“Dou Yadra Tiko”

ENA gauna makawa sara, era dau yadra na ivakatawa ena matamata ni koro kei na matamata ni valenilotu, so tale na gauna era dau yadra tu ena matanikatuba ni vale vakaitaukei. E sega ni nodra itavi ga mera sogota vinaka kece na matamata ena bogi, ia e nodra itavi tale ga mera na yadra tiko. E itavi bibi dina oqo baleta ni vakatautaki sara ga vei ira na nodra taqomaki na lewenikoro, ni dodonu mera na solia na ivakaro ke sa vakarau yaco e dua na leqa.

E kila vinaka o Jisu Karisito na nodra itavi na ivakatawa era dau yadra ena matamata ni koro, era kilai tale ga mera ivakatawa ni katuba. Dua na gauna a bau vakatauvatani ira sara ga nona tisaipeli mera ivakatawa ni katuba qai uqeti ira mera yadra tiko, ni sa voleka ni cava na ituvaki vakajiu. E kaya: “Dou qarauni kemudou vinaka, dou yadra tiko ka masu; ni dou sa sega ni kila na kena gauna. Sa vaka e dua na tamata e vakarau lako e na dua na i lakolako. . . . A sa vakarota na i vakatawa ni katuba me yadra tiko. O koya gona mo dou yadra tiko, ni dou sega ni kila na gauna e na yaco mai kina na i taukei ni vale.”​​—⁠Marika 13:​33-​35, VV.

Na ivola tale ga oqo, Na Vale ni Vakatawa, sa sivia na 125 na yabaki na kena vakarogoya tiko yani na veivakadreti i Jisu meda “yadra tiko.” Ena sala cava? Me vaka e tukuni ena tabana e 2 ni ivola oqo, “E vakavotuya na parofisai vakaivolatabu nira vakayacori e vuravura. E vakacegui ira na tamata kece ena itukutuku vinaka ni Matanitu ni Kalou, na matanitu sa voleka ni vakarusai ira na dau veivakararawataki, ena vukica tale ga na vuravura me parataisi.” Sa veisoliyaki tiko e veiyasai i vuravura e sivia na 26,000,000 na kena ilavelave ena 150 na vosa, e levu duadua gona na kena veisoliyaki Na Vale ni Vakatawa, ni vakatauvatani kei na veivola vakalotu tale e so. Ena nodra vakayagataka na ivola oqo na iVakadinadina i Jiova, era vakataki ira ga na yadra ena gauna makawa, nira vakadreti ira na tamata kece mera “yadra tiko” vakayalo baleta ni sa vakarau mai vakatauca na nona lewa ina ituvaki kei vuravura oqo na Turaga, o Jisu Karisito.​​—⁠Marika 13:​26, 37.