“Keirau a Vakayacora Vaka Kina!”
WALE tiko ga oqo a ciqoma na valenivolavola ni tabana ni iVakadinadina i Jiova e Nigeria e dua na ivola. Oqo e vica na ka e tukuni kina:
“Na luve i keirau tagane, o Anderson, e mate ni se qai yabaki 14. A susuga voli e rua na luvenitoa. A vinakata me volitaka qai vakauta na kena isau ina valenivolavola ni tabana me nona cau ina cakacaka vakavunau e sa vakayacori tiko ena veiyasa i vuravura. Ia e mani leqa koso ni se bera ni rau volitaki.
“Keirau sa kila tiko na nona itubutubu na inaki ni nona susuga na luvenitoa, keirau mani susuga qai volitaka. Keirau sa vakauta tiko yani oqori na ilavo, e nona cau o Anderson. Ena vuku ni vosa ni yalayala i Jiova, keirau vakadeitaka ni na sega ni dede—wale tiko ga oqo—keirau na raici Anderson tale. Keirau vinakata ena gauna ena tarogi keirau kina se keirau a vakayacora na inaki ni lomana se sega, me keirau tukuna vua ni ‘Keirau a vakayacora vaka kina!’ Keirau vakanamata dina tu me keirau na raici Anderson kei ira tale ga na ‘ilala ivakadinadina levu’ era na vakaturi mai.”—Iperiu 12:1; Joni 5:28, 29.
Me vaka ga e tukuni ena ivola mai cake, e veivakayaloqaqataki vei ira na lotu Vakarisito dina na nodra vakabauta na inuinui ni veivakaturi. Sa na dua dina na gauna marautaki vei ira e vica vata na milioni na vuvale, me vakataki rau ga na itubutubu i Anderson, mera kidavaki ira tale na wekadra voleka era sa mate!—1 Korinica 15:24-26.
E dulaki tu ena Vosa ni Kalou na inuinui veivakacegui oqo ni veivakaturi, e dua vei ira na veika totoka sa voleka ni vakilai ena vuravura vou ni yalododonu ena ruku ni veiliutaki ni Matanitu ni Kalou. (2 Pita 3:13) Ni vakamacalataka tiko na veika ena cakava na Kalou vei ira na tamata ena gauna oqori, e tukuna kina na iVolatabu: “E na tavoya tani na wai ni mata kece ga mai na matadra ko koya, ka sa na sega tale na mate; sa na sega tale ga na rarawa se na tagi se na vutugu, ni ra sa takali tani na veika makawa.”—Vakatakila 21:4, VV.