‘Au Vakavinavinaka Niu Rawa ni Vuli Kina’

AKURABUI na goneyalewa o Kazuna ni vakatura o nona qasenivuli me curu ena dua na veisisivi vosa vakavalagi. E dola na veisisivi oqo ena vualiku kei Japani, ena koronivuli kece ni sekeneri ni yanuyanu levu o Hokkaido. Ia a se sega ni bau curu ena veisisivi vaka oqo e dua na gonevuli ena koronivuli nei Kazuna. Ena siga ni veisisivi a taqaya vakalevu o Kazuna, baleta ena veisisivi tiko kei ira e rauta ni 50 tale na gonevuli. Sa qai kuria ga nona taqaya ni raica e rua na turaganilewa ni veisisivi ni rau turaga ni valagi.

Ni tekivu kacivaki o cei e qaqa ena veisisivi, a kacivaki e liu o koya e taura na iotioti ni icovi. Na gauna e qai kacivaki kina na yaca i Kazuna, dua na ka na nona kidacala. Rau veiraici ena levu ni nodrau kurabui kei nona qasenivuli a dabe tikivi koya toka. Sega vakadua ni vakabauta o Kazuna na ka e yaco oya, ia sa mani gole cake ga vakamalua ena buturara me lai taura na nona icovi​​—⁠oya na imatai ni icovi!

“E rawa ga oqo ena vuku ni veivakavulici e vakarautaka na isoqosoqo i Jiova ena Koronivuli ni Vuli Vunau,” e vakamacalataka ena marau o Kazuna. “Au vakavinavinakataka vakalevu niu rawa ni vuli kina.” Ni se goneyalewa lailai o Kazuna, a curu ina Koronivuli ni Vuli Vunau, oqo e dua na soqoni vakaivavakoso ni iVakadinadina i Jiova. Ni vakavakarau tiko o Kazuna ena veisisivi vosa oya, a vakatovotovotaka tale tiko ga na kena vakayagataki na gusunivosa, me bulabula qai laurai ni tarai koya na ka e tukuna, me matanataka na nona vosa, raici ira na vakarorogo, kei na so tale na iwalewale e vakavulici ena Koronivuli ni Vuli Vunau.

Oni sureti mo ni mai dikeva na kena vakayacori na vuli oqo e veimacawa ena Kingdom Hall ni iVakadinadina i Jiova ena nomuni yasayasa. E rawa ni oni vakadinadinataka kina ni yaga vei ira na qase kei na gone. Na vuli oqo e dola raraba. Ke oni via kila na vanua ni vuli e voleka vei kemuni, mo ni qai veitaratara kei ira na iVakadinadina i Jiova ena nomuni yasayasa.