Era Wasea na iTukutuku Vinaka Vei Ira na Didivara

“ERA kauta mai vei kemuni na veika vakayalo!” Oqori na ka e kaya na dairekita ni nodra itikotiko na sa qase ena koro o Navalcarnero, e Madrid, mai Sipeni, ena nona vakamacalataka tiko na nodra veisiko yani na iVakadinadina i Jiova. Na cava e uqeti koya me tukuna kina oqori?

Era didivara e so era tiko ena Rosas del Camino, oqo nodra itikotiko na sa qase. Ia e so na iVakadinadina era gumatua ni vulica na vosa vagalu vakasipeni, e rawa kina mera veivosaki kei ira na vakaitikotiko e ke. E vakacaucautaki ira na iVakadinadina na dairekita ena nodra solia nodra gauna mera vakavulici ena iVolatabu o ira na gadreva tu na veivuke vaka oqo. E raica o koya na kena cakayaco vei ira na lewe ni itikotiko oya na nodra vulica na itukutuku vinaka ni Matanitu ni Kalou. O ira tale ga era sega ni rai vinaka kei ira na dudu era vakaitikotiko e kea era taleitaka na nodra dau veisiko yani na iVakadinadina.

E vakaitikotiko kina e dua na turaga, o Eulogio, e mataboko qai didivara, ena gauna oqo e sa vuli iVolatabu tiko kei ira na iVakadinadina i Jiova. Ena dua na siga ni vakacagau tiko na vuli iVolatabu, a gole yani e dua na kena turaga me lai solia vua na iVakadinadina e vakayaco vuli tiko e dua na serekali, era bulia na vakaitikotiko e kea me ivakaraitaki ni nodra vakavinavinaka. E ulutaga ni serekali “Dua na iVakadinadina.” Oqo e dua na tago ni ka e kaya: “E vakainaki na nodra bula, era vakarautaki vinaka, e solia vei ira o Jiova na vuku e marautaki. Era sikova wasoma na veivale baleta nira nuitaki Jiova.”

Nodra nuitaki Jiova gona e levu na iVakadinadina e veiyasa i vuravura era vulica kina na vosa vagalu ni nodra vanua. Ena sala oqo era sa wasea tiko kina vei ira na vakaleqai tu vaka oqo na inuinui ena iVolatabu.