Sala me Dede Qai Marautaki Kina na Bula

SEGA ni dua e via gone tu ga; ia e sega tale ga ni dua e via qase. Levu era voleka ni yacova na yabaki mera cegu kina mai na nodra cakacaka, era vakanamata me levu nodra gauna ena veika me baleti ira qai lailai na nodra itavi. Ia era leqataka de na sega ni vakainaki se tawayaga nodra bula. Era leqataka tale ga nira na tu duadua ga, era na sega ni mamarau, qai malumu sobu tiko ga na ituvaki ni nodra bula.

Ena rawati vakacava na bula marau? Na veitokani vinaka kei na vuvale dau loloma e vukea na nodra marau na qase kei na gone. Ia e sega ni bibi wale ga na veika era cakava e so vua e dua e sa qase. O koya e bibi cake sara na veika e rawa ni cakava o koya e qase vei ira tale e so.

E dua na gauna balavu era vakadikevi tiko kina e 423 na veiwatini era sa qase. E laurai kina ni “noda vukea nodra bula e so tale ena vakadedetaka sara mada ga na noda bula.” A kaya o Stephanie Brown, e liutaka na vakadidike oqo: “Na veika e laurai oqo e vakaraitaka ni sega ni yaga na veika eda rawata mai na noda veiwekani kei ira tale na so; e yaga ga na veika eda solia.” Na solika vaka oqo e rawa ni wili kina noda vukei ira tale e so ena cakacaka e vale, qaravi ni gone, lakovi ni veika e vinakati, vakarautaki ni sala ni veilakoyaki, se nona rogoci e dua e via tukuna na lomana.

A kaya o Jisu Karisito ena rauta ni 2,000 na yabaki sa oti: “A ka ni veivakalougatataki vakalevu me soli ka, ka vakalailai ga me taura na ka.” (Cakacaka 20:35) Na sala me dede qai marautaki kina na bula e sega ni vakatau ena levu ni ilavo e tiko ena akaude ena baqe, se na veiqaravi vakavuniwai me valuti kina na qase kei na kanamusu. E vakatau ena nona ogaoga tiko ga e dua kei na nona solia nona gauna, kaukaua, kei na igu me vakavinakataka kina nodra bula e so tale.

Ia na noda solika ena sega ni tarova noda qase, tautauvimate, kei na noda mate. Na Matanitu ni Kalou ga ena qai vakaotia vakadua na veika vaka oqori. Ena ruku ni kena veiliutaki, sa na oti na tauvimate “ka sa na sega tale na mate.” (Vakatakila 21:​3, 4; Aisea 33:24) Io, o ira na tamata talairawarawa era na bula tawamudu ena mamarau ena vuravura parataisi. (Luke 23:43) Era reki na iVakadinadina i Jiova ni rawa mera wasea vei ira tale e so na sala vakaivolatabu oqo me dede qai marautaki kina na bula.