E Yaga e Dua na Veisureti Mai Masitonia

“LAKO mai ki Masitonia, mo vukei keimami.” (Cakacaka 16:9) Oqo na nona vosa e dua na turaga ena raivotu ni yapositolo o Paula, e vakaraitaka tiko ga ni gadrevi me tukuni na itukutuku vinaka ni Matanitu ni Kalou ena dua na yalava vou, ena korolelevu era sa okati e Kirisi nikua.

Ena vanua o Masitonia nikua, e tiko kina e rauta ni le 1 na iVakadinadina i Jiova ena veiya1,840 na lewenivanua. Levu gona era sega vakadua ni se bau rogoca e dua na ka me baleta na Kalou, o Jiova. Io, e gadrevi dina mera rogoca na kai Masitonia na itukutuku ni sautu.​—Maciu 24:14.

A veivuke na Kalou me vakayacori na inaki oqori. Dua na siga ena Noveba 2003, a ciqoma e dua na qiri tawanamaki na valenivolavola ni iVakadinadina i Jiova mai Masitonia, e Skopje. Era a qiri mai na isoqosoqo na Macedonian Center for International Cooperation, ra qai sureti ira na iVakadinadina me dua nodra teveli ena soqo siga tolu ni ivakaraitaki iyaya, ena tekivu tiko ena 20 Noveba, e rawa nira lai vakamacalataka kina na nodra vakabauta. Sa dua dina na gauna veiganiti oya mera tarai kina e vica vata na udolu na tamata era se bera vakadua ni bau rogoca na itukutuku vinaka ni Matanitu ni Kalou!

Sega ni bera nodra vakavakarau na bolecakacaka mera vakarautaka na veivola ni iVakadinadina i Jiova era tabaki ena vosa vakamasitonia. E tuvai ena teveli e so na ivola oqori me rawa nira tautauri o ira na taleitaka, e dua tale ga na gauna vinaka oqori vei ira e levu mera vakayagataka wale na wai bulabula vakayalo.​—Vakatakila 22:17.

E levu na vulagi era taleitaka ga vakalevu na ivola e tara na nodra bula, me vaka na Questions Young People Ask​​—⁠Answers That Work kei Na Sala me Marau Kina na Vuvale.a E le 98 na tataleitaki era a vola tu mai na nodra itikotiko, ra qai kerea me talevi ira yani na iVakadinadina i Jiova. Levu sara era vakavinavinakataka na nodra cakacaka na iVakadinadina i Jiova kei na vinaka ni ivola era tabaka.

A gole yani ena teveli e dua na turaga, e qumia toka yani na liga i luvena tagane lailai. E taroga sara ke tiko na nodra ivola na gone. Era mani vakaraitaka vua na iVakadinadina na ivola iTalanoa Mai na iVolatabu.b E vakacega qai marau me kila se vica na kena isau. Sa qai marau ga vakalevu ni tukuni vua ni nodra cakacaka ni veivakavulici na iVakadinadina i Jiova e cicivaki ga ena cau. (Maciu 10:8) E vakaraitaka na ivola vei luvena tagane qai kaya: “Dua sara ga na ivola vinaka oqo! Au na wilika vei iko e yadua na italanoa e veisiga!”

A gole tale ga yani ena teveli e dua na parofesa ni philosophy. E dau taleitaka na vulica na lotu kece, ia vakabibi ga na nodra vakabauta na iVakadinadina i Jiova. Ni vakacega tiko na ivola Mankind’s Search for God,c e kaya sara: “Sa bau biu dina vakamatau na veika e volai tu ena ivola oqo! E tautauvata vinaka sara ga kei na noqu nanuma, ni dodonu ga me tuvai vaka oqo.” E muri, era lako tale ga yani e so na gonevuli mai na nona koronivuli, mera lai kerea ke rawa nira yadua na ilavelave ni ivola vata ga a taura na nodra parofesa. Era via vulica tale ga na ivola oya. Era nanuma ni na vakayagataka ena nodra lesoni.

E imatai gona ni gauna, vei ira e so, mera qai kila na ka dina vakaivolatabu nira raica ra qai wilika na veika e tuvai tu ena teveli. A dua na ilawalawa itabagone didivara era a mai vakararai voli. E mani vunau vakalekaleka vei ira e dua na iVakadinadina, qai vakadewataka ena vosa vagalu e dua na goneyalewa. A vakayagataka e so na iyaloyalo ena ivola Na Tamata Rogo Duadua a Bau Bula,d e vakamacalataka ni a vakabulai ira na tauvimate o Jisu, okati tale ga kina o ira na didivara. Era marau nira sa mai kila na vosa ni yalayala ni iVolatabu ni na cakava tale ga o Jisu na ka oqori vei ira na tamata era bula tiko e vuravura ena noda itabagauna. E levu era marau ni ciqoma e so na ivola vakaivolatabu, qai veivosakitaki me sikovi ira e dua na iVakadinadina e kila na vosa vagalu.

A sega wale ga ni vakarautaki na ivola ena vosa vakamasitonia, ia ena vosa tale ga vaka Albania, vakataki, kei na vosa vakavalagi. A taroga e dua na turaga e sega ni kila na vosa vakamasitonia ke tiko e so na ivola ena vosa vakavalagi. Ni sa taura oti e so na ilavelave ni Vale ni Vakatawa kei na Yadra!, sa qai kaya ni vosataka na vosa vakataki. Dua na ka na nona kurabui ni sa vakaraitaki vua na ivola ena nona vosa sara ga! E raica rawa ni o ira na iVakadinadina i Jiova era via vukei ira na tamata kece.

Sa bau dua dina na ivakadinadina levu oya, qai veivakauqeti nodra vakaraitaka e levu nira taleitaka na ka dina mai na iVolatabu! Io, o Jiova sara ga e dolava na sala me vakatetei kina na itukutuku vinaka ni Matanitu ni Kalou e Masitonia.

[iVakamacala e ra]

[Kato/iYaloyalo ena tabana e 9]

E DUA NA TOSO VAKASAKITI!

E dua na toso vakasakiti a yaco ena 17 Me, 2003, me vakatetei kina na itukutuku vinaka ni Matanitu ni Kalou. A vakatatabutaki e Skopje e dua na valenivolavola ni iVakadinadina i Jiova. A tara tiko ena loma ni rua na yabaki, qai vakalevutaki vakava mai na kena levu e liu.

E tolu na vale yadudua, qai tiko kina na tabana e liutaka na cakacaka, tabana ni ivakadewa, na bure, valenikuro, kei na valenisavasava. O Guy Pierce, e dua na lewe ni iLawalawa Dauvakatulewa ni iVakadinadina i Jiova, a solia na vunau ni vakatatabu. Era a tiko tale ga ena vakatatabu oqori na vulagi mai na tini na vanuatani. Dua na ka na levu ni nodra marau na tiko ena siga oya ena nodra raica na valenivolavola vou.

[Mape ena tabana e 8, 9]

(Raca tale na ivola)

BULGARIA

MASITONIA

Skopje

ALBANIA

KIRISI

[iYaloyalo ena tabana e 8]

O Skopje, mai Masitonia