qai sega na kena iwali ena gauna oqo?’

E vakamacalataka na iVolatabu ni vuravura vou ni yalododonu ni Kalou, ena baci yavala tale kina na kaukaua ni Kalou me tokaruataki na veivakabulai vakacakamana a cakava o Jisu ni se bula voli e vuravura. Era na marau gona na iVakadinadina i Jiova era tiko volekati kemuni mera vakaraitaka na sala, vaka kina na gauna ena vakayacora kina na Kalou na ka e sega ni rawa me cakava e dua na dau veivakabulai​—⁠oya me muduka na veimataqali tauvimate qai vakawabokotaka na mate. Io na Kalou ga “ena vakaotia sara na mate.”​—Aisea 25:8.